Fafnoḇek Ḇese faro Syapram Farkarkor Kankenem ma Fararmyan
2-8 NOVEMBER
ARASAI ḆERO REFO | KELUARAN 39-40
”Moses Iso Mnis Kaku Yahwe Akurfasnai Ḇyena”
(Keluaran 39:32) Inja, fararur ḇero tabernakel nakam, ro rum kruḇen sarawrow ya sifrur mnai na. Snonggaku Israel sifrur roi nakam Yahwe iwan faro Moses i na. Sifrur imnis kaku rarirya.
(Keluaran 39:43) Rofyor Moses ryamura myam fararur sena, sifrur nakam namnis kwar raris Yahwe ikofen na. Ma Moses ḇyebarakas si.
(Keluaran 40:1, 2) Mura Yahwe ikofen faro Moses i, 2 ”Ro ras ḇerandak ro paik ḇerandak, fandun fa ḇawes tabernakel, isoine rum kruḇen sarawrow.
(Keluaran 40:16) Moses ifrur ḇeri roi anna kam. Ifrur imnis kaku raris Yahwe iwan faro i na.
Ḇaḇesasewar Arasai Rurya
(Keluaran 39:34) Sosef sifrur ro kif domba snoman sḇein fa narik, sosef sifrur ro kif anjing laut, ma eruk kruḇen ḇeḇerwas;
it-1-IN 1362 ¶5-1363 ¶1
Kif Anjing Laut
Moḇsa Snonggaku Israel Sismaina Raya. Ro Refo taʹkhas kyurfasnai kaku ḇe aiwan ḇemnis anjing laut ido, na naser fakfuken, imbude moḇsa snonggaku Israel sismai kif anjing laut raya. Anjing laut smam si ido, sisya ro kawasan Arktik (Kutub Utara) ma Antartika (Kutub Selatan), boi anjing laut ono sisya simarisen sḇarek ro moḇ ḇesam syadi. Baboine bar kasun ro anjing laut biarawan sḇarek ro ḇar oso ro Soren Fadu (L.Tengah), ḇaido moḇ ḇese ḇesam manggun ḇa. Ro abad ḇe abad barbor ro anjing laut sine sibor manggun ḇa kwar snar snonggaku sya sifor si, ḇape ro fawar Refo aiwan ansine imbude sisya sibor kaku ro Soren Fadu (L.Tengah) ma ro Soren Ḇerik (L.Merah). Isof ro taun 1832 kako, Dictionary of the Holy Bible karya Calmet (hlm. 139) ro edisi wos Inggris fyasnaiḇair, ”Ro myos kasun ḇebor ro L. Merah, ro Sem. Sinai, sismai anjing laut sine rodia.”—Mam kako The Tabernacle’s Typical Teaching, karya A. J. Pollock, London, hlm. 47.
(Keluaran 40:34) Ramnai mandep ya ikawef rum kruḇen sarawrow, ma Yahwe baba Ḇyedi isya ryama ro tabernakel ani.
w05-IN 15/7 26 ¶3
Wasouser ro Roi Nakam Ke?
3 Ro Ibrani 3:5 ”Moses ikada ḇyeuser”. Rosai ḇefnai fa Refo doḇe nabi Moses isouser? Fyor sbawes ma sifrur tabernakel yadores, ”Moses ifrur rarirya imnis kuker roi Yahwe iwan nakam faro i na. Ifrur imnis kaku rarirya”. (Keluaran 40:16) Ḇesyom Yahwe koine, kofasnai souser koḇena kuker kosoasuser fa kofarmyan faro I. Kosouser kako ine fyasnaiḇair kosouser pdef faro Yahwe rofyor kosmai samswen ḇaido farawrowes ḇeba kaku na. Mboi, kokrenbur farawrowes ḇeba kaku ima nfasnai kaku ḇa kosouser kwar. ”Mansei ḇenapes ro roi kasun na, nari inapes kako ro roi ḇeba na. Mboi mansei ḇenapesḇa ro roi kasun na, nari inapesḇa kako ro roi ḇeba na.” (Lukas 16:10) Inja, kosouser kaku pdef ro roi ḇekasun na.
Ḇaḇewasya Refo
(Keluaran 39:1-21) Snonggaku ḇekir ansine sifrur sansun ḇeyanem pyum nane faro snonggaku ḇefarmyan ro moḇ ḇesren. Sansun anna sifrur ro benang ḇeramen, wol ungu, ma benang ḇerik. Sifrur sansun ḇesren kako ḇe Harun i, imnis raris Yahwe iwan faro Moses i. 2 Sifrur efod ro linen ḇemawa sroremna, ro ḇenang ḇrawen, benang ḇeramen, wol ungu, ma benang ḇerik. 3 Skamnam brawen mnuk naḇe lembaran ḇesrepdam, ma Bezalel kyaruk naḇe benang. Benang brawen ine seyanem kuker benang ḇeramen, wol ungu, benang ḇerik, ma linen ḇepyum. 4 Sisip ḇedwarek erdai ro efod fa spam ro efod ani pum ḇero ḇo ḇyesuya. 5 Siyanem kako ḇeḇoḇek sifer ro efod kuker roiebor ḇemnis, isoine linen ḇepyum srorem na, benang ḇrawen, benang ḇeramen, wol unggu, ma benang ḇerik, imnis raris Yahwe iwan faro Moses i. Sḇein naro efod fa siyawek kaku na. 6 Ramnai, srir karui oniks naro rosaser brawen ma sfas snonsnon ro romawa Israel ḇyesi ro karui ani, imnis raris sifrur kareren ro iwur. 7 Raris Yahwe iwan faro Moses i, Bezalel syower karui anna ro roi ḇedwarek erdai ro efod fa nḇe swarapepen faro romawa Israel sya. 8 Ramnai Bezalel ifrur sosef ḇedwarek ander kuker nyan sisipna, imnis kuker nyan sifrur efod, srorem linen ḇemawa, benang ḇrawen, benang ḇeramen, wol ungu, ma benang ḇerik. 9 Sosef ḇedwarek ander ani ḇye eruk rifyak rofyor skaraprap naḇe suru, kawanwan ma baba ḇyena rof brampin oser. 10 Sisower karui permata ro baris rifyak ro ḇedwarek ander ani. Faro baris ḇerandak: karui mirah, topas, ma zamrud. 11 Baris ḇesuru ya: karui pirus, safir, ma yaspis. 12 Baris ḇekyor ya: karui lesyem, akik, ma kecubung. 13 Baris ḇeḇefyak ya: karui krisolit, oniks, ma giok. Karui oser-oser sisower kuker rosaser brawen. 14 Barbor ro karui anna 12, karui oser faro romawa Israel oser-oser. Spai snonsnon oser ro karui oser-oser imnis kareren sifrur ro iwur. Snonsnon oser-oser ḇyewakili oser ro keret Israel 12 ansya. 15 Ramnai, sifrur rante ro brawen ḇekaku sḇein imnis ra kaḇrai ḇebana, ma sisower randum ro ḇedwarek ander. 16 Sifrur rosaser brawen risuru ma iwur brawen risuru. Ramnai iwur risuru ansuya srir ro snur risuru ḇero ḇo ḇedwarek ander. 17 Mura, sisun naro pum ro rante brawen risuru insandi ḇe ḇandum iwur risuru srir ro snur ro ḇedwarek ander risuru ansuya. 18 Ramnai, pum ḇesuru ro oser wer ya sisun naḇe rosaser ḇrawen srir ro ḇedwarek erdai efod risuru ani, inja sosef ḇedwarek ander ani isya ro ḇarpon efod. 19 Ramnai sifrur iwur ḇrawen risuru ma srower naro snur risuru ḇero baḇ sosef ḇedwarek ander, ḇero ḇandum ya, isoine ro ḇar ḇefanam kuker efod. 20 Ramnai sifrur iwur brawen risuru wer ma sower ro ḇar ḇarpon efod, isoine ro sop ḇedwarek erdai ansuya, ro ḇoḇek sifer ro efod ḇero ḇoya ḇefanam ḇar ḇeyawrepen ya. 21 Ḇepupes ya, insama siyaḇek sosef ḇedwarek ander ani, sisun kaḇrai ḇeramen ro iwur ḇesya ro sosef ḇedwarek ander ani ḇe iwur ḇesya ro efod, insama sosef ḇedwarek ander isya ro ḇo ḇeḇoḇek sifer ma ikrenbur ro moḇ ḇyedi ḇa ro efod, raris Yahwe iwan faro Moses i.
