Januari

Manfamyan Allah Ḇyesya kam simarisen sfarkor rariso sifrur posa fararmyan ine raris Yesus iwan ḇe si na. (2 Tim. 4:5) Kukro fararur ḇaḇebaryas ine ḇyefandun syadi, ma ro fararur sairirya kam, iso ḇefandun kaku fa kofrur ḇepon na. Ḇape, na kosmai samswen ro fararur ine snaro kona swaf nabor ḇa raris rosai komarisen kofrur na. Fararur ḇefandun ḇese ono naisya ḇefrur fa kona oras ma samambraḇ wer ḇa. Raris kofararur ro ras ḇe ras fa kosewar pipi faro fandandun koḇena ma kina koḇesya. Kosmai fakamamar ḇese kako ro kina koḇesi, kosmai dafduf, depresi, ma kosambraḇ wer ḇa snaro koḇe mansar binsar kwar. Samswen nane nafrur fa kofarmyan pyum ḇe Yahwe I ḇa ido, koḇeḇirḇar awer. Snaro Yesus ifawi snonggaku oser-oser nari byuk bon ḇesisye ro fararur ḇaḇebaryas ya. (Mat. 13:23) Yahwe ḇyesyowi kaku rosai monda kofrur fa kofarmyan ḇe I kuker sne ḇesiper.​—Ibr. 6:10-12. w19.04 2 ¶1-3

Setan anggarkar ḇyenane nanonef Yahwe I. Anggarkar oser ḇyena iso snonggaku ḇemar sya nari srap si ro for ḇembrer ḇa. Rosai ḇefnai fa farkarkor ine nun anonef ḇe Yahwe I? Snaro nafrur fa snonggaku skara Allah ḇena saswar ani dakna rari ḇeḇye ḇa raris Ibiris i. (1 Yoh. 4:8) Moḇsa ḇaḇir rai? Isyadi wer moḇsa Yahwe ḇyaḇir rai? Na imarisen ḇa kukro dayin kaku faro roi ḇeḇye ba na. (Yer. 19:5) Setan anggarkar ḇyena nafrur fa snonggaku sya sikyar faro farsarser Kristus ḇyeja ḇa. (Mat. 20:28) Anggarkar ḇese Setan ḇyena iso rofyor snonggaku simar ido, bar oso isya ikenem pdef ro snonggaku ansi, ine kyurfasnai snonggaku oser-oser nari ikenem fyoro. Inja, kofandun farsarser Kristus ḇyeja wer ḇa fa kosmai kankenem fyoro ya. Mboi kaku ya, Yahwe ma Yesus suswar kaku ko, inja subuk farsarser faro snonggaku sya. (Yoh. 3:16; 15:13) Inja, kokarapan rariso Yahwe ma Yesus sneḇaḇir suḇena fyor snonggaku sya sikyar ḇa faro farsarser subuk kwar na snaro sikyar faro farkarkor ḇekaku ḇa ani! w19.04 14 ¶1; 16 ¶8-9

Ro diso sfas Yesus farkarkor ḇyena? Syap Injil rifyak sfas farfyar ḇebor ḇekur Yesus i, roi ikofen ma ifrur ro supswan. Syap ḇesena ḇero Syap-Syap Yunani Kristen nafnoḇek ko syadi wer fa kofawi Yesus mamam ḇyena, snar manḇefas sya rur ḇesren ya fyarkin si ma sna ”Kristus kakara ḇyena”. Yesus farkarkor ḇyena nefainda kaku faro kankenem koḇena kam. Inja, sasoser Kristus nfara rosai kofrur ro rum, ro moḇ kofararur roya ḇaido rumfarkor, ma ro sidang. (Gal. 6:2) Kofawi sasoser Kristus kuker kowasya Syap-Syap Yunani Kristen ma kowasenkara na. Kosouser sasoser ine rofyor koso akurfasnai, parenta, ma wos farkin kosmai ro fasfas anna. Kosouser sasoser Kristus ido, kyurfasnai kosouser faro Allah ḇesaswar koḇedi, Yahwe, snar Yesus farkarkor ḇyena kam ndramuma ro I.​—Yoh. 8:28. w19.05 3-4 ¶6-7

Setan nyan ḇyenane naḇye ḇa kaku, ma faḇye kaku snonggaku ḇebor sya sakfrur marisen ḇyena. Ḇape, Yahwe ima syambraḇ syadi ro Setan ma ḇeso i sya. Yahwe ifawi pyum Setan nyan-nyan ḇyena. Kokyar kaku Yahwe ifawi mnis kandera koḇena, ma byuk fafnoḇek kofandun na. Komarisen snar kofarmyan ḇe ”Allah ḇeḇuk samambraḇ sne faro snonkaku. Ḇyuk samambraḇ ro kosnesna, ro fafisu ḇaḇekandera kosma na, insa samambraḇ Allah ḇyuk maḇeko ani, ko kako koḇuk samambraḇ sne faro kawasa kam ḇesma marindisya”. (2 Kor. 1:3, 4) Ḇefandun syadi saneprei ya iso romawa sinan sesi sifandun si ḇa ḇaido romawa karyer sesi sifrur roi ḇeḇye ḇa yoḇ si. Manḇefas Mazmur, Daud, ifawi Yahwe I monda na kokyar faro I fa byuk sneprei ya. (Mz. 27:10) Daud ikyar Yahwe na ḇye Kma faro snonggaku kina sesi sifrur pyum si ḇa. Nyan ya rarso? Roro manfamyan Ḇyesya ḇesoasuser. Naek srar ḇero sidang sya simnis ra kina koḇesi. Imnis raris, Yesus ikofen snonggaku ḇefrur Yahwe marisen Ḇyena siso manbesrar, imbesrar, ma sna ḇe i.​—Mat. 12:48-50. w19.05 15-16 ¶8-9

