September

Yesus dakfasnai rari ḇaḇaḇir oser ine faro Marta ma Maria su. Fafisu myam sufarfardun snaro srar suḇedi Lazarus imar, ”fyor ani Yesus kyanes”. (Yoh. 11:32-35) Kyanes snaro bati ḇyedine ibur i kwar monda ḇa. Yesus ifawi kako, kerower na ḇyawes kaḇer Lazarus i. Mboi, snar bati ḇyansuya susneso, inja Yesus sneri iso su ḇo dakanes. Fyor kofawi Yesus ifawi mnis snonkaku ḇese sneḇaḇir sena, nane nun fainda faro ko. Koswar i snar ifrur pyum snonkaku ḇesesya kuker sawarwar. Fafisu kofawi Yesus isya ḇyepoik ḇe Raja ro Karajan Allah ro kirine, ine syambraḇser ko. Kerower, nari ipyos kandera nakam. Fafisu iwara Yesus ikenem ḇe snonkaku ro supswan, inja myam ro mankundi fafardun ma kandera snonkaku sismai na snar Setan i. Rarirya, Yesus iso ḇesrow kaku fa ḇefaspar snonkaku koine. Kakuḇae na komarisen kaku kakna Raja ”ḇemam monda ko ro raryar ḇa koḇena”.​—Ibr. 2:17, 18; 4:15, 16. w19.03 17 ¶12-13

Na kaksowarpu fa kofnoḇek snonkaku ḇese sya fa sakfarkor infa sifawi Allah I. Bape, koiso ḇeyuf ḇar ḇefandun kaku ro fararur ine ḇa. (1 Kor. 3:6, 7) Yahwe iso ḇeyun snonkaku sya faro I. Kofawi snonkaku oso imarisen ryower ke roba ine ndramuma ro sne ḇyedi. (Mat. 13:4-8) Koswarepen Yesus ima Guru ḇeba syadi irya, mboi snonkaku ḇeḇorsya spampum ankankinem ḇebye byaryas na! Inja, kosewar kaku kwar fa kofnoḇek snonkaku sya ḇape simewer srower ko ido kopok koḇesanekar awer. Rofyor kofasna rari ḇaḇaḇir oser ine ro ḇaḇeḇaryas koḇena ido, nari kosma fainda. Ine na nafrur fa koryaḇ syadi wer. Na komarisen syadi snar koḇuk kwar. Ma snonkaku ḇena swaruser ḇemnis faro ”kankenem ḇemnaiḇa sya” na napyan ḇe si kako fa srower ankankinem ḇeḇye ya. (Kis. 13:48) Inja, ”rofyor kosma fafisu ine, mkorama kofrur roi ḇeḇye faro snonkakusya kam”. (Gal. 6:10) Rariryaido, nari koryaḇ syadi snar kosandik Kma koḇedi ro nanki.​—Mat. 5:16. w19.03 25 ¶18-19

Raja Daud fyas, ”Yahwe ima iba kaku ma isyus kaku fa ismai sanandik.” (Mz. 145:3) Daud iswar Yahwe I, ma saswar ḇyena nadif i fa isandik Allah ”ro fandu jemaat sya”. (1 Taw. 29:10-13; Mz. 40:5) Ro baboine, nyan oser kosandik Yahwe iso koḇuk kankarem ro fananjur koḇena. Kokame komarisen korower kankarem sḇuk na ro fananjur koḇena. Komarisen komnaf romawa oso ḇyuk kankarem ḇeknampu ndramuma ro sneri. Rofyor oso iryaḇ kaku fa ḇyuk kankarem ḇekur kakaku insape ifawi na, nane nadif kosnesna. Iḇye syadi, fyor sia simai ḇaido sfarkor babo wos koḇani mboi ’simkak ḇa’ fa sḇuk kankarem ido, na koḇesyowi si kaku. (1 Tes. 2:2) Moḇsa kofasnai syowi faro sasewar senane rai? Kokofen kasumasa ḇe si snar sḇuk kankarem ḇesambraḇser ko ro fananjur ya. Osower ya iso koḇuk kankarem mankun koḇena. Rarirya ido, na kosmai samaraḇraḇ ro fananjur ya monda ḇa mboi kosambraḇser ḇesesya kako.​—Rm. 1:11, 12. w19.01 8 ¶1-2; 9 ¶6

Snon risamfur sisya sismai roi ḇeḇyeḇa kaku. Siduf pado, ma na jadi fa siprei ḇa. Ḇape, ras oso smam Yesus ro swaf ḇebinkwane. Srower kwar Yesus ḇyuk pararei faro dafduf nakam. Inja, siyiw ḇo soḇo, ”Yesus, Guru, waswar inko!” Mura Yesus ḇye si fa siprei beri. Kakuḇae, sikame na sesyowi kaku Yesus ḇaḇenaḇye ḇyena. Ḇape, oso ro fandu si fyasnai syowi faro Yesus i, ḇyaḇir ro sne ḇyedi monda ḇa. Snon ḇeprei ani ryamaker Samaria. Sneri idif i fa isandik Allah ”kuker mkaren ḇeba”. (Luk. 17:12-19) Raris snon Samaria ani, komarisen kofasnai syowi faro snonkaku ḇefrur pyum konsya. Yahwe fyasnai kwar nyan ḇe ko fa kofasnai syowi. Nyan oser ifrur ya iso ḇyebarakas snonkaku ḇefrur marisen Ḇyena sya. (2 Sam. 22:21; Mz. 13:6; Mat. 10:40, 41) Refo ya kako danun ḇe ko fa ’koso asuser Allah, imnis romawa iswar kaku’. (Ef. 5:1) Inja, roi ḇefnai kaku fa kofasnai syowi ya iso snar komarisen kosoasuser Yahwe nyan Ḇyena. w19.02 14 ¶1-2; 15 ¶4