9-15 NOVEMBER
ARASAI ḆERO REFO | IMAMAT 1-3
”Fandun ro Farsarser”
(Imamat 1:3) ” ’Rofyor mgobuk sapi ḇe farsarser ḇeḇerap ido, mgobuk sapi snoman ḇeduf ḇa. Mgun kaku kuker sne ḇesiper ḇe ḇarpon Yahwe ḇe kedwai ro rum kruḇen sarawrow.
(Imamat 2:1) ” ’Rofyor mgobuk farsarser roḇean faro Yahwe I, fandun fa mgobuk tepung ḇepyum. Mgosḇawer mani ro tepung ani ma mgorir kemenyan ro ḇori.
(Imamat 2:12) ) ” ’Nama mgobuk faro Yahwe ḇe farsarser ro roḇean sun randak na, ḇoi sipok srapna awer ro rokef farsarser.
it-2-IN 501 ¶3
Farsarser
Farsarser ḇeḇerap. Farsaser ḇeḇerap fandun fa sbuk nakam faro Allah; snonnggaku ḇebuk farsarser ani ipok ryir ḇar oser ro aiwan fyarser anya fa ḇyarek ḇaḇeri. (Mam kako Hak 11:30, 31, 39, 40.) Farsarser ani ima fararyor faro Yahwe fa sismai, ḇaido fyasnai kyaremso Ḇyedi faro, farsarser sasar ḇefnoḇek farsarser anna. Yesus Kristus ḇye ”farsarser ḇeḇerap” fyor byuk kankenem ḇesiper manggun ḇyedi.
it-2-IN 504 ¶7
Farsarser
Farsarser mor-mor ḇaido roḇean. Farsarser mor-mor sbuk kayam kuker farsarser ḇaḇeoser ḇaido ḇaḇebati, farsarser ḇeḇerap, ma farsarser sasar, ma nḇe bon ḇerandak kako; ro swaf ḇesena roi anna sbuk fa naḇesisye yae. (Kel 29:40-42; Im 23:10-13, 15-18; Bil 15:8, 9, 22-24; 28:9, 10, 20, 26-28; psl. 29) Sbuk farsarser anna kam fa sfasnai syowi faro Allah ḇaḇenaḇye Ḇyena snar byuk barakas ma roi ḇepyum, ma mani kuker mamboḇo na warpu farsarser sbuk ker na. Farsarser mor-mor ḇemnis ra tepung ḇemawa, mor-mor srap ro for, ḇaido kukis ḇemnis gelang ḇaido biskuit mgun srap ro for, sikun ro wajan ḇesrepdam, ḇaido sikun ro manggesi ḇeba. Ḇar ono ro farsarser mor-mor nane srir ro ḇo rokef farsarser ḇeḇerap, ḇar sia imam sya san na, ma ro farsarser ḇaḇeoser, ḇebuk farsarser ya dakso fa daknan warpu. (Im 6:14-23; 7:11-13; Bil 18:8-11) Farsarser mor-mor sfarser ro rokef farsarser sipok srir mur (ragi) ḇaido ”ampyampuber” (roi sikofen rodine iso sari kental ro bon ara ḇaido sari ro bon-bon) nari sefermentasi na.—Im 2:1-16.
(Imamat 3:1) ” ’Rofyor mgobuk sapi naḇe farsarser ḇaḇebati ro ḇarpon Yahwe I ido, mgobuk ḇeduf ḇa, snoman ḇaido bin.
it-2-IN 501 ¶8
Farsarser
Farsarser ḇaḇeoser ḇaido ḇaḇebati (ḇaido farsarser dame). Farsarser ḇaḇeoser Yahwe kyaremso ḇefasnai ḇaḇedame isya kuker I. Snonggaku ḇebuk farsarser ani kuker kina ḇyansya sakso fa saknan warpu (ro bubes ḇero tarbernakel; imnis farfyar ḇero sinan siwara isof kpu up sya, sḇawes aḇdares-aḇdares na ro ris ḇero bubes ḇeyar eruk kruḇen ya; ro bait sim-sim naisya fa sanan rona). Imam ḇefarser farsarser ani na ismai ḇar oso, ma imam-imam ḇefararur sya sakna ḇar eḇesena. Inja, rya Yahwe ismai paw ḇediref pyum ro mafen srap ya. Rik ḇyena, nfasnaiḇair kankenem, ḇeḇebuk faro Allah ḇeḇe ḇena ya. Injariso, imam sya, ḇebuk farsarser sya, ma Yahwe rya sanan kayam, ine nfasnaiḇair sḇeoser ḇaido sedame ro fandu si kwar. Snonggaku ḇeyan ḇo isya ḇyemamas (ḇyemamas ro rosairirya monda imnis sap ro Sasoser ya) ḇaido ḇeyan farsarser sikram kawan syadi kwar ro ras sap kwarna (ro ras dares ya iba manfnai ani iḇe isnarem) na smuni ro fandu er ḇyansi. Ifrur mamas roḇean anna, snar imamas ḇaido dan rosai monda ḇesnarem kwar ro ḇarpon Allah Yahwe, inja fyasnai syowi ḇa faro roi ḇesren na.—Im 7:16-21; 19:5-8.
