ISAMBILILO 10

Muleyalula Ishiwi

Amapinda 8:4, 7

IFILI MULI ILI ISAMBILILO: Mulelanda nelyo mulebelenga mu nshila iya kuti abantu bomfwe kabili batendeke ukumfwa ukulingana ne fyo mulelandapo nelyo ifyo mulebelengapo. Pa kuti mulande nelyo mubelenge muli iyi nshila, mulingile ukulayalula iciunda, ifyo ishiwi lileumfwika, no musenselo.

IFYO MUFWILE UKUCITA:

Muleyalula iciunda. Mulekushako ishiwi pa kuti abalekutika baleumfwikisha ifishinka ifikalamba na pa kuti mulebakoselesha ukucitapo fimo. Mulekusha ishiwi na lintu mulebelenga ubupingushi bwa mu Baibolo. Mulecefya ishiwi pa kuti abalekutika balefwaisha ukumfwa ifyo muli mu kulanda nelyo pa kuti bomfwikishe ilyo mulebelenga pa fya kutiinya nelyo pa fya bulanda.

Mwilaimya ishiwi na pashilingile pantu abalekutika kuti baumfwa kwati mulebakalipila. Mwilaumfwika kwati muli mu cangalo pantu abalekutika kuti babika sana amano kuli imwe.
Muleyalulako ishiwi. Nga caliba fye bwino mu lulimi lwenu, kuti mwasansulako ishiwi pa kuti mucincimuke nangu pa kuti mulangilile ubukulu bwa cintu nelyo intamfu. Mulebweshako ishiwi pa kulanda pa fya bulanda nelyo pa masakamika.
Muleyalula umusenselo. Muleyangufyanyako ukulanda pa kulanga ukuti namutemwa. Mulelanda panono panono ilyo mulelanda ifishinka ifikalamba.

Mwilayalula ishiwi icaluleyalule pantu kuti mwatulumusha abalekutika. Mwilayangufyanya sana pa kulanda ica kuti ifyo mulelanda tafileumfwika no kumfwika.