Bushe Ukupepa Lesa Kwalola Mwi?

Ishiwi lya kuti ukupepa lyalola mu kuti, “ukucita fimo pa kulanga ukuti twalicindika lesa kabili twalimutemwa.” Nga kukonka ululimi balembelemo Baibo, ishiwi bapilibula ukuti “ukupepa” mu Baibo, kuti lyalanda pa muntu uulecindikisha nelyo uulenakila ifibumbwa. (Mat. 28:9) Aya amashiwi kuti yalosha na ku fyo abantu bacitila Lesa nelyo kalesa. (Yoh. 4:23, 24) Ifyo balelandapo mwi lyashi e fingalenga mwaishiba umo amashiwi yalolele.

Ni Yehova fye, Kabumba kabili uwalinga ukuteka ku muulu na pano isonde e o tulingile fye ukulapepa. (Ukus. 4:10, 11) Tulapepa Yehova nga tulecindika imitekele yakwe ne shina lyakwe. (Amalu. 86:9; Mat. 6:9, 10) Imitekele ya kwa Lesa ne shina lyakwe balifilandapo sana mwi buuku lya kwa Esekiele. Mwi buuku lya kwa Esekiele fye mweka, amashiwi ya kuti “Shikulu Mulopwe Yehova” yabamo imiku 217, e lyo amashiwi ya kuti “mukeshiba ukuti nine Yehova,” na yaba nga aya, yabamo imiku 55.—Esek. 2:4; 6:7.

Kanshi ukupepa Lesa te kulaumfwa fye ukuti tulamupepa, lelo tulingile no kulacitapo fimo pa kumupepa. (Yako. 2:26) Nga twaipeela kuli Yehova, tulalapa ukuti twakulamumfwila pantu ni Kateka wesu kabili twakulacindika sana ishina lyakwe. Ibukisheni ukuti ilyo Yesu aleasuka Satana lintu amutunkile pa muku walenga butatu, alandile pa fyo ukupepa Lesa kwaikatana no ‘kumubombela.’ (Mat. 4:10) Apo tupepa Yehova, tulafwaisha ukulamubombela.a (Amala. 10:12) Tulabombela Lesa wesu nga tulebomba imilimo iyumfwana no kupepa kwesu kabili iikabila ukuipeelesha pa kuibomba. Milimo nshi iyo ine?

Tulabomba imilimo ya mushilo iyalekanalekana, kabili Yehova amona iyi milimo yonse ukuti yalicindama. Tulabomba imilimo ya mushilo ilyo tulebila imbila nsuma, ilyo tulelandako amalyashi no kwasukapo pa kulongana, na lintu tulekuula no kusakamana ifikuulwa fya kulonganinamo. Na kabili tulabomba umulimo wa mushilo nga ca kuti tulebapo lyonse pa mapepo ya lupwa, tulebombako umulimo wa kwafwilisha aba bwananyina abaponenwe na masanso, tulebombako umulimo wa kuitemenwa pa kulongana kwa citungu nelyo nga twabombelako pa Bethel. (Heb. 13:16; Yako. 1:27) Nga ca kuti lyonse tuletontonkanya pa kupepa ukwasanguluka, ‘tukalabombela Lesa akasuba no bushiku.’ Twalitemwa ifi tupepa Lesa wesu Yehova!—Ukus. 7:15.