Kosambraḇyae Ko ma ”Kofrur Syadi Roi Anna” Wer

1. Rosai ḇefnai fa manwawan Paulus idif snonkaku Kristen Ibrani ro fafisu iwara insama sisambraḇyae syadi si wer?

RO ABAD randak, manwawan Paulus ḇyuk wos ananun ine faro snonkaku Kristen Ibrani sya, ”Mkorama kokarayae ko insama kodifyae ko fa kofasnai saswar ma ḇaḇenaḇye, koḇinkwanbur awer fananjur koḇena raris snonkaku ḇeḇeso sifrur na, ḇape kosambraḇyae ko, ma kofrur syadi roi anna kam wer snar komam ras ani isya fyanam kwar.” (Ibrani 10:24, 25, nwt) Naek srar sya imbude sikmom rosai ḇefnai fa Paulus ikofen ḇe si insama sisambraḇyae syadi si wer. Indo kada taun ririm raposa insape sifawi mnis kaku rosai ḇefnai fa Paulus ikofen ananun anna. Ro fafisuya, smam Yahwe ras mankara Ḇyedi faro Yerusalem fyanam kwar. Sifawi fandun fa sifrarbur mnu ani raris rosai Yesus ikofen faro si na. (Lukas 21:20-22; Farfyar 2:19, 20) Yahwe ras Ḇyedi ryama ro taun 70, ro fafisu snonkaku Roma simkok Yerusalem.

2. Rosai ḇefnai fandun kaku fa kosambraḇyae ko ma kofrur syadi roi anna wer ro fafisu ine?

² Ro baboine, kosmai fafisu ḇemnis rarirya. Yahwe ras Ḇyedi nafrur makakak. Ras ani fyanam kwar. (Yoel 2:11) Nabi Zefanya wos ḇyena namnis kuker fafisu koḇedine, ”Yahwe ras ḇeba ḇyedi fyanam kwar! Isya fyanam kwar ma kero monda fasawdam ifyafer muma!” (Zefanya 1:14) Iso ḇefnai fa, fandun kaku ”kokarayaye insa kodifyae ko, insa kofrur roi ḇeḇye ma kofasna saswarya.” (Ibrani 10:24) Fandun fa kofasnai sawarwar syadi faro naek srar koḇesya wer, insama bisa kosambraḇser si ro fafisu sifandun na.

MANSEI ḆEFANDUN WOS ḆEḆUK SAMAMBRAḆ YA?

3. Rosai manwawan Paulus ikofenbos rofyor imbe koḇuk wos ḇeḇuk samambraḇ ya? (Mam sonin ro randak artikel ine.)

³ ”Ḇaḇeḇirbar ro snonkaku ya sneri nafnai fa iryar ḇa, ḇape wos ḇepyum nafrur fa sneri iryaḇ.” (Amsal 12:25) Fafisu ine, kokame kofandun wos ḇeḇuk samambraḇ. Paulus ikofenbos ḇe naek ḇesmai fakamamar fa ḇesambraḇser naek srar sya, siswarepen snar fandun fa sisambraḇser mankunsi kako. Fyas ḇe naek srar ro Roma sya, ”Yamarisen yasrow naek ma srar mko, insama yarwas fakamaman yasma ro Allah Rur ḇyeja fa syambraḇ ser mko. Kakara yedi isoine, snar kokam kokyar faro Yesus Kristus, inja ibye kosonemyaeko.” (Roma 1:11, 12) Komam kada, manwawan Paulus mankundi fafisu ono dakfandun wos ḇeḇuk samambraḇ.​—Wasya Roma 15:30-32.

4, 5. Mansei bisa kosambraḇser ro fafisu ine, ma rosai ḇefnai ya?

⁴ Fafisu ine, bisa kosambraḇser naek srar ḇefarmyan ḇe Yahwe I ro oras nakam, imnis raris perintis ḇesoasuser sya. Ḇebor rofandu si, sibur roi ḇebor sena kwar insama bisa suf farmyan ḇe perintis. Ine kako faro naek srar ḇefarmyan ḇe utusan injil, ḇefararur ro kantor cabang ma kantor penerjemahan, pengawas wilayah ma siswasi. Naek srar ansine sḇuk oras nabor kwar fa sfarmyan ḇe Yahwe I. Inja fandun fa kosambraḇser si. Komam kada, sino simarisen sfarmyan ro oras nakam, ḇape jadi ḇa kwar. Nari siryaḇ pdef kako rofyor koḇuk wos ḇeḇuk samambraḇ yoḇ si.

