ISAMBILILO 8

Ifilangililo Ifilenga Abantu Basambilila

Mateo 13:34, 35

IFILI MULI ILI ISAMBILILO: Pa kuti abo mulesambilisha baleumfwikisha, mulelanda ifilangililo ifyayanguka ukumfwa ifingalenga balafwaisha ukukutika kabili ifingalenga mwabasambilisha ifishinka ifikalamba.

IFYO MUFWILE UKUCITA:

Mulelanda ifilangililo ifyayanguka ukumfwa. Mulebomfya ifintu ifinono pa kulondolola ifintu ifikalamba, kabili mulebomfya ifintu ifyayanguka pa kulondolola ifintu ifyayafya. Ifi fine e fyo Yesu alecita. Tamufwile ukulanda pa fintu ifishilingile ifingalenga cakosela abantu ukumfwa icilangililo. Ifyo mulelanda mu cilangililo filingile fyalingana ne fyo mulesambilisha pa kuti abalekutika bepelenganishiwa.

Mulebika amano ku fintu. Mulemona ifyaba mu calo, mulebelenga impapulo shesu, kabili mulekutika ilyo abaishiba ukusambilisha balesambilisha. Ilyo mulecita ifi, mulemona ifilangililo ifingamwafwa ukusambilisha bwino. Sungeni ifyo filangililo pa kuti mukafibomfye ku ntanshi.
Muletontonkanya pa fyebo ifingafwa abalekutika. Mulesala ifilangililo ifilanda pa fyo abalekutika bacita ne fyo batemwa. Mulecenjela pa kuti ifilangililo fyenu tafilengele abalekutika baumfwa insoni nelyo bakalipa.
Sambilisheni icishinka icikalamba. Mulelanda ifilangililo pa kusambilisha ifishinka ifikalamba te pa kusambilisha ifishinka ifinono. Shininkisheni ukuti abalekutika bekalaibukisha fye icilangililo, lelo bakaleibukisha ne fyo basambilileko.