ICIPANDE CA KUSAMBILILAMO 15
ULWIMBO 30 Lesa Wandi, Mufyashi Wandi Kabili Munandi
Ifintu Filatuwamina nga ‘Twapalama Kuli Lesa’!
“Lelo ine nalimona ukuti ukupalama kuli Lesa kusuma.”—AMALU. 73:28.
IFYO TWALASAMBILILAPO
Muli cino cipande twalasambilila pa fyo twingacita pa kuti tupalame kuli Yehova, na pa fyo tunonkelamo nga twapalama kuli ena.
1-2. (a) Finshi tulingile ukucita pa kuti tube ifibusa no muntu? (b) Finshi twalasambililapo muli cino cipande?
BUSHE mwalikwata cibusa? Mwacitile shani pa kuti uyo muntu abe cibusa wenu? Nalimo mwaleba pamo nankwe, mwalishibe amafya ayo akwatapo kabili mwalishibe ifyo atemwa ne fyo apata. Na kabili mwaishileishiba ukuti alikwata imibele iisuma sana iyo na imwe mwingafwaya ukukwata. E fyo mwaishiletemwa uyu cibusa wenu.
2 Kwena palapita inshita pa kuti mube cibusa no muntu. Ifi fine e fyo caba na pa kuti tube ifibusa na Yehova Lesa. Muli cino cipande twalasambilila pa fyo twingacita pa kuti tube ifibusa fya kwa Lesa wesu, na pa fyo tunonkelamo nga twaba ifibusa fyakwe. Natutendekelepo ukusambilila pa mulandu tulingile ukubela ifibusa fya kwa Yehova.
3. Mulandu nshi tulingile ukutontonkanishisha sana pa busuma bwaba mu kupalama kuli Yehova? Langilileni.
3 Ukwabula no kutwishika, mwalishiba ukuti ukupalama kuli Yehova kusuma. Nomba nga twalatontonkanya sana pa busuma bwaba mu kupalama kuli ena, kuti twalafwaisha ukutwalilila ukupalama kuli ena. (Amalu. 63:6-8) Ku ca kumwenako, twalishiba ukuti nga tulelya ifya kulya ifisuma, nga tuletukusha umubili, nga tulekwata inshita iikalamba iya kutuushako kabili nga tulenwa amenshi ayalinga, kuti twakwata ubumi ubusuma. Nangu caba ifi, abantu abengi tababika amano ku kucita ifi. E ico tabakwata ubumi ubusuma. Nomba nga tuletontonkanya sana pa busuma bwaba mu kulacita ifintu ifingalenga twakwata ubumi ubusuma, kuti twatwalilila ukucita ifyo fintu. Ifi fine e fyo caba na kuli ifwe. Twalishiba ukuti ukupalama kuli Yehova kusuma, lelo nga tuletontonkanya sana pa busuma bwaba mu kupalama kuli ena, tukalatwalilila ukupalama kuli Cibusa wesu.—Amalu. 119:27-30.
4. Finshi kemba wa malumbo alembele pa Amalumbo 73:28?
4 Belengeni Amalumbo 73:28. Uwalembele Amalumbo 73 ali mwina Lebi uo basontele ukuba kemba pe tempele lya kwa Yehova. Afwile alibombeele Yehova ne cishinka pa myaka iingi. Na lyo line, alishibe ukuti alingile ‘ukulapalama kuli Lesa,’ kabili ifi fine e fyo alefwaya abantu bambi nabo balecita. Busuma nshi bwaba mu kupalama kuli Lesa?
TULABA NE NSANSA NGA ‘TWAPALAMA KULI LESA’
5. (a) Mulandu nshi tubela ne nsansa nga twapalama kuli Yehova? (b) Bushe amano ayo Yehova amupanda yamwafwa shani, kabili yamucingilila shani? (Amapinda 2:6-16)
5 Nga twapalama sana kuli Yehova, tulaba ne nsansa icine cine. (Amalu. 65:4) Fingi filenga tuleba ne nsansa nga twapalama kuli Yehova. Ku ca kumwenako, nga tulebelenga Baibo kabili nga tulemumfwila, tulaba na mano. Aya mano yalatucingilila ku fintu ifingalenga twakwata amafya ayakalamba, kabili yalalenga twilacita ifyabipa. (Belengeni Amapinda 2:6-16.) E co Baibo ilandila aiti: “Wa nsansa umuntu uusanga amano no muntu uwishiba ifya kwiluka ifintu.”—Amapi. 3:13.
