Cinshi Abafyashi Bengacita Ilyo Umwana Wabo Alelila Sana
KU BALEMBA LOLENI! MU CANADA
Badokota basukile balanda ifyo nyina aletunganya. Umwana wakwe alwele ubulwele bwa kunyonga kwa mu nda. Inyushipepala ya Globe and Mail iya mu Canada yalandile kuti ukulwala kwa mu nda kulakuma “abana abengi, e kutila umo mu bana bane alalwalako ubu bulwele.” Umwana ngalelila sana calola fye na ku nshiku shitatu mu mulungu e cimo ico mwingeshibilako kuti nalwala ubu bulwele. Ico umufyashi uusakamene e ngacita cinshi? Badokota abaishiba sana ifya kuundapa amalwele ya bana batila ilingi line abafyashi—no mwana—balingile ukulolela ukufikila ubulwele ubwine bwapwa. Bushe bafwile ukulolela ukufika lilali?
Ukufwailisha kupya ukwabelele mu Canada ukwali pa bafyashi abakwata abana ababa no bulwele bwa kunyonga kwa mu nda kulanga kuti impendwa iikalamba iya bana ababa no bu bulwele bwalipwile ilyo bali ne myeshi itatu. Ifyafwailishe namayo dokota Tammy Clifford, umukalamba wa kabungwe kacincintila amalwele uwa pa Cipatala ca Bana ku Eastern Ontario Research Institute, na fyo fyasokolwele kuti abafyashi ababa no mwana uulwala bulwele bwa kunyonga kwa mu nda tababipilwa pa nshita ntali. Dokota Clifford atile: “Ilyo mwana alekumanya imyeshi 6 ukutula apo afyalilwe, abafyashi baba na bana aba musango uyo baba fye kwati bafyashi abashakwata abana abalwala ubu bulwele bwa kunyonga kwa mu nda. Ngo bu bulwele bwa kulila pa mulandu wa kukalipwa kwa mu nda bwapwa, abafyashi bamoneka kwati tabakweete no bu bwafya.”
Inyushipepala ya Globe yatile uku kufwailisha kupya ukwasabankanishiwe na namayo dokota Clifford na bo abomba nabo, “kwalundako ubulondoloshi bwacindama ku fyo ba sayansi baishiba pa bana balwala ubu bulwele. Basanga kuti kwaba imisango itatu: abana aba kuti balwala ubu bulwele, kabili limo limo bapola ilyo bacili fye ne myeshi itatu; kwaba naba kuti ukunyonga kwa mu nda kwatantalilako ukwa kuti kwapwa imyeshi iingi ukwabula ukuleka; kabili na banono balalwala ubu bulwele ku ntanshi, ilyo papita imyeshi iinono ukutula apo bafyalilwe.” Bacili balesambilila na fimbi ukumona pa kukula kwa bana ababa no bulwele bwa kunyonga kwa mu nda ilyo baleya balekula. Ili bumba lyalekelesha e lyo balefwaisha ukusambililapo sana.
Umwana uo bapoosa mu muulu no kumwanka e uliila sana. Inyushipepala ya Globe yatile, “ukulila kweka te kuti kukalifye umwana, lelo ukupoosa umwana mu muulu no kumwanka bubi bubi ne lyo fye ni pa nshita iinono kuti kwaonaula mishipa ya mwana nelyo fye ukumwipaya.”
Kwena mu kulila kwa mwana na mo mwaliba ubusuma, nangu fye alelila sana. Inyunshipepala ya Globe yatile, “Abafwailisha basokolola kuti abana abalila sana balabasakamana sana ku ba basunga. Balabasunsuntila sana, balabasekesha sana, kabili balalanda na bo ilingi no kubatemwa sana.”