Ubushiku Ubwacila Inshiku Shonse

Ubo bushiku, bushiku bwa mfwa ya kwa Yesu Kristu. Bushe cinshi imfwa ya kwa Yesu yacindamine? Kwaba imilandu iingi.

Filya Yesu atwalilile uwa cishinka mpaka fye ne mfwa yakwe, calangilile apabuuta tuutu ukutila umuntu kuti atwalilila na bumpomfu kuli Lesa.

Imfwa ya kwa Kristu na kabili yaiswile inshila ku bantu bamo bamo ukutila bakeseba ishamfumu nankwe ku muulu. Kabili, yaiswile ne nshila ya bantu abengi iya kwisaikala mu paradaise pano isonde kuli pe na pe.

Pa bushiku bwa mfwa yakwe icungulo, Yesu abomfeshe umukate ushatutumuka no mwangashi wakashika nge fishibilo fye lambo lyakwe. Kabili aebele abasambi bakwe ukuti: “Mulecite ici ku kunjibukisha.” (Luka 22:19) Bushe mukebukisha ubu bushiku bwacindamisha?

Inte sha kwa Yehova balemwita ukwisasangwa ku Cibukisho ca mfwa ya kwa Yesu. Uno mwaka Icibukisho cikabako Pali Citatu, pa April 12, cilya akasuba kawa. Kuti mwaya ku Ng’anda ya Bufumu iyabela mupepi na ku mwenu. Mukwai kuti mwaipusha Inte sha kwa Yehova ababa mupepi na kuntu mwikala pa kuti mwishibe inshita ya Cibukisho ne cifulo uko cikabela.