ISAMBILILO 13

Mulelondolola Bwino Ifyo Abalekutika Bengabomfya Ifyebo

Amapinda 3:21

IFILI MULI ILI ISAMBILILO: Mulelondolwela bwino abalekutika pa kuti beshibe ifyo ifyebo mulelandapo fingabafwa, kabili mulebalanga ifyo bengabomfya ifyo basambilila.

IFYO MUFWILE UKUCITA:

Muletontonkanya pa bakulakutika. Muletontonkanya sana pa co abakulakutika balingile ukwishibila ifyebo mulefwaya ukubeba, kabili muletontonkanya pa fyebo ifingabafwa sana.
Ilyo mulelanda ilyashi, mulelanga abalekutika ifyo bafwile ukucita. Ilyo mwatendeka fye ukulanda, mufwile ukulenga bonse abalekutika bailuka ukuti, ‘Ifi fyebo kuti fyangafwa.’ Ilyo mulelondolola icishinka cikalamba cimo na cimo, balangeni ifyo bengacibomfya. Mulelungatika pa kulanda.

Ilyo mulelondolola ifyo abalekutika bengabomfya amashinte ya mafunde ya mu Baibolo, mufwile ukulanga ukuti namubatemwa kabili namwishiba ifyo bomfwa. Mwilalenga abalekutika batendeka ukumfwa ukuti bali no mulandu, lelo mulelenga batwalilila ukutemwa Yehova no kumutetekela, kabili mulecetekela ukuti bakatwalilila ukucita ifisuma no kulakonka ifyo mwabasambilisha.