Ifyo Wingacita nga ca Kuti Ifintu Fyayaluka

UBWAFYA UBUBAPO

• Incito bawiso babomba yalenga mukuukile kumbi.

• Cibusa obe alekuukila ku cifulo ca kutali.

• Umukalamba obe alefuma pa ng’anda pantu ali mu kuupwa.

Finshi wingacita pa kuti wilaumfwa sana ububi nga ca kuti ifintu fyayaluka?

Icimuti icongama nga ca kuti icimwela cikalamba cilepuupa, tacishuulika nangu icimwela cipuupe shani. Na iwe nga ca kuti ifintu fyayaluka ica kuti te kuti ucitepo icili conse, ufwile ukuba nga filya ifimuti ifyongama nga kwaba umwela. Ilyo tatulalanda pa fyo wingacita nga ca kuti ifintu fimo fyayaluka, natulande pali fimo ifyo ufwile ukwishiba nga ca kuti ifintu fyayaluka.

IFYO ULINGILE UKWISHIBA

Nangu ucite shani ifintu fikalayaluka. Baibolo yalilanda pa ficitikila abantu ukuti: “Inshita ya fintu fyabula ukwenekela ifikila fye umuntu uuli onse.” (Lukala Milandu 9:11) Ifi Baibolo yalandapo na iwe wine kuti fyakucitikila inshita iili yonse. Na lyo line, te lyonse ificitika ukwabula ukwenekela fibipa. Limo ifintu nga e lyo fyayaluka cimoneka kwati nacibipa, lelo filawama mu kuya kwa nshita. Na lyo line, abantu abengi tabafwaya ukuti ifintu fileyaluka, ne ci cilenga baleumfwa ububi nga ca kuti ifintu fyayaluka.

Abacaice e bomfwa sana ububi nga ca kuti ifintu fyayaluka. Mulandu nshi bomfwila ububi? Alexa atile: “Pantu ilyo tulekula umubili ulaya uleyaluka. Kanshi nga kwaba na fimbi ifyayaluka, kulaba ukumfwilako ububi.”

Umulandu na umbi uo abacaice bomfwila ububi nga ca kuti ifintu fyayaluka wa kuti bena ifintu ifingi tafyabacitikilapo pantu e lyo balekula. Lelo abakalamba baleshiba ifya kucita pantu balebukisha ifyo bacitile ilyo ifya musango uyo fyabacitikiilepo.

Ufwile ukwishiba ifya kucita. Pa kuti ushipikishe ilyo ifintu fyayaluka ulungile ukuba uwakosa. Umuntu uwakosa alashipikisha nga ca kuti ifintu fyayaluka kabili alamona ne fyo engacita pa kuti elaumfwa sana ububi. Abacaice abeshiba ifya kucita ilyo ifintu fyayaluka, ilingi line tabatendeka ukubomfya imiti bubi bubi nelyo ukunwa sana ubwalwa nga ca kuti bakwata amafya.

IFYO WINGACITA

Ulingile ukusumina nga ca kuti ifintu fyayaluka. Tatuletwishika ukuti ulafwaya ukuti ifintu fileba fye ifyo ulefwaya ukuti fibe, lelo ifi te kuti ficitike. Abanobe kuti bakuuka, baupa nelyo ukuupwa, bamunonko bakakula no kufuma pa ng’anda kabili kuti mwakuukila kumbi ica kuti washa ne fibusa ne fintu fimbi ifyo waishiba. Kanshi mu nshita ya kuti ulesakamikwa sana, ufwile ukusumina ukuti ifintu nafyaluka.—Ilembo ilingakwafwa: Lukala Milandu 7:10.

Wilabika amano ku fyapita. Nga ca kuti ulebika sana amano ku fyapita kuti waba kwati ni namutekenya uuleenshya motoka lelo ekalilefye ukulalolesha mu cilola icilelanga ifili ku numa. Limo cilaba fye bwino ukuloleshako panono ku numa, lelo ufwile ukubika sana amano ku ntanshi. Ifi fine e fyo ulingile ukucita nga ca kuti ifintu fyayaluka. Ulebika sana amano ku fya ku ntanshi. (Amapinda 4:25) Ku ca kumwenako, finshi ulefwaya ukucita mu mweshi ukonkelepo nelyo mu myeshi 6 iileisa?

Ulebika sana amano ku fisuma. Laura atile: “Ifyo umuntu atontonkanya pa fyalwike kuti fyalenga ashipikisha nelyo iyo. Ulingile ukulabika amano ku ifisuma ificitike nga ca kuti ifintu fyayaluka.” Bushe kuti walembako icintu icisuma pa fyalwike?—Ilembo ilingakwafwa: Lukala Milandu 6:9.

Victoria alandile pa fyo cali lintu aali umwaice ilyo abo aleyangala nabo bonse bakukiile kumbi. Atile: “Naletalalilwa sana kabili nalefuluka ifyo ifintu fyali kale. Nomba imona kwati ifyacitike fyalingafwile ukukulilako. Naishileishiba ukuti pa kuti umuntu akuule, ifintu filingile ukulayaluka kabili natendeke no kumona ukutila kuti nakwata abanandi na bambi.”—Ilembo ilingakwafwa: Amapinda 27:10.

Uleyafwako bambi. Baibolo itila: ‘Mwilabika fye amano ku fyo mulefwaya fye mwe bene, lelo mulebika amano na ku fyo bambi bafwaya.’ (Abena Filipi 2:4) Ukwafwako bambi kuti kwakwafwa ilyo ifintu fyayaluka. Anna uuli ne myaka 17 atile: “Ilyo nalekula, naishileishiba ukuti nga nayafwako abakwete amafya nga yalya na ine nkwete nelyo ayacililepo, nalesansamuka.”