Bushe Kuti Twa-afwa Shani Abashasumina Abaupana na BaNte?
1 Ababomfi ba kwa Yehova abengi baupana na bantu abatemwa bamunyinefwe kabili abasenamina icilonganino lelo abashifwaya ukuba ababomfi ba kwa Lesa. Umwaume umo uwaupa nkashi atile: “Naletiina sana ukuya ku ng’anda ne ng’anda.” Bambi napamo balikwata imisango ishili ya mu malembo iyo bafwile ukuleka, nelyo batontonkanya ukuti te kuti bakumanishe ukucita ifya ku mupashi ifingi filya umwina myabo acita. Bushe kuti twabaafwa shani?
2 Mulebapoosako Amano: Ukupoosa amano kuli bambi no kumona ifilebasakamika kuti kwalenga bayankula ku cine ca mu Baibolo. (Fil. 2:4) Abo kale abashali abasumina nga bena myabo ilingi balanda pa fyo bambi balangile ukutemwa kuli bene. Umwaume tulandilepo pa kubala alondolola ukuti: “José, eluda mu cilonganino, alimpooseleko amano. Ndemona ukukoselesha alenkoselesha e kwalengele ukuti nsuke mpooseko amano ku kusambilila.” Umwaume na umbi uwaupa nkashi atila bamunyina abalemutandalila baleesha ukulanda pa fyo atemwa. Atila: “Natendeke ukumona icalici [lya mukashi wandi] mu nshila imbi. Abanankwe bali ba mano abalelanda amalyashi yalekanalekana.”—1 Kor. 9:20-23.
3 Baafweni: Abashasumina abaupana na baNte kuti batemwa nga twabaafwa mu cikuuku. (Amapi. 3:27; Gal. 6:10) Ilyo motoka iya mwaume ushasumina uwaupa nkashi yafwile, Nte wacaice alimwafwile. Atila: “Ici calimfikile pa mutima icine cine.” Munyina umbi aafwile umulume wa kwa nkashi akasuba konse ukupanga ulubao ukushingulusha ulubansa. Ilyo balebomba no kulanshanya, balundulwile bucibusa. Pa numa ya milungu ibili, uyu mwaume aebele munyinefwe ati: “Ni nshita ya kutampa ukwalula imikalile yandi. Bushe kuti mulensambilishako Baibolo?” Alundulwike lubilo lubilo kabili ino nshita ni Nte yabatishiwa.
4 Ilyo tuletwalilila ukufwayafwaya abayana mu ncende tushimikila, natutwalilile ukwafwa abaupa nelyo ukuupwa ku basumina banensu.—1 Tim. 2:1-4.