1921—Swaf Taun Utin Oser Naiwara

SYAP Watch Tower 1 Januari 1921 byuk fakfuken ine faro Siswa Alkitab ḇeryaḇ sya: ”Fararur rosai nari kofrur ro taun ineni?” Infa kokarem fakfuken ani, syap ani dap mnuk ḇero Yesaya 61:1, 2, ḇekofen, ”Yahwe isiḇer aya fa yabaryas angginem ḇeḇye faro snonggaku bena snemayar sya . . . , fa yakofenḇadir taun Yahwe ḇaḇenaḇye Ḇyena ma ras munsu Allah koḇedi.” Mnuk ani danun ḇe si faro fararur sena fa sbaryas.

MANBARYAS ANGGINEM ḆEḆYE ḆEMAKAK ḆA

Insama simbran fararur senane, Siswa-Siswa Alkitab sipok simgak awer. Kukro? Snar sbaryas ”angginem ḇeḇye” faro snonggaku bena sne mayar sya ma sikofenbadir Yahwe ”ras munsu” Ḇyena faro snonggaku ḇeḇarḇor sya.

Naek J.H. Hoskin, ḇeḇarek ro Kanada, ismai samswen rariryano byaryas kuker makak ḇa. Ro musim semi taun 1921, isrow kuker pendeta Metodis. Inja Naek Hoskin iso ḇeyawos ḇeponi doḇe, ”Bisa kuyawos asuser Refo anine. Imbo na kakara kuḇena naḇesisye faro roi ḇeḇeso mboi, na kuyawos pyum na ḇae.” Ḇape kakuya rarirya ḇa. Naek Hoskin doḇe, ”Nukain nuyawos menit ri ḇeḇeso monda, ḇape [pendeta ani] imsor fafayaḇa. Byaspum kedwa ya ryok naḇa kaku inja yoḇerada kaca eroyo kedwa ani na ikpefe.”

Pendeta ani iyuw naba aya ḇo doḇe, ”Iḇye kada waramura ḇe snonggaku ḇeḇe Kristen ḇa sya!” Naek Hoskin ḇyefasis monda, ḇape fyor iswara ibur kwar, kyara wer ḇo doḇe, ’Manggundi dakfasnai rari ḇemnis snonggaku Kristen sya ḇa!’

Meserdi, fyor pendeta ani dun faya ro gereja, ma dawos ḇeḇyeḇa Naek Hoskin i. Naek Hoskin doḇe, ”Pendeta ani ikofenḇair ḇe jemaat ḇyesi doḇo ayama snon ḇeyawos anggarkar ro kota ine inja iḇye kada spambos aya fa yamar.” Ḇape, Naek Hoskin isusu ḇa. Byaryas ma ismai bon ḇepyum fyor sisrow snonggaku ḇebor sya. Doḇe, ”Yamarisen kaku yabaryas ro moḇ ani. Ḇero diansya sia soḇe, ’Yafawi Mansar auma Manseren hamba Ḇyedi risau!’ Sikofen ḇe aya nari sbuk roi ḇeḇeso yafandun na.”

ROI RISURU FARO FARKARKOR REFO

Infa nafnoḇek snonggaku ḇemarisen fa ḇesur ro ḇaḇerurya, Siswa-Siswa Alkitab ansine sifrur roi risuru faro farkarkor Refo ḇero syap The Golden Age.a Roi oser ya iso, fakfuken nasya ḇeknam ro Refo nari sinan sya sḇukisawos kayam na kuker romawa sesi. Sinan sya nari ”sbuk fakfuken faro romawa sesya ramnai sifnoḇek si fa sisrow kankarem ḇero Refoya”. Fakfuken ḇepyan ono nasya, imnis raris, ”Refoya iser syap barbor rifis?” Fakfuken ono kako nakofenḇair roi ḇeḇefandun kaku, rupara, ”Snonggaku Kristen oser-oser na sismai wayam kaku ke?” Fakfuken ḇeradinena nafnoḇek romawa babo sya fa simgak ḇa fyor sbaryas.

