Abacaice Bepusha Ukuti
Kuti Nacita Shani pa Kuti Ndeipakisha Ukubelenga Baibolo?
Miku inga ubelenga Baibolo? (Conga)
□ Cila bushiku
□ Cila mulungu
□ Fimbi ․․․․․
Pwishishisha aya mashiwi.
Nga ca kuti nshi-ipakisha ukubelenga Baibolo, ninshi ilingi line icilenga mulandu wa kuti . . . (Conga icasuko)
□ Nshitemwa ifyo ndebelenga
□ Nshumfwa ifyo ndebelenga
□ Kulaba ifimpumfyanya
□ Fimbi ․․․․․
BUSHE tawatemwa ukubelenga Baibolo? Nga ca kutila tawatemwa ukubelenga Baibolo, ufwile kuti wasuminishako ifyalandile Will uuli ne myaka 18, atile, “Nshi-ipakisha ukubelenga Baibolo.” Nomba, uyu wine mulumendo asosele no kuti, “Ilingi line icilenga ukukanaipakisha ukubelenga Baibolo ca kuti tatwishiba bwino bwino ifya kuibelenga.”
Mulandu nshi ulingile ukwishiba ifya kubelenga Baibolo? Bushe kuti watemwa ukwishiba na fimbi pali ifi?
◼ Ifyo wingacita pa kuti ulepingula bwino pa fintu
◼ Ifyo wingacita pa kupanga ifibusa ifisuma
◼ Ifingakwafwa pa kuti tauleba sana no bulanda ilyo ifintu fyakubipila
Baibolo ilapanda amano pali ifi fintu e lyo na pa fintu fye fimbi. Nomba, pa kusanga aya mano kano wabombesha. Lelo ukufwaya amano yaba mu Baibolo kwaba ngo kufwaya ifyuma fyashikama: Te mulimo wayanguka, lelo nga twasanga aya mano, tulatemwa nga nshi!—Amapinda 2:1-6.
Bushe kuti wacita shani pa kusanga ifyuma nelyo amano ayaba mu Baibolo? Akabokoshi kali ku kulyo, kuti kakwafwa ukwishiba ifya kubelenga Baibolo e lyo akabokoshi kambi akali ku kuso kuti kakwafwa ukwishiba ifyo wingatantika ukubelenga Baibolo. Na kabili, esha ukukonka ifyo wingatemwa pa fyebo fili pa mabula yakonkapo.
Amalyashi na yambi aya kuti “Abacaice Bepusha Ukuti” kuti wayasanga pa Intaneti pali iyi adresi www.watchtower.org/ype
Nga ca kuti intaneti e ko yaba uko wikala, kuti wabelenga Baibolo pa intaneti pa www.watchtower.org
IFYA KUTONTONKANYAPO
Abantu batila icingakwafwa ukusanga ico ulefwaya kubombesha.
◼ Bushe aya mashiwi kuti yakwafwa shani ilyo ulebelenga Baibolo?
◼ Ni nshita nshi wingatantika ukulabelenga Baibolo?
[Akabokoshi ne Cikope pe bula 23]
IFYA KUBELENGA BAIBOLO
Ilyo ushilatendeka ukubelenga . . .
◼ Fwaya icifulo ukushili icongo pa kuti kwiba ifya kukupumfyanya.
◼ Pepa kuli Lesa pa kuti akwafwe ukuumfwa ifyo ulebelenga.
Ilyo ulebelenga . . .
◼ Bomfya mapu ne fikope ifilelangilila ifyo ulebelenga mu Baibolo pa kuti fikwafwe ukulaelenganya ifyalecitika.
◼ Tontonkanyapo sana pa fyalecitika, e lyo na pa tuntu utunono tumbi utulandilwepo.
◼ Ulebelenga na mafutunoti e lyo na malembo yambi ayaloshiweko.
◼ Uleyipusha ifipusho pamo nga:
IFYO CALI: Ni lilali ifi fyacitike? Ni nani walandile aya mashiwi? Bushe aya mashiwi ni bani bale-eba?
