Januari

Timotius kakyar ḇyena neknam ro kakaku ismai kwar ya ma fyanam kuker Yahwe I. Au kako fandun fa wafarkor Refo, kwarauser pyum na insama wakyar kaku roi wafarkor ḇekur Yahwe I. Ḇepon ya, fandun fa wakyar kakaku rikyor ḇeknam kaku ine. Oser ya, wakyar kaku Allah Yahwe iso ḇefrur roi nayafa kam. (Kel. 3:14, 15; Ibr. 3:4; Why. 4:11) Ḇesuru ya, wakyar Refo naser anun ḇeramuma ro Allah faro snonggaku sya. (2 Tim. 3:16, 17) Ma ḇekyor ya, wakyar Yahwe iryur kawasa ḇefarmyan faro I fa seoser, ma siso farkankin ro Yesus i. Siso Saksi-Saksi Yahwe sya. (Yes. 43:10-12; Yoh. 14:6; Kis. 15:14) Kwara awer na wafawi roi ḇero Refo nakam resari. Roi fandun fa wafrur ya iso buk swaruser Bena nasiper fa wakyar nako Ausya wasmai kakaku ya kwar.​—Rm. 12:1. w20.07 10 ¶8-9

Ro ḇardadi ine, kampam sya ḇarpon sena namnis snonggaku ma ’roi smam imnis wower brawen’ ro siḇrusna. (Why. 9:7) Smun monda ”snonkaku [Allah mbroḇ Ḇyesi] ḇesma kakop aḇyair ro Allah ḇa ro andar sena” ro swaf paik ririm. Ine iso swaf faro kampam oso fa ikenem. (Why. 9:4) Ine kyurfasnai ḇe Yahwe manfamyan Ḇyesi ḇesmai ramrem sya. Simgak ḇa ḇo sḇaryas anun samamyai faro dunya ḇeḇarḇor ine, ma nafnai fa ḇewaira ḇe dunya ine sya simarisen ḇa kaku. Inja, kampam sap ro syap Yoel 2:7-9 siḇese ro kampam sap ro syap Fasasna. Kowasya ro Refo kada, fyorno ido sap roi oso fa sḇukiḇair roi ḇesisye. Imnis raris, ro Fasasna 5:5, sap Yesus i ḇe ’Singa ro er Yehuda’, ḇape ro 1 Petrus 5:8, sap Ibiris i ḇe ’singa ḇeaur’. w20.04 3 ¶8; 4-5 ¶10

Sarai ḇyuk binfyan ḇyedi, Hagar i, fa fyarḇuk kuker Abram i. Mboi ḇarpur mura, ifrur pyum Sarai ḇa. Rofyor Hagar fyadores kwar, myamkyof Sarai kukro pyansnasem. Iso ḇefnai fa Sarai ifrur pyum Hagar i ḇa isof ifrarbur i. (Kej. 16:4-6) Snar konapes ḇa, inja na kokara Hagar ismai roi ḇeradirya kukro dararer i. Ḇape, Yahwe myam Hagar imnis rarirya ḇa. Iwan malaikat fa isrow Hagar i. Malaikat anine ifnoḇek Hagar i fa fyadwer kenem ḇyedi ma ikofen Allah nari ḇyuk romawa sibor ḇe i. Hagar ifawi kaku Yahwe isya myam ma ifawi roi ḇekur i na. Nane nadif i fa ikofen ḇe Yahwe I, ”Auso Allah ḇemam roi nakam . . . [ma] ḇemam aya.” (Kej. 16:7-13) Rosai Yahwe myam ro Hagar i? Yahwe ifawi kaku Hagar i ma rosai monda ḇekur i na. Kaku ḇae, Yahwe imarisen ḇa fyor myam Hagar ḇyesyowi Sarai ḇa. Ḇape, Yahwe ifawi pyum Hagar sneḇaḇir ḇyena ma roi ḇekur i na, inja ifrur pyum Hagar i. w20.04 16 ¶8-9

Manwawan Paulus doḇe snonggaku Kristen syakam sisya siso ro fanandi farandar oso. (Ibr. 12:1) Kobabo ke koḇesinan kwar ke, kosambraḇ ke koryar ḇa ke, fandun fa kokame komkuepen isof ro papupes insama kosmai sasuref Yahwe nari ḇyuk ḇe ko na. (Mat. 24:13) Paulus bisa danun kaku faro ḇesesya kukro manggundi ’ifrar isof ismai mun ḇepupes ya kwar’. (2 Tim. 4:7, 8) Ḇape, rosai Paulus ikofen kaku ḇekur fanandi farandar anya? Fyorno ido, Paulus fyasḇair roi sifrur ro Yunani ḇepon iwara fa ḇyukifarkor roi ḇefandun kaku. (1 Kor. 9:25-27; 2 Tim. 2:5) Mnuk ḇeḇeso ro Refo doḇe snonggaku Kristen kenem sena imnis ra fanandi farandar. (1 Kor. 9:24; Flp. 2:16) Snonggaku oso na iso randak ro fanandi faro kankenem rofyor ḇyuk kenem ḇyedi fa fyarmyan ḇe Yahwe I ma ḇyebaptis. (1 Ptr. 3:21) Ifrar isof ismai ro mun ḇepupes iso rofyor Yahwe ḇyuk sasuref ḇe i isoine kankenem fyoro ya.​—Mat. 25:31-34, 46; 2 Tim. 4:8. w20.04 26 ¶1-3