Inai mkun oso ro rumfarkor, kuker myaren ikofen na dakso ḇa ro ras ḇeba Yahwe imewer kaku. Snonkbor oso imamyai mboi ḇyaryas ro rum ḇe rum. Bati ḇyedine kyoryae ker Saksi Yahwe sya. Ḇesyabo, ḇyaryas pdef ro rum ani. Snon oso fyararur marḇak kwar fa fyamfon fandandun ro kina ḇyesi ma bos ḇaido amber ḇyani dor i fa ifrur roi ḇenapes ḇa. Ifawi imewer ido na sisae i ro moḇ fyararur ro ya. Mboi fyasnaiḇadir fandun fa ifrur roi ḇenapes ma isouser faro sasoser na snar iso Allah marisen Ḇyena faro manfamyan Ḇyesi nairi. (Rm. 13:1-4; Ibr. 13:18) Mam ido, rari rosai skofasnai na? Imbude na wap rari ḇeḇeso, raris ḇaḇebri ma ḇaḇekakaku. Ḇape, skokame skofasnai rari ḇefandun kaku oso isoine soasuser faro Yahwe I. Soasuser nadif sko fa skomewer skoyuk Allah sasoser Ḇyena. Yahwe na imarisen kaku faro sko oser-oser snar skofasnai rari anya. Komarisen kakfrur Kma koḇedi ro nanki imarisen faro ko kako. w19.02 2 ¶1-2

Ḇepon kaku ya Sasoser Moses kyadaunwarek snonkaku ḇepok fa ḇekadaunwarek mankundi ḇa, raris ḇeḇe awak sya, kabom, ma kawasa ḇemandaman sya. Allah ikofen faro mankara ḇero Israel sya, ”Rofyor mkoḇemankara snonkaku mandaman ḇaido romawa awak sya, mkopambar awer ḇaḇenanapesya, ma mkoposerbur awer sansun ro kabom oso fa ḇe fadwer roi dun kwar anna.” (Ul. 24:17) Yahwe fyasnaiḇair saswar Ḇyena faro snonkaku ḇefandun syadi fafnoḇek sya. Ma Yahwe ḇyuk samamyai ḇe snonkaku ḇefrur pyum si ḇa sya. (Kel. 22:22-24) Yahwe imarisen insama snonkaku ḇeyuf fakamamar sya fa siswar ma smamwarek snonkaku ḇero fadadiren sena. Dayin kaku farḇakḇuk famfnom sairirya kam. Ma myam kaku insama ḇefandun fafnoḇek sya sekadaunwarek si kuker nanapes. (Im. 18:6-30) Kokyar Yahwe ifrur pyum ko kuker nanapes ido, nari koswar kaku I. Ma, rofyor koswar Allah ma sasoser ḇenapes Ḇyena ido, nari nadif ko fa koswar min koḇansi ma kofrur pyum si kuker nanapes. w19.02 24-25 ¶22-26

Kokarapan contoh ḇefasnai moḇsa kokadaunwarek mankunko rai insama Setan kakara ḇyena nawyaye awer ko. Yahwe fyarkor ko kwar ”farbuk ma roi ḇemamas roḇa fararur famfnom [fandun fa] neḇekofen awer rofandu [ko]”. (Ef. 5:3) Ḇape rosai nari kofrur ya rofyor min fararur ḇaido bati ro rumfarkor sfawar roi ḇekur fararur farḇuk ya? Manwarwaren ḇaido sneuser koḇena, na nbuk swarapepen ḇe ko. (Rm. 2:15) Ḇape na korower na ke? Imbude komarisen fa korower rosai sikofen na ḇaido komam sonin sirwas na. Ḇape, fandun fa kopampum na kuker kofadwer awawos anna ḇaido kobur si imnis ra koken kerwa ḇeba ḇero mnu ya. Kofandun ḇaḇebri fa kopampum farawrowes ro bati koḇesya fa kokara ḇaido kofrur roi ḇesasar na. Kokyar kaku Yahwe myam sasewar koḇena ma nari ḇyuk samambraḇ ma fawawi nanem kofandun na infa kopampum Setan kakara ḇyena.​—2 Taw. 16:9; Yes. 40:29; Yak. 1:5. w19.01 17-18 ¶12-13

