September

Snar Yahwe ma Yesus sufararur marḇak kaku, ine kyurfasnai fandun ḇa fa komnaisu ke? Oroḇa ḇeri. Refo ikofen fyor Yahwe ifrur nanggi ma supswan raposa, ’imnai fyararur ma imnaisu’. (Kel. 31:17) Snar Yahwe ima dakfawi imor ḇa, inja fyandun oras fa imnaisu ḇa. Rarirya, wos anna nkurfasnai Yahwe imnai fa ifrur roi ḇebor kam ma byuk oras fa imarisen faro roi ifrur kwar na. Fyor Yesus ikenem ro supswan dakfararur marḇak kako, mboi nya oras kaker fa imnaisu ma dan kayam kuker bati ḇyesi. (Mat. 14:13; Luk. 7:34) Refo danun ḇe Allah kawasa Ḇyesi fa simarisen sfararure. Fandun fa sfararur marḇak ma simyaren. (Ams. 15:19) Imbude kofararur fa kosewar fandun ro kina koḇedi. Ma snonggaku Kristen koine kam kona fakamamar fa kobaryas angginem ḇepyum. Ḇape, kofandun kaker swaf fa komnaisu. w19.12 2 ¶2; 3 ¶4-5

Kofawar awer farfyar kuker rur ḇeḇye ḇa sya. Kosouser Yesus akurfasnai ḇyedi. Fafisu ryo nanggi, ifawi kaku Setan ma rur ḇeḇye ḇa sya moḇ sikenem rai. Ḇape, fafisu ryo supswan, korower fyawar ḇe snonggaku sya ḇa kuker rosai Setan ma rur ḇeḇye ḇa sya sifrur na. Roi fyawar iso Yahwe marisen Ḇyena, mboi Setan ma rur ḇeḇye ḇa sya ḇa. Inja, fandun fa kakfrur raris Yesus i. Kofawar awer farfyar kuker rur ḇeḇye ḇa sya. Ḇefandun ya, kawos monda roi ḇepyum ya iso kakaku ya. (Mz. 45:1) Komgak faro rur ḇeḇye ḇa sya awer. Fyor kokenem ro supswan ine, bisa kosmai roi ḇepyum ḇa na. Kokandor monda kosmai susa, dafduf, ḇaido marmar ya bisa ndrama nkur ko. Ḇape kokara awer roi nane kam awyaye ro rur ḇeḇye ḇa sya. Refo ikofen, ”Oras ma fafisu kofawi ḇa na ndrama myun manseirya kam.” (Pkh. 9:11) Yahwe nya samambraḇ syadi ro rur ḇeḇye ḇa sya. w19.04 23-24 ¶13-14

Sasoser pamarenta sor snonggaku fa sikofenḇair ḇe si ono ḇefrur roi ḇemnis ḇa ḇe romawa mgun ido, penatua sikunem faro sasoser anya ke? Imbo. Ro sup-sup ḇena sasoser ḇemnis radine, penatua sisewar fa sisouser na. Sasoser anna neḇesebur Allah sasoser Ḇyena ḇa. (Kis. 5:28, 29) Inja, fafisu penatua sya sifawi ono sisya sifrur roi ḇemnis ḇa ḇe romawa mgun ido, na sifuken ḇeri ḇe kantor cabang fa sifawi ḇekur rariso siso sasoser pamarenta anna rai. Penatua sya na sbuk kakakyar ḇe romawa ḇesmai roi ḇemnis ḇa ani ma sinan ḇyesuya, ḇaido snonggaku ḇefawi kwar sya, sima sna knam kaku fa sikofenḇair roi anna faro ḇeḇepoik sya. Ḇape, rariso fyor ḇefrur sasar ani iso oso ro sidang ma snonggaku ḇebor sifawi roi ifrur kwar na? Snonggaku Kristen ḇekofenḇair roi anna ḇe ḇepoik sya, imbude na ḇyaḇir roi ikofen na nun sanandik ḇe Allah snonsnon Ḇyeja ḇa. Ḇape, fandun fa ḇyaḇir rarirya awer. Snonggaku ḇefrur sasar ani iso ḇeanonef Allah snonsnon Ḇyedi. w19.05 10 ¶13-14

Allah iwan snonswa ma binswa fa suḇesyowiyae su ma sukenem imnis asas farḇakḇuk suḇena. Ine na nafnoḇek imbeswa ansuya fa susambraḇser snemuk suḇena fa sukain kayam pdef. Refo doḇe, ”Snon oso nari ibur kma ma sna ḇyesuya ma kyainus swari pdef, ma nari suḇeoser.” (Kej. 2:24) Imbape, snonggaku ḇeso fawawinanem dunya ine sna kakara ḇesisye. Soḇe eḇe snon fandun fa kyara fandun manggun ḇyedi ḇardi, eḇe bin ya dakfrur rarirya kako. Syap oso ikofen, ”Ro sup ḇeba ḇeḇeso, fyor snon ma bin suḇe sufarḇuk ido nari sukofen asas suḇena ro ḇarpon snonggaku ḇesesya ḇo suyoḇe nari sukain kayam pdef isof marmari fyaspar su. Mboi ḇeḇefarḇuk ḇebor sya sifadwer wos anna kwar, soḇe na sikain kayam kuker swa sesi fafisu siswaryae si kaker.” Snar smam farḇakḇuk ḇe fasfesepen ḇekain fyoro ḇa, ine nafnai kwar kina ḇebor sya sḇesisye ma ḇebor sya sekandera kaku. Inja, nasnaibos kaku mamam dunya ḇekur farḇakḇuk ya nama neroyoḇa. w19.05 24 ¶12