Rosai fandun fa kofarkor ḇepon na? Kaku ya na kobuk swaf ras ḇe ras fa kofarkor Refo. Kirine, mnuk-mnuk ro Refo sap kwar fa kowasya faro minggu nakam ro sidang sifrur na fa nabor wer ḇa. Rarirya kona swaf fa kokarauser na ma kosewar ro publikasi koḇena infa kofawi nabor syadi mnuk kowasya na. Fandun ya iso kowasya mnuk-mnuk anna monda ḇa, mboi insama roi kowasya ro Refo na nsun kaku ro kosnesna ma nafrur fa kofanam syadi ḇe Yahwe I. (Mz. 19:14) Fafisu koso fananjur Farkarkor Baryas, ine ifnoḇek ko fa kofawi pyum Refo syadi wer. Rarirya, komam pyum mnuk-mnuk ro Refo na, ḇepon syadi mnuk nari siwasya fyor sawos farkarkor anna ro sidang. Komam mnis kada moḇsa wos ḇero mnuk ani ḇyefesepen kuker knam kaku ro syos ya. Oso wer ido, rofyor kowasya mnuk na kobuk swaf fa kokarauser na ma kokara rariso kombran mnis na ro kankenem koḇena rai.​—Yos. 1:8. w19.05 27 ¶5; 27-28 ¶9

Yesus fyasnai nyan ḇepyum ro fararmyan ya. Roi ḇefandun kaku faro Yesus ya iso fyakapon Allah Karajan Ḇyedi. Imbran ḇinggwan kaku fa byaryas angginem ḇepyum ḇe snonggaku sya. Syewar swaf insama byaryas ro moḇ snonggaku sibor ro na ma ro rum ḇe rum. Ro kenem ḇyedi, fyasnai kaku fararmyan ima roi ḇefandun kaku dirya. Bisa kakso Yesus nyan ḇyena raris kosewar swaf fa kobaryas angginem ḇepyum ine ḇe snonggaku sya ro moḇ risai monda. Snar ḇaḇebaryas ine ḇeḇedari korir marisen manggun koḇena. (Mrk. 6:31-34; 1 Ptr. 2:21) Naek srar koḇesya sia sifarmyan ḇe perintis istimewa, perintis biasa, ma perintis ekstra. Sia wer sfarkor wos ḇebabo ḇaido sra ḇe moḇ sifandun manbaryas ḇebor sya. Ḇebor ḇeso ro fararur ḇaḇebaryas sine manbaryas ḇena oras nabor raris perintis sya ḇa, mboi sesewar kaku fa sakso ro ḇaḇebaryas ya. Inja kobuk nabor ke nabor ḇa ke, Yahwe ḇyesyowi kaku na. w19.04 4 ¶7-8

Wafuken manggundaw: ’Ro sne yedi, yana sne dosam kermgun kaker ke?’ (1 Ptr. 2:1) ’Yakara yapyum syadi ro ḇesesya snar moḇ yarama ya, farkarkor, ḇaido nana arasai yasmai na ke?’ (Ams. 16:5) ’Yamamkyof snonggaku ḇesesya snar sakna raris aya ḇa ma sramaker moḇ ḇese ke?’ (Yak. 2:2-4) ’Yamarisen roi dunya Setan byuk na ke?’ (1 Yoh. 2:15-17) ’Yamarisen kaku yamam hiburan ḇeḇye ḇa ma ḇefasnai mamun na ke?’ (Mz. 97:10; 101:3; Am. 5:15) Kankarem faro fakfuken nane na nfasnaibos, roi risai fandun fa wafrur fararwei. Bati kokinfir sya na sawyae kaku ko. (Ams. 13:20) Snonggaku ro ris koḇedi ḇero moḇ kofararur ma ro rumfarkor sya na sipok sifnoḇek ko ḇa fa kona Allah kakara Ḇyena. Ḇape, bati ḇepyum na kosrow si ro fananjur Kristen koḇedi. Ro diwa, na kodifyae ko fa ”kofrur roi ḇeḇye ma kofasna saswarya.”​—Ibr. 10:24, 25. w19.06 12 ¶13-14

Yahwe imewer kaku snonggaku koine kosmai samswen ma kandera komam ro baboine na. Inja, Yahwe manfamyan ḇesouser Ḇyesi oso ḇyekandera kaku rawo dawos famfnom ido, sasar oḇa. (Ayb. 6:2, 3) Imbude dawos roi ḇekaku ḇa ḇekur ḇe ko ḇaido Yahwe I. Ḇape, kopok komsor fasaw awer ḇaido komankara awer i snar roi dawos na. Fyorno ido, snonggaku ḇekandera kaku oso na fyandun kako wos anun ḇaido sansonek. (Gal. 6:1) Moḇsa penatua sya sbuk na rai? Fandun fa siso Elihu nyan ḇyena, kuker sawarwar ryower pyum Ayub i. (Ayb. 33:6, 7) Fafisu Elihu ifawi mnis kwar Ayub nyan kakara ḇyena, insape byuk wos anun ḇe i. Penatua ḇeso Elihu nyan ḇyena nari srower pyum ma sisewar fa sifawi mnis rosai ḇekur snonggaku oso. Rarirya, fyor sbuk wos anun na, nari nsun kaku ro ḇerower sya sisnesna. w19.06 22-23 ¶10-11