Salomo ima nya arasai nabor kaku ma nya papoik ḇeba kaku. Dawos ḇe mankundi, ”Nari yasewarpan fa yaḇero marasriseni ma yamam bon rosai na yasmai ya.” (Pkh. 2:1-10) Inja Salomo ḇyawes rum ḇepyum kaku, ifrur yaf ḇepduk kaku, ma rosai monda imarisen na. Isya ismai aski ma doryaḇ ke? Fafisu Salomo myam kaḇer roi ifrur kwar na, ikofen wos ḇero mnuk rasine. Wun farkarkor ro Salomo fawar ḇyedine ke? Sia sifrur sasar ma sismai bon ḇeḇyeḇa kwar insape sun farkarkor ro na. Yahwe imewer wasmai roi ḇeradine. Imarisen rwower ma wasouser faro I. Ine nefandun kakyar, mboi na wafafko ḇaḇeri faro rosai kwinfir ro kenem Bedi snar kakyar Bena. Ma Yahwe nari ipok fa ḇyefnder ḇaḇeri saswar wafasnai kwar faro snonsnon Ḇyedi. (Ibr. 6:10) Inja, swewar fa ḇawes kakyar ḇesambraḇ. Rarirya na kwinfir roi ḇepyum ro kankenem ma mam ro mankundaw Mami Bedi ro nanki, Yahwe I, imarisen wasmai roi ḇepyum.​—Mz. 32:8. w18.12 18 ¶14-15

Snonkaku ḇena Allah karkara Ḇyena ima ikyar faro Allah ma syewar fa myam roi nakam raris Allah mamam Ḇyena. Imarisen Yahwe fyarkin i ro kankenem ḇyedi ma dun snemuk fa isouser I. (1 Kor. 2:12, 13) Daud ḇyuk farari ḇepyum ro snonkaku ḇena Allah karkara Ḇyena. Idisen, ”Fararmyan faro Yahwe iso ḇar ayedi.” (Mz. 16:5) Daud ikofen kasumasa faro ”ḇar” ḇyedi, iso fararmyan faro Allah ma ḇaḇebati ḇefanam kuker I. Daud syewar kako fadadiren ro I. (Mz. 16:1) Bon ya? Doḇe, ”Yaryaḇ kaku.” Ḇaḇebati ḇefanam kuker Yahwe iso monda ḇefrur fa Daud iryaḇ kaku! (Mz. 16:9, 11) Snonkaku ḇesewar pipi ḇaido marasrisen monda, na sipok sismai raryaḇ ḇeba raris Daud i ḇa. (1 Tim. 6:9, 10) Wakyar faro Yahwe ma wafarmyan ḇe I ido, nari kenem Bena nefainda kaku ma wasmai marasrisen. Inja, rosai na wafrur ya insama kakyar Bena nako? Fandun fa buk oras Bena faro Yahwe I kuker wawasya Wos Ḇyena, mam pyum braur ḇepyum ifrur kwar na, ma kwarauser rari ḇepyum Ḇyena, raris saswar Ḇyena maro au.​—Rm. 1:20. w18.12 22-23 ¶7-8

Paulus dawosḇair farḇakḇuk ine rarirya monda ḇa. Isya ikofen faro snonkaku Kristen insama fandun fa sesyowi farḇakḇuk ya, smam na ḇe roi ḇefandun kaku. Wakmam farḇakḇuk ya ryariri ke? Iḇye syadi faro ḇefarḇuk kwar Au ya, ḇesyowi farḇakḇuk mankun Bena ke? Mam farḇakḇuk ya ḇe roi ḇefandun kaku ido, Ausya waso Yesus nyan ḇepyum kaku ḇyena. Yesus mankundi ḇyesyowi kaku farḇakḇuk ya. Ras oso, snonkaku Farisi sifuken i ḇekur imbeswa ḇeḇesisye ro farḇakḇuk ya. Yesus kyarem kuker dap kaḇer rosai Allah ikofen faro farḇakḇuk ḇerandak ya: ”Inja snon oso nari ibur kmari ma snari su ma ḇye oser kuker swari, isof suḇe kraf oser.” Ikofen wer, ”Rosai Allah fyesepen kwar, snonkaku sya sipok sfaspar awer.” (Mrk. 10:2-12; Kej. 2:24) Allah iso ḇefrur farḇakḇuk ḇerandak rofandu Adam ma Eva su. Imarisen insama suḇeoser ro farḇakḇuk suḇena isof fyoro. Inja, ipok ikofen ḇe su fa suḇesisye ro farḇakḇuk suḇena ḇa. Yesus ifawi roi nane ma nya mamam raris moḇ Allah myam na rai. w18.12 9-10 ¶2-4

Rofyor kofarkor kakaku ya kwar, kofawi fandun kaku fa kosouser Yahwe parenta Ḇyena. Mboi, fafisu kosur pdef ro kakyar ya, kofarkor nabor Yahwe karkara Ḇyena wer, roi imarisen ma imarisen ḇa na, ma moḇsa myam roi nakam rai ma nfara ko fafisu kofrur snemuk. Komarisen fa kokara raris Yahwe karkara Ḇyena. Mboi fyorno ido samswen fa kokara raris moḇ kyara raya, snaro koine snonkaku ḇenapes ḇa kaker. Imnis raris, kofawi rariso Yahwe mamam Ḇyena faro kenem ḇesren, nana arasai, fararur ḇaḇeḇaryas, sḇuk sasar rik ya, ma eḇesena. Mboi na samswen ḇe ko fa kofawi rosai ḇefnai fa myam na ryariri. Inja, moḇsa na kofarkor fa kokara raris Yahwe karkara Ḇyena rai? Kankarem ḇyena neknam ro moḇsa kakara koḇena namnis rofyor kofarkor Refo, kofawi karkara Ḇyena, kokarauser na, ma kosewar fa kona karkara Ḇyena. w18.11 27-28 ¶2-4

