AKABOKOSHI KAKUTWAFWA UKUSAMBILILA 1B
Ifyaba Mwi Buuku Lya Kwa Esekiele
Ifi e fyo twingakanya ifyaba mwi buuku lya kwa Esekiele:
IFIPANDWA 1 UKUFIKA KU 3
Ilyo Esekiele na baYuda bali bankole mu Babiloni mu mwaka wa 613 ninshi Yesu talaisa pano isonde, Esekiele alimwene ifimonwa ifyafumine kuli Yehova, kabili Yehova amwebele ukusesema ku baYuda abaleikala mupepi no mumana wa Kebari.
IFIPANDWA 4 UKUFIKA KU 24
Pa kati ka mwaka wa 613 no wa 609 ninshi Yesu talaisa pano isonde, Esekiele alibilile imbila ya bupingushi iyalelanda maka maka pa konaulwa kwa Yerusalemu na bacipondoka abaleikalamo kabili abalepepa utulubi.
IFIPANDWA 25 UKUFIKA KU 32
Ukutendekela mu mwaka wa 609 ninshi Yesu talaisa pano isonde, umwaka abena Babiloni batendeke ukushinga Yerusalemu pa muku wa kulekeleshako, Esekiele nomba alilekele ukubila imbila ya bupingushi pali Yerusalemu, atendeke ukubila imbila ya bupingushi pa bena Amone, pa bena Edomu, pa bena Egupti, pa bena Moabu, pa baPelishiti, pa bena Sidone, na pa bena Turi abali abalwani babo.
IFIPANDWA 33 UKUFIKA KU 48
Ukutendekela mu 606 ninshi Yesu talaisa pano isonde, ninshi umusumba wa Yerusalemu ne tempele ifyo bashiile ukutali sana nabafyonaula, Esekiele atampile ukubila imbila iyali no kulenga abaYuda baba ne subilo. Iyi imbila yali ya kuti ukupepa ukwasanguluka ukwa kwa Yehova Lesa kwali no kubako na kabili.
Ifyaba mwi buuku lya kwa Esekiele bafilemba ukulingana ne fyo fyalekonkana ukucitika e lyo ne lyashi balelandapo. Amasesemo ayalanda pa konaula Yerusalemu ne tempele ilyalimo, e yo babalilapo ukulandapo ilyo bashilalanda pa masesemo ayengi ayalanda pa kubwesha ukupepa ukwasanguluka. Ifi fyakonkana fyaliba fye bwino pantu te kuti kube amasesemo ayalelanda pa kubwesha ukupepa ukwasanguluka nga ca kuti takwapwile.
Na kabili amasesemo Esekiele aseseme pa nko ishali mupepi, kabili ishali ishilwani sha kwa Lesa (ifipandwa 25 ukufika ku 32) yaba pa kati ka mbila ya bupingushi iyo abilile pali Yerusalemu e lyo na pa masesemo ayalanda pa kubwesha ukupepa ukwasanguluka. Umo uwasambilila sana alandile pa mbila ya bupingushi iyo Esekiele abilile ku nko ishali mupepi, atile: “Ifi iyi mbila ya bupingushi baibika apa, cilalenga twamona ifyo Lesa abeleele abantu bakwe uluse, aleka no kubakanda. Pantu filya ali no kukanda abalwani babo, fyalelanga ukuti alibeleele abantu bakwe uluse.”