UMO FILOLELE: Bushe kuti nalondolwela shani umuntu umbi ifi fyebo?
IFYO FICINDAMINE: Mulandu nshi Yehova Lesa abikilemo ili lyashi mu Cebo cakwe? Bushe ili lyashi lilesokolola cinshi pa mibele ya kwa Lesa nelyo inshila acitilamo ifintu? Finshi ningasambililako kuli ili lyashi?
Nga wapwisha ukubelenga . . .
◼ Belengelapo ifyebo na fimbi. Bomfya impapulo isho Inte sha kwa Yehova shilemba, pamo nga icitabo ca kuti Insight on the Scriptures ne citabo citila “Amalembo Yonse Yantu Yapuutwamo kuli Lesa Kabili ya Kunonsha,” nga e ko shaba mu lulimi lobe.
◼ Na kabili pepa. Eba Yehova ifyo wasambilila e lyo ne fyo ulepanga ukufibomfya. Mutashe pa Cebo cakwe, Baibolo.
[Akabokoshi ne Cikope pe bula 24]
UKATANTIKA SHANI IFYA KUBELENGA BAIBOLO?
Salapo . . .
□ Ukubelenga Baibolo ukutampila ku ntendekelo ukushinta ku mpela.
□ Ukubelenga Baibolo ukutampila ku mabuuku yabalilepo ukulembwa, nelyo ukulingana no mo ifintu fyakonkanine ukucitika.
□ Ukubelenga ifiputulwa fyalekanalekana ifya mu Baibolo cila bushiku.
Pali Cimo: Belenga amabuuku umo bashimika sana ifyacitike kale (Ukutendeka ukufika kuli Estere)
Pali Cibili: Umwaba ubumi bwa kwa Yesu ne fyo alesambilisha (Mateo ukushinta kuli Yohane)
Pali Citatu: Umwaba ilyashi lya Cilonganino ca Bena Kristu ba kubalilapo (Imilimo)
Pali Cine: Umwaba ubusesemo ne fishinte fimbi ifya kututungulula mu fyo tucita (Esaya ukufika kuli Malaki, no Ukusokolola)
Pali Cisano: Umwaba amashiwi ya nshintu no lwimbo (Yobo, Amalumbo, Ulwimbo lwa Nyimbo)
Pa Cibelushi: Amabuuku ayapanda amano pa mikalile (Amapinda, Lukala Milandu)
Pa Mulungu: Amakalata ayalembeelwe ifilonganino (ibuuku lya Abena Roma ukushinta kuli Yuda)
Te mulandu ne fyo watantika ukubelenga Baibolo, uleibukisha ukulalemba apo wapelela! Conga ifi ✔ mupepi ne cipandwa cimo cimo nga wapwisha ukucibelenga, nelyo cita fimbi ifingakwafwa ukwishiba ifipandwa wabelenga.
Putula aka kabokoshi muli ino magazini no kukabika muli Baibolo obe!
[Akabokoshi/Icikope pe bula 24]
LENGA AMALYASHI YA MU BAIBOLO UKUWAMA!
Tontonkanyapo sana pa fyo ulebelenga. Ku ca kumwenako:
□ Panga umutande wa lupwa ukubomfya amashina ya bantu ulebelengapo mu Baibolo.
□ Panga amaDagramu. Ku ca kumwenako, ilyo ulebelenga pa muntu wa mu Baibolo uwali ne citetekelo, suntinkanya imibele isuma iyo akwete e lyo ne fyo acitile ku mapaalo apokelele.—Amapinda 28:20.
[Icikope]
Cibusa wa kwa Lesa
↑ Icumfwila
↑ Uwa cishinka
↑ ↑
Abrahamu
□ Lenga ifikope ifya kulangilila ilyashi ulebelenga.
□ Lenga ifikope ifilelangilila umo ifyo fintu fyakonkanine. Londolola ifilecitika mu cikope cimo cimo.
□ Panga icipasho ca cintu ulebelengapo, pamo nga icibwato ca kwa Noa.—Ku ca kumwenako, belenga ifyebo fyaba pe bula 22 muli Awake! ya January 2007.