Ḇape faro snonggaku ḇefawi Refo kwar sya roi ono nasya kako faro si. Sḇuk fakfuken ḇeḇeso ma kankarem ḇyena bisa sismai naro syap Studies in the Scriptures jilid randak ya. Roi sḇukifarkor Refo anane nbuk payamyum faro snonggaku ḇebor sya. Ḇape, syap The Golden Age edisi 21 Desember 1921 ikofenḇair snar roi risuru ansuine nari sifrur na wer ḇa. Snaro?

SYAP ḆEBABO!

Syap *The Harp of God*

Kartu ḇefasnaiḇair bar nari siwasya na

Kartu ḇeser fakfuken na

Naek ḇefarkin ro organisasi ansine smam ḇoi fandun fa farkarkor Refo ine sifrur na ḇesya kwar ma kuker nyan ḇepyum. Inja, sisasyar syap The Harp of God ro paik November 1921. Snonggaku ḇemarisen ḇesmai syap inensya siso kako program farkarkor Refo kuker sḇuki syap ani fa sfarkor ro manggunsi. Roi ine nafnoḇek si fa sfarkor ”Allah marisen Ḇyena fa byuk kankenem fyoro ḇe snonggaku sya”. Moḇsa sifrur farkarkor ine rai?

Fyor snonggaku oso ismai syap ani kwar, ikako nari daksmai kartu mgun oso nari ḇefasnaiḇair ro bar risai nari iwasya ya. Minggu ḇeramaya, nari ismai kartu ḇese ḇeser fakfuken-fakfuken ḇekur fasfas iwasya kwar na. Kartu ani kako nari ḇebair bar rosai nari iwasya fa fyarkor ro minggu ḇerama ya wer.

Ro swaf minggu ri 12, ḇefarkor Refo anine nari ismai kartu na ro sidang ḇero moḇ ya ro minggu oser-oser ya. Ḇefarem ker kartu-kartu anane siso naek srar ḇeḇesinan kwar sya ḇaido snar keadaan ḇesena nafrur si fa jadi fa sbaryas ro rum ḇe rum ḇa. Anna K. Gardner, ḇero Millvale, Pennsylvania, AS, fyawar ḇo doḇe, ”Fyor syap The Harp of God sisasyar na, Thayle, eba yedi jadi fa dakbran ḇa, inja na dakfarem monda kartu-kartu na ro swaf minggu oser-oser ya.” Fyor ḇefarkor Refo ani imnai ro program ani kwar ido, nari oso ro sidang myamfar i ma ifnoḇek i fa fyarkor Refo nabor wer.

FARARUR ḆEWAF SI

Ro papupes taun ani, Naek J.F. Rutherford fyarem surat ḇe sidang nakame. Fyas ḇo doḇe, ”Ro taun ine, fararur ḇaḇebaryas angginem ḇeḇye faro Karajan Allah neḇebaryas kwar ma nafnoḇek snonggaku ḇebor sya nasyadi ro taun-taun ḇepon aniwara.” Mura ikofen wer, ”Kona fararur nabor kaker. Inja mgofrur raryaḇ snonggaku ḇesesya insama sakso fa sakfrur fararur ḇeba ine.” Siswa-Siswa Alkitab ansine sfanaiḇair snar siso anun ani. Ro taun 1922, sḇaryas angginem ḇeḇye ine kuker makak ḇa ma siryaḇ syadi wer.

Bati Ḇemgak Ḇa Sya

Siswa-Siswa Alkitab sfasnai saswar mamḇekanaek kuker sifnoḇek oso ma ḇesesya. Sima bati ḇemgak ḇa sirya, ma ’sḇe naek rofyor samswen isya’. (Ams. 17:17) Mgorama komam fawar ḇeuser ine.

Ro ras Selasa, 31 Mei 1921, snonggaku sya srakrok ro kota Tulsa, Oklahoma, AS, rofyor snon bena kif ḇepaisem oso sisun i ḇe bui snar skursofi ḇo soḇe myun bin bena kif ḇepyoper oso. Snon ḇepyoper sisyadi ro 1.000 smamunmun kuker snon ḇepaisem ḇebor kuf ḇa sya. Srakrok kako ro moḇ Greenwood, moḇ ani kawasa ḇena kif ḇepaisem sibor sroroya. Ro dia, nasyadi ri 1.400 rum na ma toko-toko na sfasyar ma srap na. Sikofenḇadir snar ḇemar sya se 36. Ḇape, barbor ro ḇemar sya imbude sisyadi ri 300. Ḇarpur ya rakrok ine sifawi na ḇe Pembantaian Ras ro Tulsa.

