Mansei Ḇefara Karkara Bena?

1, 2. (a) Rofyor Petrus ikofen ḇe Yesus fa fyaḇri mankundi, rosai kyarem ya? (Mam sonin ro randak artikel ine.) (b) Rosai ḇefnai fa Yesus kyarem rarirya?

YESUS manfamyan ḇyesi sikandor kaku! Skara Yesus na ḇyawes kaḇer Karajan Israel, ḇesyaḇo Yesus ikofen kero wer nari ḇyekandera ma imar. Manwawan Petrus dawos ḇepon, ”Manseren, Allah myam monda awer roi ḇera dine! Roi ḇeḇesya ani ipok kyur awer au.” Yesus kyarem, ”Biris wabur. Au karui ḇekarkar aya, snar kwara karkara Allah ḇyena ḇa, ḇoi karkara snonkaku.”​—Matius 16:21-23; Farfyar 1:6.

² Fyor Yesus ikofen rarirya, nasnai kaku snar Yahwe karkara Ḇyena iḇese ro karkara Setan dunya ḇyedi ḇyepoik roro ya. (1 Yohanes 5:19) Petrus danun ḇe Yesus i fa nya rari faḇri mankun raris snonkaku ḇebor ro dunya ine. Mboi, Yesus ifawi Yahwe imarisen insama fyasos mankundi faro kandera ma marmar nari kero wer ḇekur i na. Yesus kankarem ḇyena nefasnaibos nya Yahwe karkara Ḇyena ma pyampum kaku karkara ḇero dunya ine.

3. Rosai ḇefnai fa samswen fa kona Yahwe karkara Ḇyena ma kopampum karkara dunya ine?

³ Ko ido rariso? Kokara Yahwe karkara Ḇyena ke karkara dunya ine? Snonkaku Kristen koine, koḇesewar kwar fa kofrur rosai Allah imarisen na. Mboi nyan karkara koḇena moḇsa ḇyerai? Koḇesewar kwar fa kokara Yahwe karkara Ḇyena, iso komam roi nakam raris moḇ myam na rai ke? Fandun fa koḇesewar kaku insama kofrur na. Imbape, napyan kaku fa kokara karkara dunya ine. Kukro rur dunya ine isya ro ris koḇedi. (Efesus 2:2) Snonkaku ḇero dunya ine smam monda faro fandun mankun sena, ma nane na nafrowes ko fa kokara raris si. Kaku, samswen fa kokara Yahwe karkara Ḇyena, mboi napyan kaku fa kokara karkara dunya ine.

4. (a) Komam monda dunya ine dawyae karkara koḇena ido, rosai nari kofrur ya? (b) Rosai nari kofarkor ro farkarkor ḇerama ya?

⁴ Komam monda dunya ine dawyae karkara koḇena ido, nari kofandun mankunko ma komarisen kokinfir roi ḇekaku ma ḇesasar ro mankunko. (Markus 7:21, 22) Inja, fandun fa kokara ”Allah karkara ḇyena”, mboi ”karkara snonkaku” ḇa. Farkarkor ine nafnoḇek ko fa kofrur na. Na kokarauser rosai ḇefnai fa komam roi nakam raris Yahwe mamam Ḇyena, ine nadwarek mankenem ko ḇa, mboi nun fainda ḇe ko. Nari kawos kako rariso insama karkara dunya ine fyara ḇaido dawyae awer ko. Ro farkarkor ḇerama ya, nari kofarkor nyan fa kokara Yahwe karkara Ḇyena faro roi ono ma moḇsa kona karkara Ḇyena rai.

YAHWE KARKARA ḆYENA NUN FAINDA

5. Rosai ḇefnai fa sino sisya simewer manseirirya kako sawyae si?

⁵ Sino sisya simewer manseirirya kako sawyae nyan karkara sena. Sikofen ḇo soḇe, ”Na yakara ro mankundaya.” Imbude skara simarisen sifrur snemuk ro mankunsi ma sna hak fa sifrur na. Simewer ḇesesya sfara ḇaido sidif si fa simnis snonkaku ḇesesya.a (Mam fasfas kasun ro sop.)

6. (a) Ḇaḇemkei rosai Yahwe ḇyuk ḇe ko na? (b) Ḇaḇemkei kosmai nane nasyadi ke?

