Ifyo Magazini ya Loleni! Ya-afwile Umuntu mu Nshila Ashale-enekela

ABALEMBA LOLENI! KU BENIN

◼ Ilyo Noël Nte ya kwa Yehova uwali ne myaka 23 apingwilepo ukuleka isukulu pa kuti alebombako umulimo wa kushimikila inshita yonse, balupwa lwakwe baletwishika uko aali no kulafumya indalama sha kubomfya mu mikalile yakwe. Kwena, calimwafishe ukusanga incito ya kumupeela inshita iikalamba pa kuti alebombako sana umulimo wa kushimikila. Kanshi ilyo Loleni! yafumine iyakwete umutwe waleti, “Ifintu Fisano Ifingamwafwa Ukusanga Incito,” Noël ali-ibelengele bwino bwino imiku iingi.a Bushe magazini yalimwafwile? Ee, yalimwafwile, ukucila na pa fyo ale-enekela.

Umukalamba we sukulu ilishili lya buteko amwene Noël aleshimikila ku ng’anda ne ng’anda kabili alimwipwishe pa kuti eshibe nga ca kuti Noël ni Nte ya kwa Yehova. Ico amwipushishe, alefwailapo kafundisha na umbi, kabili apo kale kale alishibe ukuti Inte sha kwa Yehova shilasambilisha bwino, aipwishe Noël nga ca kuti alishibeko Nte ya kwa Yehova uwingatemwa ukuba kafundisha. Ilyo Noël ayaswike ukutila taishibepo nelyo umo, umukalamba we sukulu amwipwishe ukuti, “Nga iwe, tawingatemwa ukuba kafundisha?”

Noël tabalile abombapo umulimo wa bukafundisha, kabili alebulubusa pa kulanda. Ubu bwaishileba bwafya pantu mu calo ca Benin icipani cilolekesha pa masambililo cilabala caesha onse uulefwaya ukuba kafundisha pa kuti bamone nga tabulubusa. Umukalamba we sukulu aebele Noël ukutila, “Ukapoke satefiketi, ukesatampa incito.”

Noël alecita bwino mwi Sukulu lya Butumikishi Ilya Bulesa, e kutila isukulu ilisambilisha abantu ukuba abafikapo ukulanda ku cintubwingi kabili libako cila mulungu mu filonganino fya Nte sha kwa Yehova. Alelanda fye na malyashi ya Baibolo mu cilonganino alelongana. Nangu cibe fyo, Noël ali no mwenso ilyo icipani ca masambililo calemwesha ukumona nga tabulubusa.

Uwalemwesha amupeele magazini kabili amwebele ukubelenga mu kupongomoka paragrafu iyali mu filembo fyakashika. Noël atulumwine amenso ilyo amwene ifyebo ifyakwete umutwe uwaleti “Ifintu Fisano Ifingamwafwa Ukusanga Incito.” Alibelengele paragrafu bwino sana ukwabula ukutamantama kabili balimupeele na satefiketi.

Pa numa uwalemwesha atile ndabelenga lyonse bamagazini ba Nte sha kwa Yehova. Alondolwele ukuti, “Aba bamagazini mwaliba ifyebo ifisuma sana kabili balilembwa bwino ica kutila limo limo ndababomfya ukweseshako abalefwaya bukafundisha.”

Noël alitendeke bukafundisha, kabili umukalamba we sukulu alefwaya ukuti atwalilile ukubomba na mu mwaka wakonkelepo, lelo Noël alikeene pantu alepanga ukucitako fimbi. Balimwita ukulabombela pe ofeshi lya Nte sha kwa Yehova, e po nomba abomba.

[Futunoti]