Tulacankwa Ukubombesha mu Mulimo wa kwa Yehova!

¹ Umutumwa Paulo alitemenwe “ukubomfiwa icine cine” mu mulimo wa Bwina Kristu. (2 Kor. 12:15) Na muno nshiku, Abena Kristu abengi balabombesha mu mulimo wa bupainiya. Bambi nangu ca kuti balikwata imilimo iingi iya lupwa balatantika bwino inshita ya kubombako umulimo wa kubila imbila nsuma cila mulungu. Bamo nabo balalwalilila lelo balabombako umulimo wa Bufumu ukufika apapela amaka yabo. Ala mwandini tulakoseleshiwa ukumona abantu ba kwa Yehova balebombesha, te mulandu no mushinku nangu ifyo baba pali ino nshita!

² Ukutemwa Abantu Banensu: Ukubombela Yehova ukufika apapela amaka yesu, kulanga ukuti twalitemwa Lesa na bantu banensu, kabili kulalenga twaba na kampingu musuma. Paulo alebomba umulimo wa kubila imbila nsuma no mweo onse. E calengele alande ukutila: “Ndemwita ku kube nte buno bushiku ukuti ndi wa kaele ku mulopa wa bantu bonse.” (Imil. 20:24, 26; 1 Tes. 2:8) Tatwakabe no mulandu wa mulopa nga twabombako umulimo wa kubila ukufika apapela amaka yesu.—Esek. 3:18-21.

³ Ukubombesha mu kwafwa bantu bambi e cilenga tuleba ne nsansa. (Imil. 20:35) Munyina umo atile: “Akasuba nga kawa, ndabwelela ku ng’anda pa numa ya kubomba akasuba konse umulimo wa kwa Yehova, ukulanda fye icishinka, ndanaka. Lelo ndasansamuka, kabili ndetasha Yehova pantu alalenga naba ne nsansa isho umuntu nangu umo ashingampoka.”

⁴ Ukutemwa Lesa: Umulandu uukalamba nga nshi uulenga tulebombesha mu mulimo wa kwa Yehova ni co ulatemuna Shifwe wa mu muulu. Ukutemwa Lesa kulenga tuleumfwila amafunde yakwe, pali ayo mafunde paba no kushimikila no kupanga abasambi. (1 Yoh. 5:3) Nangu fye abantu balekaana ukukutika ku mbila nsuma, tulatwalilila ukuba ne nsansa mu kubombela Yehova.

⁵ Ino te nshita ya kubwelele numa. Tuleikala mu nshita ya kulobolola. (Mat. 9:37) Umulimi ilingi line abomba amaawala ayengi pa nshita ya kulobolola pantu akwata inshita inono iya kulonganika ifyo alelobolola ilyo tafilatampa konaika. Inshita ya kubomba umulimo wa kulobolola kwa ku mupashi nayo yalicepa. Shi ifwe bonse natutwalilile ukubombesha mu mulimo wa kubila imbila nsuma apo natwishiba ukuti inshita twikalamo naipipa.—Luka 13:24; 1 Kor. 7:29-31.