Ḇaḇesasewar Arasai Rurya
(Imamat 2:13) ” ’Farsarser roḇean oser-oser mgoḇena fandun fa mgorir kuker karumasen. Mgoḇefnder awer fa mgorir karumasen, snar karumasen nari byuk swarapepen ḇe mgo faro ḇaḇeasas kuker Allah mgoḇedi. Rofyor mgun farsarser anna ido, mgorir karumasen kako.
(Yehezkiel 43:24) Wun farsarser anna ḇe ḇarpon Yahwe. Imam sya fandun fa srir karumasen ro aiwan ansuya ma srap nakam ḇe farsarser faro Yahwe.
w04-IN 15/5 22 ¶1
Farkarkor Ḇefandun ro Syap Imamat
2:13—Rosai ḇefnai fa srir karumasen ro farsarser oser-oser na? Fandun ḇyena inema fa nḇuk masmasen faro farsarser ani ḇa. Ro supswan ḇesiper, karumasen sbuk naḇe pengawet. Snar karumasen srirna fnoḇek kuker farsarser kukro karumasen ḇyekopḇair fafisu ḇemkei ro roi ḇeḇyeḇa ma ḇesnarem na.
(Imamat 3:17) ” ’Ineiso sasoser ḇesya pdef ḇe mgo ma kpu up mgoḇesi, ro moḇ risai mgoḇarek ya: mgopok mgan awer mafen ḇaido rikna.’ ”
it-1-IN 785 ¶7
Mafen
Roi ḇefandun ḇese ro sasoser ani. Ro ḇaḇeasas Sasoser, rik ḇaido mafen ima sbuk monda faro Yahwe fa nyana. Ro rikya kankenem ya isya, ma sbuk na monda faro Yahwe I; snar rik ima Allah Ḇyenairi. (Im 17:11, 14) Mafen ima ḇar ḇepyum ro aiwan kraf ḇyesya. Sfarser mafen ro aiwan sya ido, ḇesyom Allah I sya sfasnai kaku snar ḇar ḇepyum anna Yahwe Ḇyenairi, ḇebuk nabor kaku kwar roi nayafa kame, ma ḇesyom Allah I fyasnaiḇair imarisen fa fyarser roi ḇepyum faro Yahwe I. Snar mafen ḇekopḇair roi ḇepyum snonggaku Israel sfarser faro Yahwe, inja fandun fa srap ro ḇo rokef farsarser ḇe ”roḇean” ma nḇe ”dadiref pyum” faro I. (Im 3:11, 16) Inja, san mafen kyurfasnai sun roi oso sfasren faro Allah kwar kuker sikofenḇair ḇa, ḇefasnaiḇair sekdofen Allah hak Ḇyena. Snonggaku ḇeyan mafen ani na ḇyeḇemun fa imar. Imbape, raryaḇa kuker rikya, mafen bisa sbuk faro fandun ḇesena, boi namnis ḇa kuker aiwan ḇemar ro manggundi ḇaido aiwan ḇese smuni.—Im 7:23-25.
w04 5/15 22 ¶2
Farkarkor Ḇefandun ro Syap Imamat
3:17. Snaro smam mafen ḇe ḇar ḇepyum kaku ḇaido ḇemafen pyum kaku, inja sidwarek si fa san awer na nfasnaiḇair ḇe snonggaku Israel snar ḇar ḇepyum kaku ima Yahwe Ḇyenairi. (Kejadian 45:18) Ine nbuk swarapepen ḇe ko snar iḇye kada kobuk ḇepyum kaku faro Yahwe I.—Amsal 3:9, 10; Kolose 3:23, 24.
Ḇaḇewasya Refo
(Imamat 1:1-17) Ro ḇandum rum kruḇen sarawrow, Yahwe dor Moses iḇo doḇe, 2 ”Wakofenḇair ḇe snonggaku Israel, ’Imbe mgun rofanfan fa mgofarser faro Yahwe I ido, na mgun sapi, domba, ḇaido kambing. 3 ” ’Mgobuk sapi ḇe farsarser ḇeḇerap ido, mgobuk sapi snoman ḇeduf ḇa. Mgun kaku kuker sne ḇesiper ḇe ḇarpon Yahwe ḇe kedwai ro rum kruḇen sarawrow. 4 Mgorir mgoḇramna ro aiwan ya ḇukor ḇyedi ro farsarser ḇeḇerap ani, ma nari sun fa sifrur ḇaḇedame faro mgo. 5 ” ’Ramnai, sapi mgun ḇebabo ani mgokaruki ro ḇarpon Yahwe I. Harun romawa ḇyesi, isoine imam sya, nari sfarser sapi ani rik ḇyena ma spek naro swaf-swaf nakam ḇero rokef farsarser ya, ḇero kedwa rum kruḇen sarawrow. 6 Aiwan sfarser ani fandun fa sak kif ḇyena ma skakor na. 7 Ramnai, sifrur for ro rokef farsarser ma srir ai na roḇo ya. 8 Fandun fa srir kraf skakor ḇe farsarser anna, ḇukor ma mafen ḇyena, ro ai naḇori ḇesya ḇerap ro rokef farsarser. 9 Snewar ma weyof ḇyesi sḇansren kaku na kuker ware. Ramnai, imam ryap nakam ro rokef farsarser yaḇori insama paw ḇyena neke. Inema farsarser ḇeḇerap, farsarser srap kuker for, dadiref ḇyena nun marisen faro Yahwe. 10 ” ’Rofyor mgobuk domba mgun ḇebabo ḇaido kambing ḇe farsarser ḇeḇerap, mgobuk monda ḇe snoman sya ma ḇeduf ḇa. 11 Fandun fa skaruk si ro ḇar wambrur ro rokef farsarser, ro ḇarpon Yahwe. Ramnai, rik ḇyena na Harun romawa ḇyesya isoine imam sya spek na ro swaf-swaf nakam ro rokef farsarser. 12 Aiwan ani skakor na, ma imam ryir kraf skakor na, ḇukor ḇyeja kako ma mafen ḇyena, ro ai naḇori ḇesya ḇerap ro rokef farsarser ya. 13 Snewar ma weyof ḇyesi sḇansren kaku na kuker ware. Ramnai, imam ryap nakam ro rokef farsarser yaḇori insama paw ḇyena neke. Inema farsarser ḇeḇerap, farsarser srap kuker for, dadiref ḇyena nun marisen faro Yahwe. 14 ” ’Imbape, mgobuk man sya ḇe farsarser ḇeḇerap faro Yahwe ido, na mgobuk man tekukur ḇaido manjawa ḇebabo. 15 Imam fandun fa fyarser na ro rokef farsarser. Na ḇyenpar sasukor ḇyedi ma ryap naro rokef farsarser, ḇoi rik ro man ani sisḇawer kaku naro swaf-swaf ro rokef farsarser. 16 Bur ḇyesya spasna ma aroren sena sisasyar naberi. Nane kam sisawen ḇe ḇar wamurem ro rokef farsarser, iso moḇ ḇefafen. 17 Man ani sisofuki ro ḇraper ḇyesuya, ḇoi ipok imuk awer. Ramnai, imam ryap ro ai naḇori ḇesya ḇerap ro rokef farsarser ya, insama paw ḇyena neke. Inema farsarser ḇeḇerap, farsarser srap kuker for, dadiref ḇyena nun marisen faro Yahwe.