6. Cinshi calengele uwaimbile amalumbo aleke ukusekelela?
6 Kwena na bantu ababa ifibusa fya kwa Yehova, nabo bene inshita shimo balaba no bulanda. Uwalembele Amalumbo 73 alilekele ukusekelela pa mulandu wa kuti atendeke ukutontonkanya pa fintu ifyo alemona kwati tafyali bwino. Alikalipe kabili alifimbiile abantu abo ifintu fyale-endela bwino nangu ca kuti tabalekonka amafunde ya kwa Lesa. Aletontonkanya ukuti abantu abali abankalwe kabili aba cilumba, balekwatilako icuma, baleikala bwino sana kabili tabalecula no kucula. (Amalu. 73:3-7, 12) Uyu uwaimbile amalumbo alisakamikwe sana, ica kuti inshita imo alitwishike nga ca kuti mwaliba ubusuma mu kubombela Yehova. Pa mulandu wa kuti ali no bulanda, alandile ati: “Kanshi naicusha fye ifi nasangulula umutima wandi ne fi nasamba iminwe yandi pa kulanga ukuti ndi wa kaele.”—Amalu. 73:13.
7. Finshi twingacita nga ca kuti tuli no bulanda? (Moneni icikope icili pa nkupo.)
7 Kemba wa malumbo talekele ubulanda bwamupesha amano. Alicitilepo cimo. Cinshi acitile? Aileingila “mu cifulo ca mushilo ica kwa Lesa” umo Yehova alengele alamona ifintu nge fyo Yehova alefimona. (Amalu. 73:17-19) Nga tuli no bulanda, Cibusa wesu Yehova aleshiba. Nga tulepepa kuli Yehova pa kuti aletutungulula, nga tulekonka ifyo Icebo cakwe cilanda, kabili nga tulekonka ifyo atweba ukupitila mu cilonganino cakwe, tukakwata amaka ya kutwalilila ukumubombela na lintu tuli no bulanda. Na lintu tukwete amafya ayengi sana ica kuti twafilwa no mwakulosha, Yehova alatusansamusha.—Amalu. 94:19.a
Umwina Lebi uwalembele Amalumbo 73, naiminina pa “cifulo ca mushilo ica kwa Lesa” (Moneni paragrafu 7)
NGA ‘TWAPALAMA KULI LESA’ TULABA NE NSANSA NE SUBILO
8. Finshi fimbi tunonkelamo nga twapalama kuli Lesa?
8 Finshi fimbi tunonkelamo nga twapalama kuli Lesa? Ica kubalilapo, tulakwata ubumi ubusuma. Icalenga bubili, tulakwata isubilo ilyakosa. (Yer. 29:11) Nomba natusambilile ifingi pali ifi fintu fibili.
9. Cinshi tubela ne nsansa nga ca kuti twapalama kuli Yehova?
9 Tulakwata ubumi ubusuma nga twapalama kuli Yehova. Pali lelo, abantu abengi batila Lesa takwaba. E ico tabaishiba ico abantu babela pano isonde, kabili basumina ukuti ku ntanshi abantu bakaloba pano isonde. Nomba ifyo tusambilila mu Cebo ca kwa Lesa fyalilenga twashininkisha ukuti Lesa “e ko aba no kuti alalambula abafwaisha ukumubombela.” (Heb. 11:6) Na kabili Yehova atubumbile mu nshila ya kuti tulefwaya ukulamubombela. E ico tulaba ne nsansa nga ca kuti tulemubombela.—Amala. 10:12, 13.
10. Finshi Yehova alaya abamucetekela? (Amalumbo 37:29)
10 Abantu abengi tabakwata isubilo lya cine cine. Kanshi ico batontonkanyapo fye, kubomba incito, kuupa nelyo ukuupwa, kukwata abana no kupekanya ifyo bakalaikala nga baleka ukubomba incito. Tabaishiba ifyo Yehova atulaya. Nomba ifwe twalishiba ukuti Yehova alasakamana ababomfi bakwe. (Amalu. 25:3-5; 1 Tim. 6:17) Twalicetekela Lesa, cibusa wesu kabili twalishininkisha ukuti akafikilisha ifyo atulaya. Pa fintu ifingi ifyo atulaya paba ne subilo lya kulamupepa umuyayaya mu Paradaise.—Belengeni Amalumbo 37:29.