Paulus imgakwarek snar kakara ḇeḇye ḇa ro dunya Setan nawyae snonggaku Kristen ḇeḇeso kwar. (Ef. 4:17-19) Roi ḇeradine bisa nkur ko kako. Setan, manḇepoik dunya ine, byuk nyan ḇebor fa dawninyan ko insama kobinggwanbur Yahwe. Imnis raris, sasewar snonsnon ḇaido komarisen smam ko ḇe snonggaku ḇefandun kaku. Roi kofarkor ro rum, rumfarkor, ḇaido snonggaku ḇero ris koḇedi, Setan ḇye na kako fa byukininyan kakara koḇena fa namnis kakara ḇyena. Na jadi fa kosawen roi ḇerares nako ḇemnis raris ”ayar mamun” ḇero swaruser koḇena ke? (2 Kor. 10:4) Komam kada Paulus kankarem ḇyena, ”Nggopanggar nyan kakara ḇesasar ma nggokakok rosairirya monda ḇesampum fawawi ḇekur Allah. Nggomam kaku kakara nakam fa sisouser faro Kristus i.” (2 Kor. 10:5, NW) Imbo, kuker fafnoḇek ro Yahwe na kosambraḇ fa kofadwer kakara ḇesasar na. w19.06 8-9 ¶1-3

Hana, Raja Daud, ma manfasfas Mazmur oso skoḇesanekar ma skombrus kaku, mboi skosnefer faro Yahwe fa skosmai fafnoḇek. Skoḇenadi ḇe Yahwe fa skokofenḇair makakwarek skoḇena. Skokofenbos ḇe I roi ḇewar fa skoḇesanekar kaku. Ma skora pdef ḇe moḇ sbukisyom Yahwe I. (1 Sam. 1:9, 10; Mz. 55:22; 73:17; 122:1) Yahwe fyasnai sawarwar kuker ryower ma ifnoḇek sko oser-oser. Hana ismai aski ro swaruser ḇyena. (1 Sam. 1:18) Daud fyas, ”Samswen ro snonggaku ḇenapes nabore, ḇape Yahwe fyaspar i ro roi anna kam.” (Mz. 34:19) Manfasfas Mazmur anya ḇyaḇir Yahwe ’dufepen nako ḇramin raku [ḇyena]’, kuker saswar byuk anun fa fyarkin i. (Mz. 73:23, 24) Rosai kofarkor ro farfyar anane? Fyorno ido, kokamar samswen ḇemarḇak kaku ḇefrur fa koḇekandera. Ḇape, rofyor kokarauser moḇsa Yahwe ifnoḇek snonggaku ḇesesya ido, na komkuepen. Fandun fa kosnefer ḇe I ro nadi, ma kofrur roi imarisen fa kofrur na.​—Mz. 143:1, 4-8. w19.06 17-18 ¶14-15

Mam monda awer roi snonggaku sya sikofen ḇaido sifrur na, nafnai fa wamai waḇe Saksi Yahwe. (Mi. 4:5) Kowasenkara nyan ḇepyum ro manwawan ḇero Yerusalem sya, fafisu Yesus imar kwar. Sifawi manfarkin agama Yahudi sya sayin kaku si. (Kis. 5:17, 18, 27, 28) Ḇape, ras ḇe ras sra pdef ḇe bait ma sfasnaibos sima Yesus manfamyan ḇyesirya kuker sbaryas. (Kis. 5:42) Simewer makakak ya ifrur fa sisusu. Kaksawen makak faro snonggaku sya kako kuker kobaryas ma kofasnaibos koma Saksi Yahwe siko. Kofrur na ro moḇ kofararur ro ya, rumfarkor, ma ro moḇ koḇarek ya. (Kis. 4:29; Rm. 1:16) Rosai ḇefrur fa manwawan sya siryaḇ? Snar sifawi roi ḇefnai sayin si ma sismai kandera snar sifrur Allah marisen Ḇyena. Nainema syowi ḇeba kaku faro si. (Luk. 6:23; Kis. 5:41; 1 Ptr. 2:19-21) Rofyor kofawi sayin ko snar kofrur roi ḇekaku ya ido, kopok korir awer ayayin sena nafrur fa komgak ma kofarmyan ḇe Yahwe I wer ḇa. w19.07 7 ¶19-20