Naek Richard J. Hill, Siswa Alkitab oso bena kif ḇepaisem dakḇarek ro Greenwood, fyawar rosai ḇeḇesyana, ”Ro roḇ rakrok ani, nggosya nggoso fananjur ari. Fananjur ya imnai, nggorower mura spam ro kota yadori. Ine nejadi isof romfawru.” Ras Rabu arwoya, tanggal 1 Juni, fafisu ya iḇyeḇa syadi. Naek Hill doḇe, ”Snonggaku ḇeḇeso srama sikofenḇadir ḇe inggo soḇo imbe nggoḇye ido nggora ḇe Aidoram moḇ siryur rona.” Inja, Naek Hill, swari, ma romawa rim ḇyesi sramura ḇe aidoram ani. Ro diwa, indokada snon ma bin bena kif ḇepaisem sya se 3.000. Tentara siwan mura fa ḇedwarek rakrok ani siso ḇemamwarek si.

Ro fafisu ya, naek bena kif ḇepyoper oso ḇenir Arthur Claus ifrur roi oso kuker makakḇa. Doḇe, ”Rofyor yarowero snonggaku sya sfasyar ma srap rum ḇero Greenwood, yasewar fa yafawi rariso bati yeja Naek Hill i isya ro payamyum ke roḇa.”

Arthur Claus ifnoḇek romawa ri 14 fa sfarkor Refo kuker syap The Harp of God

Fafisu isya ro Naek Hill rum ḇyeja kwar, isrow kuker snon bena kif ḇepyoper ḇekif senapan ya. Snon ani ima ḇyarek fanam kuker Naek Hill ma ḇati ḇyediri. Snon ani doḇerada Arthur ryama imḇe ifrur napnap, inja iyuw naba ḇo doḇe, ”Rosai imbe wun ro dineni?”

Arthur fyawar ḇo doḇe, ”Yawos sasar ido, na pyambos aya. Mḇoi yakofen asuser ḇe i snar ayama Naek Hill bati ḇyedi risaya ma yarama ker ḇe rum ḇyedi.” Mura Arthur ma snon ani bisa sumamwarek Naek Hill rum ḇyani inja snonggaku sfasyar rum ani ḇa.

Ḇarpur ya, Arthur ryower soḇo Naek Hill ma kina ḇyesi sisya ro Aidoram ani. Arthur ismai informasi snar snonggaku bena kif ḇepaisem sine na sisasyar ro moḇ ani ḇa mboi sismai surat izin ro Jenderal Barrett ya mande, ima ḇyebukor faro tentara ro diwa. Arthur doḇe, ”Samswen kaku fa kosrow jenderal ani. Fyor yakofen ḇe i snar imbe yun kina oso ro Aidoram, ifuken aya, ’Imbe mamwarek kina ani ma fandandun sena kam ke?’ Yakofen ḇeri imbo, kukro roi ine yakara na kwar.”

Fyor ismai surat izin ani kwar, Arthur ryamura ḇe Aidoram ani. Fyasnai surat ani ḇe tentara oso, ma ikofen radine, ”Kaku, Jenderal Barrett iso ḇepanepen surat ine! Ras ine, insape au ḇeyun snonggaku sisasyar ro moḇ ine.” Fyor isrow kuker Naek Hill ma kina ḇyesi kwar, Arthur dun pyan si ra sibur.

Arthur myam kaku Naek Hill ma kina ḇyesya skain kuker payamyum. Snonggaku smanen fyor smam ḇaḇebri ma saswar mambekanaek Arthur fyasnai ine. Arthur fyawar ḇo doḇe, ”Ḇeḇarek fanam ma ḇemamwarek pyan Naek Hill rum ḇyeja fnoḇek aya sya sna kakara ḇepyum faro inggo. Osower ido, ḇesesya simarisen fa sakfarkor napnapes ine snar smam ro fandu Allah kawasa Ḇyesya oso ḇyaḇir ikaki syadi ro ḇesesya ḇa ma srama ro er ḇeḇeseyae imboi sḇeoser.”

a Ḇarpur wer snir The Golden Age ine wer ḇe Consolation ro taun 1937 ma Awake! (Sadarlah!) ro taun 1946.