Roro Manseren koḇani Yesus i, inari ḇyuk ’samambraḇ ma iḇriwarek ko ro ḇeḇarḇor sya’. (2 Tes. 3:3) Inja, moḇsa Yahwe kyadaunwarek ko rai? Yahwe ḇyuk romamun ḇebor ḇe ko fa kobukidwarek ko ro Setan roi ḇeḇarḇor ḇyena. (Ef. 6:13-17) Romamun ḇebor anna nsambraḇ kaku ma napyum faro ko! Imboi romamun anna bisa nadwarek ko ido, na koḇepake kam na ma kopok koper na ḇa. Imnis ra, ḇeḇoḇek sifer isoine kakaku. Ḇeḇoḇek sifer ine nfasnaiḇairo Allah Wos Ḇyena, Refo ya. Rosai ḇefnai kaku fa koḇepake na? Snar kakaku ḇero Refo na nadwarek ko ro Setan anggarkar ḇyena, snar iso ”kma ro ankarkar na kam”. (Yoh. 8:44) Ro swaf risyaran syadi danggarkar ker ma ifrowes kawasa ḇero ”supswan ḇesiper” ine kwar. (Why. 12:9) Moḇsa na koḇepake roi ḇeḇoḇek sifer anine? Koḇepake na kuker (1) kofarkor kakaku ro Yahwe I, (2) kosyom I ’kuker rur ma napnapes’, ma (3) kofrur roi ḇebor na kuker anggarkar ḇa.​—Yoh. 4:24; Ef. 4:25; Ibr. 13:18. w21.03 26-27 ¶3-5

Roi ḇefrur kaku fa sup ani ipduk iso kukro ro dia samsyom ḇekaku ya isya. Ro swaf ras Pentakosta taun 33 M, ”sup” anya kyur kaku ḇe sup oso wer ḇa kukro Yahwe kawasa Ḇyesi sro supswan ḇesiper. Inja ro baboine, ”Sup Ḇepduk” ine kyur ḇe roi Allah kawasa Ḇyesi sifrur nakam, imnis raris siso fananjur ma ḇaḇeḇaryas ya. Ro ras-ras ḇepupes, raja bar wambrur syun ker ro ”Sup Ḇepduk”. Imnis raris, ro fafisu mamun dunya ḇesuru fyor Nazi Jerman ḇye raja bar wambrur, syun ro ”Sup Ḇepduk” kuker iwayam ma myun Allah kawasa Ḇyesi. Mamun Dunya II posa, fyor Uni Soviet ḇye raja bar wambrur, syun ḇe ”Sup Ḇepduk” kuker iwayam Allah kawasa Ḇyesi, ma isawen si ḇe moḇ ḇebinggwan. w20.05 13 ¶7-8

Fafisu Yesus ryama ḇe supswan ine ḇaim, snonggaku ono sisya sakḇebati kuker Allah kwar. Oser ya iso Abraham i, snon ine ikyar kaku faro Allah. Fyor Abraham imar, swaf taun ri 1.000 nande mura, Yahwe dor i ḇe bati Ḇyedi. (Yes. 41:8) Inja, marmar na ipok idwarek ḇaḇebati koḇena kuker Yahwe I ḇa. Yahwe ḇyefnder Abraham i ḇaḇeri. (Luk. 20:37, 38) Yahwe bati Ḇyedi oso ḇese iso Ayub i. Fafisu malaikat sya sfanjur kam ro nanggi, Yahwe ikofenḇair ḇekur Ayub i. Yahwe doḇe Ayub ima ’nya sne ḇenapes, isoasuser, imgak faro Allah, ma ḇyinggwan ro roi ḇeḇye ḇa na’. (Ayb. 1:6-8) Oso wer iso Daniel i. Ro swaf taun ri 80, ḇyarekus snonggaku ḇesyom ḇe Yahwe I ḇa sya. Mboi, ifarmyan ḇe Yahwe I pdef. Moḇsa Yahwe myam Daniel i rai? Rarwan rikyor malaikat ryama myamfar nabi ḇe mansar kaku kwar ine fa ikofen ḇe i snar Allah iswar kaku i. (Dan. 9:23; 10:11, 19) Kokyar kaku Yahwe na myander kaku fa ḇye bati Ḇyesi ḇemar kwar sya fa sikenem kaḇer.​—Ayb. 14:15. w20.05 26-27 ¶3-4

Ḇefarkor pyum Refo sya, na sfarkor Allah parenta Ḇyena ma simarisen na kako. Mboi, ḇefarkor ansine nari sisouser Yahwe kukro siswar faro I ke? Koswarepen, Eva ifawi Allah parenta Ḇyena ḇae, mboi iswar Allah ḇa. Adam dakfrur rarirya kako. (Kej. 3:1-6) Inja, kofarkor si Allah parenta ma marisen Ḇyena nama napyum kwar, mboi nane nasrow ḇaime. Yahwe parenta ma marisen Ḇyena dun payamyum faro ko ḇesya kwar. (Mz. 119:97, 111, 112) Imbape, ḇefarkor Refo na skara rarirya ḇa rawo manggunsi sifawi Yahwe ḇyuk parenta anna kukro iswar si. Inja, ipyum fa kofuken si radine, ”Kwara ido, rosai ḇefnai fa Allah dor manfamyan Ḇyesi fa sifrur roi ine ḇaido sifrur awer roi iwa? Rosai kofarkor ro roi ine ḇekur Sinan I?” Kofnoḇek si fa skara Yahwe I ma siswar kaku snonsnon Ḇyedi ido, rosai kofarkor yoḇ si nari nsun ro sisnesna. Ḇefarkor Refo kuker konsya nari siswar Yahwe I ma parenta ḇyuk ḇe ko na kako. Kakyar sena nari nsambraḇ syadi ma nafnoḇek si fa simkuepen pdef ro samswen ḇekur si na.​—1 Kor. 3:12-15. w20.06 10 ¶10-11