Yesus ma manfamyan ḇyesi ḇeraker Yahudi sya sifrur Ras Mananai snar sisouser Sasoser Moses. Ḇape, ro roi Yesus ikofen ma ifrur na nfasnai kaku snonggaku ḇefrur roi ḇepyum ma ḇefnoḇek snonggaku ḇese ro Ras Mananai sima sifrur sasar ḇa. (Mat. 12:9-11) Myam roi ḇepyum sifrur ro Ras Mananai ḇe roi ḇesasar ḇa. Ro rosai Yesus ifrur na nfasnaiḇair ifawi kaku rosai ḇefnai fa Allah ikofen kawasa Ḇyesi fandun fa simnaisu. Snar simnaisu ro fararur rasras na, inja na sna swaf fa skara monda ḇaḇeari sena faro Allah. Yesus iba ro kina ḇembran Ras Mananai ḇe nyan fa siksyom Allah. Kofawi roi ine rofyor kowasya ḇekur Yesus fafisu ibur ḇe mnu marin ḇyedi, Nazaret. Refo doḇe, ”Imnis rari [Yesus] ḇyedi ro ras Mananai Yahudi syun ḇerum nadi, raimnai iyori fa ḇyewasya Refo.” (Luk. 4:15-19) Yesus manfamyan ḇyesi sesyowi kaku sasoser Ras Mananai ya, inja fyor sikram Yesus i, simnai sfasos mani ḇespum fa sbukipyos Yesus baken ḇyedi isof Ras Mananai inande kwar.​—Luk. 23:55, 56. w19.12 4-5 ¶10

Manfamyan Kristen koine kam na kaksowarpu fa kosewar snonggaku ḇena sne ḇenapes sya. Ine imnis ra kosewar roma mgun ḇeḇor oso. Moḇsa ndrariri? Kwarapan fawar oso. Roma mgun ḇyeumur taun rikyor iḇore. Snonggaku ri 500 sifnoḇek fa sisewar i. Swaf oras ri 20 mura ido, snonggaku oso isrow roma mgun ani ro yaf katera. Snonggaku ani imewer ḇesesya sisandik i snar iso ḇesrow randak roma mgun anya kwar. Doḇe, ”Bisa yasrow roma mgun ani snar fafnoḇek ro snonggaku riutin ansi.” Snonggaku ḇebor sya siḇor famfnom simnis ra roma mgun ani. Sismai saneraro oḇa, inja sifandun fafnoḇek. Manbaryas Karajan riyuta riwar syadi sisya sisewar snonggaku ḇeradine sya. Fafisu wabaryas ro moḇ oso, imbude na wasrow snonggaku ḇemarisen ḇefarkor Refo kuker Au ḇa. Ḇape, manbaryas oso ḇese ḇebaryas ro moḇ anya kako iso ḇesrow snonggaku ḇemarisen ḇefarkor kakaku ro Refo ya. Rofyor naek ḇaido srar oso isrow snonggaku nari ḇarpur ya dakḇe Yesus manfamyan ḇyedi ido, kokame kakmarisen fnoḇek i snar kakso ro sasewar snonggaku ḇena sne ḇenapes ya. w19.07 16-17 ¶9-10

Paulus iswarepenser naek srar ḇero Filipi sya fa simkuepen. Rofyor sidang anya insape dores, kawasa mnu Filipi sewayam naek srar ansi. Ro taun 50 M, Paulus ma Silas susmai fararyor ro Allah fa sura ḇe Makedonia. Inja, sura ḇe Filipi fa subaryas angginem ḇepyum ro dia. (Kis. 16:9) Ro diwa, susrow bin ḇenir ḇe Lidia, ḇeyakmnaf angginem ḇepyum ma Yahwe ”ḇyas sneri”. (Kis. 16:14) Lidia dakḇebaptis fnoḇek ḇero kina ḇyesi kam. Ḇape, Setan irandak fa ifrur roi ḇesamswen yoḇ si. Snon ḇero mnu sya sismer Paulus ma Silas su ḇe ḇarpon ḇebarara sya. Mura, skursof su ḇo soḇe sufnai famfaḇri ro mnu anya. Nafrur fa siprer su, sisun su ḇe bui, ma sor su fa subur mnu ani. (Kis. 16:16-40) Paulus ma Silas sususu ke? Oroḇa ḇeri! Naek srar ḇero sidang ḇebabo ani rosai sifrur ya? Sakmkuepen kako! Roi ḇepyum Paulus ma Silas sufasnai nane nsambraḇser kaku si. w19.08 2 ¶1-2

Kakuḇae, ”bon napnapes” kyurfasnai ḇe saswar sfasnai faro Yahwe ma kawasa Ḇyesi, ma kako kawosḇair ḇe ḇesesya kakyar koḇena faro Kristus ma saneraro ḇepyum koḇena. Kobuk ”bon napnapes” fafisu kosewar kaku ro fararur ḇefandun kaku ine fa kofrur snonggaku sya ḇe manfamyan. (Mat. 28:18-20) Roi risai ḇekur ko, na kosnaiyar ḇe sananai. Fafisu ono, roi neḇemam nadwarek fararur ḇaḇebaryas nbuk swaf ḇepyum fa kobaryas. Imnis raris, fyor ya smamwarek Manwawan Paulus ro rum oso ḇero Roma. Ḇape, fyas syapram ḇyedi faro naek srar ro Filipi sya. Rosai ḇekur i na nadwarek i ḇa fa byaryas ḇe manwarek ma ḇerama ḇemamfar i sya. Ro fafisu ḇeradine Paulus iryaḇ pdef fa byaryas, ma ine byuk kakakyar ḇe naek srar sya fa ”simsik ḇo siwawos ro Allah wos ḇyedi kuker makakak ḇa.”​—Flp. 1:12-14; 4:22. w19.08 12 ¶15-16