⁵ Mansei wer ḇefandun wos ḇeḇuk samambraḇ ya? Bisa kosambraḇser naek srar ḇekinfir fa ḇefarḇuk ḇa snaro simarisen sisoasuser Yahwe ma sfarḇuk kuker naek ḇaido srar ḇena kakyar oser kuker si. (1 Korintus 7:39) Binswa sya kako sismai sneprei rofyor siswasi sikofen siswar si ma sḇesyowi kaku rosai sifrur kwar na. (Amsal 31:28, 31) Snonkaku Kristen ḇesmai wayam ma ḇeduf sya, si kako sfandun wos ḇeḇuk samambraḇ. (2 Tesalonika 1:3-5) Yahwe ma Yesus susambraḇser snonkaku ḇesoasuser ansine.​—Wasya 2 Tesalonika 2:16, 17.

PENATUA SYA BISA SISAMBRAḆSER KO

6. Ro Yesaya 32:1, 2, fararur rosai penatua sya suf na?

⁶ Wasya Yesaya 32:1, 2. Kokenem ro fafisu ḇesamswen kaku ma napyan ḇe ko fa koḇesanekar. Yesus Kristus iwan naek ḇesmai ramrem sya ma ”manfarkin” ḇesouser ro domba-domba ḇesesya fa sisambraḇser ko. Ro sidang, penatua sima tuan faro kakyar koḇena ḇa, ḇape sifararur fnoḇek ko monda insama komarisen syadi wer. Simarisen sifnoḇek ko fa kosmai aski ma kosouser pdef.​—2 Korintus 1:24.

7, 8. Rariso penatua sya bisa sisambraḇser ḇesesya ro rosai sawos ma rosai sifrurna rai?

⁷ Penatua sya bisa sakfrur ra manwawan Paulus i, syewar fa syambraḇser naek srar sya. Fyas ḇe snonkaku Kristen ḇero Tesalonika ḇesmai wayam sya, ”Rarirya kako, nkoswar naba faro mko, inja nkomarisen nkoḇerwas Allah Ankankinem Ḇeḇye ḇyedi monda faro mkoḇa, ḇape kankenem nkoḇena ḇardi kako kuker mko, snar nkoswar mko kwar.”​—1 Tesalonika 2:8.

⁸ Penatua sya bisa sisambraḇser ḇesesya ro rosai sawos na. Ḇape wos monda namnis kwar ke? Paulus ikofenḇair ḇe penatua ḇero Efesus sya, ”Rofyor ko fararur rarirya insa ko fnoḇek snonkaku ḇepokḇa ma ko swarepen Manseren Yesus wos ḇyedi, doḇo: ’Ipyum syadi ro koḇuk ya ro kosma ya.’” (Farfyar 20:35) Kuker sne ḇesiper Paulus imarisen ’ḇyuk roi ḇeḇor kam’ faro naek srar sya. Fyasnaiḇair ro fararur ḇyena snar imarisen ifrur roi ḇepyum syadi faro si. (2 Korintus 12:15) Kuker nyan ḇemnis rarirya, penatua sya simarisen sisambraḇser ḇesesya ro rosai sawos na monda ḇa, ḇape ro fararur sena kako. Ine nfasnaiḇair siswar kaku ko.​—1 Korintus 14:3.

9. Rariso penatua sya sḇuk wos ananun ḇepyum rai?

⁹ Fafisu ono, penatua sya fandun fa sḇuk wos ananun fa sisambraḇser naek srar sya. Penatua sya bisa sisewar farkankin ro Refo rariso sḇuk wos ḇeḇuk samambraḇ. Rofyor Yesus ikenem kaḇer ro marmarya, ḇyuk nyan ḇepyum rofyor ikofenḇair wos ananun ḇe sidang-sidang ḇero Asia Kasun. Ḇyuk anun ḇepakrek faro sidang-sidang ḇero Efesus, Pergamus, ma Tiatira. Ḇape rofyor ḇyuk ananun ḇaim, isandik si faro roi ḇepyum sifrur kwar na. (Fasasna 2:1-5, 12, 13, 18, 19) Yesus ikofenḇair ḇe sidang ro Laodikia, ”Snonkaku yaswarsya si yasonek ma yaprersya. Inja mkomarisen ido mkombror ro sasar mkoḇena.” (Fasasna 3:19) Penatua sya bisa sakfasnai nyan rariso Yesus ḇyuk wos ananun ya rai.

