Ukwibukisha Yehova No Mwana Wakwe

TUTILE umuntu akupeela ubupe ubwawamisha. Kuti waumfwa shani?— Bushe kuti wati fye natasha no kulaba ku wakupeele? Nelyo kuti wamwibukisha ne fyo akucitiile?—

Yehova Lesa atupeele ubupe bwawamisha. Atumine Umwana wakwe pe sonde ukwisatufwila. Bushe walishiba icalengele Yesu ukutufwila?— Ici cintu cacindama sana ico tufwile ukumfwikisha.

Nge fyo twasambilile mu Cipandwa 23, Adamu alibembwike ilyo atobele ifunde lyafikapo ilya kwa Lesa. Kabili twapokele ulubembu kuli Adamu, shifwe. E ico, cinshi uletontonkanya tulekabila?— Ukulandila mu mampalanya, tulekabila shifwe umupya, uwali uwapwililika pe sonde. Bushe nani uletontonkanya engaba shifwe wa musango yo?— Ni Yesu.

Yehova atumine Yesu pe sonde pa kuti abe shifwe mu cifulo ca kwa Adamu. Baibolo itila: “Umuntunse wa ntanshi, Adamu, aishilebo mutima wa mweo, Adamu wa kupelelekesha aishilebo mupashi uupeelo mweo.” Nani wali Adamu wa kubalilapo?— Ni uyo Lesa abumbile ku lukungu lwa mushili. Adamu wa bubili nani?— Ni Yesu. Baibolo ilange ci ilyo itila: “Umuntu wa ntanshi [Adamu] wa pano nse, wa mushili; Umuntu uwalenga babili [Yesu] wa mu muulu.”—1 Abena Korinti 15:45, 47; Ukutendeka 2:7.

Apo Lesa akuushishe ubumi bwa kwa Yesu ukufuma ku muulu no kububika mwi fumo lya mwanakashi Maria, Yesu takwete lubembu ululi lonse ulwa kwa Adamu. E mulandu wine Yesu abelele umuntu wapwililika. (Luka 1:30-35) Kabili e mulandu wine malaika asosele ku bacemi ilyo Yesu afyelwe ati: “[Kufyalilwe] imwe lelo Umupusushi.” (Luka 2:11) Nomba pa kuba Umupusushi wesu, cinshi Yesu ilyo aali akanya akabile tala ukucita?— Akabile ukukula mpaka afika ku bukalamba nga Adamu. Lyene Yesu e lyo engaba ‘Adamu wa bubili.’

Yesu, Umupusushi wesu, akaba kabili ‘Shifwe wa nshita pe.’ E fyo etwa muli Baibolo. (Esa. 9:6, 7) Yesu uwapwililika kuti aba shifwe ukucila Adamu, uwaishileba uushapwililika ilyo abembwike. Kanshi kuti twasala ‘Adamu wa bubili’ nga shifwe. Kwena, Yesu wine Mwana wa kwa Yehova Lesa.

Pa kwishiba Yesu, kuti twamupokelela ngo Mupusushi wesu. Bushe uleibukisha ifyo tufwile ukulubulwako?— Ee, ni ku lubembu ne mfwa ifyo twapyana kuli Adamu. Umweo wapwililika uo Yesu apeele, witwa ati icilubula. Yehova apeele icilubula pa kuti imembu shesu shilekelelwe.—Mateo 20:28; Abena Roma 5:8; 6:23.

Cine cine tatulefwaya ukulaba ifyo Lesa no Mwana wakwe batucitila, bushe te ifyo?— Yesu alangile abakonshi bakwe inshila isuma iingatwafwa ukwibukisha ifyo acitile. Natulandepo.

Elenganya ukuti uli mu muputule wa pa muulu mu ng’anda imo mu Yerusalemu. Ni nshita ya bushiku. Yesu na batumwa bakwe bali pe tebulo. Pe tebulo pali impaanga yaocewa, imikate yapapaatala, no mwangashi wakashika. Balelya ica kulya caibela. Bushe nawishiba icilengele?—

Ici ca kulya ca kubebukisha ico Yehova acitile imyaka iingi ku numa ilyo abantu bakwe, abena Israele, bali abasha mu Egupti. Pali ilya nshita Yehova aebele abantu bakwe ati: ‘Ulupwa lonse lwipaye akaana ka mpaanga, no kushinga umulopa pa fiibi fya mayanda yabo.’ Lyene abebele ati: ‘Ingileni mu mayanda yenu, no kulye nama ya mpaanga.’