16-22 NOVEMBER
ARASAI ḆERO REFO | IMAMAT 4-5
”Buk Roi Bepyum Syadi faro Yahwe I”
(Imamat 5:5, 6) ” ’Rofyor ono isya ḇyesasar snar ifrur roi oser ro roi sap anna, fandun fa ikofenḇair sasar ḇyena. 6 I kako fandun fa byuk farsarser ḇaḇesasarya faro Yahwe snar sasar ifrur na, isoine domba bin ḇebabo oser ḇaido kambing bin ḇebabo, ḇe farsarser sasar. Ramnai, imam nari ifrur ḇaḇedame faro i, ma sasar ḇyena nari neḇepyos.
it-2-IN 503 ¶9
Farsarser
Farsarser ḇaḇesasarya. Farsarser ḇaḇesasarya kako ima farsarser sasar rirya, snar ḇaḇeḇarḇor risai monda ḇefesepen kuker sasar. Farsarser ani ine faro sasar ḇeḇeyap oso ḇefnai fa ḇefrur sasar ya syasar, ma iḇese kermgun kuker farsarser sasar ḇesena. Farsarser ine sbuk insama neḇeḇak kaḇer faro hak sekdofen kwarna ḇaido infa sifrur imnis kaḇer hak oso na. Ro roi ine, nfasnai Yahwe hak Ḇyena ḇaido er ḇesren Ḇyesi hak sena sekdofen na kwar. Farsarser ḇaḇesasar ani sbuk insama nḇak kaḇer faro Yahwe snar sekdofen hak Ḇyena kwar, ḇaido faro snonggaku ḇesasar ḇembror kwar ya, infa sifrur mnis kaḇer ḇaido sḇak kaḇer faro i hak-hak ḇyena oso kuker sifrur ḇaḇeasas oso. Osower ido, insama nbuk ḇaḇemkei ḇe i ro samamyai ismaina snar sasar ḇyena.—Mam kako Yes 53:10.
(Imamat 5:7) ” ’Fyor ipok ḇa fa byuk domba ḇaido kambing ido, fandun fa byuk faro Yahwe I man tekukur risuru ḇaido manjawa ḇebabo risuru ḇe farsarser ḇaḇesasar ya. Man oser ya faro farsarser sasar ma oser ya wer faro farsarser ḇeḇerap.
w09-IN 1/6 26 ¶3
Kyarapyum Ḇaḇeraryar Ḇa Koḇena
Yahwe kyarapyum kaku ḇaḇeraryar ḇa ro snonggaku sya inja nasnai ro Sasoser Taurat Ḇyedi, ḇekofen radine, ”Fyor ipok ḇa fa ḇyuk domba ḇaido kambing ido, fandun fa ḇyuk faro Yahwe man tekukur risuru ḇaido manjawa ḇebabo risuru ḇe farsarser sasar.” (Mnuk 7) Wos ”fyor ipok ḇa fa ḇyuk” seterjemahkan kako ”fyor ḇramin ḇyedi ikwan ḇa fa syawar”. Rofyor snonggaku Israel oso syaḇarar kaku inja ipok ḇa fa ḇyuk domba oso ido, Yahwe imarisen ḇyuk roi ipok fa ḇyuk na isoine man tekukur risuru ḇaido manjawa ḇebabo risuru.
(Imamat 5:11) ” ’Rofyor ipok ḇa fa byuk man tekukur risuru ḇaido manjawa ḇebabo risuru, fandun fa dun ḇar ḇeḇesamfur ro tepung ḇepyum ro efa oser faro farsarser sasar ya. Ipok isḇawer mani ḇaido ryir kemenyan ro ḇori awer, snar iso farsarser sasar ya.
w09-IN 1/6 26 ¶4
Kyarapyum Ḇaḇeraryar Ḇa Koḇena
Rofyor snonggaku ani ipok ḇa fa ikoḇes man risuru ido, na rariso? Ro sasoser Taurat ”Fandun fa dun ḇar ḇeḇesamfur ro tepung ḇepyum ro efa oser faro farsarser sasar ya.” (Mnuk 11) Ḇape, faro snonggaku ḇesaḇarar kaku, Yahwe dor si ḇa ma ḇyuk ḇe si fa sbuk farsarser sasar ya kuker rik ḇa. Ro Israel, ḇaḇesaḇarar nadwarek snonggaku oso ḇa ismai barakas ḇaido fakamaman fa nya wis ḇepyum kuker Allah.
Ḇaḇesasewar Arasai Rurya
(Imamat 5:1) ” ’Rofyor oso isya myam ḇaido ifawi sasar snonggaku oso ifrurya ido, iso ḇe saksi ya. Rofyor anya kafkofenḇair oso isya kwar snar snonggaku ḇemam ya fandun fa ikofenḇair i, boi ikofenḇair i ḇa, iso na ḇesasar ya ma iso ḇekamar sasar ḇyena.
