Abacaice Bepusha Ukuti

Kuti nacita shani pa kuti indelanda ifyalondoloka mu mapepo?

“Ifya kucita na banobe na balupwa bobe nga nafifula sana, nangu nga naukwata imilimo iingi iya ku sukulu, nelyo iya ku ncito, kuti walaba na kuli Lesa, uwacindamisha pali bonse.”—E fyalandile Faviola, uuli ne myaka 15, uwa ku United States.

“MULEPEPA ukwabula ukuleka.” (1 Abena Tesalonika 5:17) “Beni no mute wa kupepa.” (Abena Roma 12:12) “Lekeni ifyo mulelomba fishibikwe kuli Lesa.” (Abena Filipi 4:6) Nga uli Mwina Kristu, ufwile walishiba aya malembo bwino. Ufwile walishiba no kuti takwaba inshila imbi iya kumfwaninamo iyacila pe pepo. Pantu na kuba bala tontonkanya, kuti mwalanda na Lesa Wa Maka Yonse mwi pepo inshita fye iili yonse akasuba nangu ubushiku! Kabili Baibolo yalanda ukuti: “Alatumfwa.”a—1 Yohane 5:14.

Nomba nangu walishiba ifi, nalimo cilakwafya ukupepa, nga filya cafya ulya mukashana tulandilepo pa ntendekelo. Nga ca kuti ulafilwa ukupepa, ninshi walikwata ubwafya ubwaba kwati ciibi ico bakomene. Bushe nga e bwafya wakwata, kuti wabupwisha shani? Cino cipande calakwafwa (1) ukwishiba ubwafya wakwata, (2) ifyo ulefwaya ukuti amapepo yobe yaleba, e lyo na (3) ifyo wingapwisha ubwafya, nga filya wingakomonona iciibi, pa kuti ucite ifyo ulefwaya ukucita.

Intanshi, natumone ifyo wingeshiba ubwafya ukwete. Cinshi icikwafya sana kwi pepo? Lemba icasuko pe samba.

․․․․․

Icakonkapo ulingile ukwishiba ifyo ulefwaya ukucita pali ubo bwafya. Pe samba, conga pali cimo ico wingafwaya ukucita, nangu kuti walemba fye pa musela umbi apalembelwe ukuti “Amafya yambi.”

□ Ndefwaya indepepa imiku iingi.

□ Nshilefwaya ukulalanda fye fimo fine pa kupepa.

□ Ndefwaya ukulalanda ifili mu mutima pa kupepa.

□ Amafya yambi ․․․․․

Ifyo Wingapwisha Ubwafya nga Filya Wingakomonona Iciibi

Ipepo lyaba nge ciibi ico wingesula fye inshita iili yonse. Lelo abaice abengi kuti batila tabesula ciibi imiku iingi sana nangu limbi kuti batila tabacisula conse. Nga ca kuti na iwe ubu e bwafya wakwata, winenuka! Pantu nawishiba kale ubwafya, e lyo kabili nawishiba ne fyo ulefwaya ukucita. Nomba ico ulingile fye ukucita kufwaya amakii ya kukomonwenako iciibi. Tontonkanya pa bwafya wingakwata, e lyo ne fyo wingapwisha ubo ubwafya.

◼ Ubwafya: UMULEKELESHA. “Limo limo pa mulandu wa milimo ukufula, ndalabako ukupepa.”—E fyalandile Preeti, uuli ne myaka 20, uwa ku Britain.

Ifya Kupwisha Ubwafya: “Cenjeleni, mwilaenda kwati bawelewele lelo mule-enda nga ba mano, mulebomfya bwino inshita yonse iyo mwashukila, pantu ishi nshiku sha bubifi.”—Abena Efese 5:15, 16.

Ifyo Wingacita ni Fi: Salila libela inshita isuma iyo wingalapepa cila bushiku. Nalimo no kulemba kuti walemba inshita wakulapepelapo pa kuti taulelaba. Yoshiko, uwikala ku Japan, uuli ne myaka 18, alandile ukuti: “Nga nshisaliile limo inshita ya kupepa, ndalabikilwako pa mulandu wa ncito ukufula.”

◼ Ubwafya: IFYA KUPUMFYANYA. “Ntontonkanya pa fintu fimbi mu nshita ya kuti mbike amano ku fyo ndelanda mwi pepo.”—E fyalandile Pamela, uuli ne myaka 17, uwa ku Mexico.