NAEK SRAR ḆESESYA KAKO BISA SAKSAMBRAḆSER ḆESESYA

10. Rariso kosambraḇyae ko rai?

¹⁰ Penatua serer monda ḇa ḇeḇuk wos samambraḇ faro snonkaku ḇesesya. Paulus idif snonkaku Kristen syakam fa sawos, ”wos ḇeḇefandun ḇeḇawes, insa ḇemnafsya, sisma saswar-fakamaman”. (Efesus 4:29) Ko oser-oser fandun fa kofawi pyum rosai snonkaku ḇesesya sfandun na, insama bisa kofnoḇek si. Paulus ikofen faro snonkaku Kristen ro Ibrani, ”Swambraḇser ḇramin ḇemor bedi ma wepur ḇeradadai bedi. Wambran ro nyan ḇepyom insa wemin ḇeryarḇa bedi ryosdis awer mboi iprei.” (Ibrani 12:12, 13)Kokame bisa kosambraḇyae ko ro rosai kawos na. Koma kobabo kaker ke, bisa kaksambraḇser snonkaku ḇesesya.

11. Rosaiso ḇesambraḇser Marta i rofyor ḇye-stres?

¹¹ Imbesrar oso ḇenir ḇe Marta, ḇye-stres ro fafisu ḇeḇeso.a (Mam fasfas kasun ro sop.) Fyas, ”Ras oso rofyor yaḇenadi ḇo yor samambraḇ, yasrow imbesrar ḇesinan kwar oso, fyasnai sawarwar ro fafisu yafandun na. Dakfawar samswen ḇekuri raris ḇekur ayanya, inja yafawi yemir monda ḇa ḇesmai samswen ine.” Imbesrar ine na kyara ḇaḇeri snar wos ḇyena nsambraḇser Marta i!

12, 13. Rariso koso wos anun ḇero Filipi 2:1-4 na rai?

¹² Paulus fyas faro snonkaku Kristen ro Filipi sya: ”Inja ro Kristus ananun naisya, sneprei ma saswar, ḇaḇeoser ro Rurya isya, saswarya ma snesoya isya, insa mkofrur mnis raryaḇ yedi isoine: iḇye mkona sne-kakara oser, mkona saswar oser, rur oser, kakara oser, mboi mkosewar ḇaḇefandun mankun mkoḇena ḇardi awer roḇa sanandik ḇeḇefromo awer. Inja iḇye kuker randun sne mkomam min mkoḇesi sikaki syadi ro mankun mko; ma mkono oser-oser syewar fandun mankundi ḇyena awer, ḇape fandun snonkaku ḇesesya kako.”​—Filipi 2:1-4.

¹³ Kokame bisa kofnoḇek snonkaku ḇesesya kuker nyan ḇebor. Bisa kofasnai ”sneprei ma saswar”, ’ḇaḇeoser ro rurya’, ma ”saswar ma snesoya” insama kosambraḇser naek srar koḇansi.

NYAN ḆEḆESO FA KOSAMBRAḆYAE KO

14. Moḇsariso na kosambraḇser snonkaku ḇesesya rai?

¹⁴ Nari komarisen kaku rofyor korower snonkaku kofnoḇek ro fafisu iwara sya sisouser pdef. Manwawan Yohanes fyas, ”Roi oso ḇa ḇefrur fayaryaḇ syadi ro yamnaf romawa yesi sikenem imnis ḇaryas ro Allah.” (3 Yohanes 4) Perintis sibor simarisen kaku rofyor srower snonkaku sifnoḇek ro fafisu iwara fa sfarkor napnapes, sakfarmyan kaker ḇe Yahwe I isof ro fafisu ine, iḇa syadiwer sino sakḇe perintis. Inja, rofyor perintis sya sesanekar ido, bisa kofawar ḇe si roi ḇepyum sifrur kwar ro fafisu iwara fa sifnoḇek snonkaku ḇesesya.