Habakuk ikenem ro fafisu ḇesamswen kaku. Snonkaku ḇero ris ḇyedi siḇarḇor ma sirarmomen, ma naine nafrur fa ḇyesneso fafayaḇa. Myam mboi snonkaku Israel sifrur pyum ma siswaryae si ḇa. Habakuk kyara ḇo ifuken, ’Fafisu risai roi ḇeḇarḇor ine ipromes? Rosai ḇefnai fa kawan kaku insape Yahwe ifrur na fa namnai?’ Ḇyaḇir iḇor iḇerari. Inja dor kaku ḇe Yahwe fa ifrur roi oso. Imbude Habakuk kyara Yahwe iswar kawasa Ḇyesi ḇa kwar ḇaido na ifrur roi ono ḇa. Ras oso ḇaḇir rarirya kako ke? Habakuk ifuken fakfuken nane snar ikyar faro Yahwe ma asas Ḇyena werḇa ke? Oroḇaḇeri! Habakuk dor faro Yahwe I fa ifnoḇek i ro makakwarek ma samswen ḇyena. Ine kyurfasnai Habakuk isusu ḇa mboi ikyar pdef faro Yahwe I. Kakuḇae, Habakuk ḇyeḇirḇar ma ikmome. Ifawi mnis ḇa roi ḇewar fa Yahwe iwaf kaker fa ifrur roi oso ma myam monda ḇyekandera kaku. w18.11 16 ¶4-5

Raris, Petrus ma Andreas su, suma mandaswan suiri. Mboi fyor Yesus dor su fa suyakḇe manfamyan ḇyedi, subur fararur suḇenane. (Mat. 4:18-20) Ine kyurfasnai ḇa rofyor kofarkor kakaku ya ido, fandun fa korir kobur fararur koḇena, kukro Refo doḇe fandun fa kofararur fa komamfaduru kina koḇesya. (1 Tim. 5:8) Mboi fyor kofarkor kakaku ro Refo, nyan komam nana arasai na nefadadwer. Na kofawi rosai ḇefandun syadi ro kenem koḇena. Ine iso binkbor oso ḇenir ḇe Maria roi dakfrur ya. Maria nya aw fa ikir syadi ro farfnak golf insama ismai pipi nabor. Mura ro fafisu anya, dakfarkor Refo. Iswar rosai fyarkor kwar anna ma iso na ro kenem ḇyedi. Maria ifawi na samswen fa myam wis ḇyena kuker Yahwe I ma ro swaf anya kako ifnak golf. (Mat. 6:24) Inja, dun snemuk fa ibur aw ḇyena fa ismai pipi nabor faro roi ḇepyum syadi. Kirine, dakḇe perintis ma doḇe, ”Yaḇeaski syadi ma kenem ayedine ḇyefainda syadi.” w18.11 5-6 ¶9-10

Fafisu Yesus ḇyeumur taun ri 30, ḇye sukan ai werḇa ma ḇye guru snar ifawi ine iso fararur ḇefandun kaku fa ifrur nairi. Doḇe fararur ḇaḇeḇaryas ankankinem ḇeḇye Karajan Allah naiso ḇefnai fa Allah iwan i ḇe supswan ine. (Mat. 20:28; Luk. 3:23; 4:43) Yesus fyakapon ḇaḇeḇaryas ankankinem ḇeḇye ro kankenem ḇyedi, ma imarisen snonkaku ḇesesya sakfrur rarirya kako. (Mat. 9:35-38) Ḇebor ro koinema sukan ai siko ḇa, mboi kokame koma guru ḇeḇuk farkarkor ankankinem ḇeḇye faro ḇesesya. Fararur ine fyandun kaku snar Allah iso ḇeyuf na. Refo dap ko ḇe ”min ḇefararur kayam fnoḇek Allah”. (1 Kor. 3:9; 2 Kor. 6:4) Kona kakara ḇemnis manḇefas mazmur ḇekofen, ”Knam ro wos Bena iso kakaku.” (Mz. 119:159, 160) Yahwe wos Ḇyena nama kakaku nairi. Iso ḇefnai fa komarisen kokir fa koḇaryasbos wos ḇekaku anna ro fararmyan koḇena. (2 Tim. 2:15) Inja kosewar kaku fa kokir syadi ro koḇuk Refo, roi ḇepon kaku fa koḇukifarkor snonkaku ḇesesya fa sifawi Yahwe, Yesus, ma Karajan Allah. w18.10 9 ¶1-2

Snonswa dakso ḇeḇeḇukor ro i isoine Yesus Kristus nyan ḇyena ido, nari napyan ḇe swari fa ”ḇyesyowi” kaku i. (Ef. 5:22-25, 33) Ma rofyor binswa ya ḇyesyowi swari ido, na syewar fa ifawi mnis swari sneḇaḇir ḇyedi ma ifrur pyum i. Fafisu sinan sya skarauser pyumyae si ido, na sfasnai nyan ḇepyum faro romawa sesya. Sfarkor romawa sesya kako fa skara snonkaku ḇesesya ma sifrur pyum. Imnis raris, sfarkor si insama sifrar mura-muma awer ro Balai Karajan. Ḇaido rofyor sanan kayame, na sikofenḇair ḇe romawa sesya fa siwaf isof ḇesinan kwar sya sun ḇepon roḇean sena. Inja, fandun fa koḇuk wos sandik faro romawa oso rofyor ifrur roi ḇepyum raris iseḇen kedwa ya faro ko. Romawa ani na imarisen, ma dakfarkor fa ifawi koḇuk ido nari koḇeaski syadi ḇardibur ro kosmai ya. w18.09 28 ¶5-6

