Umukululo wa Fipusho

◼ Busuma nshi bwaba mu kulongana mu cilonganino icibombela mu ncende twikala?

Mu filonganino, e mo tukoseleshiwa no ‘kucincimusha ku kutemwa na ku kubombe milimo isuma.’ (Heb. 10:24, 25) Mu cilonganino e mo tusambilila icine kabili e mo batupangasha ukufishapo umulimo wesu uwa kupanga abasambi. (Mat. 28:19, 20) Tulakoshiwa no kushipikisha ifya kwesha mu busumino kabili twalikwata bakangalila ba kutemwa abatwafwa ifya kucita na mafya na masakamika yalefulilako. Kanshi, icilonganino calicindama pa kuti tuletwalilila abomi lwa ku mupashi. Lelo, bushe mwaliba ubusuma mu kulongana ku cilonganino icibombela mu ncende twikala?

Imibele ya bantu umo umo yalipusanapusana, kabili ifintu pamo nge ncito ya ku mubili, umwina myenu uushatetekela, ne myendele na fyo kuti fyapendelwako pa kupingula icilonganino ca kulonganako. Lelo kwaba ubusuma lwa ku mupashi no busuma bumbi, ilyo umo alelongana mu cilonganino cibombela mu ncende ekala. Baeluda kuti cabangukila ukufika kuli bakasabankanya bonse bwangu bwangu nga kwaba ubusanso. Imikululo ya Fipusho iya ku numa yalilandapo ubusuma na bumbi ubwingi.—May 1991 na July 1976.

Ilingi line, cilanguka ukusangwa ku kulongana lwa mupepi, cilalenga twabangilila pa kuti tulandeko na bambi, ukubomba ifilekabilwa, no kusangwa ku lwimbo lwa kwiswila ne pepo. Nga ca kuti abalesekelela bekala mu bwina mupalamano, ilingi line cilanguka ukubamonako, ukutungulula isambililo lya Baibolo na bene, no kubalangilila ukwingabawamina ukulongana.

Tulecetekela ukuti imitwe ya ndupwa ili no kutontonkanya pali uyu mulandu no kupepelapo, ukutontonkanya bwino bwino fyonse ifibimbilwemo pa kulingulula icingawamina sana ulupwa lwabo lwa ku mupashi na lwa ku mubili.—1 Tim. 5:8.