(Imamat 5:15, 16) ”Rofyor snonggaku oso isya isouser ḇa snar ifawi ḇa ḇo ḇyeyuk sasoser faro roi ḇesren Yahwe nyana, snonggaku ani fandun fa byuk domba snoman oser ḇeduf ḇa ḇe farsarser ḇaḇesasar faro Yahwe. Imam dap ḇaḇyak ro domba ani na ḇyesyekel perak rifis, ḇemnis ukuran marḇak ro syekel moḇ ḇesren ya. 16 I kako ḇyak fadwer snar ḇyeyuk sasoser faro roi ḇesren na, warpu ḇar ḇeḇerim ro baba ḇyena. Fandun fa byuk na faro imam, ma imam nari fyarser domba snoman farsarser ḇaḇesasar ani fa ifrur ḇaḇedame faro i, ma sasar ḇyena nari neḇepyos.
it-1-IN 1356 ¶2
Saranden
Aiwan ma rokaker na. Mgun randak ro sapi, domba, ma kambing snoman, smam naḇe roi ḇesren faro Yahwe ma sipok sḇak kaḇer na ḇa, boi fandun fa nḇefarsarser, ma ḇar ono sbuk faro imam ḇefasren kwar sya. (Bil 18:17-19) Aiḇon ḇerandak ma ḇar ḇeḇesamfur ima isren, rarirya kako roi ḇeḇefarser kam ma fasarser ḇeḇebuk nakam neḇeyap faro fararur ḇero tabernakel. (Kel 28:38) Roi nasren nakam faro Yahwe ima isren ma smam kyof na ḇa ḇaido sbuk kuker nyan ḇeḇeyap ḇa, ḇaido ḇepyum ḇa. Contoh oser yaiso sasoser faro ḇar ḇeḇesamfur. Rofyor snonggaku oso ryir ḇar oso fa naḇesisye faro ḇar ḇeḇesamfur, raris iryur gandum ḇyena, ma ramnai i ḇaido oser ro kina ḇyansi ifawi ḇa bo dun ḇar nono faro fandun ḇero rum yadori sya, imnis raris dun fa ikun ido, snonggaku ani syasar snar dekdofen Allah sasoser Ḇyena faro roi ḇesren na. Inja imnis ḇeḇeyap ro Sasoser ya, na ḇyak kaḇer ḇe tabernakel imnis barbor dun na, ma ḇyak kaḇer wer persen ri 20. Byuk kako domba snoman oso ḇeḇepar ḇa ro nai ḇyedi fa ḇye farsarser. Rarirya, snonggaku Israel ani fyasnai ḇyesyowi roi ḇesren Yahwe nyana.—Im 5:14-16.
Ḇaḇewasya Refo
(Imamat 4:27–5:4) ” ’Rofyor oso rofandu er ani isya ifrur sasar snar ifawi ḇa ḇo ifrur rosai Yahwe imewer na, ma isasar, 28 ḇaido rofyor ifawi ifrur sasar kwar, fandun fa byuk kambing bin ḇebabo ḇeduf ḇa ḇe farsarser faro sasar ifrur na. 29 Fandun fa ryir ḇramin ḇyesuya ro aiwan nari fyarser ani ḇukor ḇyedi, ma myuni ro moḇ smun farsarser ḇeḇerap sfarser anna. 30 Imam dun rik kermgun ro kambing ani kuker brampin ḇyesya ma pyekna ro knapur-knapur ḇesya ro rokef farsarser ḇeḇerap. Ḇedawer ro rik anya sisḇawer naḇe ḇar ro sop ro rokef farsarser ya. 31 Imam dun kam mafen anna, imnis raris ifrur kwar kuker mafen ro farsarser ḇaḇebati. Imam ryap kaku nakam ro rokef farsarser insama paw ḇyena neke, ma dadiref ḇyena nun marisen ḇe Yahwe. Imam nari ifrur ḇaḇedame faro i, ma sasar ḇyena nari neḇepyos. 32 ” ’Ḇape, byuk domba ḇe farsarser sasar ido, na dun domba bin ḇebabo oser ḇeduf ḇa. 33 Fandun fa ryir ḇramin ḇyesuya ro aiwan nari fyarser ani ḇukor ḇyedi. Fandun fa aiwan ani skaruki ḇe farsarser sasar ro moḇ smun farsarser ḇeḇerap sfarser anna. 34 Imam dun rik kermgun ro aiwan sfarser ani kuker brampin ḇyesya ma pyekna ro knapur-knapur ḇesya ro rokef farsarser ḇeḇerap. Ḇedawer ro rik anya sisḇawer naḇe ḇar ḇero sop rokef farsarser ya. 35 Imam dun kam mafen anna, imnis raris ifrur kwar kuker mafen ro domba snoman ḇebabo faro farsarser ḇaḇebati. Imam ryap nakam ro rokef farsarser, roḇo farsarser ḇeḇerap kuker for faro Yahwe. Imam nari ifrur ḇaḇedame faro i, ma sasar ifrurna nari neḇepyos.
5 ” ’Rofyor oso isya myam ḇaido ifawi sasar snonggaku oso ifrurya ido, iso ḇe saksi ya. Rofyor anya kafkofenḇair oso isya kwar snar snonggaku ḇemam ya fandun fa ikofenḇair i, ḇoi ikofenḇair i ḇa, iso na ḇesasar ya ma iso ḇekamar sasar ḇyena. 2 ” ’Ḇaido rofyor snonggaku oso pyan ro roi oso ḇemamas ya, imnis raris aiwan ḇesnarem sor sna awerna, ine faro aiwan ḇeyan ḇepek, rofanfan, ḇaido aiwan ḇeḇaḇa mgun, nari ḇyemamas ma syasar fyor ifawi ḇa ḇo pyan rona kwar. 3 Ḇaido rofyor ifawi ḇa ḇo pyan ro roi oso nḇe mamas snar snonggaku, ine kako faro roḇor ḇaido snonggaku, inari ḇyemamas ma syasar fyor insape ifawi ro ḇarpur ya. 4 ” ’Ḇaido rofyor snonggaku oso isya ifawi ḇa ḇo fasawsaw ḇyesowar fa ifrur rosairirya monda, ḇepyum ke ḇeḇyeḇa ke, ḇyesasar fyor insape ifawi ro ḇarpur ya.
23-29 NOVEMBER
ARASAI ḆERO REFO | IMAMAT 6-7
”Fasnai Kasumasa”
(Imamat 7:11, 12) ” ’Rofyor snonggaku oso imbe byuk farsarser ḇaḇebati faro Yahwe I, ineiso sasoser ḇyena: 12 Rofyor byukna fa fyasnai kasumasa, I kako byuk mamami ḇepisen ḇa ḇemnis gelang ḇeḇaren kuker mani, mamami ḇesrepdam ḇerir mur ḇa ḇeḇepek kuker mani, ma mamami ḇemnis gelang ro tepung ḇepyum sḇaren kuker mani.
(Imamat 7:13-15) I kako dun mamami ḇemnis gelang ḇerir mur kuker farsarser ḇaḇebati dun fa fyasnaiḇair kasumasa ḇyena. 14 Oser ro mamami sairiryana byukna faro Yahwe ḇe ḇar ḇesren. Nama nari nḇe imam ḇepek rik ro farsarser ḇaḇebati nya nairi. 15 Kraf ro farsarser ḇaḇebati byuk fa fyasnaiḇair kasumasa na san ro ras sfarser ani. Ipok ikram na rawo meser arwo ya ḇa.