Akurfasnai kosmai ro Yesus Kristus, Raja koḇedi, na nafnoḇek ko ro baboine ma rasras naiwama. Kosewar fa komam monda faro fainda kosmai ro koso mnis fararwei ḇebabo na. Fafisu wafrur nadi ro kina, na wawos moḇsa fararwei sifrur ro fananjur ḇaido ro ḇaḇeḇaryas nafnoḇek kwar kina Bedi raya. Koswarepen snar koso mnis akurfasnai ro Yahwe organisasi Ḇyedi na nun barakas nabor ido, nari napyan ḇe ko fa koso mnis akurfasnai anna ma kosmai aski. Imnis raris, snar kofrur publikasi nabor werḇa imnis ḇepondi, inja kosae kumpan nabor ḇa. Ma snar koḇuk teknologi ḇebabo, inja bisa korwas ankankinem ḇeḇye faro snonkaku sibor syadi wer. Inja koḇuk publikasi elektronik na, audio, ma vidio nabor syadi wer. Ine iso nyan oser fa kosonem Kristus ḇemarisen ko fa koḇuk pyum farsarser kumpan sḇuk ḇe Organisasi na. Fafisu kosonem akurfasnai ro Kristus i, koisya kofnoḇek naek srar koḇesya fa sna kakyar ḇesambraḇ ma sḇeoser syadi. w18.10 21 ¶17-19

Kosawarwar raris Yahwe ido, na koḇuk saneprei faro si imnis rosai sor ro nadi sena! (2 Kor. 1:3-6) Ḇape, kokara awer naek srar na sifrur sasar ḇa. Fandun fa kona kakara ḇemnis. Kokara na sifrur roi ḇenapes ḇesya kwar ido, nari kofafko. (Pkh. 7:21, 22) Koswarepen Yahwe ima dor syadi ro samambraḇ koḇena ḇa. Inja, fandun fa kokḇaḇyae ko. (Ef. 4:2, 32) Komewer kofrur naek srar koḇesi skara sima sifrur nabor ḇa ḇaido koḇukimamkara si kuker ḇesesya. Imbape, kosambraḇser si ma komam roi ḇepyum sifrur kwar na. Ine na nafnoḇek si fa sḇeaski ro fararmyan sena ḇe Yahwe I.​—Gal. 6:4. w18.09 12-13 ¶16-17

Yesus myam ifrur Allah marisen Ḇyena ima imnis raris roḇean. Kokara kada, kan roḇean ḇepyum ido nari nafrur fa komarisen ma baken koḇena nsambraḇ ḇae. Imnis rarirya kako, kofrur Allah marisen Ḇyena ido nari nafrur fa komarisen ma nsambraḇser kakyar koḇena. Kofrur rosai Yahwe dor ido, nari kofawinanem. (Mz. 107:43) Ma snonkaku ḇena fawawinanem, nya roi ḇepyum nabore. Refo doḇe, ”Roi wamarisen nakam napok namnis kuker i ḇa. . . . Ima imnis aiknam kankenem faro snonkaku ḇeserepen ro i, ma snonkaku ḇeserepen nako ro i nari sor si sḇeaski.” (Ams. 3:13-18) Yesus doḇe, ”Rofyor mkofawi roi nane kam kwar, ma rofyor mkofrur na ido, aski faro mko.” (Yoh. 13:17) Fafisu Yesus manfamyan ḇyansi sifrur rosai Yesus ikofen faro si, nari sḇeaski. Sasouser faro farkarkor ma nyan ḇyena nama nyan kankenem senairi. w18.09 4 ¶4-5

Adam ma Eva suyemir ḇeḇarek ro yaf Eden, mboi fandun fa sukara snonkaku ḇesesya. Rosai ḇefnai ya? Yahwe ḇyuk fararur ḇe su kwar fa sukapar romawa insama sibor ro supswan ma sufrur na ḇe firdaus. (Kej. 1:28) Ipyum ya iso Adam ma Eva sumarisen romawa suḇesya sismai aski ro fafisu iyama, imnis Yahwe imarisen snonkaku syakam sismai aski ndraya. Sikam na sifararur kayam fa sifrur supswan ine ḇesiper ḇe firdaus. Inema fararur ḇefarfnak risyaḇa! Snonkaku ḇemnis kaku sya kako fandun fa sifararur kayam kuker Yahwe I fa sifrur supswan ine ḇe firdaus ma marisen Ḇyena fa ndarirya. Rarirya kada, nari sisun ro Allah ras mananai Ḇyedi. (Ibr. 4:11) Kokarapan kada, fararur ine nari nun marasrisen ma raryaḇ ḇeba kaku! Yahwe nari ḇyuk barakas nabor ḇe si snar sifandun mankunsi ḇa ma siswar snonkaku ḇesesya. w18.08 15 ¶2; 17 ¶ 8-9