Moḇsa na wafarmyan pdef ḇe Yahwe fafisu sidwarek Au? Kantor cabang nari byuk akurfasnai ma anun ḇepyandam faro penatua sya. Kantor cabang jadi fa sawos ḇeri kuker penatua sya ḇa ido, nari penatua siso ḇefnoḇek Au ma ḇero sidang syakam fa sisyom ḇe Yahwe I pdef. Nari sbuk akurfasnai ḇeknam ro Refo ma roi organisasi fyasos kwar na. (Mat. 28:19, 20; Ibr. 10:24, 25) Yahwe ḇyeasas kwar manfamyan Ḇyesi nari sismai roi sfandun na fa sisambraḇser kakyar sena. (Yes. 65:13, 14; Luk. 12:42-44) Inja, wakyar kaku Yahwe organisasi Ḇyedi nari ifrur sairirya monda fa fyasos roi wafandun na fa swambraḇser kakyar Bena. Ḇape, roi fandun fa wafrur ya isya. Fafisu sidwarek fararur koḇena, swewar moḇ ḇepyum fa wakram Refo Bedi ma syap-syap ḇesena, ḇeḇe cetak ḇaido ḇeḇe elektronik na. Wasasor Au insama rwir famfnom awer ro moḇ na ḇepyan fa snonggaku sya sisrow na. Ko oser-oser fandun fa kosewar kaku fa kosambraḇser kakyar koḇena. w19.07 10-11 ¶10-11

Ro fafisu naiwara, snonggaku ḇebor ro supswan ḇesiper sakna agama. Ḇape swaf taun-taun ḇarpur ine, fararwei ḇeba isya. Kirinema snonggaku ḇebor syadi smam manggunsi sna agama oḇa. Kaku ya, ro sup ḇeḇeso kawasa sesi sikofenbos sima sna agama ḇa. (Mat. 24:12) Rosai ḇefrur si? Imbude ono sisya kankenem sena neknam ro marasrisen, ḇaido ḇaḇeḇirḇar. (Luk. 8:14) Ono wer randak ya sna agama mboi mura ido sikyar faro Allah wer ḇa. Ḇesesya sikyar faro Allah, ḇape skara agama ima roi ḇekwar diri, dun fainda oḇa, ma imnis kuker sains ma nyan kakara snonggaku sya ḇa. Imbude sikyar faro bati, guru sya, ḇaido roi sikofen ro media, snonggaku sya soḇe kankenem ima ryamuma ro evolusi. Ḇape, srower ḇa sikofenḇair roi ḇeḇefnai kaku fa sikyar ḇe Allah. Sia wer sayin kaku manfarkin agama sya snar sisewar pipi ma samsyom. Ro sup ḇeḇeso, pamarenta ḇero diansya sidwarek kawasa sya fa seari. w19.07 20 ¶1-2

Ko ḇeso fanandi faro kankenem ya, kofandun kakyar ḇesambraḇ. Kaku ya, sibor sya baken sena nasambraḇ wer ḇa mboi simarisen sbuk ḇepyum syadi ro fararmyan ḇe Yahwe. (2 Kor. 4:16) Imbude wafarmyan ḇe Yahwe fyoro kwar, mboi kirine wadufe inja wasambraḇ wer ḇa fa wafrur nabor raris ḇepon ya ḇa. Rarirya ido, ḇesanekar awer. Wakyar Yahwe iswarepen ma imarisen faro fararmyan Bena ro fafisu iwara. (Ibr. 6:10) Koswarepen, saswar koḇena faro Yahwe na neḇefasnai ro roi nabor kofrur ḇe I na ḇa. Ḇape, kofasnai koswar Yahwe kuker kofrur roi kosambraḇ fa kofrur na, koryaḇ pdef, ma koswarepen saneraro koḇena. (Kol. 3:23) Yahwe ifawi samambraḇ koḇena ma dor ko ḇa fa kofrur roi kosambraḇ ḇa fa kofrur na.​—Mrk. 12:43,44. w19.08 3-4 ¶6; 5-6 ¶11-12

Yahwe iyer snonggaku sya fa sfanam ḇe I roro ”fararur ḇepyum” manfamyan Ḇyesi sifrur na. (Mat. 5:14, 15; 1 Ptr. 2:12) Swambri ḇe Saksi Yahwe ḇa ido, ras oso daksrow kuker naek srar ono ro sidang Bedi kwar ke? Wor i fa isowarpu Au ḇe fananjur. (1 Kor. 14:24, 25) Komarisen kaku kina koḇesya kam sakwarpu ko fa kofarmyan ḇe Yahwe. Imbape, imbude kosewar kwar fa kofnoḇek si mboi simewer saksun ro kakaku ya. Rarirya ido, kobuk sasar ḇe manggunko awer snar kankinfir sena. Ḇesyadi ya, kopok kodif snonggaku oso fa imarisen faro kakyar koḇena awer. Ḇape waswarepen, fyor kina Besi smam waryaḇ syadi snar wafarmyan ḇe Yahwe I, na nun fainda kaku ḇe si. Benadiwarek si, wawos myaren asuser ḇe si. Wamnai awer fa wafnoḇek si! (Kis. 20:20) Wakyar kaku Yahwe nari ḇyebarakas sasewar Bena. Ma kina Bansi simarisen srower Au ido, nari sismai ḇaḇye! w19.08 18-19 ¶15-17

