Yehova Alapaala Abantu Bakwe
1 “Moneni, inshiku shikesa, cisemo ca kwa Yehova, ilyo uulelima akapalama ku uleseepa, ilyo uulekande myangashi akapalama ku ulebyale mbuto.” (Amose 9:13) Taleni kutumaneni no kutontonkanya pali ici cishinka ca kuti abantu balobolola ifingi nga nshi ica kuti ilyo inshita ya kulima no kutanda ilefika ninshi ukulobolola takulapwa no kupwa. Ala ico cintu kuti cawama nga nshi!
2 Nangu line Yehova alishiba ifyo tukabila pa kuti tube abomi muli shino nshiku sha kulekelesha, Icebo cakwe citukoselesha ukufwaisha ubucingo bwine bwine no kucankilwa ipaalo lya ku mupashi ilyo twakwata. (Luka 12:29-31; 12:16-21; Rom. 12:12) Apo Yesu Kristu ni Mfumu Mesia, alipeelwa ifintu ifyo Lesa acindamika. (Esa. 43:4) Ilyo tulefikilisha umulimo wa kubila “mbila nsuma iyi ya bufumu,” “ifikwatwa fyakwe” na fyo filafulilako.—Mat. 24:14; Luka 12:42-44.
3 Ifyaba pa fikwatwa fya kwa Kristu ifya pe sonde ifya ku mupashi maofesi ya musambo, Amayanda ya Bufumu, e lyo ukubikako fye ne Cikuulwa ca Kulonganinamo Ukulongana Kukalamba mu Lusaka icakuulilwe nomba line. Ici cikuulwa cisuma, ica kupepelamo fye Yehova, cileafwilisha mu kulenga “abengi ukulungama.”—Dan. 12:3.
4 Ku kupwa kwa ba1990 Ibumba Litungulula lyasuminishe ukukuula icikuulwa ca kulonganinamo ukulongana kukalamba mu Lusaka. Kwali umulimo wa kufwaya icifulo cisuma icikalamba bwino bwino uko abantu abali no kulacibomfya bengangukililwa ukufika. Icifulo calinga calisangilwe ku kabanga ka Lusaka.
5 Bushe ici cikuulwa cali no kukuulwa shani? Ababomfi bafuma ku fyalo fimbi babili, abali ni baeluda abaishiba ifya makuule, balisalilwe ukwangalila umulimo. Kwali no mulimo wa kufwailisha utwampani twaishiba imilimo ya kukuula kabili kamo pali utu kalisalilwe ukushila no kukuula Icikuulwa ukulingana ne fyo Ibumba Litungulula lyalefwaya. Nomba apo fwe Nte sha kwa Yehova twalishiba ifyo twingakuula bwino bwino ifikuulwa fikalamba, nga cinshi twabomfeshe akampani? Icikalamba icalengele ca kuti ukubomfya akampani muli uyu mulimo kwatushiilileko inshita ya kubomba umulimo wacindamisha uwa kubila “imbila nsuma ya bufumu bwa kwa Lesa.”—Luka 4:43.
6 Mu April 2004 umulimo walitendeke. Icibumba caba mupepi na kilomita imo icalepa amamita yabili calikuulilwe ukushinguluka icifulo conse. Babomfeshe inshimbi ishingi nga nshi ku kupangilako icikuulwa cishakwata ifibuumba mu mbali icaba bamita 44 mu butali na 40 mu bufumo umo abantu nalimo 3,000 bengakumana no kwikala fye bwino pa fipuna. Kwaba ne mbali shitatu mu mbali ya ici cikuulwa uko balimba ulunkoto apalundumana apo abantu bambi bengekala kabili bonse pamo abengasangwako kuti bafika mupepi na 7,000 aba kuti bekeele fye bwino. Icisebele icasansuka, icishiba ca lubatisho ne fisoselo ifisuma nga nshi filalenga abasangilwe ku kulongana ukumona no kumfwa fyonse pa kulongana kukalamba. E lyo kabili kwaba na jenaleta iibomfya amafuta ya diselo, kanshi nangu amalaita yaya takwingaba ukutabataba.
7 Ifintu fimbi ifisuma ifyabapo, fimbusu ifingi nga nshi e lyo no kwa kusambila ku minwe. Icikuulwa icakuulwa bwino nga nshi umupita no mwela kabili umo babika na matailoshi cakwata ifimbuusu fya kukumpa ukucila pali 70. Pa geti paba akayanda umwa kwikala abalelonda, e lyo umusebo walibikwamo injelwa, kabili kwaba no kwa kubika bamotoka ne miputule isuma 4 umwa kwikala uwa kusakamana icifulo na bakangalila benda batatu.
8 Ukulongana pamo ku ‘kumfwe fyebo fya kwa Yehova’ lipaalo nga nshi. (Amala. 4:10) Mu fyalo umo ukulongana kwabindilwe, nomba kuti bapepa Lesa ukwabulo bwafya ne ci lipaalo nga nshi, pantu lishuko ilyo babapokele pa myaka iingi. (w75-E ibu. 547.) Mu Zambia, tatwakwata fye ubuntungwa bwa kupepa, lelo kwaba no buyantanshi mu kuwamya ififulo tupepelapo no kukuula ififulo fipya.
9 Nangu line ubwikashi bupya ubo Lesa akaleta bukapwisha ubupiina, ico twacindamika sana mapaalo ya ku mupashi ayaba ku ntanshi: e kuti icalo cipya umwaba uluse, icine, ubulungami, no mutende. Ilyo tulesekelela pa kukwata icikuulwa ca kulonganinamo ukulongana kukalamba, tulesubila ukupeelwa ifyuma fya ku mupashi pantu twalicetekela ukuti ‘Yehova akatupeela icisuma.’—Amalu. 85:10-13.
[Icikope pe bula 4]
Ukukuula ilinga
[Icikope pe bula 4]
Aba kuitemenwa abengi balibombako, bushe na imwe kuti mwabombako?