Rosai na wafrur rofyor snonkaku sya sfawar roi ḇekaku ḇa ḇekur ḇe Au? Ine iso ḇekur Yesus ma Yohanes Ḇeḇebaptis su. (Mat. 11:18, 19) Rosai Yesus ifrur ya? Imewer ifnak oras ma samambraḇ ḇyena fa dawoswarek i ro farfyar ḇekaku ḇa na. Mboi, danun ḇe snonkaku sya fa sifawi roi ḇekaku ya. Imarisen insama smam monda faro roi ifrur ma fyarkor faro si na. Yesus doḇe, ”Allah fawawi Ḇyena nfasna napnapes ro fararur ḇyena.” (Mat. 11:19) Kosmai farkarkor ḇefandun kaku ro Yesus i. Fyorno ido snonkaku sya na sawos ankarkar ḇaido sikofen roi ḇekaku ḇa ḇekur ko. Imbude komkak roi anna nari nafnai fa snonsnon koḇena naḇye ḇa. Mboi, moḇ kokenem raya nari nafrur fa snonkaku sya sakfawi mansei kaku ko. Raris kofarkor ro Yesus i, kenem ḇepyum koḇena na nfasnaibos roi skursof yoḇ kona namnis kam ḇa ma nkaku ḇa. w18.08 6-7 ¶11-13

Refo ikofenḇair kuker snonkaku ḇesouser ḇa raris Kain, Salomo, ma snonkaku Israel syakam sna swaf fa simbror ma sfadwer kenem sena. (Kis. 3:19) Nasnai kaku, Yahwe syewar kaku fa ifnoḇek kawasa Ḇyesya fafisu sifrur sasar. Kokarapan kada rariso ḇyuk ampun ḇe Harun i rai. Baboine, kuker sawarwar Yahwe ḇyuk swarapepen ḇekadaunwarek ko ro kofrur roi ḇesasar na. Ḇyuk Refo, publikasi koḇena, ma iba syadi wer ḇyuk naek srar Kristen koḇesi fa sifnoḇek ko. Rofyor kosouser Yahwe swarapepen Ḇyena ido, kokyar kaku nari fyasnai sawarwar ḇe ko. Yahwe sawarwar Ḇyena nun fainda ḇe ko. (2 Kor. 6:1) Ine ḇyuk swaf ḇe ko ”insa kobur ḇarḇorna ma rmomen supswan ine”. (Tit. 2:11-14) Ro Setan dunya ḇyedine, nari kosmai fafisu ḇebor ḇefrowes sas soasuser koḇena faro Yahwe I. Kun snemuk fa kowaira ḇe Yahwe I pdef kuker kosnesna nasiper! w18.07 20 ¶20-21

Rosai na ḇefnoḇek ko fa kosewar kaku insama kosmai Yahwe marisen Ḇyena mboi dunya ine ḇa? Fandun fa kokarauser roi ḇefandun kaku risuru. Ḇeoser ya, Yahwe ḇyuk marisen Ḇyena ḇesya kwar faro snonkaku ḇefarmyan ḇe I kuker soasuser. (Ibr. 6:10; 11:6) Yahwe ḇyesyowi kaku manfamyan ḇesoasuser Ḇyesi oser-oser. Inja, rofyor fyanander si ido ḇyaḇir nama ifrur roi ḇenapes ḇa nairi. Ima ”ifawi nyan kankenem snonkaku ḇenapes sya” ma ifawi moḇsa fyaspar si rai. (Mz. 1:6; 2 Ptr. 2:9) Ḇesuru ya, kokarauser na iso Yahwe na ḇyuk marisen Ḇyena ḇe ko kuker nyan kokara ḇaim na. Rofyor snonkaku sya sifrur roi ḇepyum insama ḇesesya sisandik si ido, nari Yahwe ḇyebarakas si ḇa. Rosai ḇefnai ya? Snaro raris rosai Yesus ikofen na, sismai ḇaḇyak sedi kwar. (Mat. 6:1-5) Ḇape fyor snonkaku ono sifrur roi ḇepyum mboi ḇesesya smam na ḇa, Yahwe ”ḇemam roi ḇeyokef” myam roi anna. Myamepen rosai sifrur na, ma ḇyebok ḇaido ḇyebarakas si. w18.07 5 ¶8, 10

Petrus kyara ro sneri rosai knam ro fasasna ani. Fyoro ḇa mura, Kornelius manwawan ḇyesi srama. Rur ḇesren ikfin Petrus fa ryaḇe Kornelius rum ḇyedi fnoḇek snonkaku iwan sya. Rofyor Petrus ḇyemankara ’imnis rosai myam na’ ido, na ipok ryaḇe Kornelius rum ḇyedi ḇa. Snonkaku Yahudi sya sakraḇe snonkaku Kafir rum sena ḇa. Inja rosai ḇefnai fa Petrus rya? Petrus dakmamfarfir snonkaku ḇe Yahudi ḇa sya kako, mboi fasasna myam anya ma farkankin ro rur ḇesren nfadwer mamam ḇyena. Rofyor Petrus ryower Kornelius i ramnai, doḇe, ”Kaku ḇeri yafawi kwar, Allah [myamfarfir] snonkaku ḇa. Snonkaku oser-oser ro er rosairya kaker, ḇeyararyof ma ḇeḇesyowi Allah kuker napnapes imarisen si.” (Kis. 10:34, 35) Ine fawawi ḇebabo ḇeba kaku faro Petrus i. w18.08 10 ¶3-4

