ISAMBILILO 14

Mulekomaila pa Fishinka Ifikalamba

AbaHebere 8:1

IFILI MULI ILI ISAMBILILO: Mulelenga abalekutika balekonkamo bwino ilyo mulelanda ilyashi, kabili balangeni ifyo cila cishinka campene ne co mulelandila ilyashi ne fyo campene no mutwe we lyashi lyenu.

IFYO MUFWILE UKUCITA:

Mufwile ukwishiba ico mulelandila ilyashi. Nga ca kuti ilyashi lyenu lilelanda pa kulenga abantu beshibe fimo, bashininkishe ukuti fimo fya cine, nelyo nga lilebakoselesha ukucitapo cimo, mulingile ukulanda ukulingana ne fyo fine. Ifishinka ifikalamba ifili mu lyashi filingile ukulenga mwafishapo ico mulelandila ilyashi.

Muleyipusha amuti: ‘Mepusho nshi abakulakutika bengakwata nelyo finshi bashingasumina pali ili lyashi? Mepusho nshi bengabalilapo ukwipusha kabili ni yesa bengalekeleshako? Finshi bengabalilapo ukulanda pa fyo bashingasumina pali ili lyashi, kabili ni finshi bengalekeleshako?’ Lyena tantikeni ifishinka ukulingana ne fi pa kuti abakulakutika balekonkamo, baleumfwikisha, kabili basumine ifyebo fili mu lyashi.
Mulekomaila pa mutwe we lyashi. Ilyo mulelanda ilyashi mulebwekeshabwekeshapo amashiwi yamo ayali mu mutwe we lyashi nelyo kuti mulebomfya amashiwi ayapalana ubupilibulo na mashiwi yali mu mutwe we lyashi.
Mulelanda ifishinka ifikalamba mu nshila iyayanguka pa kuti fyaumfwika. Mulesala fye ifishinka fikalamba ifyampene no mutwe we lyashi ifyo mwingasambilisha bwino ukwabula ukupula mu nshita. Mwilafusha ifishinka fikalamba, mulelanda bwino cila cishinka, mulepemwina ilyo mushilatendeka ukulanda pa cishinka cimbi, kabili ifishinka ifikalamba fifwile fyaikatana bwino.

Nalimo kuti mwalanda ifishinka fikalamba pa ntendekelo ye lyashi pa kuti abalekutika balekonkamo bwino nelyo kuti mwafilanda pa mpela ye lyashi pa kuti abacilakutika balefibukisha.