Ifya Kupwisha Ubwafya: “Umuntu alanda ifyaisula mu mutima wakwe.”—Mateo 12:34.

Ifyo Wingacita ni Fi: Nga ca kuti pa kupepa, ulatampa ukulatontonkanya pa fintu fimbi, ubale uleipifya amapepo. Cimbi ico wingacita, kulapepela pa fintu ifyo wacindamika sana. Marina, uwikala ku Russia, uuli ne myaka 14, alondolwele ukuti: “Ilyo nali mupepi no kukumanya imyaka 13, natampile ukulatontonkanya sana pe pepo ukuti e nshila tumfwaninamo na Lesa. Ukutontonkanya pe pepo muli iyi nshila kwalelenga ukuti indelanda fyonse ifili mu mutima.”

◼ Ubwafya: UKUBWEKESHAPO FIMO FINE. “Nga ndepepa, mbwekeshapo fye fimo fine.”—E fyalandile Dupe, uuli ne myaka 17, uwa ku Benin.

Ifya Kupwisha Ubwafya: “Nkatontonkanyapo sana pa milimo yenu yonse, kabili nkabika amano ku mibombele yenu.”—Amalumbo 77:12.

Ifyo Wingacita ni Fi: Nga walamona kwati ifyo ulanda pa kupepa tafilolamo sana, kuti ulelemba cila bushiku icisuma cimo pa fyo Yehova aakucitila. Mutashe pali ico cintu. Kuti watwalilila fye ukulalemba cila bushiku umulungu fye onse, ilyo umulungu ulepwa ninshi walipepa kuli Lesa pa fintu 7 ifyalekanalekana ukwabula ukuti ulebwekeshapo fimo fine. Ifi fine e fyo ulecita na ku fintu ifyo ucita cila bushiku. Bruno, uwa ku Brazil, uuli ne myaka 21, alondolwele ukuti: “Nga ndepepa, inanda sana pa fintu ifyacicitika pali ubo bushiku.” Samantha, uuli ne myaka 18, uwa ku United States, na o ifi fine e fyo acita. Atile: “Ndesha ukwibukisha fyonse ifyacicitika lelo line ifishabala aficitikapo inshiku shimbi, kabili ifi fine e fyo nanda mwi pepo. Ukucite ifi kwalingafwa ukuti nindalanda ifintu fimo fine.”

◼ Ubwafya: UKUTWISHIKA. “Inshita imo nalipepele pa bwafya nalekwata ku sukulu, lelo tabwapwile. Na kuba, e lyo amafya yafulileko. E ico natampile ukutontonkanya nati, ‘Nga mulandu nshi ningalapepela na kabili? Pantu nangu napepa shani Yehova taleumfwa!’”—E fyalandile Minori, uuli ne myaka 15, uwa ku Japan.

Ifya Kupwisha Ubwafya: “Ilyo ubo bwesho bwaisa [Yehova Lesa] akafwaya na pa kuti mufuminemo pa kuti mube na maka ya kubushipikisha.”—1 Abena Korinti 10:13.

Ifyo Wingacita ni Fi: Ico ufwile ukwishiba ca kuti: Yehova ‘alomfwa ipepo.’ (Amalumbo 65:2) E ico pa numa ya kupepa pa bwafya ubo ukwete, esha ukupitulukamo sana mu bwafya. Ukucila ukulalolela fye icasuko ico ule-enekela, tontonkanya na pali fimbi ifyo Lesa akucitila pali ubo bwafya. Apo fye ucili uletwalilila ukupepa, ninshi Yehova alyasuka kale ipepo lyobe nangu ca kuti tapwisha ubwafya ubo walepepela ukuti bupwe, pantu alikupeela amaka ya kushipikisha.—Abena Filipi 4:13.

◼ Ubwafya: INSONI. “Nga natontonkanya pa fyo abana be sukulu banandi bengalanda nga bamona ndepepa ilyo nshilatampa ukulya ica kulya ca kasuba, ndomfwa insoni sha kupepa.”—E fyalandile Hikaru, uuli ne myaka 17, uwa ku Japan.

