AMASUKO KU MEPUSHO YA MU BAIBOLO

Bushe abantu kuti baikala umuyayaya?

Umuntu wa ntanshi Adamu, aliikele imyaka iingi, lelo mu kupita kwa nshita alisukile akota no kufwa afwa. Ukutula ilyo, abantu abengi balyesha inshila shalekanalekana pa kuti belakota. Lelo takuli uwingabutuka imfwa. Mulandu nshi? Adamu alikotele no kufwa pa mulandu wa kuti alibembukiile Lesa. Kanshi na ifwe tulakota no kufwa pantu twalipyana ulubembu kuli Adamu.—Belengeni Ukutendeka 5:5; Abena Roma 5:12.

Pa kuti tukwate umweo wa muyayaya, tulakabila umuntu uwa kutulubula. (Yobo 33:24, 25) Icilubula cintu ico umuntu alipila pa kuti alubule umunankwe, na ifwe pa kuti tukwate umweo wa muyayaya tulakabila ukulubulwa ku mfwa. (Ukufuma 21:29, 30) Yesu apeele ici cilubula ilyo atufwilile.—Belengeni Yohane 3:16.

Cinshi tufwile ukucita pa kuti tukakwate umweo wa muyayaya?

Te bantu bonse abakalubulwa ku kulwala no kukota. Na kuba, abantu abashumfwila Lesa nga fintu Adamu acitile, tabakakwate ishuko lya kwikala umuyayaya. Bantu fye abo bakelela imembu, e bakekala umuyayaya.—Belengeni Esaya 33:24; 35:3-6.

Nga tulefwaya ukwelelwa imembu, tufwile ukucitapo cimo. Tufwile ukwishiba Lesa pa kulasambilila Icebo cakwe, Baibolo. Baibolo ilatusambilisha ifyo twingacita pa kuti tube ne nsansa, pa kuti tube ifibusa fya kwa Lesa e lyo ne fyo tufwile ukucita pa kuti tukakwate umweo wa muyayaya.—Belengeni Yohane 17:3; Imilimo 3:19.

Nga mulefwaya ukwishibilapo na fimbi, belengeni icipandwa 3 muli ici citabo, Bushe Cinshi Baiboo Isambilisha? icalembwa ne Nte sha kwa Yehova

[Icikope pe bula 16]

Cinshi Lesa acita icikalenga ukuti tukalubuke ku mfwa?