Fwayeni Abalefwaya Ukumfwa
1. Bushe tulanga shani ukuti tulatasha pa kukwata ishuko lya kubombako umulimo wa kushimikila?
1 Ilyo Yesu aleshimikila alebombesha ukweba abantu imbila nsuma iya cisansamushi. (Esa. 61:1, 2) Nge nkombe kabili abeminishi ba kwa Kristu, na ifwe muno nshiku twalikwata ishuko nga nshi ilya kumupashanya ilyo tulebombesha mu mulimo wa kufwaya bonse abalefwaya ukumfwa icine mu ncende tushimikila.—Mat. 10:11; 2 Kor. 5:20.
2. Bushe Paulo alealuka shani mu fyo aleshimikila, kabili finshi fyafuminemo?
2 Mulealula Ifyo Mushimikila: Umutumwa Paulo alitemenwe sana intanshi ukulaya mu masunagoge ku kushimikila ku baYuda na ku bantu abasangwike fye abaYuda. (Imil. 14:1) Ilyo Paulo aali mu Filipi, aile na Sila ku kufwaya abantu ku ncende uko ‘batile e kwali icifulo ca mapepo.’ Batampile ukushimikila ku banakashi abalongene, kabili umo pali balya uwatemenwe ifyo asambilile ali ni Lidia.—Imil. 16:12-15.
3. Ukusansha pa kushimikila ku ng’anda ne ng’anda ni kwi kumbi ukwingawama ukushimikila?
3 Ukusansha pa fyo mushimikila ku ng’anda ne ng’anda mu cifulo cenu ica kubombelamo, bushe kuti mwalashimikilako na palya pasangwa bamotoka abengi, na kulya abantu baya mu kwangala, apasangwa abalelolela ukwingila incito, mu misebo umupita sana abantu, mu mashitolo e lyo na pa maliketi? Kuti mwashimikila na ku bantu abekala mu mayanda ayaba mu kati ka malinga na ku bekala mu ncende umwayafya ukwingila nalimo kuti mwabalembela kalata nelyo ukubatumina foni. Nga ca kuti mulemona ifilecitika e lyo mulealula ifya kushimikila ukulingana ne fyo ifintu fili mu cifulo mushimikila, cikalenga ukuti mukabe ‘abacincila mu mulimo wa kwa Shikulu.’—1 Kor. 15:58.
4. Bushe finshi fimbi ifyo twingacita nga ca kuti tulefwaya ukulabombesha mu mulimo wa kushimikila?
4 Bakasabankanya abengi pa kuti balebombesha mu mulimo wa kushimikila balasalapo ukukuukila ku filonganino fimbi ifyaba mu calo cabo nelyo ku fyalo fimbi. Bambi na bo balisambilila ululimi lumbi pa kuti baleshimikila ku bantu abafuma ku fyalo fimbi.
5. Bushe tufwile ukulamona shani inshita tulimo, kabili cinshi ico tulingile ukucita?
5 Bonse fye tufwile ukwishiba ukuti ‘ibala bantu ba muli ici calo’. (Mat. 9:37; 13:38) Ilyo tulemona ukuti impela ya buno bwikashi bwabipa ili mupepi sana, ifwe umo umo tulingile ukutontonkanya pa mikalile yesu, ifyo twacenjelamo, na mashuko twakwata, e lyo ne fingalenga ukuti tulebombesha mu mulimo wa kushimikila. Yehova alitulaya ukuti akatupaala nga twatangisha ifya Bufumu kabili tulebombesha no mutima onse mu mulimo wa kushimikila.—Mat. 6:33.