11. Bushe ifintu fituwamina shani nga twaba ifibusa fya kwa Lesa, kabili ena omfwa shani nga twaba ifibusa fyakwe?
11 Nga twapalama kuli Lesa, ifintu filatuwamina mu nshila na shimbi. Ku ca kumwenako, Yehova alitulaya ukuti nga twabembuka, akalatubelela uluse nga ca kuti twalapila. (Esa. 1:18) Ici cilenga twilatwalilila ukusakamikwa pa membu isho twacitile kale. (Amalu. 32:1-5) Na kabili, tulatemwa nga ca kuti twalenga Yehova asekelela. (Amapi. 23:15) Ukwabula no kutwishika, kuti mwatontonkanya na pa nshila na shimbi isho Yehova atupaalilamo nga ca kuti tuli fibusa fyakwe. Nomba kuti mwacita shani pa kuti mutwalilile ukupalama kuli Lesa?
IFYO MWINGACITA PA KUTI MUTWALILILE “UKUPALAMA KULI LESA”
12. Finshi mwacita pa kuti mupalame sana kuli Lesa?
12 Nga ca kuti muli Bena Kristu ababatishiwa, ninshi kale kale mwalicita ifintu ifingi ifyalenga mupalame kuli Yehova. Mwalisambilila icine pali ena na pali Kristu Yesu, mwalilapila pa membu isho mwacitile kale, mwalilanga ukuti mwatetekela sana Lesa kabili mulesha na maka yenu yonse ukulacita ifyo afwaya. Nomba pa kuti mutwalilile ukupalama kuli Lesa, mufwile ukutwalilila ukulacita ifi fintu.—Kol. 2:6.
13. Fintu nshi fitatu ifyo tufwile ukulacita pa kuti tutwalilile ukulapalama kuli Yehova?
13 Finshi tulingile ukulacita pa kuti tutwalilile ukupalama kuli Yehova? (1) Tulingile ukutwalilila ukuisambilisha Baibo. Ilyo tuleisambilisha Baibo, tatufwile ukupelela fye pa kwishiba ifishinka fimo pali Lesa. Lelo tulingile ukwishiba ifyo Lesa afwaya tuletontonkanya ne fyo afwaya ukuti tulecita. Na kabili tulingile ukulakonka amashinte ya mafunde ayaba mu Cebo cakwe. (Efes. 5:15-17) (2) Tufwile ukulakosha icitetekelo cesu ukupitila mu kulatontonkanya sana pa fyo Lesa alanga ukuti alitutemwa umo umo. (3) Tufwile ukutwalilila ukupata ifintu ifyo Yehova apata, kabili tulingile ukulataluka abantu abacita ifintu ifyo Yehova apata.—Amalu. 1:1; 101:3.
14. Finshi tulingile ukulacita cila bushiku pa kuti tulesekesha Yehova? (1 Abena Korinti 10:31)
14 Belengeni 1 Abena Korinti 10:31. Tulingile ukulacita ifintu ifingalenga Yehova asekelela. Nomba tatufwile ukupelela fye pa kulabila imbila nsuma na pa kulaya mu kulongana. Fyonse ifyo tucita cila bushiku fifwile ukulalenga Yehova alesekelela. Ku ca kumwenako, nga ca kuti tuli aba cishinka muli fyonse, kabili nga tulepeelako abantu ifyo balekabila, tulalenga Yehova asekelela. (2 Kor. 8:21; 9:7) Na kabili, Yehova afwaya tulecindika ubumi pantu bupe ubo atupeela. Kuti twatwalilila ukupalama kuli Lesa uwatupeela ubumi nga ca kuti tuleilama mu miliile, mu minwene kabili nga tulecita ifintu ifingalenga twakwata ubumi ubusuma. Nga tuleibikilishako pa kuti tulesekesha Yehova na mu tuntu utumoneka ukuti tunono, akalatutemenwako.—Luka 16:10.
Nga tule-ensha bwino imyotoka, nga tuleisakamana ukupitila mu kutukusha umubili no kulya ifya kulya ifisuma, kabili nga tulepeelako abantu ifyo balekabila, kuti twasekesha Yehova (Moneni paragrafu 14)
15. Bushe Yehova afwaya tulemona shani abantu?
15 Yehova alaba ne cikuuku ku balungama na ku bashalungama bene. (Mat. 5:45) Afwaya na ifwe bene tuleba ne cikuuku ku bantu. Ku ca kumwenako, tafwaya tulepontela umuntu nangu umo, tafwaya tuleba no lubuli, lelo afwaya tuleba “abafuuka ku bantu bonse.” (Tito 3:2) E ico nangu ca kuti abantu tabasumina mu fyo twasuminamo, tatulingile ukulamona ukuti twalicindama ukubacila. (2 Tim. 2:23-25) Tulapalama kuli Yehova nga ca kuti lyonse tuleba ne cikuuku ku bantu.
