“Nshilefwaya”
1 E fyo abantu abengi mu ncende shimo batweba nga tulefwaya ukubashimikila. Cinshi cikatwafwa ukukanafupuka nga ca kuti abantu mu cifulo tushimikila tabalefwaya ukumfwa ku bukombe bwesu? Kuti twacita shani pa kuti abantu belakana ukumfwa imbila nsuma?
2 Twalilileni Ukutemwa Umulimo: Icikatwafwa ukutwalilila ukutemwa umulimo kwibukisha umulandu abengi bashifwaila ukukutika. Abantu abasambilile ukuti ifintu fyonse pano calo fyayalwike fye, Lesa te wafibumbile nangu balya aba kuti ukufuma fye ku bwaice baishiba ukuti Lesa takwaba nalimo tabaishiba ukuti Baibolo yalicindama nga nshi. Bambi nalimo ico bashifwaila ukumfwa ku mashiwi ya kwa Lesa ni co balimona ubumbimunda ubwaseeka mu mipepele. Bambi nabo, nalimo ico bashifwaila ukukutika ca kuti tabaishiba icikapwisha amafya kabili tabakwata isubilo. (Efes. 2:12) Bambi ‘kukanaishiba’ ukuti impela ili mupepi pantu batontonkanya fye pa mafya bakwata.—Mat. 24:37-39.
3 Nangu ca kutila abantu bamo tabafwaya ukumfwa imbila nsuma, ifwe tukatwalilila ukutemwa umulimo, pantu twalishiba ukuti ukubombesha kwesu kulacindika Yehova. (1 Pet. 4:11) Na kabili, ilyo tulelanda pa cine, nangu fye ni ku bashifwaya ukumfwako, icitetekelo cesu cena cilakosa. Tule-esha na maka ukumona abantu mu cifulo tushimikila nga filya fine Yehova abamona. Alyumfwilile abantu bali mu Ninebe ubulanda ‘abashaishibe ukupaatululo kwa kulyo kwabo ku kwa kuso kwabo.’ (Yona 4:11) Abantu abekala mu cifulo tushimikila balekabila ukumfwa imbila nsuma! E ico, tatulingile ukufupuka lelo tulingile ukufwaya inshila shingalenga bafwaya ukukutika ku bukombe bwa mu Baibolo.
4 Landeni Ifyo Bengatemwa Ukumfwa: Mu mashiwi yenu aya kubalilapo nalimo kuti mwalanda ilyashi ilyo kuli iyo ncende bengatemwa ukulandapo kabili lekeni nabo balandepo. Kutikisheni ilyo balelanda, lyena balangeni ubukombe ubusuma ubwaba mu Baibolo. Ku ncende imo ilyo kwacitike cinkunka, Nte umo atandalile cila ng’anda no kubeba ukuti nao ali no bulanda nga nshi pa cacitike. Atile: “Apo pene fye abantu batendeke ukulanda pa cacitike. Nalandile na bantu abengi ilyashi ilisuma bulya bushiku pantu nabalangile ukuti nalibatemwa.”
5 Ubufumu bwa kwa Lesa e bukapwisha amafya yonse ayo abantu bapitamo. Esheni ukwishiba ubwafya ubusakamika abantu mwasanga pa ng’anda. Nalimo kuti bamusuminisha ukuti mubalondolwele ubukombe bupeela isubilo ubwa mu Baibolo. Nga tabalefwaya, nalimo kuti baisaumfwa inshita ‘imbi.’—Imil. 17:32.