Fandun fa kokaḇaḇaḇ kukro snonggaku oso fyandun swaf fa kyaḇer wer ḇe Yahwe I. Naek srar ḇeḇinggwanbur Yahwe kwar mboi skaḇer wer soḇe, penatua ḇaido ḇesesya ro sidang srama smamfar ker si ḇesyandari skaḇer. Imbesrar ro Asia snori Nancy fyas, ”Yana bati ḇefanam oso ro sidang, iso ḇefnoḇek kaku aya. Ima imnis ra eba yedi, ima iswar aya. Ikofen ḇe aya roi ḇepyum nufrur kam ro fafisu naiwara. Ryower pyum fyor yakofen roi yakara na, ma imarisen ḇyuk anun ḇe aya. Ima bati ḇekaku yediri, isya ḇesya kwar fa ifnoḇek aya.” Rofyor snonggaku oso fyafayaf, ima imnis ra isya ḇyepar. Sawarwar imnis ra aryawin ḇefrur fa snonggaku ḇepar ani iprei. Ḇeḇeso sḇinggwanbur sidang kukro fyor iwara simsor faro snonggaku oso ro sidang. Iso ḇefnai fa simewer skaḇer ḇe Yahwe I. Imbude ono skara sifrur pyum si ḇa. Sfandun snonggaku ḇerower pyum si ma ḇefawi pyum kaku roi sḇaḇir na. w20.06 26 ¶10-11

Pampum farawrowes na kwar ido, na napyan syadi fa wafrur roi ḇekaku. Waswarepen kako, Setan iso ḇefarkor ninyan snonggaku ḇero dunya ine fa sna mamam ḇesasar ḇekur fararur farḇuk ya. Inja, pampum ḇeri mamam ḇesasar anna ido, Au isya ’wakafyo Ibiris ya kwar’. Kofawi kaku Yahwe derer monda na ḇekofenḇair rosaiso fararur ḇesasar ani. Kosewar kaku monda fa kofrur sasar awer. Imbape kofrur sasar ido, kokofen sasar koḇena ḇe Yahwe I ro nadi. (1 Yoh. 1:9) Kofrur sasar ḇeba ido, kor fafnoḇek ro penatua sya kukro Yahwe ikanow si kwar fa smamwarek ko. (Yak. 5:14-16) Imbape, kopok kokara ker awer faro sasar kofrur kwar ro fafisu naiwara. Kukro? Kma koḇedi iswar kaku ko, inja iwan Roma Ḇyedi fa imarwarek ko insama kosmai payasyos ro sasar koḇena. Fafisu Yahwe ikofen nari ḇyuk ampun faro snonggaku ḇembror sya, na ifrur kaku rarirya. Yahwe ḇyuk sneuser ḇesren ḇe ko kwar, inja roi oḇaḇeri ḇedwarek ko fa komnai kofarmyan faro I.​—1 Yoh. 2:1, 2, 12; 3:19, 20. w20.07 22-23 ¶9-10

Fafisu ono Yahwe ḇyarek ro manggundi. Ḇape, roi ine ifrur fa ḇyesanekar ḇa. Oso isya fa kyainus Yahwe I ḇa yo, na iryaḇ pdef. Rariryano, Yahwe imarisen insama ḇesesya sakkenem kako ma sakna raryaḇ. Inja, Yahwe saswar Ḇyediso eḇedari irandak fa ifrur roi ḇebor kam. (1 Yoh. 4:19) Yahwe ifrur ḇepon Roma Ḇyedi, Yesus i. Mura, roro Roma ḇepon Ḇyedine, ’Allah ifrur roi ḇeḇor kam’, ma malaikat sya kako. (Kol. 1:16) Yesus imarisen kaku fa fyararur kayam fnoḇek Kmari. (Ams. 8:30) Bar malaikat sya sakmarisen fafisu smam Yahwe ma Yesus sufrur farsyos ma supswan ine. Moḇsa sfasnai raryaḇ sena rai? Sisandik Yahwe I, ma siryaḇ kaku fafisu smam Yahwe ifrur roi ḇesena ma snonggaku koine. (Ayb. 38:7; Ams. 8:31) Yahwe fararur Ḇyesine oser-oser nfasnai saswar ma fawinanem Ḇyena.​—Mz. 104:24; Rm. 1:20. w20.08 14 ¶1-2

Yahwe ifrur ko fa kofasnai saswar koḇena ḇe snonggaku ḇesesya ma komarisen siswar ko. Inja fyor snonggaku oso dayin ko, koḇesanekar ma imbude komgak kako. Manbesrar oso fyas ḇo doḇo, ”Rofyor sordade sya smun, sayin, ma sawos makakak ḇe aya kukro Saksi-Saksi Yahwe risaya, yamgak kaku ma yaḇaḇir sanonef aya kaku.” Inema nafrur koḇaḇir koḇye ḇa kaku fyor snonggaku sayin ko, ḇoi roi anna nafrur kokandor ḇa. Yesus ḇyardi kwar snar nari sayin ko. Rosai ḇefnai dunya ine dayin Yesus manfamyan ḇyesi koine? Kukro raris Yesus i, koma ’[dunya] ine i ḇena konya ba’. (Yoh. 15: 17-19) Iso ḇefnai fa, koḇesyowi pamarenta sya raryano, kopampum fa kosyom si ḇaido roi ḇekopbair si fa ḇewakili si. Kosyom monda faro Yahwe I. Kosonem Allah hak Ḇyedi fa ḇyepoik snonggaku sya ḇape Setan ma ḇeso i sya sfamyun snar Allah nya hak ine ḇa. (Kej. 3:1-5, 15) Kobaryas snar Karajan Allah iso saneraro snonggaku sismai na ma Karajan iso nari ḇekakok snonggaku ḇepampum i syakam. (Dan. 2:44; Why. 19:19-21) Anun aniso abar ḇepyum faro snonggaku ḇena sne ḇemayar sya ḇape ine abar ḇepyum ḇa faro snonggaku ḇeḇarḇor sya. w21.03 20 ¶1-2

