Uo Abaice na Bakalamba Bengapashanya

Noa aali ni cibusa musuma uwa kwa Lesa. Acitile ukufwaya kwa kwa Yehova ubumi bwakwe bonse. ‘Aleenda na Lesa’ kabili Lesa alimupaalile pa kucite co. Abaice na bakalamba kuti bamupashanya. (Ukute. 6:9) Vidio ya Noah—He Walked With God ikamwafwa ukwishiba bwino bwino ifyo Noa aleikala, ico apaalilwe na Yehova, ne fyo mwingacita pa kuti mumupashanye.

Vidio iya pa DVD iya Noah yena yalikwata na mepusho. Pa numa ya kutamba vidio, kuti mwaipusha ifi fipusho: (1) Finshi bamalaika bamo balufyenye, kabili bushe abaNefili bali ni bani? (Ukute. 6:1, 2, 4) (2) Cinshi calengele abantu ukubipa, kabili bushe Lesa aumfwile shani pali ci? (Ukute. 6:4-6) (3) Cinshi calekeenye Noa ku bantu bambi? (Ukute. 6:22) (4) Bushe ababifi baonawilwe shani? (Ukute. 6:17) (5) Bushe icibwato cali shani ubukulu? (Ukute. 6:15) (6) Finshi fimbi ifyo Noa acitile, kabili bushe abantu bayankwileko shani? (Mat. 24:38, 39; 2 Pet. 2:5) (7) Bushe imisango ya finama fyali mu cibwato yali inga inga? (Ukute. 7:2, 3, 8, 9) (8) Bushe imfula yalokele inshiku shinga, kabili bushe isonde lyaiswile amenshi mu nshiku shinga? (Ukute. 7:11, 12; 8:3, 4) (9) Cinshi calengele ukuti Noa na ba ng’anda yakwe bapusuke? (Ukute. 6:18, 22; 7:5) (10) Bushe icibwato caileikala pesa? (Ukute. 8:4) (11) Bushe Noa aishibe shani ukuti nomba kuti afuma mu cibwato? (Ukute. 8:6-12) (12) Cinshi Noa acitile ilyo afumine mu cibwato? (Ukute. 8:20-22) (13) Bushe umukolamfula wimininako cinshi? (Ukute. 9:8-16) (14) Bushe ‘ukwenda na Lesa’ e kutila shani? (Ukute. 6:9, 22; 7:5) (15) Cinshi tufwile ukulacita nga tulefwaya tukesemona Noa mu Paradaise? (Mat. 28:19, 20; 1 Pet. 2:21)

Bushe ilyashi lya busumino ilya kwa Noa uwa cumfwila lyamusambilisha cinshi pa fyo ‘mwingenda na Lesa’ no kucetekela Yehova ukuti akapususha abantu babako pali lelo?—Ukute. 7:1; Amapi. 10:16; Heb. 11:7; 2 Pet. 2:9.