Roi ḇefnai fandun fa kona sne ḇerun ya isoine rari ine ifrur Yahwe imarisen. Manwawan Petrus dakkofen bos roi ine fyor fyas wos ḇero mnuk faro ras ine. Ro syap ”Mari Jadilah Pengikutku”, fasal 3, syos ḇe 23 dawosḇair Petrus wos ḇyena ḇo doḇe, ”Ararer ima imnis ra roi ḇemamur. Dun ḇe roi ḇeḇye ḇa kaku. Rari ine ifrur fa snonggaku ḇena samambraḇ ḇeba kaku na ḇye roi oḇa ro ḇarpon Allah. Imbape, ḇaḇerun sne nafrur fa snonggaku ḇe roi oḇa na ḇyefainda faro Yahwe. . . . Nari byuk barakas ḇe Au snar ḇaḇerun sne Bena.” Kokarapan kada, bisa kofrur Yahwe imarisen. Inema roi ḇepyum syadi kosambraḇ fa kofrur na ke? (Ams. 23:15) Kona sne ḇerun ido, na kofrur Yahwe imarisen monda ḇa. Na kaksmai fainda nabor kako. Kona sne ḇerun ido, ḇesesya simarisen sfanam yoḇ ko. Rosai ḇefnai ya? Kwarapan, snonggaku ḇemnis rariso wamarisen sya.​—Mat. 7:12. w19.09 4 ¶8-9

Penatua sya sfararur marḇak fa sifnoḇek naek srar sya. Skara ḇa sima sipyum syadi ro ḇesesya snar fakamamar sismai na. Mboi sḇeaḇaḇen faro naek srar ro sidang sya. (1 Tes. 2:7, 8) Siswar kaku naek srar ma sfasnai sne ḇerun. Eḇedari sawos myaren asuser yoḇ si. Penatua ḇefarmyan fyoro kwar ḇenir ḇe Andre doḇe, ”Yamam mboi naek srar na simarisen syadi rofyor penatua sya simyaren asuser ma sifrur pyum si. Nari simarisen fa sifararur kayam kuker penatua sya.” Toni, ḇeyakfarmyan ḇe penatua fyoro kwar, dakkofen radine, ”Yaḇesewar fa yaso anun ḇero Filipi 2:3 fa yamam snonggaku ḇesesya sikaki syadi ro aya. Ine nafnoḇek aya fa yafrur raris manḇepoik ḇa.” Penatua fandun fa sfasnai sne ḇerun, raris Yahwe I. Yahwe iso Manḇepoik ḇekaki syadi ro farsyos ḇeba ine, mboi imarisen ”ikunem fa . . . ikanow snonggaku ḇeryar ḇa ro roref”. (Mz. 18:35; 113:6, 7) Inja, Yahwe dayin kaku snonggaku ḇeararer sya. w19.09 16-17 ¶11-12

Insama kosmai sneprei fyor koḇar Yesus kamnam ḇyedi fandun fa kona mamam ḇemnis pdef. Kofrur Yahwe fararur Ḇyena inja fandun fa kofrur imnis Yahwe nyan Ḇyena. Koma snonggaku ḇefararur monda siko, ma Yahwe iso Ḇena fararur ya. (Luk. 17:10) Kosewar kofrur kuker nyan koḇena ḇardi ido, na kosmai samswen snar kopampum Yesus kamnam ḇyedi. Imbape, koso farkankin ro Yahwe ido, na kosambraḇ fa kofrur roi randak ya kokara ḇe roi ḇesamswen na. Koswarepen, snonggaku oso ḇaḇeri nari ḇepok fa ḇedwarek Yahwe marisen Ḇyena fa ndrarirya! (Rm. 8:31; 1 Yoh. 4:4) Imbe koḇar Yesus kamnam ḇyedi snar komarisen kosandik Yahwe I. Ro abad randak, snonggaku ḇeso Yesus snar skara ma sisewar fandun manggunsi ḇardi, sismai aski ḇa ma simewer sḇar Yesus kamnam ḇyedi. (Yoh. 6:25-27, 51, 60, 66; Flp. 3:18, 19) Ḇape, ḇeso Yesus snar siswar kaku Allah ma min sesi, sḇar Yesus kamnam ḇyedi fyor sikenem kaker ro supswan, ma siwaf fafisu nari sfarmyan kayam fnoḇek Kristus ro nanggi. Imnis si, na koryaḇ pdef fyor koḇar Yesus kamnam ḇyedi kuker sne ḇenapes. w19.09 20 ¶1; 24-25 ¶19-20

Kwarapan kako barakas wasmai snar wamkei ro farkarkor ḇekaku ḇa na. Komarisen kaku fa kosmai ḇaḇemkei ḇeradine! Wakyar kaku, nari wasmai ḇaḇemkei ḇeba syadi ya. Fyoro wer ḇa, Yesus nari kyakokpres agama ḇekaku ḇa ma pamarenta ḇepyum ḇa na. Allah nari kyadaunwarek ’raryur ḇeba’ ro snonggaku ḇefarmyan faro I sya, mura ḇye si fa sismai barakas ro firdaus ro supswan. (Why. 7:9, 14) Snonggaku ḇebor ḇemar kwar sya nari sikḇok. Si ḇekinfir fa sfarmyan ḇe Yahwe na sipok siduf, sḇe mansar binsar, ḇaido simar wer ḇa. (Kis. 24:15) Ro fafisu Ḇaḇepapoik Taun Syaran Oser, Yesus ma ḇepoik fnoḇek i sya nari sifnoḇek snonggaku sya fa sismai baken ḇeprei ma sna wis ḇepyum kaku kuker Allah. Kawasa Israel ḇepon siwara sismai ḇaḇemkei fafisu taun Yobel. Rarirya kako snonggaku sya nari sismai ḇaḇemkei ḇeba syadi ro fafisu Ḇaḇepapoik Taun Syaran Oser. Inja, ḇefarmyan ḇe Yahwe kuker soasuser syakam nari sḇe snonggaku ḇenapes kaku ma sna sasar oḇa. w19.12 12-13 ¶14-16