Yahwe ḇyesyowi kaku imbesrar ḇero sidang sya kuker ḇyuk fararur ḇefandun kaku fa suf. Sima sfasnai nyan ḇepyum ro fawawinanem, kakyar, raryaḇ, ḇaḇebri, frur pyum, ma fararur ḇepyum. (Luk. 8:2, 3; Kis. 16:14, 15; Rm. 16:3, 6; Flp. 4:3; Ibr. 11:11, 31, 35) Komarisen ro sidang koḇedi kako naek srar ḇesinan kwar sisya sibore. Sidafduf kukro sḇe mansar binsar kwar. Samswen nane nadwarek si fa sifrur nabor syadi ro sidang ma fararur ḇaḇeḇaryas. Imbape, naek srar ḇesinan kwar ansine sifararur imnis samambraḇ sena ro ḇaḇebaryas, ma sbuk samambraḇ sena nasiper fa sisambraḇser ma sfarkor ḇesesya! Ma kosmai payamyum ro farkarkor sḇuk na. Yahwe ḇyesyowi kaku si, ma kakḇesyowi si. (Ams. 16:31) Kokarapan kako roma inai babo sya. Sismai samswen nabor kukro siba muryas ro Ibiris dunya ḇyedine ma nafo awyae ḇebye ḇa na. Mboi, fyor komam roma inai babo sya sbuk kankarem ro fananjur, sakso ro ḇaḇebaryas, ma siḇriwarek kakyar sena, ine nafrur fa kosambraḇ kaku. Imbo, roma inai babo mgoya, mgona fararur ḇefandun kaku ro Yahwe sidang Ḇyedi ḇae!​—Mz. 8:2. w20.08 21-22 ¶9-11

Fafisu kora kobaryas ma kokofenḇair ḇe snonggaku ḇese koma Saksi Yahwe siko ido, imbude nari kosmai samswen imnis ra risen ḇeba. Rupa ra, kina koḇesya simsor ko, bati koḇesya skoryae ko, ma sisya spampum angginem kobaryas na. Rosai wafrur kaku insama wamgak ḇa? Ḇepon ya, wakyar kaku Yesus isya fyarkin fararur ine ro nanggi mumfes. (Yoh. 16:33; Why. 14:14-16) Oso wer ido, wakyar kaku Yahwe ḇyeasas kwar nari fyasos rosai wafandun na. (Mat. 6:32-34) Kakyar Bedi syambraḇ ido, nari wamgak ḇaḇeri. Fasnai kwar kakyar ḇemnis rarirya. Imnis raris, wamgak ḇa fa wakofenḇair ḇe kina Bansi snar wafarkor Refo kuker Saksi Yahwe ma waso fananjur ya kwar. Fadwer kako rari ma nyan kenem Bena kwar insama wafrur Yahwe imarisen. Wakyar ma wamgak ḇa ḇesyandari wafrur roi nane kwar. Kirine kako, Ausya swewar kaker fa wamgak ḇa. Wakyar Yahwe nari ryous Au ḇesya kwar.​—Yos. 1:7-9. w20.09 5 ¶11-12

Raja Asa ima snon ḇefrur pyum dirya kukro fyasnai fawinanem ro kenem ḇyena ma ikyar faro Yahwe I. Ifarmyan pdef ḇe Yahwe ro fafisu ḇesamswen ma ro fafisu ḇepyum na kako. Fyor ibaḇa ya, Asa ifarmyan kuker sne ḇesiper faro Yahwe I. (1 Raj. 15:14) Fyasnai kaku roi ine rofyor kyakokpres agama ḇekaku ḇa ro sup Yehuda. Refo doḇe Asa ’imkokpres rokef farsarser ḇekaku ḇa ma moḇ sbukisamsyom ro na, imerdawdiwer adir-adir ḇesren na, ma kyaruk adir besren’. (2 Taw. 14:3, 5) Irya monda ḇa, ḇye kpuri, Maaka i fa dado ro nasan ḇyedi ro karajan. Kukro? Snaro Maaka iwan snonggaku sya fa sisyom amfyanir. (1 Raj. 15:11-13) Ipyos agama ḇekaku ḇa monda ḇa. Ifnoḇek kawasa Yehuda sya fa sisyom kaḇer ḇe Yahwe I. Yahwe ḇyebarakas Asa ma kawasa Yehuda sya, inja sikenem ro payamyum ma kananon. Ro swaf taun risamfur Asa ḇyepoik anya, ”oso ikyaren sup ani ḇa”.​—2 Taw. 14:1, 4, 6. w20.09 14 ¶2-3