Rosai Yesus fyasnai ro mnuk ine? Isoine fandun fa komam kenem koḇena fa ipyan ma kokara monda faro fararur ḇaḇebaryas ya. Yesus fyasnai nyan ḇepyum ro fararur ḇaḇebaryas ine, ma fyarkor manfamyan ḇyesya insama skokara monda fa skofarmyan ḇe Yahwe I ma Karajan Ḇyedi. Koso pyum Yesus nyan ḇyena kuker kofakapon fararur ḇaḇebaryas ine ro kenem koḇena, isoine kosewar ḇepon Karajan Allah ma kakaku Ḇyena. (Mat. 6:33) Nyan oser insama komam monda faro fararur ḇaḇebaryas ya iso komam kankenem koḇena fa napyan. Rarirya, kona swaf nabor kaku fa kofnoḇek snonggaku sya fa sakmambir ma sakswar Yahwe I. Imnis ra, bisa fa kona oras nabor insama kobaryas ro minggu ani ke? Bisa fa korir roi ḇefandun manggun ḇa ḇefnak oras koḇena ke? w19.04 5-6 ¶12-13

Taun ḇarpur ine, naek srar ḇefarmyan fyoro kwar sya sismai fararur ḇesren ḇebabo. Samswen ḇe naek srar ḇebor ansine fafisu kankenem sena nefararwei. Kakuḇae na siswar kaku fararur sifrur ro ḇeponi, roi sesyowi kaku na ro swaf taun ḇe taun kwar. Ono sisya sesneso fyor sifrur fararwei annane. Ḇape, ḇarpur ya siso fararwei anna kwar. Rosai ḇefnai ya? Ḇepon kaku ya, snar siswar Yahwe I. Sifawi sbuk kankenem sena fa sfarmyan ḇe Yahwe, faro fararur ḇaido fakamamar oso ḇa. (Kol. 3:23) Simarisen sifarmyan ḇe Yahwe kuker sne ḇerun ro fararur sairirya kam. Snar sifawi Allah fyandun kaku si, inja ’sḇuk makakwarek sena kam faro I’. (1 Ptr. 5:6, 7) Kona sne ḇerun ido, nun fainda faro ko ma snonggaku ḇesesya. Kosambraḇ kako fa kombran pdef fafisu kosmai samswen. Ḇesyadi ya, na kofanam syadi ḇe Kma koḇedi ro nanggi. w19.09 6-7 ¶15-17

Yahwe kyur Daud i fa ḇye bukor faro kina ḇyesi ma er Israel ḇesiper. Snar Daud ḇye raja, inja nya papoik ḇeba. Ro swaf ḇeḇeso, Daud byuk sasar papoik ḇyena ma ifrur sasar ḇeba kaku. (2 Sam. 11:14, 15) Ḇape, fyasnai ikunem faro Yahwe kuker imarisen ryower rofyor Yahwe isonek i. Ikofenḇair roi ḇero sneri ḇe Yahwe roro nadi ya. Ma syewar kaku fa isouser Yahwe ananun Ḇyena. (Mz. 51:1-4) Oso wer ido, sne ḇerun ḇefnai fa imarisen ryower ananun ḇepyum ismai ro snon sya monda ḇa, mboi bin sya kako. (1 Sam. 19:11, 12; 25:32, 33) Daud dun farkarkor ro sasar ifrur kwar na, ma fyakapon fararmyan faro Yahwe ro kankenem ḇyedi. Ifawi na ismai payamyum snar ikunem faro Yahwe I. Baboine, na komam snonggaku ḇekunem faro Yahwe sima siḇese ro snonggaku ḇemewer ḇerower farkankin Ḇyena. Snonggaku ḇekunem faro Yahwe nari ”sibras snar sisnesna namarisen”.​—Yes. 65:13, 14. w19.09 17-18 ¶15; 19 ¶21

Ro taun 1935, Saksi-Saksi Yahwe sifawi raryur ḇeba fandun ḇa fa sikenem ro nanggi insa sores ’ro ḇarpon karapesa ma Rumgun Domba ani’. Inja, sores kaku ḇeri ro nanggi ḇa. Raryur ḇeba nari sikenem ro supswan, imbape na sores ’ro ḇarpon karapesa’ kuker skarem Yahwe iso Manḇepoik farsyos ma supswan ma sisouser faro I. (Yes. 66:1) Na sores ro ḇarpon ’Rumgun Domba ani’ kako snar sikyar faro Yesus farsarser fasaspar ḇyedi. Ro Refo, mnuk ḇese isya ḇefnoḇek ko fa kofawi mnis wos sarḇer ḇero Wahyu 7:9. Ro Matius 25:31, 32 dapḇair er syakam nari ”seḇefanjur ro ḇarpon” Yesus karapesa ḇyedi. Snonggaku ḇeḇarḇor sya sisya kako ro fandu si. Nasnai kwar, snonggaku ansine sro nanggi ḇa, mboi sro supswan. Fawawi ḇesnaibos nane nsun kaku ro kakara. Iso eḇedari Refo ikofen ḇa raryur ḇeba nari sek ḇe nanggi. Ḇeḇe 144.000 sya monda siso ḇesmai asas fa sikenem fyoro ro nanggi. Nari sḇe raja fnoḇek Yesus i fa sḇepoik supswan.​—Why. 5:10. w19.09 28 ¶9