□ Belengela pamo na ba pa ng’anda nelyo abanobe. Ifya kucita: Lekeni umo abe kashimika. E lyo bambi balebelenga amashiwi ya balimo muli ico cipandwa.
□ Sala ilyashi lya mu Baibolo, e lyo upange ilyo lyashi libe kwati lyashi lya kubelenga pa mulabasa. Cita lipoti ilyo lyashi mu nshila ishalekanalekana kabili “uleipusha” abo filecitikila e lyo na bakambone.
□ Sala ilyashi lya mu Baibolo umuli umuntu uushasalile bwino ifya kucita kabili elenganya ifyali no kufumamo asala bwino! Ku ca kumwenako, tontonkanya pali filya Petro akene Yesu. (Marko 14:66-72) Fintu nshi ifisuma ifyo Petro ali no kucita ilyo ifya musango yu fyamucitikile?
□ Tambako nelyo kutikako ku filangililo fya mu Baibolo ifya pa matepu nangu pa maCD.
□ Lemba icilangililo cobe we mwine. Bikamo na masambililo wingasambililako muli ico cilangililo.—Abena Roma 15:4.
IFYA KUCITA: Angaleni icilangililo ne bumba linono ilya banobe.
[Akabokoshi ne Cikope pe bula 25]
IFINGALENGA WABIKAKO AMANO
◼ Imika ubuyo! Pano lembapo ubushiku ulefwaya ukutendeka ukubelenga Baibolo.
․․․․․
◼ Sala iciputulwa mu Baibolo ico watemwa sana. (Mona akabokoshi kaleti “Ukatantika Shani Ifya Kubelenga Baibolo?”) Lyena pano lembapo iciputulwa ca mu Baibolo ico walabalilapo ukubelenga.
․․․․․
◼ Pa kutampa, belenga fye pa nshita inono. Nangu fye ukubelenga Baibolo amamineti 15 kwawamapo ukucila ukukanakwata inshita ya kubelenga. Pano lembapo inshita ukalapoosa pa kubelenga.
․․․․․
Ifya kucita: Ulingile ukukwata Baibolo iya kubomfya fye pa kubelenga. Lembamo ifishinka. Shila ifikomo maka maka ifyo ulefwaya ukaleibukisha.
[Akabokoshi ne Fikope pe bula 25]
IFYO ABANOBE BALANDA
“Ndabelengako Baibolo cila bushiku ilyo nshilalaala. Ici cilalenga ndetontonkanya pa fisuma ilyo nshilalaala.”—e fyalandile Megan.
“Nga nabelenga icikomo cimo, ndatendeka ukucitontonkanyapo pa mamineti 15. Ndabelenga yonse amafutunoti, na malembo yonse ayaloshiweko, kabili ndabelengelapo ifyebo na fimbi mu mpapulo. Inshita shimo nshipwisha icikomo nga ndebelenga Baibolo, lelo ndasambilila ifintu ifingi muli iyi nshila!”—e fyasosele Corey.
“Kwali inshita imo nabelengele Baibolo mu myeshi 10. Pali iyi nshita nalisambilile bwino bwino ukuti ifipande fyalekanalekana ifya mu Baibolo fyalyampana ne fipande fimbi.”—e fyalandile John.
[Akabokoshi pe bula 25]
KUTI WASALAPO!
□ Sala ilyashi ulefwaya ukubelenga. Mu Baibolo mwaliba amalyashi ayasuma kabili aya cine cine. Sala ilyashi limo ilyo watemwa sana, kabili libelenge ukufuma pa ntendekelo ukushinta ku mpela.
Ifyo wingacita: Nga ulefwaya ukwishiba ifingakwafwa ukunonkelamo sana mu lyashi walabelenga, belenga ifyebo fyaba pe bula 292 mu citabo ca kuti Ifipusho Abacaice Bepusha—Ifyasuko Fingabafwa, Ibuuku 2, ico Inte sha kwa Yehova shalemba.