Fafisu ono ido, na kobuk robebor koḇena faro snonggaku ḇese fa sikram pyan na kukro kokyar si. Rupa ra, kora kokram kumpan koḇena ro bank. Kokram kumpan koḇena ro dine kukro kokyar kumpan anna nari nasiper ma napromes ḇa ḇaido skaraw na ḇa. Manwawan Paulus ikofenḇair ḇe Timotius i fa iswarepen isya ismai syowi ḇeba, isoine fawawi ḇekaku ḇekur Allah marisen Ḇyena faro snonggaku koine. Timotius ismai syowi ḇeba kako fa byaryas wos Refo ma fyararur ro fararur ḇesren ḇe manbaryas. (2 Tim. 4:2, 5) Paulus danun kaku faro Timotius i fa dufepen nako rosai ikyar faro i kwar. Ko kako bisa komnis Timotius i fa kufepen roi ḇesyowi Yahwe ikyar kwar faro ko na. Yahwe ikyar ko fa kufepen fawawi ḇekaku ḇekur kakaku ḇero wos Ḇyena, Refo ya. Kakaku ro Refo nama roi komyof kaku nairi kukro nfarkor ko fa kona wis ḇepyum kuker Yahwe I ma nfasnai nyan fa kenem koḇena naser marasrisen. Kokyar faro kakaku anna ido, nari kopampum farkarkor ḇekaku ḇa ma kenem koḇena nasren.​—1 Kor. 6:9-11. w20.09 26 ¶1-3

Ḇefarkor Refo kuker Au fandun fa myam raryaḇ ma kakyar Bena faro kakaku ro Refo na. Rarirya, nari imarisen ma ḇyesyowi rosai fyarkor kwar na. Fawar ḇe i payamyum wasmai ya kukro wasouser anun ro Refo na. Rarirya nari ifawi daksouser wos ro Refo ido, nari daksmai payamyum. Ras oso imbude ḇefarkor Refo ani ismai samswen. Inja fafisu mufarkor, fawar ḇe i farfyar ḇepyum ro naek srar ḇeyaksmai samswen ḇemnis ra i ma moḇsa simbran samswen sena rai. Rofyor buk farkarkor, wun naek ḇaido srar oso ro sidang fa iwarpu Au insama ḇefarkor ani dakfarkor roi ḇepyum ro i. Wafnoḇek ḇefarkor ani fa ifawi soasuser faro wos anun ro Refo na nafrur fa ikenem pyum syadi. Ḇefarkor Refo kuker Au fyarḇuk kwar ido, swari dakso farkarkor ya kako ke? Oroḇaim ido, bisa wor swari fa dakso kako. Wanun ḇe i fa fyawar roi fyarkor kwar na ḇe kina ma bati ḇyesi.​—Yoh 1:40-45. w20.10 16 ¶7-9

Yusuf ma Maria sufaduru Yesus i fa iba raris Yahwe moḇ imarisen raya kukro suso farkankin ro wos Ḇyena faro sinan sya. (Ul. 6:6, 7) Yusuf ma Maria suswar kaku Yahwe I, inja sumam roi ḇefandun kako iso susaramper roma inai suḇesya fa sakswar kaku Yahwe I. Yusuf ma Maria sumam pyum roma inai suḇesya ari sena ḇe Yahwe I fa nambran pdef. Kokyar roi ine kukro sra ker fa siso fananjur ari ro rum ari ḇero Nazaret, ma siso munara Paskah ro Yerusalem. (Luk. 2:41; 4:16) Ro marandan sena ḇe Yerusalem, imbude Yusuf ma Maria sufarkor Yesus ma kasun ḇyesi fa sifawi fawar ḇekur Yahwe kawasa Ḇyesi ro ḇepon siwara. Imbude na simnai fasaw ro moḇ Refo dap anya fa sakmam na. Kokyar Yusuf ma Maria sumam pyum ari sena ḇe Yahwe I fa nambran pdef nama napyan ḇa kukro roma inai suḇesya sibor syadi wer. Mboi komam kada, sismai payamyum ḇyena! Srir ḇepon samsyom faro Yahwe I ro kenem sena, inja kenem sena napyum bo sfanam pdef faro Yahwe I. w20.10 28 ¶8-9

Fandun fa wakfrur fasasos faro roi nari mgawos ḇe ḇefarkor Refo oso. Perintis istimewa oso, ḇenir ḇe Dorin doḇe, ”Yamarisen ḇeso aya anya ifrur fasasos faro roi nari kofarkor na. Snar ifrur raryaido, bisa dakbuk wos ḇeyun fainda.” Oso wer ido, ḇefarkor Refo anya myam mukam mufrur fasasos ḇepyum ido, nari nbe nyan ḇepyum faro i. Mboi befnder wafrur fasasos ido, besewar fa mam wos ḇeknam ḇyena. Nadi ima roi ḇefandun kaku ro farkarkor Refo ya. Inja sor Au fa benadi ido, kwarauser ḇepon rosai nari imbe wakofen ro nadi ya. Rarirya, nadi Bena nasrow faro ḇefarkor ya. (Mz. 141:2) Hanae, imbesrar oso ḇeḇarek ro Jepang, iswarepen nadi ro imbesrar oso ḇeso ro farkarkor ḇyena. Doḇe, ”Yaḇaḇir fyanam kaku kuker Yahwe I, imbe yakmnis i. Ro fafisu dap snosnon yeja ro nadi ḇyena, nafrur yaḇaḇir siswar aya.” w21.03 10 ¶7-8