Imnis kawos ro farkarkor ḇepon ya, Yahwe imarisen ḇesyom I sya sisasyarbur Babilon Ḇeba ya. Ḇape, isof ro dia monda ḇa. Fandun fa kosewar kaku fa kosyom pdef ḇe Yahwe I. Mgorama komam nyan risuru fa kofrur na. Ḇepon ya, fandun fa kokenem imnis kaku Yahwe marisen Ḇyena. Komewer kokenem imnis nyan ḇeḇye ḇa ro dunya ine. Imnis raris, komewer kofrur fararur farḇuk, raris farḇakḇuk snon kuker snon ma bin kuker bin ḇaido nyan sikenem raya. (Mat. 19:4, 5; Rm. 1:26, 27) Ḇesuru ya, fandun fa koso fananjur ya pdef fnoḇek naek srar kobansya. Na kofrur na ro moḇ risai monda, ro Balai Karajan ke, rum, ḇaido ro moḇ snonggaku sya sfawi ḇa na. Rosai monda ḇeḇejadi ya, na kopok koḇinggwanbur fananjur na awer. Ḇesyadi ya, fandun fa komyaren koso fananjur ya pdef snar ”kofawi mboi fyoroḇa wer nari Manseren ryama”.​—Ibr. 10:24, 25. w19.10 16 ¶6-7

Yahwe imarisen kosmai marasrisen ro kankenem ine. Refo doḇe ”roi ḇepyum syadi faro snonggaku isoine sanan ma sinem, ma sismai marasrisen ro fararur marḇak sena”. (Pkh. 2:24) Oso ḇeyun marasrisen ḇe ko iso hiburan. Ḇape, hiburan ḇebor ḇero dunya ine nun roi ḇeḇye ḇa ḇe ko. Hiburan anna nafrur fa snonggaku sayin roi Allah dayin na ḇa, ḇesyaḇo simarisen syadi na. Komarisen kosyom monda ḇe Yahwe ido, kopok kan awer ro ”[Yahwe] meja ḇyedi” ma ro ”ibiris meja ḇyedi” kako. (1 Kor. 10:21, 22) Snonggaku oso dan kayam kuker oso ḇese ido neḇeḇair suma suḇebatiyae su. Hiburan ḇefasnai mamamun, ḇena mon, fararur farḇuk, ḇaido fararur ma marasrisen ḇeḇye ḇa na, Allah mbroḇ Ḇyesi siso ḇefasos na. Inja, kokinfir hiburan ḇeradine imnis ra kan kayam kuker si. Bon ya, na nun roi ḇemun ḇe ko ma wis koḇena kuker Yahwe namuk. w19.10 26 ¶2; 29-30 ¶11-12

Insama wam ya ifnoḇek mandaswan ro ayayun ḇyeja, fandun fa ifrur roi risuru. Ḇeoser ya, myam mnis wai ḇyeja fa isya ro moḇ wam ya iso roya. Ipyar wai ya ro abor monda ido, na kyain pdef ro moḇ ya. Ḇesuru ya, fandun fa pyaw ayun ya fa deke ma fyosi. Imboḇae, wam ya iso ayun anya insape wai ani na imbrane. Rarirya kako, na kofarmyan pdef ḇe Yahwe fafisu kosmai fafnoḇek ro Allah rur Ḇyedi. Mboi fandun fa kofrur roi risuru. Ḇerandak ya, fandun fa koisya ro moḇ Allah rur Ḇyedi isya roya kuker kofrur fararur ro baḇ farkankin rur ḇesren. Ḇesuru ya, fandun fa kopaw ayun ya fa deke ma kofosi. Ine kyurfasnai kosewar fa kofrur fararur anna kuker nyan ḇepyum. (Mz. 119:32) Rur ḇesren na idif ko fa kombran pdef fafisu roi ḇedwarek ma samswen imnis bak ndrama nkur ko. Rur ḇesren ya kako ifnoḇek ko fa kosoasuser pdef. w19.11 9 ¶8; 10-11 ¶11

Yesus ḇyesusa kaku, snaro iwasen kero wer nari snonggaku ḇeḇarḇor sya smun i fa imar. Marmar ḇyedi iso ḇefrur fa ḇyesusa ya ḇa. Mboi Yesus iswar Kmari ma imarisen kako fa ifrur Yahwe sneri imarisen. Yesus ifawi kaku isouser pdef ḇe Yahwe fafisu ismai fafrowes ḇemarḇak kaku ido, nari Yahwe snonsnon Ḇyedi ismai sanandik. Iswar faro snonggaku sya kako. Inja, ifawi snonggaku sya bisa sismai kankenem fyoro-fyoro fyor isouser isof ro imar. Yesus ḇyesusa kaku raryano, ḇyeaski pdef. Yesus ismai ḇaḇeaski ro Allah, isoine sne ḇemarisen snar fyanam kaku kuker Yahwe I. Inja, Yesus ḇyeḇirḇar wer ḇa. (Flp. 4:6, 7) Snonggaku koine kam kaksmai fafrowes ḇemnis raris Yesus i ḇaime. Ḇape, Yesus manfamyan ḇyesya kam na sismai kako fafrowes ro kenem sena. (Mat. 16:24, 25; Yoh. 15:20) Raris Yesus i, fyorno ido kakḇeḇirḇar kako. w19.04 8 ¶1-3