(Imamat 7:20) ” ’Snonggaku ḇemamas dan aiwan kraf ro farsarser ḇaḇebati ḇeḇebuk faro Yahwe ido, na smun snonggaku ani ra imar.
w00-IN 15/8 19 ¶8
Farsarser Ḇefrur Allah Imarisen
8 Moḇsa kuker ḇebuk farsarser ya? Sasoser fyasnaiḇair manseiso ḇerama ḇe ḇarpon Yahwe ido, fandun fa isren ma ḇyemamas ḇa. Manseiso ḇemamas snar roi risai ḇefnai ya na fyarser ḇepon kaku farsarser sasar ya ḇaido farsarser ḇaḇesasarya fa ifrur pyum wis ḇyena insa nasren ro ḇarpon Yahwe insama farsarser ḇeḇerap ḇyena ḇaido ḇaḇeoser ḇyedi Allah imarisen na. (Imamat 5:1-6, 15, 17) Rarirya ido, koḇesyowi kaku saranden koḇena ro ḇarpon Yahwe I ke? Komarisen insama samsyom koḇena Allah imarisen na ido, na kosawenbur fasaw roi ḇeḇyeḇa kofrur fa koḇeyuk Allah sasoser Ḇyedi. Iḇye kada kosewar fasaw farfnoḇek ro Allah I, roro ”penatua jemaat kada” ma ”kuker fafnoḇek Yesus Kristus ani kosmai payasyos ro sasar koḇena.—Yakobus 5:14; 1 Yohanes 2:1, 2.
Ḇaḇesasewar Arasai Rurya
(Imamat 6:13) For ḇero rokef farsarser ya na smam kakuna insama nasak pdef. Napok namḇrer awer.
it-1-IN 157 ¶7
For
Roi ḇefesepen kuker tabernakel ma bait. For ima ḇyefandun kaku ro ḇaḇesamsyom ro tabernakel ma ḇarpur ya nefandun kaku ro bait. Ro arwo na ma mandira murbaḇ, imam ḇeba na ryap dupa ro bo rokef farsarser dupa. (Kel 30:7, 8) Ro Allah sasoser Ḇyena dor insama for ḇero rokef farsarser ḇeḇerap isak pdef. (Im 6:12, 13) Mamam snonggaku Yahudi ro sinan sya isof ro kpu sesya soḇe for ro rokef farsarser randak ya isak kuker mujisat snar Allah iso ḇefrur ya, ma snonggaku ḇebor sikofen rarya kako, ḇoi Refo ikofen rarirya ḇa. Imnis akurfasnai Yahwe byuk randak kaku ḇe Moses i, Harun romawa ḇyesi ”srir for ro bo rokef farsarser ma srir pyum ai naro for ani” rofyor srir ḇaim farsarser sbukna ro ḇo rokef fasarser ya. (Im 1:7, 8) Rofyor sifrur munara saḇsiḇer faro imam Harun i ramnai, sfarser farsarser saḇsiḇer anna, for ḇerama ro Yahwe, imbude nasasyar ro mandep ḇero tabernakel yaḇori, ryap pres farsarser ḇesya ro rokef farsarser ro ras anya. Ro fawar ine nefasnaiḇair snar for mujisat ani ifrur sak ai ḇero rokef farsarser ani ḇa, ḇape ”ikun fasarser ḇeḇerap ma ḇar ḇe mafen na fa nabro ro rokef farsarser yaḇori”. Inja, for ḇesak pdef ro bo rokef farsarser ya imbude for ḇerama ro Yahwe I ma for ḇesya kwar ro bo rokef farsarser ya. (Im 8:14–9:24) Rarirya kako, rofyor Salamo ḇyenadi fa ḇyetabiskan bait ramnai, for mujisat ḇerama ro Yahwe ikun pres farsarser anna.—2Taw 7:1; mam kako Hak 6:21; 1Raj 18:21-39; 1Taw 21:26 faro fawar eḇese kuker moḇsa Yahwe byuk for mujisat rofyor imarisen faro farsarser ro manfamyan ḇyesya.
(Imamat 6:25) ”Wakofen faro Harun ma romawa ḇyesya, ’Ineiso sasoser faro farsarser sasar ya: Farsarser ine fandun fa ḇeḇekaruk ro ḇarpon Yahwe I ro moḇ farsarser ḇeḇerap ḇeḇemun ya. Ima isren fafayaḇa.
si-IN 27 ¶15
Syap Ḇero Refo ḇe Nomor 33—Imamat
15 (3) Farsarser ḇepyos sasar sor na snar sasar sifrur bo sifawi ḇa na, ḇaido sasar sifrur na. Aiwan ḇemniso na sfarser na neḇemam ro sasar mansei imbe sedame kukri—ro imam, kawasa ansyakam, mananwir oso, ḇaido snonggaku ḇena royo ḇa. Farsarser ine imnis kuker farsarser ḇeḇerap ma farsarser ḇaḇebati sfarser kuker sne ḇemarisen faro snonggaku oser-oser, iso farsarser ḇepyos sasar ima fandun fa sbuk kaku na.—4:1-35; 6:24-30.