Ro abad randak Masehi, snon oso ḇena snemura ḇenir ḇe Yusuf (sap kako i ḇe Barnabas), Yahwe ḇye i fa ifrur marisen Ḇyedi. (Kis. 4:36, 37) Fyor Saul dakḇe Kristen raposa, naek srar ḇebor sya simgak fa sfanam yoḇ i snar randak iwara ḇyewayam snonggaku Kristen sya. Ḇape, Barnabas imarisen byuk sneprei ma ifnoḇek Saul i. (Kis. 9:21, 26-28) Ḇarpur ya, penatua ḇero Yerusalem sya skara fandun fa sisambraḇser naek srar ro Antiokhia ḇero Siria. Mansei siwan ya? Barnabas! Skinfir sasar i ḇa snar Refo doḇe Barnabas ”ḇyuk swarepen farosi insa skain nadworen faro Manseren”. (Kis. 11:22-24) Baboine kako, Yahwe ḇye ko fa kobuk sneprei faro naek srar koḇesi. Imnis raris, ḇye ko fa kobuk sneprei faro ḇefafardun sya snar snonggaku siswar sya srobur si. Ḇaido, fyor ono sisya siduf ke sesanekar ke, Yahwe na idif ko fa kora komamfar si ḇaido koḇetelfon si. Wamarisen Yahwe ḇye Au fa buk sneprei ḇe ḇesesya raris Barnabas i ke?​—1 Tes. 5:14. w19.10 22 ¶8

Fafisu kofararur kayam kuker bati koḇesya, na komam sifrur roi ḇepyum monda ḇa, mboi sifrur sasar kako. Rarirya ido, rosai na ḇefnoḇek ko insama kofanam pdef kuker si? Kakuḇae, kopok kokara awer na naek srar koḇesi sifrur roi ḇenapes rarya kwar. Inja, rofyor kona bati oso na kosewar kaku fa komamwarek ḇaḇebati koḇena fa nakain fyoro. Bati koḇesi sifrur sasar ido, fandun fa kobuk ananun ḇeknam ro Refo ḇe si mboi kawos kuker mayaryaren. (Mz. 141:5) Ma fyor ono sifrur fa kofafayaf ido, fandun fa kobuk ampun ḇe si. Kobuk ampun kwar ido kopok kap kaḇer awer roi sifrur kwar na ro ḇarpon sena ḇaido snonggaku ḇesesya. Ro fafisu rasras ḇepupes ine, fandun kaku fa komam monda ḇe roi ḇepyum ro naek srar sya ḇardibur sasar sena! Kofrur na ido na kofanam syadi kuker si, snar nari ro kandera ḇeba ya kofandun bati koḇansine! w19.11 6 ¶13, 16

Fafisu kobuk farkarkor Refo ya, fandun fa kosewar kaku ’kofrur snonggaku sya fa sakḇe Yesus manfamyan ḇyedi’ ma ’kofarkor si fa sifrur roi ḇebor kam raris Yesus ḇyeasas kwar’. Ipyum ya kofnoḇek si fa sifawi kaku fandun fa siwaira ḇe Yahwe ma Karajan Ḇyedi. Inja, fandun fa kofnoḇek si insama sifrur roi sfarkor kwar na, sbuk kankenem sena fa sfarmyan ḇe Yahwe, ma sḇebaptis. Sifrur rarirya ido, insape nari sfasparbur Yahwe ras Ḇyedi. (1 Ptr. 3:21) Kona swaf nabor ḇa, dunya ine kero wer na ḇyenande. Iso ḇefnai fa komewer kofnak oras koḇena fa kobuk farkarkor Refo faro snonggaku ḇemarisen manggun ḇa fa sakḇe Yahwe manfamyan Ḇyedi. (1 Kor. 9:26) Fararur koḇenane fandun fa kofrur fasaw na! Snonggaku sibor sisya kaker fandun fa srower angginem ḇeḇye ro swaf ḇedawer ine. w19.10 11-12 ¶14-15

Ro taun nakam, er Israel siryur fa sifrur Hari Pendamaian ḇaido Ras Payasyos. Ḇape ḇepon ya, imam ḇeba nya fararur ḇefandun kaku isoine isḇawer fawas ro ḇo for ya, ma dupa ani nadiref ro sim ani kam. Rosai kofarkor ya? Refo doḇe nadi ro Yahwe manfamyan ḇesoasuser Ḇyesi namnis ra dupa. (Mz. 141:2; Why. 5:8) Imam ḇeba fyasnai syowi kaku fyor dun dupa ḇe ḇarpon Yahwe. Rarirya kako, fyor koḇenadi ḇe Yahwe, kofasnai syowi ḇeba kaku. Komanen kaku baba Ḇyena. Kokofen kasumasa kaku snar Manḇedaw ḇefrur ko byuk swaf ḇe ko fa kofanam yoḇ I ma kona wis ḇepyum kuker I, raris romawa kasun fyanam ḇe kmari. (Yak. 4:8) Imarisen fa kakḇebati Ḇyedi! (Mz. 25:14) Koḇesyowi kaku fakamaman ine isof komewer kofrur Yahwe fyafko. w19.11 20-21 ¶3-5

