Ukutendeka Umulungu wa January 6 Tukalasambilila Icitabo ca Palameni Kuli Yehova
1. Ukutendeka mu mulungu wa January 6, lishuko nshi tukakwata ilikalenga tukapalame sana kuli Yehova?
1 Yehova afwaya ukuti tupalame kuli ena. (Yako. 4:8) E ico mu mulungu wa January 6 pe Sambililo lya Baibolo Ilya pa Cilonganino, tukatendeka ukusambilila icitabo citila Palameni Kuli Yehova icikatwafwa ukupalama kuli ena. Pe bula lya kubalilapo balilondolola umulandu balembela ici citabo. Patila: “Ukutontonkanya pa fyo Yehova alangisha imibele yakwe yonse, ukumona ifyo Yesu Kristu alangishe iyo mibele bwino bwino, no kumfwikisha ifyo na ifwe twingaba ne yo mibele kuli no kutupalamika kuli Lesa.” Mu 2004 na 2005 twalisambilile ici citabo mu filonganino. Lelo kwena, kwaliba abantu nalimo 2 milioni abaisa mu cine ninshi twalisambilila kale ici citabo. Kanshi kuli bena, uyu ukaba e muku wa kubalilapo ukusambilila sana pa mibele ya kwa Yehova iishaiwamina. E lyo abasambililapo ici citabo kale nabo bakatemenwako imibele ya kwa Yehova.—Amalu. 119:14.
2. Tukalasambilila shani icitabo ca Palameni Kuli Yehova?
2 Ifyo Tukalasambilila: Katungulula akulabalilapo na mashiwi yanono aya kwiswila, napamo kuti alanda fye sentesi imo nelyo yabili. Muli ici citabo tamwaba amalembo ayo balemba ati belengeni, kanshi ilyo twakulasambilila katungulula akasalamo amalembo ayacindeme ukubelenga. Pa mpela ye sambililo uuletungulula kuti aipusha icipusho cimo nelyo fibili ifya kupitulukamo. Pa fyebo mulesambilila ubo bushiku nga pali na kabokoshi akatila “Amepusho ya Kutontonkanyapo,” ninshi mufwile ukubomfya aya mepusho pa kupitulukamo. Nga kwashala inshita, katungulula kuti amona nga nacilinga ukubelenga amalembo yamo ayashambwilwe ayali mu kabokoshi, lyena kuti aipusha amepusho pa kuti bakasabankanya balandepo pali ayo malembo.
3. Ilyo tukalasambilila ici citabo, cinshi tulingile ukucita kabili mulandu nshi?
3 Mukalenonkelamo Sana: Mulepekanishisha libela isambililo nangu ca kuti mwalisambilile kale ici citabo. Muleasukapo, pantu nga mulecita ifi ninshi mulelumbanya Yehova, kabili mukalaibukisha ne fyebo, e lyo na bambi bakalanonkelamo. (Amalu. 35:18; Heb. 10:24, 25) Ilyo muletontonkanya pa mibele ya kwa Yehova iishaiwamina, mukapalama sana kuli ena. (Amalu. 77:11-13) Nga mulecita ifi, mukalafwaisha ukulakonka amafunde yakwe no kulaebako bambi pali ena.—Amalu. 150:1-6.