Yerusalem Ḇyeḇekakok

Snonkaku Yehuda sisoasuser ḇa faro Yahwe I ma sisyom ker ḇe allah-allah ḇekaku ḇa. Ro swaf taun ḇe taun, Yahwe ḇyesewar fa ifnoḇek si. Iwan nabi sibor sya fa sḇuk swarapepen ḇe si, ḇape simewer srower si. Iba syadi skoryae nabi ansine. Rariso Yahwe ifrur ḇaḇesamsyom amfyanir sena fa namnai?

Raja Babilon, Nebukhadnezar, ifrur kafyo er nabor kwar. Rofyor ifrur kafyo Yerusalem ro randak kaku, fyor Raja Yehoyakhin, ḇeḇarara, sordade, ma kamasan sya kako, ramnai dun si ḇe Babilon. Dun roieḇor ḇekakur kaku nakam ro Yahwe bait ḇyeja kako. Mura, Nebukhadnezar kyinfir Zedekia i fa ḇye raja ro Yehuda.

Randak ya, Zedekia isouser faro Nebukhadnezar. Ḇape, er-er ḇefanam ḇero diansya ma nabi ḇekaku ḇa sya sanun ḇe Zedekia i fa ḇyembroḇ faro Babilon. Yeremia ḇyuk swarapepen ḇe i, ’Ḇembroḇ si ido, nari mamamun, basbiser, ma dafduf naisya ro Yehuda.’

Fafisu swaf taun riwar Zedekia ḇyepoik kwar mura, ḇyembroḇ faro Babilon. Dor fafnoḇek ro sordade Masir sya. Mura, Nebukhadnezar iwan beri sordade ḇyesi fa sra smun Yerusalem, ma sḇarek yaryar mnu ani. Yeremia ikofen ḇe Zedekia, ’Yahwe ikofen wasusubur Babilon ido, nari Tuan au ma mnu ine mkosmai fasaspar. Oroḇa ido, na snonkaku Babilon sya srap Yerusalem ma sisun Tuan au ḇe bui.’ Zedekia doḇo, ’Nari yasusu ḇaberi!’

Taun oser paik riwonem mura, sordade Babilon skakok ayar karui Yerusalem, sun ma srap mnu ani. Srap bait ya, smun snonkaku ḇebor sya, ma sfor snonkaku risyaran sya.

Zedekia ifrar ibur Yerusalem, ḇape snonkaku Babilon siyomuser i. Sfor i ro moḇ fanam ḇe Yerikho ma sun i ḇe Nebukhadnezar. Smunbos romawa ḇyesya ro ḇarpon ḇyedi. Ramnai, Nebukhadnezar ifrur Zedekia mkamor ḇyena napraf ma isun i ḇe bui. Ḇarpurya, Zedekia imar ro dia. Ḇape, Yahwe ḇyeasas faro snonkaku Yehuda sya, ’Swaf taun ri 70 raposa, nari yun mko fa mkobur ḇe Yerusalem wer.’

Romawa babo ono sisya sun si kako ḇe Babilon. Rosai na ḇekur si? Nari sisoasuser pdef faro Yahwe I ke?