Ro moḇ ḇarek roya, moḇsa snonggaku ḇebor smam fararur ya rai? Ro sup ḇebor, snonggaku sya sfararur marḇak ro swaf kawan syadi. Fyorno ido ḇefararur marḇak kaku sya na sna oras oḇa fa simnaisu, sekayam kuker kina sesi, ḇaido sfarkor Refo. (Pkh. 2:23) Ḇesesya wer, simewer sifararur ma sisewar nyan insama sifararur ḇa. (Ams. 26:13, 14) Snonggaku ono sisya sifararur marḇak mboi ḇesesya oroḇa. Ḇape, kokarapan moḇsa Yahwe ma Yesus sumam fararur ya rai. Kofawi Yahwe ima imarisen fa fyararure. Yesus fyasnaibos roi ine fyor ikofen, ”Mami ifararur isof ras ine, inja aya kako yakfararur.” (Yoh. 5:17) Kowasenpan fafisu Yahwe ifrur malaikat ḇebor sya, mak ma planet sya. Komam kako roi ḇepduk Allah ifrur ro supswan inenya. w19.12 2 ¶1-2

Moḇsa Daud ḇyebati fanam kaku kuker Yahwe I rai? Daud fyarkor ḇekur Yahwe ro ḇraur Ḇyena. Rofyor Daud byabo kaker, byuk oras ḇyena fa fyarandows kmari domba ḇyesi ro maper na. Imbude ro swaf anya iwasenkara Yahwe ḇraur Ḇyena. Imnis raris, ro roḇ ya Daud myam mura ḇe farsyos iyaswa ḇo myam mak sibor sisya monda ḇa, mboi Daud dakfawi mnis kaku Allah, Manḇefrur mak ansi, rari-rari Ḇyena. (Mz. 19:1, 2) Oso wer, fafisu Daud iwasenkara moḇsa Yahwe ifrur snonggaku kuker nyan ḇepyum kaku, Daud ḇyaḇir Allah ima ifawinanem kaku. (Mz. 139:14) Rofyor Daud iwasenkara Allah ḇraur Ḇyena kam, ḇyaḇir ima ifawi royoḇaḇeri ro ḇarpon Yahwe. (Mz. 139:6) Rosai farkarkor ya ḇe ko? Ro rasras na, mampan Allah ḇraur Ḇyena raris rokaker na, aiwan, ma snonggaku sya. Kwarapan rosai wafarkor ro si. Rarirya, ras ḇe ras na wafanam syadi ḇe Kma ḇesaswar koḇedi. (Rm. 1:20) Ras nenande mura, na ḇaḇir saswar Bena faro Yahwe nasambraḇ syadi. w19.12 19-20 ¶15-17

Moses kyinfir fa fyarmyan ḇe Allah. Fafisu ḇyeumur taun ri 40, Moses kyinfir fa daksowarpu Allah kawasa Ḇyesi, snonggaku Israel sya. Moses imewer sap i ḇe ’romawa ro imboki wairek Masir’. Imarisen ryir nasan ḇekaki anya. Moses ifawi Firaun na imsor i fafayaḇa snar kyinfir fa iḇriwarek snonggaku Israel, ḇeḇewomen ro Masir. Ro fafisu ani, Firaun ima raja ḇepoik kaku ma snonggaku Masir sya smam i ḇe dewa. Inja, rosai Moses ifrur na nfasnai ikyar kaku faro Yahwe. Kayaryar ḇyenane nbe knam ro ḇaḇebati ḇyedi kuker Yahwe fa kyain pdef ro rasras kankenem ḇyedi. (Ams. 3:5) Rosai farkarkor ya ḇe ko? Raris Moses, kokame fandun fa kofrur snemuk: Kokinfir fa kofarmyan ḇe Allah ma kaksowarpu kawasa Ḇyesi ke? Insama kofarmyan ḇe Allah, na fandun fa kobur roi ono. Oroḇaido snonggaku ḇemambir Yahwe I ḇa sya na sembroḇ ko. Ḇape, kokyar faro Kma koḇedi ro nanggi ido, kofawi kaku nari ifnoḇek ko! w19.12 17 ¶5-6

Koinema koḇeḇefrur ro saprop, mboi koḇemaeja syadi ro saprop na. Kokarapan roi ḇeḇeso ḇefrur fa kokyar Yahwe myam koma koḇemaeja. Yahwe ifrur snonggaku koine ma byuk samambraḇ ḇe ko fa kakfasnai rari Ḇyena. Rarirya, Yahwe ḇye snonggaku koine kokaki syadi ro ḇraur ḇesena ro supswan ine kam. (Kej. 1:27) Ifrur ko kako fa koḇepoik supswan ma aiwan sya. (Mz. 8:4-8) Rofyor Adam ifrur sasar kwar, Yahwe iswar pdef snonggaku sya. Iswar ko rawo imarisen byuk Roma iswar kaku, Yesus i, fa imarwarek ko snar sasar koḇena. (1 Yoh. 4:9, 10) Ḇeknam ro Yesus marmar ḇyedi, Yahwe nari ḇyawes snonggaku ḇemar kwar snar sasar ro Adam, iḇye ”snonkaku ḇenapes sya ma ḇenapes ḇa sya”. (Kis. 24:15) Refo ikofenḇair fafisu koduf, kona royoḇa, ḇaido koḇesinan kwar ke, Yahwe myam koḇemaeja kaker.​—Kis. 10:34, 35. w20.01 15 ¶5-6

