NGA MWABWELELAKO
ISAMBILILO 8
Ukutekanya
Ishinte lye funde: “Mu kutemwa mwaba ukushishimisha [ukutekanya].”—1 Kor. 13:4.
Ifyo Yesu Acitile
1. Tambeni VIDIO, nelyo belengeni Yohane 7:3-5 na 1 Abena Korinti 15:3, 4, 7. Lyena lanshanyeni amepusho yakonkapo:
Bushe bandume nankwe ba kwa Yesu bacitile shani ilyo abilile kuli bena imbila nsuma pa muku wa kubalilapo?
Finshi filanga ukuti Yesu alitwalilile ukwafwa ndume nankwe Yakobo?
Finshi Tulesambilila Kuli Yesu?
2. Tulingile ukutekanya pantu ifyo abantu bapokelela imbila nsuma filapusanapusana, bamo balomfwa bwangu bambi nabo palapita inshita.
Mulepashanya Yesu
3. Mulebomfyako inshila shimbi. Nga ca kuti umuntu talefwaya ukusambilila Baibo pa muku wa kubalilapo, tekwesha ukumupatikisha. Nga nacilinga kuti mwamulangako ifipande na mavidio ifingalenga aishiba ifyo isambililo lya Baibo liba ne fyo enganonkelamo.
4. Mwilalinganya abantu ku bantu bambi. Umuntu onse ali-ibela. Nga ca kuti lupwa nelyo umuntu mwalanshenye nankwe alewayawaya ukutendeka ukusambilila, nelyo ukusumina ifyo Baibo isambilisha, muletontonkanya pa fingalenga. Bushe kwaliba fimo ifyo asuminamo ifyacindama sana kuli ena? Bushe alatiina ba lupwa nelyo abena mupalamano bakwe? Kuti mwamupeelako inshita pa kuti umwine atontonkanye pa fyo mulanshanya, na pa kuti amone ubusuma bwaba mu fyo Baibo isambilisha.
5. Mulepepelako umuntu uulefwaya ukumfwa. Mulelomba Yehova ukuti alelenga mwaba ne subilo kabili muleba abacenjela. Mulepepa kuli Yehova ukuti alemwafwa ukwiluka nga ca kuti umuntu naleka ukutemwa ifyo alesambilila pa kuti muleishiba bwino inshita mwingaleka ukuyako.—1 Kor. 9:26.