Ḇaḇewasya Refo
(Imamat 6:1-18) Yahwe dawos wer faro Moses, 2 ”Snonggaku oso syasar ma isouser faro Yahwe I ḇa rofyor kyarawraw, ḇaido ifrowes, ḇaido danggarkar snonggaku bebuk ḇaido ḇerir roi oso faro i, 3 ḇaido isrow roiebor ḇebyor ma danggar kuker roi ani. Rofyor fyores waworek snar ifrur roi anna ḇa, ineiso fandun fa ifrur ya: 4 Rofyor ifrur roi anna ma syasar, fandun fa byuk kaḇer rosai kyaraw na, ḇaido roi ismai kuker nyan dun untung ḇaido ifrowes, ḇaido srir ro i, ḇaido robor isrow na, 5 ḇaido rosai monda ismai kuker fyores waworek. I kako na ḇyak fadwer nabor kaku, ḇyak warpu wer ḇar ḇeḇerimya ro baba ro ḇaḇyak ya. Na byuk nakam faro bena ya ro ras sfasnai kaku isasar. 6 I kako byuk domba snoman oser, imnis kuker ḇaḇyak sor na, ma dun naḇe imam ḇe farsarser ḇaḇesasarya faro Yahwe I. 7 Imam nari ifrur ḇaḇedame faro i ro ḇarpon Yahwe, ma sasar sairirya monda ifrurna nari neḇepyos.” 8 Yahwe dawos wer ḇe Moses i, 9 ”Wawan Harun ma romawa ḇyesya, ’Ineiso sasoser faro farsarser ḇeḇerap: Farsarser ḇeḇerap fandun fa srap ro for yaḇori ro rokef farsarser ro robya ḇesiper isof ro arwo ya. For ro rokef farsarser ani fandun fa isak rarya kwar. 10 Imam fandun fa syun syatu imam ḇyedi ḇeḇefrur ro linen ma syun celana ḇeknampu ro linen. Ramnai, inanggow fafen ḇerap kwar fani ro farsarser ḇeḇerap ro rokef farsarser ma isawen naḇe andir rokef farsarser ya. 11 Ramnai, fyadwer sansun ḇyena kuker sansun ḇese, ma dun fafen anna ḇe ḇandi rum kruḇen, ḇe moḇ sap kwarna. 12 For ḇero rokef farsarser fandun fa nasak rarya kwar. Napok namḇrer awer. Ro arwo na, imam na ryir ai na ro ḇo for ani ma ryir farsarser ḇeḇerap ro ḇori. Mafen ro farsarser ḇaḇebati fandun fa ryap ro ḇo farsarser ḇeḇerap ya. 13 For ḇero rokef farsarser ya na smam kakuna insama nasak pdef. Napok namḇrer awer. 14 ” ’Ineiso sasoser faro farsarser robean: Harun romawa ḇyesi fandun fa sun roḇean anna ro ḇarpon Yahwe I ro ḇarpon rokef farsarser ya. 15 Oser ro imam sya fandun fa dun ro farsarser roḇean amek oser ro tepung ḇepyum kuker mani ḇyena, ma kemenyan nakam kako ro ḇori. Fandun fa ryap nakam na ro rokef farsarser insama paw ḇyena neke, ine ifrur faro farsarser nakam, ḇediref pyum ma ḇeyun marisen faro Yahwe. 16 Mun ḇedawer ro tepung na Harun ma romawa ḇyesi san na. Nama sifrur naḇe mamami ḇepisem ma san na ro moḇ ḇesren oso. Fandun fa san na ro bubes rum kruḇen sarawrow. 17 Mamami fandun fa sifrur na awer kuker mur. Nama Yabukna kwar ḇe ḇar ani ḇesi ro farsarser srap kuker for faro Aya. Ima nasren fafayaḇa, imnis raris farsarser sasar ma farsarser ḇaḇesasarya. 18 Ro Harun romawa snon ḇyesya rawo kpu up ḇesyakam fandun fa san na. Inema sbuk ḇesi ma kpu up sesi isof fyoro ro farsarser ḇeḇerap kuker for faro Yahwe I. Roi risai monda ḇepai ro farsarser ani fandun fa smam ḇe roi ḇesren.’ ”
30 NOVEMBER–6 DESEMBER
ARASAI ḆERO REFO | IMAMAT 8-9
”Yahwe Barakas Ḇyena Neḇemam Kaku”
(Imamat 8:6-9) Inja, Moses dor Harun ma roma ḇyesya fa sfanam, ma iwan si fa siḇan manggunsi kuker war. 7 Ramnai, Moses syower sansun syatu, ḇeḇoḇek sifer, ma rompi ḇekwan faro Harun i. Ramnai, ryir efod, ḇeḇoḇek sifer kako faro i infa fyorepen efod fa nako. 8 Ḇeuser ya, Moses ryir ḇedwarek ander, ma ryir Urim ma Tumim ro ḇedwarek ander ani. 9 Ramnai, Moses syower serban ro Harun ḇukor ḇyedi, ma ro ḇarpon serban ani, Moses ryir ḇrawen mnuk ḇesnaper, isoine ḇekopḇair farsamsyom ḇesren. Roi anna kam sifrur imnis raris Yahwe iwan faro Moses i na.
(Imamat 8:12) Pupesya, Moses isḇawer mani ramrem ḇar nono ḇe Harun ḇukor ḇyedi ma ryem i, insama byuk kankenem ḇyedi faro fararur ḇesren ya.
it-2-IN 311 ¶4
Ramrem
Moses ḇyan Harun ma Harun romawa ḇyesi, isoine Nadab, Abihu, Eleazer, ma Itamar (ḇaido, iwan siban manggunsi) ro baskom kansai ḇero bubes ma syower sansun baba imam ḇeba faro Harun i. (Bil 3:2, 3) Rofyor Harun isun sansun ḇepyum na, faro i sisower sansun ḇefasnaiḇair rari-rari ma fakamamar ro nasan ismai na. Ramnai Moses iryem tabernakel, roiebor nakam ma rosaser na, ma rokef farsarser sbuk farsarser ḇeḇerap, kuker baskom ma rosaser sbuk fa sbukifrur fararur nakam. Rarirya roi anna kam sifasren na, srir fa naḇese insama sbukifrur fararur Allah Ḇyena monda. Inja, Moses ryem Harun kuker isḇawer mani ḇe Harun ḇruri.—Im 8:6-12; Kel 30:22-33; Mz 133:2.
(Imamat 9:1-5) Ro ras ḇeḇewarya, Moses dor Harun, romawa ḇyesi, ma manfarkin Israel sya. 2 Ikofen faro Harun i, ”Wun sapi ḇebabo mgun oser faro farsarser sasar ḇedi ma domba snoman oser faro farsarser ḇeḇerap ḇe au. Aiwan sfarser nakam siduf ḇa, ma wun naḇe ḇarpon Yahwe. 3 Ramnai wakofen ḇe snonggaku Israel, ’Fandun fa mgun kambing snoman oser faro farsarser sasarya, sapi ḇebabo mkun oser kako ma domba snoman ḇebabo mgun faro farsarser ḇeḇerap. Aiwan sya siduf ḇa ma seumur taun oser. 4 Mgun kako sapi snoman oser ma domba snoman oser faro farsarser ḇaḇebati. Mgofarser nakam ro ḇarpon Yahwe, ma mgobuk kako farsarser roḇean siḇaren kwar kuker mani na, snar ras ine Yahwe nari isrow mgo.’ ” 5 Inja sun roi nakam Moses dap anna ro ḇarpon rum kruḇen sarawrow. Kawasa ansyakam srama ma sores ro ḇarpon Yahwe I.
it-2-IN 312 ¶7
Ramrem
Ro ras ḇeḇewarya, rofyor sifasos mnis sikwar ma siryem si, imam sya sifrur randak kaku fararur sena (kuker farfnoḇek ro Moses i ḇa), sifrur fararmyan ḇaḇedame faro snonggaku Israel ono fandun fa sifasren si, inema snar sasar sena ḇe snonggaku ḇenapes ḇa boi sisouser ḇa fyor sisyom sapi mgun ro ḇrawen, ḇefrur fa Yahwe imarisen si ḇa. (Im 9:1-7; Kel 32:1-10) Pupes ro fararmyan ḇerandak iman siryem babo ansya, Yahwe fyasnai kyaremso Ḇyedi ma fyasnaina kuker mujisat fyarem for, ro mandep ḇesya ro ḇo tabernakel, inja farsarser ḇesya kaker ro rokef farsarser yaḇori neḇerap pres.—Im 9:23, 24.
