Bomfyeni Bwino Baibolo
1. Mulandu nshi Baibolo yacindamina sana?
1 Ukusambilisha bwino Icebo ca kwa Lesa nga filya fine caba muli Baibolo kuti kwatwafwa ukusambilisha icine bwino no kulenga abantu ukwishiba ifisambilisho fya bufi ne fishilano.—2 Tim. 2:15; 1 Pet. 3:15.
2. Cinshi cikatwafwa ukulasanga bwangu amalembo?
2 Ishibeni Bwino Baibolo: Pa kuti tubomfye bwino icibombelo icili conse, tulingile ukucishiba sana. Ukubelenga Baibolo yonse fye kuti kwalenga mwaishiba ifyo Baibolo ilandapo sana, kabili kuti mwalaibukisha amalembo no kulayasanga fye bwangu. Nga mwaishiba bwino Amalembo, mukaba abacenjela pa kulanda kabili tamwakaletwishika ilyo muleshimikila kuli bambi konse uko muli e lyo na lintu muli mu mulimo wa mwi bala.—1 Tes. 1:5.
3, 4. (a) Finshi tufwile ukulacita pa kuti twishibe bwino Baibolo? (b) Bushe mwalibomfyapo inshila shimbi pa kuti mwishibe bwino Amalembo?
3 Lyonse nga kwaba ukubelenga ilembo ilyo muli pa kulongana, mufwile ukukupukula Baibolo no kukonkamo ilyo balebelenga. Ilyo muleisambilisha mwe bene na lintu mulepekanishisha ukulongana, belengeni Amalembo yalimo kabili tontonkanyeni pa fyo yalefunda. Abengi balimona ukuti cisuma ukubelenga amalembo muli Baibolo pantu cilalenga baishiba ukusanga bwangu ayo malembo ilyo baleshimikila ukucila ukuyabelengela pa kompyuta nelyo pe pepala bapulintile.—Yoh. 14:26.
4 Indupwa shimo shalipekanya inshita ya kwibukisha amalembo ku mutwe fye. Pa kwibukisha amalembo nalimo babomfya utupepala apo balemba amashiwi ayaba mwi lembo e lyo ku numa ya kapepala eko balemba ilembo line. Bonse balabomfyako utu tupepala pa kuti bamone nga bengebukisha amashiwi ayaba pe lembo nelyo ukulanda apo yasangwa. Ukulapituluka mu fyebo fya kulanshanya na bantu ilyo tuleshimikila e lyo ne fya kwasuka abashilefwaya ukubashimikila nangu ifya kwasuka icipusho ukubomfya Baibolo kuti kwalenga twaishiba bwino Baibolo.
5. Mulandu nshi tulingile ukwishibila sana ifya kusambilisha abantu Baibolo?
5 Takwaba ibuuku nangu limo ilyacindama nga Baibolo. Mu Baibolo e mwaba fye ifyebo ifingalenga abantu ukuba na ‘mano ayengalenga baisapusuka.’ (2 Tim. 3:15) Apo abantu abengi mu fifulo tushimikila tabaishiba bwino ifyuma fyacindama ifisangwa muli Baibolo, kanshi tulingile ukwishiba sana ifya kusambilisha abantu ifyo Baibolo isambilisha.—Amapi. 2:1-5.