Yesus byuk kakyar ḇe manwawan Paulus i nari ifyafer ro Roma. Ḇape snonggaku Yahudi ro Yerusalem imbe smun Paulus i. Rofyor mananir sarar Romawi, Klaudius Lisias, ifawi aw ḇeḇye ḇa senane, syewar fa fyaspar Paulus i. Fasaw kaku, iwan sordade ḇyesi fa sun Paulus ḇe Kaisarea. Ro diwa, Gubernur Feliks iwan fa ”siwaren Paulus i ro Herodes rum ḇyedi”. Inja, Paulus ikrenbur snonggaku ḇekara fa ḇemun i sya. (Kis. 23:12-35) Mboi kirine Festus iso ḇye gubernur fadwer Feliks i kwar, imarisen ifrur kawasa Yahudi sya fa simarisen, inja ifuken ḇe Paulus i, ”Fasoske fa rwabe Yerusalem, insa beḇekara ro diwa ro ḇarpon ayedi ro wawos ine?” Paulus ifawi nari smun i ro Yerusalem Inja doḇe, ”Yek mankara faro Kaisar!” Festus kyarem radine, ”Wek mankara kwar faro Kaisar, inja nari rwaḇe ḇarpon Kaisar.” Inja Paulus nari rya ḇe Roma, ḇyinggwan ro snonggaku Yahudi ḇesewar fa ḇemun i sya.​—Kis. 25:6-12. w20.11 13 ¶4; 14 ¶8-10

Koḇaḇir kosasar kwar ima sasar oḇa. Rupa ra, ono sisya sbuk sasar ḇe manggunsi kukro roi sifrur rofyor sfarkor Refo ḇaime. Ḇesesya wer sbuk sasar ḇe manggunsi kukro sifrur sasar fafisu sebaptis kwar. (Rm. 3:23) Kaku ḇae, kokam komarisen kofrur roi ḇekaku. Mboi ”kokam kosasar ro roi nabor”. (Yak. 3:2; Rm. 7:21-23) Koḇaḇir kosasar kwar ido na nun marisen ḇe ko ḇa, ḇape bisa kosmai farkarkor ḇepyum ro na kako. Rosai ḇefnai fa kokofen radine? Snar koḇaḇir kosasar kwar ido na nadif ko fa kofrur fararwei ma kombror ro sasar koḇena ma komewer kofrur sasar wer. (Ibr. 12:12, 13) Imbape, bisa kobuk sasar ḇesyadadi ḇe manggunko. Imnis radine, kombror ro sasar koḇena kwar ma Yahwe byuk ampun ḇe ko kwar, mboi koḇaḇir kosasar kaker. Ḇaḇaḇir ḇeradine na nun ḇe roi ḇeḇye ḇa. (Mz. 31:10; 38:3, 4) Fandun fa kosasor ko insama kobuk sasar ker ḇe manggunko awer. Rosai ḇefnai ya? Kukro Ibiris imarisen kaku kofarmyan ḇe Yahwe I wer ḇa. Yahwe byuk ampun ḇe ko kwar! Mboi Ibiris imarisen kobuk sasar ker ḇe manggunko!​—Mam kako 2 Korintus 2:5-7, 11. w20.11 27 ¶12-13

Manfasfas Mazmur 37 ima snonggaku Lewi diri. Fyafayaf faro rari ḇeḇye ḇa sena ḇa, mboi myam sikenem mararen monda. (Mz. 73:2-9, 11-14) Rya sna roi nakame, pipi nabor, sikenem pyum, ma sna makakwarek noḇa. Snon Lewi ine nya kakara raris Yahwe insama sneri fyafayaf ḇa. Rarirya ido, sneri naknon ma nya aski kaḇer. Doḇe, ”Fyor yana [Yahwe I] kwar, roi oso ḇaḇeri yamarisen ro supswan ine.” (Mz. 73:25) Sne koḇena nfafayaf awer fyor komam rya snonggaku ḇeḇarḇor sya sikenem mararen. Marasrisen sismai na nari napromes fasaw. (Pkh. 8:12, 13) Kofafayaf faro si ido, nari koryaḇ wer ḇa ma nari wis koḇena kuker Yahwe I namuk. Inja rya kofafayaf kwar faro snonggaku ḇefrur roi ḇeḇarḇor sya ido, koso snon Lewi ani nyan ḇepyum ḇyena. Korower wos anun ḇeramuma ro Allah, ma koḇebati fanam kuker snonggaku ḇefrur Allah marisen Ḇyena. Koswar syadi Yahwe I ro roi ḇese ido, na kona aski kaku. Ma koisya ro nyan ḇeyun ḇe ’kankenem ḇekaku ya’.​—1 Tim. 6:19. w20.12 19-20 ¶14-16

Kokofen makakwarek koḇena ḇe Yahwe I ro nadi, mboi komam insama kokofen kasumasa kako. Ipyum fa kokara roi ḇepyum kosmai kwar na, isyadi wer fafisu kosmai samswen nabore. Fafisu ono ido, samswen fa kokofenḇair roi koḇaḇir kaku na faro Yahwe I. Ḇape koḇefnder awer, kokofen monda ’Yahwe yo wafnoḇek aya!’, nari ryower na. (2 Taw. 18:31) Kokyar manggunko awer, mboi kokyar Yahwe fawawinanem Ḇyena. Ro fafisu Yesaya ikenem ya, snonggaku Yehuda simgak faro snonggaku Asiria kukro siḇe srama smun si. Kawasa Yehuda simewer snonggaku Asiria sepoik si, inja sor fafnoḇek ro snonggaku Masir sya. (Yes. 30:1, 2) Yahwe byuk swarapepen ḇe si bo doḇe sikyar faro snonggaku Masir sya, inja nari sismai roi ḇeḇye ḇa. (Yes. 30: 7, 12, 13) Roro nabi Yesaya i, Yahwe ikofenḇair ḇe kawasa ansi moḇsa sismai payamyum raya. Yesaya doḇe, ”Mgokyar pdef ma mgoḇoryae ḇa kada, nari mgosambraḇ.”​—Yes. 30:15b. w21.01 4 ¶8-9