Saneraro kankenem ro nanggi nama roi kina sesi sbuk ḇe waris risya ḇa. Mboi Allah iso ḇeyor si. (1 Tes. 2:12) Oso wer ido, kopok kofuken awer roi na ḇefrur fa snonggaku ḇesesya sisnesna naduf. Imnis raris, kofuken awer ḇe manbesrar ḇesmai ramrem oso swari radine, ’Nari wakenem ro supswan ine boi swambri dek ḇe nanggi ido, moḇsa na ḇaḇir rai?’ Kokyar ro dunya babo, Yahwe nari ’ḇyas bramin Ḇyedi ma byuk sneprei faro marasrisen ḇekenem syakam’. (Mz. 145:16) Komam snonggaku ḇesmai ramrem sya sifandun syadi ḇa ido, koisya kokadaunwarek manggunko. Kukro? Refo isya ikofenḇair ḇe ko, snonggaku ḇesmai ramrem ono sisya sisouser pdef ḇa. (Mat. 25:10-12; 2 Ptr. 2:20, 21) Komewer komanen syadadi si ido, nari kosowanan snonggaku ḇesesya ḇa, ḇesmai ramrem sya ke, snonggaku sifawi si kwar ke, ḇaido ḇefarmyan fyoro kwar sya. Rarirya, rofyor snonggaku ansi sisouser wer ḇa ḇaido sibur sidang ke, nari kokyar ma kofarmyan pdef ḇe Yahwe I. w20.01 29 ¶9-10

Snar koinema Yahwe ”romawa iswar kaku” Ḇyesiko, inja kosewar kaku fa kosouser I. Koso rari-rari Ḇyena kuker kofasnai saswar, frur pyum, ma kobuk ampun faro snonggaku ḇefrur sasar maro ko. Fafisu snonggaku ḇemambir Yahwe ḇa sya smam kenem ḇepyum koḇena, imbude na simarisen sakfarkor fa sakfawi Yahwe I. (1 Ptr. 2:12) Sinan Kristen sya fandun fa sifrur pyum romawa sesya raris moḇ Yahwe ifrur pyum ko raya. Sifrur rarirya ido, nari romawa sesi simarisen sakḇebati kuker Yahwe I. Komanen kaku Kma koḇedi ro nanggi ma komarisen snonggaku ḇesesya sakfawi I. Kakḇaḇir raris Raja Daud i, fyas ḇo doḇe, ”Nari yamanen syadi Yahwe I.” (Mz. 34:2) Ḇape, komai fa kokofenḇair Yahwe I ḇe ḇesesya ido na rariso? Rariso insama komgak ḇa? Koswarepen monda nari Yahwe imarisen ma nari snonggaku ḇesesya sismai payamyum fyor kofnoḇek si fa sakfawi Yahwe I. Yahwe na ifnoḇek ko fa komgak ḇa. Raris moḇ ifnoḇek naek srar ro abad randak siwara fa simgak ḇa, na ifnoḇek ko kako fa komgak ḇa.​—1 Tes. 2:2. w20.02 11-13 ¶12-13

Ḇebor ḇefarkor Refo sya sfadwer kenem sena kwar ma sebaptis. Imbape, ḇeḇeso ḇefarkor Refo kuker konsya rya simgak fa sakḇe manfamyan faro Yesus i. Simarisen sfarkor, mboi sfadwer kenem sena fa sakḇebaptis ḇa. Ausya wafnoḇek snonggaku oso fa fyarkor Refo ido, nggokyar wamarisen wafnoḇek i fa ikenem imnis rosai fyarkor kwar ma dakḇe manfamyan faro Kristus kako. Yahwe imarisen snonggaku sya sfarmyan ḇe I kukro siswar I. Inja, roi imbe kofrur ya iso kofnoḇek ḇefarkor Refo sya fa sifawi Yahwe fyandun ma iswar kaku si oser-oser. Komarisen kofnoḇek si fa smam Yahwe ḇe ’kma faro romawa awak sya ma ḇekadaunwarek kabom sya’. (Mz. 68:5) Rofyor ḇefarkor Refo kuker Au sakḇesyowi Allah saswar Ḇyena kwar ido, nari nsun ro sisnesna mura sakswar I kako. w20.01 3 ¶7-8