KUTI ‘TWAPALAMA KULI LESA’ NA LINTU TWALUFYANYA
16. Bushe uwalembele Amalumbo 73 atendeke ukumfwa shani pa numa ya kubombela Yehova pa myaka iingi?
16 Nomba kuti mwacita shani nga ca kuti inshita shimo muleumfwa kwati Yehova tamutemwa pa mulandu ne filubo ifyo mwacitile kale? Muleibukisha ifyo tusambilile pa walembele Amalumbo 73. Atile: “Kwashele fye kwempe amakasa yandi nga yalifumine mu nshila; kwashele fye panono amakasa yandi nga yalishelemwike.” (Amalu. 73:2) Umwine ailandiile ukuti umutima wakwe “walikalipe,” ‘taletontonkanya bwino,’ kabili ‘ali fye nge cinama icishakwata mano.’ (Amalu. 73:21, 22) Bushe ifi fyalengele alatontonkanya ukuti pa mulandu ne filubo ifyo acitile, Yehova alilekele ukumutemwa kabili tali no kumwelela?
17. (a) Finshi kemba wa malumbo acitile na lintu ali no bulanda sana? (b) Finshi twingasambilila ku lyashi lyakwe? (Moneni ne cikope.)
17 Nga ca kuti uyu kemba wa malumbo alyumfwilepo ukuti Yehova alimulekelesha, ninshi afwile aumfwile fye ifi pa kashita akanono. Cimoneka kwati ilyo ali no bulanda sana, alilwike ukuti alingile ukupalama sana kuli Lesa, nga fintu alandile. Atile: “Lelo nomba mba fye na imwe lyonse; mwalikata ukuboko kwandi ukwa ku kulyo. Mulampanda amano pa kuti muntungulule, lyena mukampaala.” (Amalu. 73:23, 24) Na ifwe bene, nga twamona ukuti icitetekelo cesu nacibwelela panshi nelyo nga natufuupuka pa mulandu ne filubo ifyo twacita, tulingile ukulalomba Yehova ukuti aletukosha. (Amalu. 73:26; 94:18) Na lintu twacita ifilubo ifikalamba kuti twabwelela kuli Yehova, kabili kuti twacetekela ukuti ‘ali-iteyanya ukutwelela.’ (Amalu. 86:5) Tufwile ukupalama sana kuli Lesa wesu, maka maka nga tuli no bulanda sana.—Amalu. 103:13, 14.
Nga twaumfwa kwati icitetekelo cesu nacibwelela panshi, tufwile ukupalama kuli Yehova ukupitila mu kulapepa kuli ena no kulalongana lyonse (Moneni paragrafu 17)
KUTI ‘TWAPALAMA KULI LESA’ UMUYAYAYA
18. Cinshi twingalandila ukutila, kuti twatwalilila ukupalama kuli Yehova?
18 Kuti twatwalilila ukupalama kuli Yehova kabili tatwakaleke ukusambilila pali ena. Baibo itila te kuti ‘twiluke’ amano ya kwa Yehova ne fintu ubwingi ifyo aishiba.—Rom. 11:33.
19. Finshi Baibo itweba mwi buuku lya Amalumbo ukuti e fyo Yehova akatucitila ku ntanshi?
19 Pa Amalumbo 79:13 tubelengapo ukuti: “Ifwe fwe bantu benu abo mucema, twakulamutootela umuyayaya; kabili twakulamulumbanya mu nkulo shonse.” Na imwe bene nga mwatwalilila ukupalama kuli Lesa akamupaala umuyayaya, kabili kuti mwalanda amuti: “Lesa e ukosha umutima wandi kabili ni Lesa wandi umuyayaya.”—Amalu. 73:26.
ULWIMBO 32 Beni Kuli Yehova!
a Abalwala amasakamika nelyo aba kuti batwalilila fye ukuba no bulanda, balingile ukuya ku cipatala. Nga mulefwaya ukwishibilapo na fimbi kuti mwabelenga Ulupungu lwa kwa Kalinda Na. 1 2023.