Yesus naek ḇyesi ḇesmai ramrem ansine sfasnai sisouser kwar, inja na sakḇe raja ma imam fnoḇek i ro nanggi. (Why. 20:6) Allah Yahwe I, Yesus i, ma malaikat sya na simarisen kaku smam snonggaku ri 144.000 ḇesmai ramrem ansine, ḇarpur ya sismai ḇaḇyak sena ro nanggi. Manwawan Yohanes ikofen ḇekur raja ma imam ri 144.000 raposa, myam roi ḇepyum ḇese wer isoine raryur ḇeba sisasyarbur Armagedon ya. Snonggaku ri 144.000 sima siḇese ro snonggaku ḇeyaksun ro raryur ḇeba. Raryur ḇeba sima sibor syadi ḇaido sipok skor dandonek seja ḇa. (Why. 7:9, 10) Snonggaku ansine ”sisansun syatu ḇepyoper”, ine kyurfasnai smamwarek si fa sisren pdef ro dunya ḇeḇarḇor ine kwar ma sisouser faro Yahwe ma Yesus su. (Yak. 1:27) Sar naba bo soḇe sismai fasaspar ro Yahwe I ma Rumgun domba ani, Yesus i, ma si kako suf srai ram ḇeḇair simarisen faro Raja Yahwe ryem kwar isoine Yesus i.​—Mam kako Yohanes 12:12, 13. w21.01 15-16 ¶6-7

Snon oso imbran pyum fararur ḇyena ḇe ḇebukor ro kina kuker iso Yahwe ma Yesus nyan suḇena fa sumbran fararur suḇena ḇe ḇebukor. Imnis raris, kyara pyum rari sne ḇerun. Yahwe ima manḇefawinanem kaku, ḇape imarisen ryower kakara ro manfamyan ḇyesi. (Kej. 18:23, 24, 32) Yahwe ima inapes kaku, ḇape dor ko fa kakmnis ra I ḇa. Imbape, imarisen ifnoḇek snonggaku ḇenapes ḇa koine insama kofarmyan ḇe I kuker sne ḇesiper. (Mz. 113:6, 7) Refo kako ikofenḇair Yahwe ifnoḇek snonggaku sya. (Mz. 27:9; Ibr. 13:6) Raja Daud doḇe ifrur roi ḇeba kaku snar Yahwe fyasnai sne ḇerun ma imarisen ifnoḇek i. Kwarapan Yesus nyan ḇepyum ḇyena. Yesus ima manggorari ro manfamyan ḇyesi, boi imarisen ḇyansren wemin sena. Yesus manggundi ikofen, ”Snar yaḇuk nyan oso kwar faro mko, insa mko kako mkakfrur raris moḇ rosai yafrur faro mko kwar raya.” (Yoh. 13:12-17) Yesus nya papoik ḇeba raryano, imewer sifarmyan i. Ḇape, imarisen ifarmyan snonggaku ḇesesya.​—Mat. 20:28. w21.02 3-5 ¶8-10

Naek ḇebabo mgoya, sifandun mgo ro sidang. Ḇebor ro mgo mgodafduf ḇa ma mgosambraḇ kaker. Mgofrur roi nabor fa mgofnoḇek naek srar ro sidang kwar. Ma mgomarisen ras oso nari mgoḇe hamba pelayanan. Ḇape snonggaku ḇese imbude skara mgobabo kaker ḇaido mgofasos mgo ḇaim faro fararur ḇefandun kaku ro sidang. Mgobabo kaker raryano, mgoḇesewar kaku ro kirine insama naek srar sesyowi mgo ma sikyar kaku mgoma na mguf pyum fararur mgoḇena. Rosai monda na mgofrur kaku ya? Naek ḇebabo mgoya, mgona ḇaḇekir nari ḇebuk fainda faro naek srar ro sidang sya ke? Ḇebor ro mgo mgona ḇaḇekir ḇeradirya. Imnis ra, mgoḇekir fa mgoḇepake tablet ma HP ido, mgakfnoḇek naek srar ḇeḇesinan kwar ro sidang sya fa sakfawi sepake roiebor anna. Mgofnoḇek si ido, na sifawi sbuk roiebor anna fa sbukifrur farkarkor manggun sena ḇaido sikso fananjur na. Na sesyowi kaku fafnoḇek mgoḇena. Roi mgofrur nakam, nafrur Kma mgoḇedi ro nanggi imarisen. w21.03 2 ¶1, 3; 7 ¶18   

Rariso fyor binswa ya fyarkor ro farkarkor ḇekaki bo swari ima aroḇa? Snonswa ya na iso ḇembran fararur ḇyena fa fyarkin kina ḇyesya ro nadi ro kina ma fananjur ḇesena. (Ef. 6:4) Binswa Kristen oso ifawi swari iso ḇena fakamamar fa fyarkin kina ḇyesi ro nadi na. Rariryano, binswa ya fandun kaku fa iswarepen snar manggundi iso ḇefaduru kakyar ḇyena fa nsambraḇ pdef. Inja, fandun kaku fa nya oras fa ifrur farkarkor manggun ḇyedi ma kyarauser na. Ifrur rarirya ido, na fyasnai saswar ma syowi ḇyena pdef faro Yahwe I ma ikunem pdef faro swari kuker marisen. Binswa ḇekunem pdef faro swa sesya snar iswar Yahwe I nari ismai aski syadi buro snonggaku ḇemewer ḇesouser fasasos Yahwe ifrur faro ḇeḇebukor sya. Binswa ḇesouser ido, fyasnai nyan ḇepyum ḇe roma inai babo sya. Si kako sifrur kina ma sidang yadori ḇyeaski. (Tit. 2:3-5) Baboine, bar ḇeba ro Yahwe manfamyan ḇesouser Ḇyesya siso bin sirya.​—Mz. 68:11. w21.02 13 ¶21-23