15. Rosai wer bisa kofrur insama kosambraḇser snonkaku ḇefarmyan ḇe Yahwe kuker soasuser sya?

¹⁵ Pengawas wilayah ma siswasi soḇe sima sismai samambraḇ rofyor naek srar sya sḇuk kartu ḇeser wos kasumasa faro rarama sena ḇe sidang seja. Ko kako bisa kokofen kasumasa faro penatua, utusan injil, perintis, ma naek srar ḇefararur ro Betel, ma manseisirya monda ḇefarmyan kuker soasuser. Wos koḇena nari nsambraḇser si kaku.

RARISO KOKAME BISA KOSAMBRAḆYAE KO

16. Rosai wafrur wer fa swambraḇser snonkaku oso?

¹⁶ Rosai kofrurya rofyor koḇaḇir rya samswen kaku fa kosambraḇser snonkaku ḇesesya? Ḇekaku ya, imbe kosambraḇser snonkaku ḇesesya nama nsamswen ḇa. Randak ya, wasrow snonkaku oso ido fasnai mka ḇemarisen yoḇ i. Imbrif yoḇ Au ḇa ido, ima nfasnai isya ismai samswen ma fyandun wos ḇeḇuk samambraḇ ro Au. Bisa swambraḇser i kuker rwower i rofyor fyawar samswen ḇyena.​—Yakobus 1:19.

17. Rosaiso ḇesambraḇser naek ḇebabo oso?

¹⁷ Naek ḇebabo oso ḇenir ḇe Henri, ḇyesneso kaku rofyor kina ḇyansi sfarmyan ḇe Yahwe I werḇa. Oser ya iso kmari, randak ya dakḇe penatua. Rofyor pengawas wilayah myam naek Henri ḇyesneso, dor i fa sura suyinem kayam kofi. Ryower pyum Henri i rofyor fyawar rosai ḇyaḇir na. Henri ifawi kaku, insama kina ḇyansi skaḇer ḇe napnapes ya, fandun fa isouser pdef. Ismai samambraḇ kako rofyor iwasya Mazmur 46, Zefanya 3:17, ma Markus 10:29, 30.

18. (a) Rosai Raja Salomo fyas ḇekur ḇe wos ḇeḇuk samambraḇ ya? (b) Rosai Paulus danun ḇe kokame?

¹⁸ Rosai kofarkor ro Marta ma Henri fawar suḇena? Bisa kosambraḇser naek ḇaido srar oso ḇefandun wos sneprei. Raja Salomo fyas, ”Wos oser ḇaken neḇekofen ro oras ḇemnis, sye napyum kaku ra! Mka ḇesnai marisen nafrur sne doryaḇ; ankinem ḇepyum nbuk samambraḇ.” (Amsal 15:23, 30, catatan kaki) Koisya kofawi naek ḇaido srar oso isya ḇyesanekar ke? Bisa kofrur roi ḇepyan raris kowasya pyan fawar ḇepyum oso ḇe i ro syap Baryas ḇaido situs web koḇena ke? Paulus dakofen ḇo doḇe kodisen dow Karajan kayame, bisa nafrur fa kosmai sneprei. Fyas, ”Mkoḇuk farkarkor ma mkosonekyae mko ma mkodisen mazmur, ma sanandik ma dow rurya, ma mkokofen kasumasa ro mkosnemna faro Allah.”​—Kolose 3:16; Farfyar 16:25.

19. Rosai ḇefnai fa kosambraḇyae ko ima roi ḇefandun syadi, ma rosai fandun fa kofrur ya?

¹⁹ Yahwe ras Ḇyedi fyanam kwar, inja fandun kaku fa kosambraḇyae ko. (Ibrani 10:25) Nari komarisen kaku rofyor koso Paulus wos ananun ḇyena, ”Rarirya mkanunyae mko ma mkosonemyae mko, imnis moḇ mkofrur ro baboine raya.”​—1 Tesalonika 5:11.