Mulandu Nshi Lesa Apangiile Icalo?

1. Mulandu nshi Lesa apangiile icalo?

Yehova apangile icalo ukuti abantu baleikalamo. Icalo e mushi wesu. Kanshi abantu ba kubalilapo, Adamu na Efa, tababapangile ukuti baleikala mu muulu. Lesa alipangile kale bamalaika aba kwikala mu muulu. (Yobo 38:4, 7) Ilyo Lesa apangile umuntu wa kubalilapo, amubikile mu paradaise, incende iisuma pano calo iyo bainike ati Edeni. (Ukutendeka 2:15-17) Yehova amupangile ukuti ena na bana bakwe abo ali no kukwata bakaleikala aba nsansa pa calo umuyayaya.—Belengeni Amalumbo 37:29; 115:16.

Pa kubala, Edeni fye e yali incende iisuma pa calo. Adamu na Efa bali no kulakwata abana mpaka pa calo ponse paisula abantu. Umuye nshiku bali no kulenga icalo conse caba paradaise. (Ukutendeka 1:28) Icalo tacakonaulwe nakalya. Abantu bakatwalilila ukwikala pa calo umuyayaya.—Belengeni Amalumbo 104:5.

Tambeni vidio ileti: Mulandu Nshi Lesa Apangiile Icalo?

2. Mulandu nshi icalo cishabela paradaise?

Adamu na Efa balikeene ukumfwila Lesa, e ico Yehova alibatamfishe muli ilya ncende iisuma. E fyo icalo cishabela paradaise, kabili abantu balifilwa ukulenga icalo ukuba paradaise. Baibolo itila: “Isonde alipeela mu minwe ya mubifi.”—Yobo 9:24.—Belengeni Ukutendeka 3:23, 24.

Bushe Yehova alilabako kuli filya alefwaya abantu ukulaikala pa kubala? Iyo. Yehova ni Lesa uwa maka yonse. Te kuti afilwe ukufikilisha ukufwaya kwakwe. (Esaya 45:18) Akalenga abantu ukulaikala nga filya fine alefwaya ukuti balekala pa kubala.—Belengeni Amalumbo 37:11, 34.

3. Bushe Lesa akalenga shani icalo ukuba Paradaise?

Ilyo Yesu Imfumu ya Bufumu bwa kwa Lesa akalateka icalo, e lyo cikaba paradaise. Yesu na bamalaika ba kwa Lesa bakonaula bonse abashumfwila Lesa ilyo kukaba inkondo ya Armagedone. Kabili akakaka Satana imyaka 1,000. Abantu ba kwa Lesa bakapusuka iyi nkondo pantu Yesu akabatungulula no kubacingilila. Bakaba no mweo wa muyayaya mu Paradaise.—Belengeni Ukusokolola 20:1-3; 21:3, 4.

4. Ni lilali amacushi yakapwa?

Ni lilali Lesa akafumya ifyabipa pano calo? Yesu alandile pa “cishibilo” icali no kulanga ukuti impela naipalama. Ifilecitika pa calo filelenga abantu ukulaikala mwenso mwenso kabili filelanga ukuti “icalo cili ku mpela.”—Belengeni Mateo 24:3, 7-14, 21, 22.

Ilyo Yesu akalateka pa myaka 1,000, akafumyapo amacushi yonse pano calo. (Esaya 9:6, 7; 11:9) Yesu wine akaba Shimapepo Mukalamba kabili akafuuta imembu shonse isha bantu abatemwa Lesa. E fyo Lesa akafumyapo amalwele, ukukota, ne mfwa, ukupitila muli Yesu.—Belengeni Esaya 25:8; 33:24.

5. Ni bani bakalaikala mu Paradaise?

Abantu abomfwila Lesa e bakalaikala mu Paradaise. (1 Yohane 2:17) Yesu atumine abasambi bakwe ukufwaya abafuuka no kubasambilisha ifya kucita pa kuti babe abantu ba kwa Lesa. Muno nshiku, Yehova alesambilisha abantu abakalaikala mu Paradaise pano calo. (Sefania 2:3) Pa Ng’anda ya Bufumu iya Nte sha kwa Yehova, abantu balasambilila ifya kuba abalume abasuma, ifya kuba abakashi abasuma, ne fya kuba abafyashi abasuma. Abana na bafyashi bapepela pamo kabili balasambilila ne fyo bafwile ukucita pa kuti balenonkelamo mu mbila nsuma.—Belengeni Mika 4:1-4.