Manwawan Paulus fyasnai nyan ḇepyum kaku ro ḇaḇeḇri ma ḇaḇefarmku ya. Fyono ido iryar ḇa kako. Mboi fyarmku pdef snar ikyar Yahwe nari byuk samambraḇ ḇe i. (2 Kor. 12:8-10; Flp. 4:13) Kofasnai kofandun Yahwe fafnoḇek Ḇyeja ido, na kaksambraḇ ma kakḇeḇri. (Yak. 4:10) Kokyar kaku snar samswen ḇekur ko nakam ndrama ro Yahwe I ḇa. Manwawan Yakobus ikofen, ”Rofyor snonkaku oso isma fafrowes ido ikofen awer: Fafrowes ine ryama ro Allah! Snar ḇarḇorya ipok ifrowes Allah ḇa, ma Allah mankundi ifrowespan manseirya ḇa kako.” (Yak. 1:13) Kofawi kakaku ine ido, nari kofanam syadi wer ḇe Mami koḇedi ro nanggi. Yahwe ima fyarwei ḇa. (Yak. 1:17) Ifnoḇek snonggaku Kristen ro abad randak siwara kwar rofyor sismai samswen, inja na ifnoḇek ko kako. Wor fafnoḇek ro Yahwe insa wana fawawinanem, kakakyar, ma ḇaḇeḇri. Nari kyarem nadi bena kam. w21.02 31 ¶19-21

Bisa wafnoḇek ḇefarkor Refo fa dakso fananjur ari kuker fasnai snar wafandun i. (Flp. 2:4) Buk wos manen snar ḇyesewar fa ifrur fararwe ḇepyum na. Wafuken kako roi fyarkor ro Refo ya, kina ḇyesi, ma fararur ḇyena. Ḇape, wafuken faḇye awer i. Ḇesewar fa mambir pyum i ido, bisa bebati fanam kuker i. Ine na nafnoḇek i fa isur ma ḇyebaptis. Fyor ḇefarkor Refo ifrur fararwe, wafrur fa ḇyabir dakro sidang yadori. Wafrur pyum i. (Ibr. 13:2) Fyor ḇefarkor Refo bisa fa dakḇe manbaryas ido, wor i fa mubaryas. Diego, naek oso ro Brasil, doḇe, ”Naek ḇebor sya sor aya fa nggobaryas. Ine nyan ḇepyum fa yakmambir si. Bisa yafarkor nabor ro si, ma ayano yaḇaḇir yafanam kuker Yahwe ma Yesus su.” w21.03 12 ¶15-16   

Yesus ikofenḇair ḇe manfamyan ḇyesi fa siswar mbroḇ sesya. (Mat. 5:44, 45) Roi ine napyan ke? Aroḇa! Ḇape bisa sifrur kuker fafnoḇek ro Allah rur ḇesren Ḇyedi. Bon ḇyena iso saswar, ḇaḇekaḇaḇaḇ, ḇaḇenaḇye, ḇaḇerandun sne, ma ḇaḇefarmku manggun. (Gal. 5:22, 23) Rari-rari nane nafnoḇek ko fa kofarmku fyor sayin ko. Snonggaku ḇebor randak ḇedwarek ḇarpur mura nefararwei kukro siswasi eḇe snon ma bin ya, romawa, ḇaido ḇeḇarek fanam si sya sfasnai rari-rari anna. Ḇebor ḇedwarek sya sḇe naek srar koḇesi. Inja, rofyor ḇabir samswen fa waswar snonggaku ḇeyayin ausya snar sifarmyan ḇe Yahwe I, benadi wor rur ḇesren. (Luk. 11:13) Wakyar kaku Allah nyan Ḇyena napyum syadi. (Ams. 3:5-7) Ayayin na naba syadi ma nafrur koḇe kandera, ḇape saswari isambraḇ syadi. Ine nfadwer snonggaku ḇese sisnesna fa simnai sidwarek ko. Ma, rofyor kofasnai saswar ya pdef, ine nafrur Yahwe sneri iryaḇ kaku. Imbape snonggaku ḇedwarek konsya sayin ko raryano, koḇeaski pdef. w21.03 23 ¶13; 24 ¶15, 17

Yoel ḇardadi ḇyena dawosḇair mamamun ro sordade sya. (Yl. 2:1, 8, 11) Yahwe doḇe nari iwan sordade ḇeba (sordade Babilon sya) fa sbuk samamyai faro snonggaku Israel ḇesoasuser ḇa sya. (Yl. 2:25) Sap sordade ansine ḇe ”snonggaku ḇeraker bar wambrur” kukro snonggaku Babilon sya sramuma ro bar wambrur fa smun snonggaku Israel sya. (Yl. 2:20) Sordade ansya seḇefasos pyum raris kampam sya. Yoel doḇe, ”Oser-oser imbran ḇe ḇarpon ro nyan ḇyena. . . . Sisun mundum ḇe kota, . . . Sek ro rum-rum boya, ma sisun ro kekbir raris ḇekaraw sya.” (Yl. 2:8, 9) Kwarapan roi nane kada. Sordade sya sisya sro moḇ nakam. Snonggaku sya sna moḇ fa siyokef si ḇa. Snonggaku oso ḇaḇeri ḇefrarbur sordade Babilon sya! Raris kampam, snonggaku Babilon (snonggaku Khaldea) sisun mundum fa smun Yerusalem ro taun 607 MḆ. Refo ikofen, ”Snonggaku Khaldea raja sedi . . . nya saswar oḇa faro roma ḇaido inai babo sya, ḇesinan ḇaido ḇeryar ḇa sya.”​—2 Taw. 36:17. w20.04 5 ¶11-12