Kwarauser fakfuken anine: ’Yaḇesyowi kaku fakamaman yedi fa yakro Yahwe organisasi Ḇyedine ke?’ Ro fafisu koḇedine, Yahwe fyasnaibos kwar isya ḇyebarakas kawasa Ḇyesi. Na kokofen kasumasa kaku. (1 Tes. 5:18) Rariso kofasnai kaksaramper Yahwe organisasi Ḇyedine? Kofrur na kuker koso mnis akurfasnai ḇeknam ro Refo ḇero syap koḇena, fananjur, ma munara. Ko kako bisa kofrur na kuker komyaren kobaryas ma kobuk farkarkor. (1 Kor. 15:58) Kokam komarisen insama Yahwe imarisen farsarser koḇena. Koḇe kofarmyan ḇe Yahwe snar koḇesyowi kaku I. Komarisen kobuk roi ḇepyum syadi faro Yahwe snar koswar I kuker sne ḇesiper. Ma komarisen kaku fa kosaramper organisasi Yahwe fyarkin ro baboine. Kofrur roi nane kam ido, kofasnaiḇair ḇe Yahwe I koḇesyowi kaku fakamaman kosmai fa kofarmyan faro I ḇe Saksi Ḇyedi! w19.11 25 ¶17-18

Yesus Ikofen ḇa nari kakfrur mujisat raris ifrur kwar na. Ḇesyaḇo, manfamyan ḇyesya nari sbaryas ma sfarkor snonggaku sibor syadi, ro sup ḇebor syadi, ma ro oras nabor syadi ro ifrur kwar na. Wakfararur ro kantor oso ido, wafuken ro manggundaw: ’Ro moḇ yafararur roya sifawi ayama yafararur myaren ke? Yafrur posa fararur yedi ro oras sap kwar na ma kuker samambraḇ yena nasiper ke?’ Kwarem imbo ido, ḇena fararur ya na ikyar Au. Ma snonggaku ḇero moḇ wafararur roya na simarisen syadi fa srower angginem ḇepyum. Fafisu Ausya baryas ma buk farkarkor ido, wafuken manggundaw: ’Sifawi ayama yafararur myaren ro ḇaḇebaryas ke? Yafasos pyum fa yarama randak ro rum ḇe rum ke? Yakaḇer fasaw fa yawawos kuker snonggaku ḇemarisen sya ke? Yaso ker ro fararur ḇese ro fararmyan ya ke?’ Kwarem imbo ido, na wasmai raryaḇ ro fararur Bena. w19.12 5-7 ¶14-15

Imbeswa ḇekinfir fa suna romawa, fandun fa suyawawos fakfuken risuru ḇefandun kaku suine: Oser ya, fafisu risai sumarisen fa suyakna romawa? Ḇesuru ya, na suna romawa rifis? Swaf ḇepyum risai na suyawos ḇekur roi anine? Ma rosai ḇefnai fa roi risuru suine sufandun kaku? Fyorno ido, snon ma bin ḇekara fa ḇefarḇuk na suyawos ḇepon roi ine fyor sufarḇuk ḇaime. Rosai ḇefnai ya? Snar fandun fa suna karkara oser faro roi ine. Fandun kako fa sukara sufasos kwar fa suyuf fakamamar anna ke roḇa. Ḇefarḇuk babo ḇeḇeso sya sun snemuk fa siwaf taun oser ke suru insape sakna romawa, snar sifawi sḇe kma ma sna ḇemamwarek romawa syama nun oras ma samambraḇ sena. Inja, skara sna romawa fasaw ḇa insama sismai swaf kaker fa sikenem ḇeḇe imbeswa resari ma sfanam syadi. w19.12 23 ¶4-5

Ro supswan ine ḇesiper, ḇebor ro Yahwe manfamyan Ḇyesi sismai samswen ḇefrur fa sekandera ḇaido sesneso kaku. Naek srar ono sisya sismai dafduf ḇemarḇak kaku. Sia wer sfafardun kukro snonggaku siswar sya simarbur si. Ḇesesya wer ido sesaneso kukro smam oso ro kina ḇaido bati sesi sifarmyan ḇe Yahwe wer ḇa. Ono wer, sekandera kukro rim ḇeba. Naek srar ansine sfandun sneprei ya. Moḇsa na kofnoḇek si rai? Ḇe bati ḇesouser. Bati ḇesouser sya na sbuk oras ma samambraḇ sena fa sifnoḇek naek srar sya. Imnis raris, manbesrar oso snori Piter, dokter doḇe ismai dafduf ḇeḇye ḇa kaku ma nari ikenem kawan ḇa. Swari ḇenir ḇe Ketrin, dakkofen, ”Ras anya, imbeswa oso ḇero sidang suyun pyan nu ḇe dokter. Fafisu suyakfawi Piter dafduf ḇyeja, sukofen ḇeri ḇo suyoḇe nari supok surir nu ḇa ro samswen ḇekur nu nane. Suisya ḇesya kwar fafisu nufandun fafnoḇek suḇena.” Kaksmai samswen mboi bati ḇekaku sisya skainus ko ido, na kosnesna naprei kaku! w20.01 8 ¶1; 9 ¶5; 10 ¶6