Paulus fyasnai sne ḇerun kaku, inja ifawi fyandun wos sneprei ro bati ḇyesya. Kyara ḇa na snonggaku ḇese smam ima iryar ḇa kwar isof fyandun samarawraw ro bati ḇyesi ro fafisu ismai samswen. (Kol. 4:7-11) Kuker sne ḇerun kofasnai kofandun samarawraw ido, naek srar koḇesi nari simarisen sbuk fafnoḇek kofandun na. Paulus ifawi wos ḇero Refo nari nbuk sneprei ḇe i. (Rm. 15:4) Nbuk fawawinanem kako ḇe i ro samswen rosai monda ḇekur i na. (2 Tim. 3:15, 16) Rofyor sisun Paulus i ḇe bui ro Roma ḇerarwan risuru, ifawi fyoro wer ḇa na smun i fa imar. Dor Timotius i fa ryama fasaw ma dun syap ḇeniw ḇyena. (2 Tim. 4:6, 7, 9, 13) Rosai ḇefnai ya? Kukro syap ḇeniw naiso fasfas ḇeḇeso ro Syap-Syap Ibrani Paulus byukifarkor Refo ya. Kosmai samswen ḇemarḇak kaku mboi kofarkor myaren Refo raris Paulus ido, Yahwe nari byuk sneprei ḇe ko roro mnuk-mnuk kowasya kwar anna. w20.02 23-24 ¶14-15

Elifaz, Bildad, ma Zofar skobuk swaf na ḇa fa skokara moḇsa skofnoḇek Ayub i rai. Ḇesyaḇo, skokara monda nyan fa skobukifasnai Ayub ifrur sasar kwar. Roi ḇeḇeso skokofen na nkaku, mboi roi ḇebor skokofen ḇekur Ayub ma Yahwe nama napyum ḇa ḇaido nkaku ḇaḇeri. Skursof famfnom Ayub i. (Ayb. 32:1-3) Yahwe imarisen faro roi skofrur na ke? Oroḇa. Yahwe imsor fafaya snon rikyor anskoine. Dap sko ḇe snon ḇefawi royoḇa ma iwan sko fa skor ḇe Ayub insama ḇyenadiwarek sko. (Ayb. 42:7-9) Na kun farkarkor riḇeso ro roi ḇeḇye ḇa Elifaz, Bildad, ma Zofar skofrur na. Ḇepon ya, kopok komankara famfnom awer naek srar koḇesi. (Mat. 7:2-5) Ḇape, ipyum fa korower pyum si insape kawose. Rarirya ido, na kofawi pyum rosai ḇekur kaku si. (1 Ptr. 3:8) Ḇesuru ya, fyor kawose fandun fa komam mnis roi kawos na napyum ma nkaku. (Ef. 4:25) Ḇekyor ya, koswarepen Yahwe myam kaku roi kokofen ḇe snonggaku ḇese. w20.03 22-23 ¶15-16

Fafisu ono, na komambir pyum Yahwe rofyor kofarkor snonggaku ḇesesya ḇekur Yahwe I. Imnis raris, fyor Yahwe fyarkin ko fa kosrow snonggaku ḇena sne ḇenapes sya, na komam ro manggunko Yahwe ima isawarwar kaku. (Yoh. 6:44; Kis. 13:48) Fafisu ḇefarkor Refo sya sfadwer kenem ḇeḇye ḇa sena ma sifasnai kenem ḇepyum ido, komam papoik ro Wos Refo fyararur ro si. (Kol. 3:9, 10) Ma komam Allah kaḇaḇaḇ Ḇyedi fyor byuk swaf ker ḇe snonggaku ḇebor sya fa sfarkor Refo ma sismai fasaspar. (Rm. 10:13-15) Kofarmyan ḇe Yahwe fyoro kwar ke roḇa, fandun fa koḇesyowi ḇaḇebati koḇena kuker I. Rariso na kofasnaiḇair koḇesyowi ḇaḇebati koḇena kuker Allah? Nyan oser ya iso koḇenadi. Komarisen koḇebati fanam kuker snonggaku oso ido, fandun fa kawos ker kuker i. Rarirya kako, komarisen kakḇebati fanam kuker Allah ido, kawos ḇe Yahwe ḇesya kwar ro nadi. Komai awer fa kokofenḇair rosai kokara ma koḇaḇir na. w19.12 19 ¶11, 13-14

Nari komarisen kaku. Ro fafisu Yesus ḇye Raja ro Karajan Allah, nari ipyos ḇaḇekandera ḇerama ro mbroḇ koḇedi Setan i. (Yes. 65:17; 1 Yoh. 3:8; Why. 21:3, 4) Inja ro fafisu iyama kosmai kankenem ḇeyun marisen. Ro fafisu ine Yesus byuk fararur oso ḇe ko mboi ipyan ḇa, rariryano isaramper ko ḇesya kwar. (Mat. 28:19, 20) Inja na koḇebri syadi wer! Insama koḇeaski ido kofandun kakyar, saneraro, ma ḇaḇebri. Inja, moḇsa kosmai aski ya pdef rofyor fafrowes ndrama nkur ko? Koso mnis raris nyan Yesus ifrur ya. Ḇepon ya, koḇenadi ḇesya kwar. Ḇesuru ya, kosmai samswen rariryano, fandun fa kosouser pdef ḇe Yahwe, ma kobaryas kuker raryaḇ. Ḇekyor ya, fafisu kosmai fafrowes na, kor fafnoḇek ro bati koḇesya. Rarirya ḇaḇeaski ro Allah nari kyadaun sne ma swaruser koḇena. (Flp. 4:6, 7) Ma imnis raris Yesus i, bisa kokrenbur fafrowes ḇebor ḇerama ḇekur ko na.​—Yoh. 16:33. w19.04 13 ¶16-17