Abena Israele e fyo bacitile. Kabili bulya bwine bushiku, malaika wa kwa Lesa apitile mu calo ca Egupti. Mu mayanda ayengi, malaika aipeye amabeli. Lelo lintu malaika amona umulopa wa kaana ka mpaanga pa fiibi, alecilila ilya ng’anda. Muli ayo mayanda, tapali abana bafwile. Farao, imfumu ya Egupti, alitiinine pa co malaika wa kwa Yehova acitile. E co Farao aebele abena Israele ati: ‘Mwalubuka. Fumeni mu Egupti!’ E co, babikile ifipe fyabo pa ngamali na pa mpunda no kuya.

Yehova talefwaya abantu bakwe ukulaba ifyo abalubwile. E co atile: ‘Umuku umo pa mwaka mufwile ukulya ica kulya nge co mwacilya buno bushiku.’ Baitile ici ca kulya caibela ati Ica Kucilila. Bushe walishiba umulandu?— Pantu bulya bushiku malaika wa kwa Lesa ‘acilile’ amayanda apali icishilwa ca mulopa.—Ukufuma 12:1-13, 24-27, 31.

Yesu na batumwa bakwe baletontonkanya pali ici ilyo balelya Ica Kucilila. Pa numa, Yesu acita icintu icacindama sana. Lelo, ilyo talacite ci, Yuda, umutumwa wabula bucishinka bamutamfya. Lyene Yesu abuula umukate umo pa ishele, no kupepelapo, amokaula no kupeela abasambi bakwe. Atila: “Buuleni, mulye.” Lyene abeba ati: ‘Uyu mukate e mubili wandi uo ndi no kupeela nga namufwila.’

Lyena Yesu abuula kapu ya mwangashi wakashika. Pa numa ye pepo na limbi ilya kutasha, abapeela kapu no kusosa ati: “Nwenimo bonse.” Kabili abeba ati: ‘Uyu mwangashi e mulopa wandi. Nomba line nalapongolola umulopa wandi pa kuti shilekelelwe imembu shenu. Citeni ci ku kunjibukisha.’—Mateo 26:26-28; 1 Abena Korinti 11:23-26.

Bushe naumona ukuti Yesu atile abasambi bafwile ukucite ci ku kumwibukisha?— Tabalekabila ukulya Ica Kucilila na kabili. Lelo, umuku umo cila mwaka bali no kulya ici ca kulya caibela ku kwibukisha Yesu ne mfwa yakwe. Ici ca kulya citwa ati Umulalilo wa kwa Shikulu. Ilelo ici ca kulya ilingi tuciita ati Icibukisho. Mulandu nshi?— Pantu citwibukisha ifyo Yesu na Wishi, Yehova Lesa, batucitiile.

Umukate ulingile ukutulenga ukutontonkanya pa mubili wa kwa Yesu. Ali uwaitemenwa ukupeela umubili wakwe pa kuti tube no mweo wa muyayaya. Ngo mwangashi wakashika?— Ulingile ukutwibukisha pa fyo umulopa wa kwa Yesu wacindama. Walicindama ukucila umulopa wa mwana wa mpaanga uwa pa Ca Kucilila mu Egupti. Bushe walishiba icalenga?— Baibolo itila umulopa wa kwa Yesu kuti waleta ukulekelelwa kwa membu. Kabili lintu imembu shesu shonse shikalekelelwa, tatwakalelwala na kabili, tatwakalekota, no kufwa. Tufwile ukulatontonkanya pali fi lintu twasangwa ku Cibukisho.

Bushe bonse bafwile ukulyako umukate no kunwako umwangashi pa Cibukisho?— Yesu aebele abalyako no kunwako ati: ‘Mukaba mu bufumu bwandi no kwikala pa fipuna fya bufumu mu muulu na ine.’ (Luka 22:19, 20, 30) Ici calepilibula ukuti bali no kuya ku muulu ku kuba ishamfumu na Yesu. E co ni balya fye abakwata isubilo lya kuteka na Yesu ku muulu e bafwile ukulyako umukate no kunwako umwangashi.

Lelo na bashilyako umukate no kunwako umwangashi bafwile ukusangwa ku Cibukisho. Bushe walishiba umulandu?— Pantu na ifwe Yesu alitufwilile. Pa kusangwa ku Cibukisho, tulanga ukuti tatwalabako. Twibukisha ubupe bwawamisha ubwa kwa Lesa.