Auso oser ro Yesus manfamyan ḇyesi ḇefanjur ro sim ḇero bo ro ras Pentakosta taun 33 Masehi ido, na wakyar kaku snar waksmai ramrem kuker rur ḇesren ya. (Kis. 2:5-12) Mboi, snonggaku syakam ḇesmai ramrem kuker rur ḇesren sismai kuker nyan ḇemnis radirya kam ke? Oroḇa. Kokarapan fafisu risai snonggaku oso ismai ramrem. Ro ras ani ḇesmai ramrem sima snonggaku Kristen ri 120 ḇekain ro rum bo ansya serer ḇa. Ras anya kako, snonggaku ḇese ri 3.000 saksmai ramrem kuker rur ḇesren raris rosai Yesus ikofen ḇepon kwar. Sismai ramrem rofyor sebaptis. (Kis. 2:37, 38, 41) Imbape, ro taun-taun ḇe ḇarpon mura, snonggaku Kristen syakam ḇa sebaptis resari insape sismai ramrem. Snonggaku Samaria sya sebaptis kwar mura fyoro ḇa sismai ramrem. (Kis. 8:14-17) Ono wer ido, Kornelius ma kina ḇyesi sima sismai ramrem rofyor sebaptis ḇaime. Insape serer ḇesmai ramrem kuker nyan ḇeradirya.​—Kis. 10:44-48. w20.01 20-21 ¶2-4

Ro syap Injil rifyak monda, Yesus byuk apap ”Kma”, ”Mami”, ”Kmaya”, ḇekur ḇe Allah Yahwe I, barbor ya fanam ḇe 200. Rosai ḇefnai fa Yesus dap ker Yahwe I ḇe Kma? Roi oser ya iso insama snonggaku sya sikyar Yahwe I ḇe Kma ḇeswar si. (Yoh. 17:25) Kokarapan rosai kofarkor ro Yahwe I ro nyan ifrur pyum Roma Ḇyedi, Yesus i. Yahwe ryower Yesus nadi ḇyena ḇesya kwar. Ryower monda ḇa mboi kyarem na kako. (Yoh. 11:41, 42) Ro fafisu ḇesamswen kako, Yesus ḇyaḇir Kmari iswar ma ifnoḇek i. (Luk. 22:42, 43) Yesus ikyar kaku faro Kmari, ma Yahwe fyasos roi fyandun ro rasras na. Ḇefandun syadi wer, Yahwe ifnoḇek Yesus i fa isoasuser pdef. Snar Yahwe iso Kma ḇesaswar, inja ifrur fa Yesus ikyar Kmari isya ifnoḇek i. (Mat. 26:53; Yoh. 8:16) Yahwe kyadaunwarek Yesus i ḇa ro roi ḇefrur fa ḇyekandera. Mboi, ifnoḇek Yesus fa isusu ḇa. Yesus ifawi kandera rosai monda ḇekur i na nakain fyoro ḇa. (Ibr. 12:2) Yahwe fyasnai iswar kaku Yesus i kuker ryowerepen nadi ḇyena, byuk rosai fyandun na, fyarkor i, ma isaramper i.​—Yoh. 5:20; 8:28. w20.02 3 ¶6-7, 9

Rofyor kun snemuk fa koso adat ḇaido tradisi oso ḇaim, kokara pyum snaro snemuk kun ine nbuk fainda ḇepyum ḇe naek srar koḇesya ke roḇa. Komewer kofrur fa naek srar koḇesya skarkar! (Mrk. 9:42) Komewer kako kofrur fa snonggaku ḇeḇe Saksi ḇa sya sne sena naduf kuker komasasor yae kuker si ḇaido kokoryaye kakyar sena. Mgoswarepen saswar ine fainda ḇyedi iba kaku! Snaro saswar ine eḇedari bisa kawos ḇe snonggaku sya ido kofasnai syowi, rarirya na nun sanandik ḇe Yahwe I. Ma kofasnai saswar ine kuker komam ma koḇesyowi si, na randak ya simewer srower rosai kokofen na ḇape ḇarpur mura sfafko ma srower ko. Kofasnai ḇeri ḇe snonggaku sya, koine Saksi-Saksi Yahwe siko. (Yes. 43:10) Kina koḇesya oso imar ido, kina eḇesesya nari simarisen ko ḇa snaro koso ro adat senane ḇa. Ḇape kokofenḇair ḇepon kuker kakyar koḇena ḇe si ido, na sidif ko ḇa kukro sifawi kwar. Inja, kopok fa komai awer kokofenḇair kakaku ḇekur snonggaku ḇemar sya ḇe snonggaku ḇesesya.​—Rm. 1:16. w19.04 17-18 ¶14-16