(Imamat 9:23, 24) Mura, Moses ma Harun susun ḇe rum kruḇen sarawrow yadori, ramnai susae ma suḇebarakas er ani. Rarirya, Yahwe fyasnai baba Ḇyedi faro er anine kam.24 Yahwe byuk for, ma for ani ikunpres farsarser ḇeḇerap ma mafen ḇesya ro rokef farsarser ya. Fafisu er ansyakam smame, siryaḇ ma sḇansuḇa.
Ḇaḇesasewar Arasai Rurya
(Imamat 8:6) Inja, Moses dor Harun ma roma ḇyesya fa sfanam, ma iwan si fa siḇan manggunsi kuker war.
(Imamat 8:14-17) Mura, Moses dun sapi snoman faro farsarser sasar ya. Harun ma romawa ḇyesya srir sibrasna ro sapi ḇukor ḇyedi ḇeḇefarser ani. 15 Moses kyaruk sapi ani, ramnai kuker ḇrampin ḇyedi pyek rik aiwan ani ro knapur oser-oser ḇesya ro rokef farsarser, insama rokef farsarser ani isren, ḇape rik ḇedawer na sisḇawer ḇe ḇar ro sop rokef farsarser ya. Rarirya, rokef farsarser ani sfasreni ma isren kaku. 16 Mura, Moses dun mafen ḇero snewar ḇyena kam, mafen ro ken ḇyeja. Ma barmor ḇyesuya kuker mafen ḇyena, ryapna ro rokef farsarser insama paw ḇyena neke. 17 Ramnai ḇedawerna, isoine kraf, kif, ma kapui ḇyena, srapna ro ḇandi rum kruḇen, raris Yahwe iwan faro Moses i na.
it-2-IN 169 ¶4
Moses
Allah ikanow Moses i ḇe manfandu ro ḇaḇeasas Sasoser ifrur kuker Israel. Fakamaman ḇeradine sbuk na ḇa ḇe snonggaku sairirya ro ḇarpon Allah, nbuk monda ḇe Yesus i, manfandu ḇaḇeasas babo. Kuker rik ro farsarser aiwan sya, Moses pyek syap ḇaḇeasas fa ḇyemanfaker faro Yahwe ḇe ”snonggaku” ḇerandak ya, ma er ani (ineiso faker ro tua-tua sya) ḇe ”snonggaku” ḇeuser ya wer. Iwasya syap ḇaḇeasas ani faro er ansi, ḇekofen, ”Ngomarisen ngosouser ma ngofrur Yahwe parenta ḇyena kam.” (Kel 24:3-8; Ibr 9:19) Ro nasan ismaina ḇe manfandu, Moses nya fakamaman fa smam ḇaḇawes Tabernakel kuker sifrur roiebor na, imnis moḇ Allah fyasnai ḇe i na. I kako ryem imam sya, ryamrem Tabernakel ma Harun, ḇe imam ḇeba, kuker mani sifrur kuker kefikefi skinfir na. Ramnai, myamwarek fararur ḇesren randak ro imam babo skanow ro tabernakel sifrur ya.—Kel psl 25-29; Im psl 8, 9.
Ḇaḇewasya Refo
(Imamat 8:31–9:7) Mura, Moses ikofen faro Harun ma romawa ḇyesya, ”Mgofnaw domba kraf ḇyenane ro kedwa rum kruḇen sarawrow. Mgan na rodiwa kuker mamami ro aram sbuk fyor ḇaḇeramrem. Mgan na, snar iso iwan faro aya na. 32 Aiwan kraf ḇaido mamami ḇedawer na mgorap nakam. 33 Fandun fa mgoisya mgofanam pdef ro kedwa ḇero rum kruḇen sarawrow fyoro ya ras rifik isof ro ḇaḇeramrem mgoḇena namnai, snar sfandun ras rifik fa iryem mgo ḇe imam. 34 Yahwe iwan fa kofrur rosai kam kofrur ro rasine na fa ifrur ḇaḇedame faro mgo. 35 Fandun fa mgoisya mgofanam pdef ro kedwa ḇero rum kruḇen sarawrow arkok ma roḇ fyoro ya ras rifik, ma mgofrur roi imbe mgofrur faro Yahwe I, insamaido mgomar ḇa. iso iwan faro aya na.” 36 Harun ma romawa ḇyesya sifrur ḇeri roi nakam Yahwe iwan roro Moses i.
9 Ro ras ḇeḇewarya, Moses dor Harun, romawa ḇyesi, ma manfarkin Israel sya. 2 Ikofen faro Harun i, ”Wun sapi ḇebabo mgun oser faro farsarser sasar ḇedi ma domba snoman oser faro farsarser ḇeḇerap ḇe au. Aiwan sfarser nakam siduf ḇa, ma wun naḇe ḇarpon Yahwe. 3 Ramnai wakofen ḇe snonggaku Israel, ’Fandun fa mgun kambing snoman oser faro farsarser sasarya, sapi ḇebabo mgun oser kako ma domba snoman ḇebabo mgun faro farsarser ḇeḇerap. Aiwan sya siduf ḇa ma seumur taun oser. 4 Mgun kako sapi snoman oser ma domba snoman oser faro farsarser ḇaḇebati. Mgofarser nakam ro ḇarpon Yahwe, ma mgobuk kako farsarser roḇean siḇaren kwar kuker mani na, snar ras ine Yahwe nari isrow mgo.’ ” 5 Inja sun roi nakam Moses dap anna ro ḇarpon rum kruḇen sarawrow. Kawasa ansyakam srama ma sores ro ḇarpon Yahwe I. 6 Ma Moses ikofen, ”Yahwe iwan mgo fa mgofrur roi ine kam snar Yahwe nari fyasnaiḇair baba Ḇyedi faro mgo.” 7 Mura Moses ikofen faro Harun i, ”Rwa ḇe rokef farsarser ma farser aiwan faro farsarser ḇeḇerap ḇedi. Wafrur ḇaḇedame ḇe manggundaw ma kina ḇedi. Farser kako farsarser ro er ine, ma wafrur ḇaḇedame faro si, raris Yahwe iwan na.”