Kakuḇae na koḇinkwanbur roi Yahwe imewer na. Mboi rofyor kosmai samswen oso ḇo sasoser ḇesnaibos ro Refo naisya ḇa ido rosai na kofrur ya? Moḇsa na kofawi rosai Allah imarisen na rai? Koḇuk sasoser ḇero Refo fa nfarkor sneuser koḇena ido, nari kofawi rosai fandun fa kofrur ya. Snar Yahwe iswar ko, inja ḇyuk ḇe ko wos farkin nari ḇefarkin sneuser koḇena. Doḇe, ”Aya, Yahwe, iso Allah mkoḇedi, ḇefarkor mko faro payamyum mkoḇena, ḇefarkin mko ro nyan ḇefandun fa mkombran ro na.” (Yes. 48:17, 18) Rofyor kokarauser wos farkin ro Refo ma kokram na ro kosnesna ido, sneuser koḇena na nfarkin pyum syadi ko wer. Rarirya, nari nafnoḇek ko fa kofrur snemuk ḇepyum. Wos farkin ro Refo na nfarkin swaruser koḇena ma nafnoḇek ko fa kofrur snemuk ḇepyum. Kofarkor Yahwe wos farkin Ḇyena ido, na kofawi pyum Yahwe nyan kakara Ḇyena ma rosai ḇefnai fa ifrur sasoser oso. w18.06 16 ¶5; 17-18 ¶8-10

Ḇeyakso Herodes i sya, siso ḇemarisen faro Herodes kakara ḇyeja, sisewar fa sifrowes Yesus i. Skara ḇo soḇe rofyor Yesus ikofen sḇak awer som ani ido, nari siksof i ḇe mbroḇ faro Karajan Romawi. Ḇape, rofyor Yesus ikofen fandun fa sḇak som ani ido, nari kawasa sya sibur i ḇeri. Inja, rosai Yesus ifrur ya? Yesus isasor i kaku insama iwaira faro oso ḇa ro roi ḇeḇesyana ḇesya kwar. Yesus ifawi ḇeyor som sibor sya sankarkar, mboi myam faro roi anna ḇa. Ḇape, kyara ḇe Karajan Allah monda naiso ḇeḇuk nyan ḇesae ḇekaku faro samswen ḇekur snonkaku sya. Yesus fyasnai nyan ḇepyum ḇe ko. Imbude na komam partai polotik oso rya ipyum ma inapes, mboi partai ḇeseya wer rya ipyum ḇa ma inapes ḇa, ḇape kopok kowaira awer faro ḇar oser ya. Snonkaku Kristen sima sikyar faro Karajan Allah ma sikyar rosai dawos nama roi ḇekaku. Iso ḇefnai fa, rosai snonkaku sya sifrur ḇe roi ḇenapes ke roḇa, na kakkofenḇair awer kakara koḇena ḇaido kawos pampum awer si. (Mat. 6:33) Saksi Yahwe sibor randak ya saksowarpu ro fararur polotik, mboi siso na werḇa kwar. w18.06 6 ¶9-11

Setan ifrowes si kuker fararur farḇuk monda ḇa, ḇape imbude ḇyeasas kako faro si nari ḇyuk papoik fa sḇepoik snonkaku syakam. Kuker nyan ine, Setan ḇyensewar fa idwarek rosai Yahwe ikofen kuker ’up ro bin’ ani. (Kej. 3:15) Yahwe myam monda i ḇa. Ifrur Fabruḇ ḇeba ya fa idwarek Setan ma rur ḇemaḇak ansya aw sena. Inja, fararur farḇuk ma ararer nama ara ḇesrow kaku. Malaikat-malaikat ḇeyaksowarpu Setan ansya, ro randak ya sima sḇarek kayam kuker Allah ro nanki fyoro kwar. Ḇape, sibor siso marisen ḇesasar sena monda, ma muniwara marisen ḇesasar anna nsambraḇ syadi. Koswarepen koma kofarmyan ḇe Yahwe I fyoro kwar ke roḇa, marisen ḇesasar bisa nasur ro kosnesna. (1 Kor. 10:12) Iso ḇefnai fa ro ras ḇe ras, fandun kaku fa komambir kosnesna ma kosawen kakara ḇeḇyeḇa ma ararer na!​—Gal. 5:26; Kol. 3:5. w18.05 18 ¶11-12

