Abacaice Bepusha Ukuti
Mulandu Nshi Cawamina Ukulaya ku Kulongana?
Bushe walitemwa ukulongana?
Ee
Twalilila
Iyo
Finshi wingacita pa kuti utemwe Ukulongana?
BAIBOLO itila, Abena Kristu bafwile ukulalongana capamo mu kupepa. (AbaHebere 10:25) Finshi wingacita nga tawatemwa ukuya mu kulongana, nelyo nga ca kuti ilyo uli mu kulongana usanga uletontonkanya pa fintu fye fimbi ifyo waciba no kulacita aukanayako? Konka ifi twalalandapo ifingakwafwa ukwaluka.
1. ULEYA MU KULONGANA LYONSE
Ilembo lingakwafwa: “Abantu bamo balaleka ukuya ku kupepa, lelo ifwe tatufwile ukuleka.”—AbaHebere 10:25, Contemporary English Version.
Mulandu nshi ufwile ukulaila mu kulongana lyonse nangu ca kuti tawatemwa ukulongana? E cingakwafwa ukutemwa ukulongana! Tontonkanya pali ici: Bushe kuti waishiba ukuteya umupila no ku-utemwa nga ca kutila uteya fye limo limo? E cimo no kulongana. Nga uleya sana mu kulongana, e lyo ukakosa sana mu kupepa. Ne co cikalenga ulefwaisha ukuya mu kulongana lyonse!—Mateo 5:3.
Icingakwafwa: Pa numa ya kulongana, ule-ebako kalanda umo ifyo wacitemwa mu lyashi acilanda. Nga mwalongana, ulelembako icintu cimo icacikukoselesha mu kulongana. Kabili apo ifingi ifyo tusambilila mu kulongana filanda pa mulimo twapeelwa fwe Bena Kristu, ule-esha ukucita ifingalenga walalanda bwino na bantu pa fyo wasuminamo. Ukucita ifi, kukalenga ulemona ukuti ifyo tusambilila fyalicindama.
“Nasambilile ukutula ku bwaice ukuti mfwile ukulaya mu kulongana lyonse. Kanshi na lintu nali umwaice, naishibe ukuti ku kulongana te kwa kuya fye ilyo natemwa. Na ino nshita e fyo naishiba.”—Kelsey.
Icishinka ni ci: Abaya mu kulongana lyonse e batemwa sana ukulongana kabili balanonkelamo sana!
2. ULEBIKAKO AMANO
Ilembo lingakwafwa: “Mulebikako amano ku fyo mulekutika.”—Luka 8:18.
Abasambilila pa fyo umuntu akutika batila, fwe bantu tulalaba ukucila pali hafu ya fyebo twaumfwa. Nga ca kutila indalama wakwete shalepwa bwangu ifyo, bushe te kuti ucitepo cimo pa kuti shilapwa bwangu?
Icingakwafwa: Uleikala na bafyashi bobe ku ntanshi ukushiba sana ifya kupumfyanya. Ulelembako ifyebo. Nangu line ifilenga abantu ukukutikisha filapusanapusana, ukulemba ifyebo kuti kwalenga ulebika amano kuli kalanda no kubomfya ifyo fyebo pa kupituluka mu fyo wacisambilila.
“Nalefilwa ukubika amano ku filelandwa pa kulongana. Ino nshita ndapoosako amano. Ndatontonkanya pa co njila mu kulongana. Nshila fye ico cine mu kulongana nga filya ciba ku baya ku calici. Ine nja mu kupepa no kusambilila fimo ifingangafwa mu bumi.”—Kathleen.
Icishinka ni ci: Ukuya ku kulongana ukwabula ukukutika, cimo no kuya ku mutebeto no kubwelako fye ne nsala.
3. ULECITAKO FIMO
Ilembo lingakwafwa: “Abantu basambilila ku bantu banabo nga filya fine icela cinoona icela cibiye.”—Amapinda 27:17, Baibolo ya Good News.
Fingi ifyo mwingacita pa kulongana mwe bacaice. Mwilalaba ukuti Abena Kristu banenu balakoseleshiwa nga mwaya ku kulongana, nelyo nga mwayasukapo e lyo na lintu mulelanshanya nabo.
Icingakwafwa: Kuti cawama nga wapanga ukula-asukapo nangu fye umuku umo pa lyashi lyonse ilya fipusho ne fyasuko nga mwaya mu kulongana. Ulewamyako ne Ng’anda ya Bufumu no kubombako imilimo iibako ilyo ukulongana kushilatendeka, na lintu mulelongana e lyo na pa numa ya kulongana. Ulelanshanyako na bamo mu cilonganino abo ushilanda nabo sana.
“llyo nali ne myaka 16, nalesendako ifisoselo no kubika bwino ifintu pa cisebele. Ukubombako iyi milimo kwalelenga nalaumfwa ukuti nalicindama kabili kwalilengele nalafika bwangu ku kulongana. Ifi fyalingafwile ukutemwa ukupepa Lesa e lyo no kusambilila Baibolo.”—Miles.
Icishinka ni ci: Wilaikala fye ukwabula ukucitako icili conse! Ukucitako fimo kulafwa umuntu ukukosa mu kupepa.
Ifipande na fimbi ifya “Abacaice Bepusha Ukuti,” filasangwa pa Intaneti pa www.watchtower.org/ype
[Akabokoshi ne Fikope pe bula 11]
TULEKWITA KU KULONGANA!
Bushe Kuti Watemwa
● Ukwishiba icine pali Lesa?
● Ukuba umuntu umusuma?
● Ukukwata ifibusa ifisuma?
Inte sha kwa Yehova kuti bakwafwa ukucita ifi fintu ne fintu fimbi! Balalongana pa Mayanda ya Bufumu imiku ibili mu mulungu. Takuba kusonkesha imisonko, kabili uuli onse kuti asangwako.
Uleisa mu kulongana! Amayanda ya Bufumu tayaba nga amacalici ayo wayako. Ku kulongana kwa Nte sha kwa Yehova, kuba ukusambilila Baibolo, kanshi ukalasambilila ifyo Icebo ca kwa Lesa cingakwafwa ukwisaikala bwino ku ntanshi!—Amalango 31:12; Esaya 48:17.
Sai—Ubushiku bwa kubalilapo ukuya mu Ng’anda ya Bufumu, nalipapile. Tamwali ifilubi, tamwali uwafwele ifya bushimapepo, kabili takwali uwanjebele ukupeela umutuulo. Bonse balinsansamukile kabili nalyumfwile bwino. Ifyo twasambilile fyali ifyayanguka ukumfwa, kabili fyalilolamo. Ici e cine ico nalefwaya!
Deyanira—Nali ne myaka 14 ilyo nalongene ne Nte sha kwa Yehova umuku wa kubalilapo. Ilyo nafikile fye ku Ng’anda ya Bufumu, bonse balimpokelele bwino. Bonse balitemenwe ukumona naya mu kulongana kabili balimbikileko amano. Ici calengele niba ne nsoni sha kubwelelako!
[Akabokoshi pe bula 12]
Fwailisha ifyebo fikalandwapo ku kulongana kukakonkapo. Salapo ilyashi limo ilyo watemwa sana kabili . . .
PUTULA NO KUKOPOLOLA
Lemba apa ilyo taulaya mu kulongana.
Ilyashi ntemenwe:
․․․․․
Ifyo ningatemwa ukwishiba pali ili lyashi:
․․․․․
Lemba apa ilyashi nga lyapwa.
Ifyo nasambilila:
․․․․․
Ifyo nacitemwa mu lyashi ifyo nalaeba kalanda:
․․․․․