ISAMBILILO 11

Mulecincimuka

Abena Roma 12:11

IFILI MULI ILI ISAMBILILO: Mulecincimuka pa kulanda pa kuti abalekutika balefwaisha ukucitapo cimo.

Mulelanda ukulingana ne fyo muleumfwa mu mutima. Ilyo mulepekanya ukuyalanda ilyashi, muletontonkanya sana pa co ilyashi lyenu licindamine. Ishibeni bwino ilyashi lyenu pa kuti mukalilande no mweo onse.
Muletontonkanya pa bakalakutika. Muletontonkanya sana pa fyo ifyebo mukabelenga nelyo ifyo mukasambilisha fikafwa abakalakutika. Muletontonkanya na pa fyo mukalanda ifyebo pa kuti abakalakutika bakafyumfwikishe.
Mulelanda no mweo onse. Mulecincimuka pa kulanda. Mwilabomfya amaboko na pashilingile, kabili ifyo mulecita pa menso fifwile ukulanga ifyo muleumfwa.

Mwilabomfya amaboko icibomfyebomfye ica kuti caba fye kwati cibelesho pantu kuti mwapumbula abalekutika. Mulebomfya amaboko apo calinga. Mufwile ukucincimuka maka maka ilyo mulesambilisha ifishinka ifikalamba na lintu mulefwaya abalekutika bacitepo cimo. Tamulingile ukuba fye abacincimuka ilyashi lyonse ica kuti na balekutika batendwa.