Kofawi Paulus fyafardun snar snonkaku Yahudi sya simewer srower ankinem Karajan. Ḇape, Paulus ipok imnai ḇa fa ḇyaryas faro si. Fyasnaiḇair rosai ḇyaḇir ro sneri faro snonkaku Yahudi ansi ḇo doḇe, ”Marisen ro sneri ma fararyor ayena faro Allah naiso insama sismai fasaspar. Na Yakofen kaku snar sima simyaren sfarmyan ḇe Allah, ḇape imnis kuker fawawi ḇekaku ḇerama ro Allah ḇa.” (Rm. 10:1, 2, NW) Paulus doḇe roi ḇedif i fa ḇyaryas ḇe snonkaku Yahudi sya isoine snar ”marisen ro sneri”. Imarisen insama saksmai fasaspar ya. (Rm. 11:13, 14) Paulus dor ḇe Yahwe I fa ifnoḇek snonkaku Yahudi oser-oser insama simarisen srower ankankinem Karajan ya. Paulus doḇe ”simyaren sfarmyan ḇe Allah”. Paulus myam roi ḇepyum ro snonkaku sya naisya, ma ikyar si kako sakna samambraḇ fa sfarmyan ḇe Yahwe I. Paulus ifawi snar snonkaku Yahudi ḇemyaren ansi na sakḇe Yesus manfamyan ḇyesi, ḇemyaren raris i kako. w18.05 4 ¶4; 6-7 ¶13-14

Ko oser-oser fandun fa kofawi pyum rosai snonkaku ḇesesya sfandun na, insama bisa kofnoḇek si. Paulus ikofen faro snonkaku Kristen ro Ibrani, ”Swambraḇser ḇramin ḇemor bedi ma wepur ḇeradadai bedi. Wambran ro nyan ḇepyom insa wemin ḇeryarḇa bedi ryosdis awer mboi iprei.” (Ibr. 12:12, 13) Kokame bisa kosambraḇyae ko ro rosai kawos na. Koma kobabo kaker ke, bisa kaksambraḇser snonkaku ḇesesya. Paulus fyas: ”Inja ro Kristus ananun naisya, sneprei ma saswar, ḇaḇeoser ro Rurya isya, saswarya ma snesoya isya, insa mkofrur mnis raryaḇ yedi isoine: iḇye mkona sne-kakara oser, mkona saswar oser, rur oser, kakara oser, mboi mkosewar ḇaḇefandun mankun mkoḇena ḇardi awer roḇa sanandik ḇeḇefromo awer. Inja iḇye kuker randun sne mkomam min mkoḇesi sikaki syadi ro mankun mko; ma mkono oser-oser syewar fandun mankundi ḇyena awer, ḇape fandun snonkaku ḇesesya kako.”​—Flp. 2:1-4. w18.04 23-24 ¶10, 12

Roi ḇefnai fa Yahwe iwan Yesus i fa fyasparbur ko ro sasar ma marmarya iso insama na koḇuk kankenem koḇena ḇesiper fa kofarmyan ḇe I. Nyan ḇepyum kaku fa koḇuk ḇaḇemkei koḇena iso koḇuk oras ma samambraḇ koḇena ḇesiper fa kofarmyan ḇe Yahwe I. Kofrur rarirya ido, nari kopok komam fandandun ro dunya ine ma marisen mankun koḇena nḇe roi ḇefandun kaku ro kankenem koḇena ḇa. (Gal. 5:16) Kwarapan rosai Nuh ma kina ḇyesi sifrurna. Sikenem rofandu snonkaku ḇeḇarḇor ma ḇefrur fararur farḇuk ḇeḇyeḇa. Ḇape saksowarpu snonkaku ḇero ris sesya roi skara ma roi sifrur anna ḇa. Skinfir fa simyaren sifrur fararur Yahwe ḇyuk faro si na. Sḇawes wai ḇeba, siryur roḇean ḇe mankunsi ma rofanfan sya, ma sḇuk swarapepen ḇe snonkaku ḇesesya faro Faḇruḇ Ḇeba ya. ”Nuh ifrur Allah parenta ḇyena kam. Ifrurna imnis kaku radiri.” (Kej. 6:22) Bon ya iso, Nuh ma kina ḇyesi sismai payamyum rofyor Allah myunpres snonkaku ḇeḇarḇor sya.​—Ibr. 11:7. w18.04 11 ¶8; 12 ¶11-12

Setan ma rur ḇemaḇak ḇyesi kako sfara agama ḇekaku ḇa ma farḇaḇyan ḇero dunya ine fa dankar ”supswan ḇesiper” ine, ḇaido snonkaku syakam. (Why. 12:9) Setan ḇyuk agama ḇekaku ḇa fa fyarkor roi ḇesasar kuker Yahwe I, ma ḇyesewar kako fa ipyos Allah snonsnon Ḇyedi. (Yer. 23:26, 27) Ine naiso ḇefnai fa snonkaku ḇeḇeso skara sisyom faro Allah kwar, ḇape ḇekaku ya, sima sisyom faro rur ḇemaḇak sya. (1 Kor. 10:20; 2 Kor. 11:13-15) Setan fyara kako farḇaḇyan ro dunya ine fa dankar snonkaku sya. Imnis raris, doḇe nari snonkaku sya sismai aski rofyor sna pipi nabore, ma sna roi nakam. (Ams. 18:11) Snonkaku ḇekyar faro ankarkar ine sḇuk kankenem sena ḇesiper fa sisewar ”Arasai” syadi ro sisewar Allah. (Mat. 6:24, NW) Ma snonkaku ḇeswar Allah ro randak ya kako, snar saswar ḇyedi iba syadi faro arasai na, inja muniwara kakyar ḇyedi faro Allah napromes.​—Mat. 13:22; 1 Yoh. 2:15, 16. w18.05 16-17 ¶6-7