Ifya Kupwisha Ubwafya: “Kwaliba . . . inshita isuma iya kucita icintu conse ico tulefwaya ukucita.”—Lukala Milandu 3:1, ukulingana na Baibolo ya Beck.

Ifyo Wingacita ni Fi: Kwena abantu nga bakumona ulepepa kuti bamona ukuti ico ulecita cisuma, lelo taulingile ukupepa mu musango wa kuti na bambi baishiba ukuti ulepepa. Umuntu umo uwapepele muli iyi nshila, ni Nehemia ilyo aali pa ntanshi ya Mfumu Artakishashete, cimoneka kwati ipepo apepele lya mu mutima, kabili kwati ne imfumu tayaishibe ukuti Nehemia alepepa. (Nehemia 2:1-5) Kanshi na iwe kuti wapepela fye mu mutima kuli Yehova ukwabula no kuti abantu beshibe ukuti ulepepa.—Abena Filipi 4:5.

◼ Ubwafya: UKUISUULA. “Yehova alishiba kale amafya nakwata. E lyo kabili nga ca kuti nintendwa pa mafya nkwete, ninshi na o wine natendwa! Limo limo imona kwati nshalinga no kulanda nankwe.”—E fyalandile Elizabeth, uuli ne myaka 20, uwa ku Ireland.

Ifya Kupwisha Ubwafya: “Mulepoosa amasakamika yenu yonse pali [Lesa], pantu asakamana imwe.”—1 Petro 5:7.

Ifyo Wingacita ni Fi: Ukabelenge amalembo yakonkapo, no kufwaya ifyo impapulo shalandapo e lyo ukatontonkanyepo: Luka 12:6, 7; Yohane 6:44; AbaHebere 4:16; 6:10; 2 Petro 3:9. Ifi fikomo fili no kukwafwa ukwiluka ukuti Yehova alafwaya ukuumfwa uko ulelanda nankwe e lyo kabili tamona ukuti ulingile ukuba umuntu uwakosa sana mu kupepa pa kuti engakukutika. Kemba wa malumbo Davidi, uwalekwata amasakamika, alondolwele ukuti, “Yehova ali mupepi ku baba ne mitima ya bulanda; kabili apususha abasakamikwa imitima.”b—Amalumbo 34:18.

Apo fye Yehova umwine alakutika ku mapepo yobe, ninshi alikusakamana. Niko, umukashana uwa ku Italy uuli ne myaka 17 atile: “Yehova taeba bamalaika ukuti e bo balekutika ku mapepo yesu. Kanshi apo e ukutika ku mapepo yesu fye yonse umwine, ninshi aliyacindamika.”

[Amafutunoti]

IFYA KUTONTONKANYAPO

◼ Fintu nshi ifyacindama kuli Yehova ifyo wingalanda mwi pepo?

◼ Ilyo ulepepa kuli Yehova, fintu nshi ifyo wingapepelako abantu bambi?

[Akabokoshi ne Fikope pe bula 20]

IFYO ABAICE BANOBE BALANDA

“Ipepo lyaba kwati fyebo fya nkaama ifyo ulemba mu kabuuku, ifya kwishiba fye iwe na Yehova.”—E fyalandile Olayinka, uwa ku Nigeria.

“Tutile walikwata cibusa uo watemwana nankwe sana kabili walimupeela ne fya bupe ifingi. Lyena, bushiku bumo, uyo cibusa obe aleka ukukusosha. Ifyo wingomfwa e fyo na Yehova engomfwa nga twaleka ukulapepa kuli ena.”—E fyalandile Chinta, uwa ku Australia.

“Lyonse naletontonkanya ukuti ningile ukufisa ifili mu mutima. Nomba apo naishibila ukutila Lesa alafwaya ukuti tulepepa kuli ena, nalishiba ukuti kanshi kwaliba no kusansamuka, ukufulwa, no kupelenganishiwa e lyo no kweba Yehova fyonse ifyo ndeumfwa mu mutima. Nomba nalishiba ifya kucita pa fyo ng’umfwa.”—E fyalandile Amber, uwa ku United States.

[Icikope pe bula 19]

Nga ca kuti uli no bwafya bwa kupepa nga filya wingakwata ubwafya iciibi nga nacikomwa, kuti wabomfya Icebo ca kwa Lesa, Baibolo, nga makii ya kwiswilako