□ Sala ibuuku limo ililanda pa lyashi lya kwa Yesu. Belenga ibuuku lya kwa Mateo (ilya ntanshi ukulembwa pa mabuuku ya mbila nsuma), ibuuku lya kwa Marko (umo alondolola ifintu ifingi ifyalecitika mu nshiku sha kwa Yesu), ilya kwa Luka (ililanda sana pa mapepo na pa banakashi), nelyo ilya kwa Yohane (ilyalandako panono pa fyaba mu mabuuku ya mbila nsuma yambi).
Ifyo wingacita: Ilyo ushilatendeka ukubelenga, mu kwipifya belengako ifyebo fimo ifilanda pali ilyo ibuuku lya mu Baibolo no walembele pa kuti umfwikishe ifyo ilyo ibuuku lyapusana na mabuuku yambi.
□ Sala ilumbo limo mwi buuku lya Amalumbo. Ica kumwenako:
Nga ca kuti ulatalalilwa kabili tawakwata ifibusa, belenga Amalumbo 142.
Nga ca kuti uli no bulanda pa fintu ifyo ulufyenye, belenga Amalumbo 51.
Nga ulatwishika nga ca kuti mwaliba ubusuma mu kukonka amafunde ya kwa Lesa, belenga Amalumbo 73.
Ifyo wingacita: Lemba amalumbo yonse ayo wabelenga maka maka yalya aya kukoselesha sana.
[Akabokoshi pe bula 26]
FWAILISHA
◼ Tontonkanya ifyo cali. Fwailisha inshita ilyo ifyo ulebelenga fyacitike, icifulo fyacitikileko, e lyo ne fyo ifintu fyali pali iyo nshita.
Cita ifi: Belenga Esekiele 14:14. Bushe Daniele ali ne myaka inga ilyo Yehova alandile pali ena na pali Noa na Yobo ukuti bali abalungami?
Ifingakwafwa ukusanga icasuko: Icipandwa 14 ice buuku lya kwa Esekiele calembelwe pa numa fye ya myaka isano ukutula apo Daniele asendelwe ubusha ku Babiloni—kanshi afwile ali fye umwaice.
Ifyo wingasambililako: Bushe Daniele ali umwaice sana ica kuti Yehova teti amone icitetekelo cakwe? Finshi Daniele apingwilepo bwino ifyalengele ukuti bamupaale? (Daniele 1:8-17) Bushe ica kumwenako ca kwa Daniele kuti cakwafwa shani ukupingula bwino pa fintu?
◼ Uletontonkanya pali fyonse. Inshita shimo ishiwi fye limo nangu yabili kuti yacindama ukutontonkanyapo.
Cita ifi: Linganya Mateo 28:7 kuli Marko 16:7. Mulandu nshi Marko ena alandile ukutila Yesu ali no kumoneka bwangu bwangu ku basambi “na [kuli] Petro”?
Ifingakwafwa ukusanga icasuko: Pali ifi fyacitike, Marko tali ni nsangwapo; Petro afwile e wamushimikile ifyo cali e lyo alemba.
Ifyo wingasambililako: Mulandu nshi Petro atemenwe ilyo aumfwile ukuti Yesu alefwaya ukumumona na kabili? (Marko 14:66-72) Cinshi wingeshibilako ukuti Yesu ali ni cibusa wa cine cine uwa kwa Petro? Kuti wapashanya shani Yesu nga ulefwaya ukuba na bucibusa bwa cine cine na bantu bambi?
◼ Fwailapo ifyebo na fimbi. Belengelapo impapulo shilanda pali Baibolo.
Cita ifi: Belenga Mateo 2:7-15. Ni lilali abalebukila ku ntanda batandalile Yesu?
Ifingakwafwa ukusanga icasuko: Belenga ifyebo fyaba mu Ulupungu lwa kwa Kalinda ulwa January 1, 2008, pe bula 31.
Ifyo wingasambililako: Bushe Yehova alesakamana shani ulupwa lwa kwa Yesu ilyo bali mu Egupti? Bushe ukucetekela Lesa kuti kwakwafwa shani ukukanaba sana no bulanda ilyo ifintu fyakubipila?—Mateo 6:33, 34.