Yeremia Ḇyaryas Yahwe Anun Ḇyena

Yahwe kyinfir Yeremia i fa ḇye nabi faro kawasa Yehuda sya. Iwan Yeremia fa ḇyuk swarapepen faro si insama simnai sifrur roi ḇeḇyeḇa na. Ḇape Yeremia doḇe, ’Yahwe yo, ayama yabe roma babo kaker. Yafawi ḇa moḇsa na yawos ḇe kawasa ansi rai.’ Yahwe ikofen ḇe i, ’Wamkak awer. Nari yakofenḇair rosai fandun fa wawos na. Nari yafnoḇek au.’

Yahwe iwan Yeremia fa iryur manfarkin sya, imerpef ḇaḇewu saprop ro ḇarpon sena, ma ikofen ḇo doḇe, ’Yerusalem nari ḇyeḇekakok imnis radine.’ Rofyor Yeremia ifrur rarirya ido, manfarkin ansya simsor kaku. Imam ḇenir ḇe Pasyur myun Yeremia ma isun bramin ma wemin ḇyena ḇe apyaur sifrur ro aimun na. Ro roḇ ya ḇesiper, Yeremia kyain ro moḇ oser monda. Ro arwoya, Pasyur pyer i ro apyaur anya. Yeremia doḇe, ’Ibye mura kwar. Yamewer yaḇaryas anun anna wer.’ Ḇape, Yeremia isusu kwar ke? Oroḇa. Rofyor Yeremia kyara kaḇer wer, doḇe, ’Yahwe anun ḇyena namnis for ḇesak ḇero kor-kor yena dori. Na yapok yamnai yaḇaryas na ḇa.’ Yeremia ḇyuk swarapepen pdef faro er ansi.

Taun nawas mura, raja ḇebabo oso ḇyepoik ro Yehuda. Imam ma nabi ḇekaku ḇa sya simewer kaku srower Yeremia anun ḇyaryas na. Sikofen ḇe ḇeḇarara sya, ’Snonkaku ine iḇye imar mura.’ Yeremia doḇe, ’Mkomun aya ido, mkomun snonkaku ḇesasar ḇa. Ayama yakofenḇair Yahwe wos Ḇyena, wos mankun yena ḇa.’ Rofyor ḇeḇarara sya srower, sikofen, ’Mkomun snonkaku ine awer.’

Yeremia ḇyaryas pdef Allah anun Ḇyena, ma ḇeḇarara sya simsor fafayaḇa. Sor ḇe Raja fa myun Yeremia i. Raja ikofen ḇe si fa sifrur rosai monda simarisen ro Yeremia i na. Inja, sun Yeremia i ma sisaweni ḇe sumur ḇedo ḇefo marser, soḇe insama imar ro dia. Fawas mura Yeremia imbrure.

Ramnai, ḇefararur ro istana snori Ebed-melekh ikofenḇair ḇe Raja ḇo doḇo, ’Ḇeḇarara sya sisawen Yeremia i ro sumur kwar! Komam fasaw i ba ido, na imar ro diwa.’ Raja iwan Ebed-melekh fnoḇek snon ri 30 fa spaw Yeremia i ro sumur ya dori. Roi ḇekur Yeremia i nabore, ḇape imnai fa ḇyaryas Allah anun Ḇyena ḇa. Fandun fa komnis Yeremia i ḇae?