Balefwala Amayuniformu Apaleba Icishibilo ca Purple Triangle
Ba Maud bekala ku France kabili babomba incito ya kusakamana abana be sukulu abalemana ilyo balesambilila. Bushiku bumo abana be sukulu balesambilila pa fyo abaNazi baleipaya abaYuda, (ifyo baleita ukuti Holocaust) e lyo na pa fyalecitika mu nkambi sha baNazi. Abafungwa balefwala yuniformu apaleba ako balebililapo. Ako balebilila pali yuniformu e kalelenga abantu baishiba umulandu umufungwa bamukakiile mu cifungo.
Abafungwa bamo balefwala yuniformu apaleba icishibilo ca Purple Triangle. Ilyo kafundisha alefunda abana be sukulu pali iyi yuniformu, abebele ukuti: “Ndemona kwati abafungwa abalefwala iyi yuniformu apali icishibilo ca Purple Triangle, nalimo balelaala na baume banabo e lyo na banakashi nabo ifyo fine.” Ilyo kafundisha apwishishe ukusambilisha abana, ba Maud baile kuli uyu kafundisha no kuyamulondolwela ukuti ilya yuniformu iyalekwata Purple Triangle e yo balepeela ba Nte abo bakakile.a Ba Maud balilaile kafundisha ukuti bali no kumuletela ifyebo na fimbi ifilanda pali ili lyashi. Kafundisha alisumine kabili aebele ba Maud ukutila bakasambilisheko abana be sukulu ili lyashi.
Kafundisha umbi na o alesambilisha abana pali ili line lyashi. Ena alikwete charti iyalelangilila uto balebilila pa mayuniformu ya bafungwa kabili pali iyi charti pena palelangilila ukuti ka Purple Triangle e ko baleishibilako Inte sha kwa Yehova. Ilyo uyu kafundisha apwile ukusambilisha abana, ba Maud balimulangile ifyebo na fimbi pali ili lyashi kabili na o alibasuminishe ukuti bakasambilishe abana be sukulu.
Ba Maud ninshi nabekata impapulo babomfeshe pa kusambilisha abana be sukulu
Ba Maud bapekenye ukuti balalanda na bana be sukulu aba kubalilapo pa mamineti fye 15 lelo ilyo inshita yafikile, kafundisha abebele ukutila: “Kuti mwalanda nabo pe awala limo.” Ba Maud batendekelepo ukutambisha abana be sukulu vidio iyalelanda pa fyo abaNazi balecusha Inte sha kwa Yehova. Ilyo baletamba, muli vidio balandile ukutila abaNazi balisendele abana 800 abali Inte sha kwa Yehova. Ba Maud baliminike vidio kabili balibelengele ifyo abana batatu pabo basendele balandile. Pa numa ya kutambisha vidio, ba Maud balibelengeele abana be sukulu kalata iya mu 1940 iyo Gerhard Steinacher umwina Austria uwali ne myaka 19 kabili Inte ya kwa Yehova, alembeele abafyashi bakwe ilyo bashilamwipaya ku baNazi.b
Ba Maud balilangile abana be sukulu abakonkelepo ifyebo fimo fine. Filya ba Maud bali abashipa fyalilenga aba bakafundisha babili ukulalumbula Inte sha kwa Yehova lyonse ilyo balelanda pabo bakakile mu nkambi sha baNazi.
a Ilyo kwali Inkondo ya Calo iya Bubili, Inte sha kwa Yehova mu Germany abaishibikwe no kuti Bibelforscher (nelyo Abasambi ba Baibolo), balebakaka pantu balekaana ukutungilila ubuteko bwa baNazi.
b Gerhard Steinacher balimupingwilile ukufwa pa mulandu wa kuti alikene ukuba mwi bumba lya bashilika abena Germany. Muli kalata alembele atile: “Ndi fye umwana umunono, kuti nashipa fye nga Shikulu ampela amaka, kabili ici e co ndemulomba.” Ubushiku bwakonkelepo Gerhard balimwipeye. Icipampa ico babikile pa manda yakwe balembelepo ukutila: “Bamwipaile pa mulandu wa kucindika Lesa.”