Manwawan ri 12 siso ḇeso Yesus i fyor ifarmyan ro supswan ine. Yesus ikenem kaḇer ro marmar ya kwar insape Manwawan Paulus dakḇe snonggaku Kristen. Ḇarpur mura, Paulus ḇye ”manwawan faro er-er” sya, ḇesyaḇo daksun ro manwawan ri 12 ansya ḇa. (Rm. 11:13; Kis. 1:21-26) Snonggaku ri 12 ansi sfanam kaku faro Yesus i. Ḇape, Paulus fyafayaf faro si ḇa. Iryaḇ monda faro roi ismai kwar na. Kona sne ḇerun ma koryaḇ faro roi kosmai kwar na ido, na komnis Paulus ma koḇesyowi snonggaku ḇesmai fararur ro Yahwe I kwar sya. (Kis. 21:20-26) Ifrur fasasos kwar fa ikanow snon sya insama sfarkin sidang Kristen. Sima sinapes ḇa kaker, mboi Yahwe myam si ḇe roi ḇepyum byuk faro snonggaku koine. (Ef. 4:8, 11) Koḇesyowi si ma kuker sne ḇerun koso akurfasnai sbuk ḇe ko na ido, nari kofanam pdef ḇe Yahwe I ma kokain ro ḇaḇeoser fnoḇek naek srar koḇesya. w20.02 17-18 ¶13-14

Rofyor wafarkor Refo kuker Saksi Yahwe sya ḇaim, imbude ḇesyowi Refo ma waswar Yesus i kwar. Ḇape kirine, ḇesyowi syadi Refo ma Yesus i. Oso wer ido, snar wafawi Saksi Yahwe sya kwar, wamarisen ḇebati kuker si. Na waswar ma ḇesyowi roi ḇepyum anna kam ḇae. Imbape, insama wun snemuk fa buk kenem Bedi ḇe Yahwe ma ḇebaptis, roi nane nasrow ḇaime. Roi na ḇedif kaku Au fa ḇebaptis iso snar waswar syadi Yahwe I. Waswar syadi Yahwe ro roi nane kam ido, na wapok rwir roi sairirya ḇaido manseirirya ḇa fa idwarek Au fa wafarmyan ḇe Yahwe I. Saswar Bena faro Yahwe na nadif Au fa ḇebaptis ma nafnoḇek Au fa wasoasuser pdef ḇe I fafisu ḇebaptis kwar. Yesus ikofen fandun fa koswar Yahwe kuker sne, kakara, kenem, ma samambraḇ koḇena nasiper. (Mrk. 12:30) Rosai na kofrur insama koswar ma koḇesyowi kaku Yahwe I? Fafisu kokarauser moḇsa Yahwe iswar ko raya, na komarisen kaku kakswar I kako. w20.03 4 ¶4-5

Kofrur posa fararmyan koḇena ima kofrur fararur ḇaḇebaryas ma kobuk farkarkor imnis raris samambraḇ koḇena. Ine kyurfasnai kobuk oras koḇena monda ḇa, ḇape roi ḇefnai fa kobaryas kako nefandun faro Yahwe I. Snaro koswar Yahwe ma min koḇesya, inja kofrur fararmyan Kristen ine ro kankenem koḇena ḇesiper. (Mrk. 12:30, 31; Kol. 3:23) Kofrur fararmyan Kristen ine ro kankenem koḇena ḇesiper ima kyurfasnai kobuk kankenem ma samambraḇ koḇena ḇesiper fa kofrur roi ḇepyum syadi ro fararmyan ya. Fararur ḇaḇebaryas ine ndrama ro Yahwe I, inja na koḇensewar kaku fa kobaryas ḇe snonggaku syakam. Ko kako kona oras nabor fa kobaryas ḇa. Imboi komarisen kaku fa kobaryas. Inja, kosewar kaku insama kofnoḇek snonggaku sya fa sismai angginem ḇepyum ya. Fararur koḇena na nabore, inja na kokara moḇsa kofakapon fararmyan koḇena rai. w19.04 2 ¶3; 3 ¶4, 6

Anggarkar Setan ḇyena nafrur fa snonggaku sesneso syadi ma sekandera kaku. Raris roma mgun oso imar ido, soḇe Allah dun i fa ḇye malaikat ro nanggi. Anggarkar ine ifrur fa sinan sesya sesneso ḇaido simarisen ke? Farkarkor ḇesasar ro for ḇembrer ḇa ine kako eḇedari snonggaku ḇemewer ḇesouser faro farkarkor ro gereja na ido, nari srap si ro aprop. Syap oso ro Pengadilan Katolik Spanyol ikofen, snonggaku ḇena fararur ine sya sikyar imbe sfasnai monda faro bidah [snonggaku ḇemewer ḇeso farkarkor ro gereja] sya bisa ”sḇaḇir kaku for ḇembrerḇa isof fyoro-fyoro” anine insama simbror ma jadi fa srap si ḇa. Ro sup ḇesena, snonggaku sya sfasos anan ḇaido sbuk roi oso faro apus sesya ḇemar fyoro kwar sya, ḇefasnai sesyowi si ma kako sor barakas ro si. Sino wer ido sifrur rarirya kako insama apus sesya simsor si ḇa ma sawninyan si ḇa kako. Kakyar ḇerama ro anggarkar Setan ine nun fainda ḇa kaku. Mboi nafrur fa snonggaku sya seḇirḇar ma simgake. w19.04 14 ¶1; 16 ¶10