⁶ Na komarisen fa kofawi kona Yahwe karkara Ḇyena, mboi kona kaker karkara ro mankunko. Suru Korintus 3:17 doḇe, ”Romoḇsai [Yahwe] Rur ḇyedi isya roya moḇ ani ḇaḇemkeya isya kako.” Yahwe ḇyuk ḇaḇemkei fa kokinfir, komarisen koḇe snonkaku ḇe rariso. Kona ḇaḇemkei ro mankunko ma kokinfir roi risai komarisen kaku na. Yahwe ifrur ko moḇryariri. Mboi ine kyurfasnai ḇa kona ḇaḇemkei ḇesyadadi. (Wasya Galatia 5:13.) Rofyor imbe kofawi roi ḇekaku ḇaido ḇesasar ya, Yahwe imarisen koḇuk Wos Ḇyena fa nfarkin ko. Roi nane nadwarek kaku ko ke, nun fainda ḇe ko?

7, 8. Komam roi nakam ro Yahwe mamam Ḇyedi ido na nadwarek kaku ko ke? Fasnai fawar oser.

⁷ Wos sarḇer ine na fyasnaiḇair na: Sinan sya sisewar fa sfarkor romawa sesya fa sna kenem ḇepyum. Na sfarkor si fa sankarkar ḇa, sfararur myaren, ma sfandun ḇesesya. Farkarkor nane nadwarek kaku si ḇa. Imbape, sinan sya sfasos romawa sesya fa sismai payamyum ro kenem sena. Rofyor siba muryas ma sibur rum sena ido, nari simkei fa skinfir ro mankunsi. Skinfir fa sikenem imnis nyan ḇepyum sinan sesya sfarkor kwar ḇe si na ido, sipok fa sun snemuk ḇepyum ma sḇinkwan ro samswen, ḇaḇeḇirḇar ma fafafko.

⁸ Raris sinan ḇefrur pyum, Yahwe imarisen kako romawa Ḇyesya sismai payamyum ḇeba ro kenem sena. (Yesaya 48:17, 18) Inja Yahwe fyarkor ko wos farkankin ḇefarkin kenem koḇena ma moḇsa kofrur pyum ḇesesya raya. Dor ko fa komam roi nakam raris moḇ myam na raya ma kokenem imnis marisen Ḇyena. Naine nadwarek kaku ko ḇa. Imbape, nane nafrur fa kofawinanem syadi ma nafnoḇek ko fa kofrur snemuk ḇepyum syadi wer. (Mazmur 92:5; Amsal 2:1-5; Yesaya 55:9) Na kona kaker ḇaḇemkei ro mankunko, mboi na kokinfir roi nari ḇefrur fa kosmai aski. (Mazmur 1:2, 3) Rofyor kona Yahwe karkara Ḇyena ido, nari kosmai fainda nabore!

YAHWE KARKARA ḆYENA NAKAKI SYADI

9, 10. Rosai ḇefasnai kaku Yahwe karkara Ḇyena nakaki syadi ro dunya ine karkara ḇyena?

⁹ Roi oso ḇese ḇefnai fa komarisen kokara Yahwe karkara Ḇyena. Isoine Yahwe karkara Ḇyena nakaki syadi ro karkara ḇero dunya ine. Dunya ḇyuk ananun ḇekur rosaiso kenem ḇepyum ya, nyan kina sya sismai aski, ma moḇsa kona fararur ḇepyum raya, ma roi eḇesena. Mboi, ḇebor ro ananun sḇuk anna neoser kuker Yahwe karkara Ḇyena ḇa. Imnis raris, dunya idif ker snonkaku sya fa sisewar fandandun mankun sena ma smam farḇakḇuk famfnom ḇe roi ḇesasar ḇa. Fyorno ido, sanun ḇe imbeswa ḇesmai samswen ḇeba na ḇo soḇe nari sismai aski syadi fyor sḇesisye ḇaido sifrur farḇakḇuk sena fa namuk kada. Ananun nane neḇesebur rosai Refo fyarkor na. Mboi, ananun ro dunya ipyum syadi ro ananun ro Refo ya ke?

¹⁰ Yesus doḇe, ” Allah fawawi Ḇyena nfasna napnapes ro fararur ḇyena.” (Matius 11:19) Dunya ine ifrur roi ḇepyum nabor kwar ro teknologi na. Mboi ipok ḇa fa ifrur mnis samswen ḇebor ḇedwarek ko fa kona aski, raris mamamun, mamfarfir, ma roi ḇeḇarḇor na. Oso wer ido, dunya ine myam farḇakḇuk famfnom ḇe roi ḇesasar ḇa. Mboi snonkaku ḇebor sya sikofen kaku naiso ḇefrur fa kina sya senapnap, sismai dafduf ḇemarḇak, ma roi ḇeḇyeḇa ḇesena. Mboi Yahwe wos anun Ḇyena ido ryariso? Snonkaku Kristen ḇena Yahwe mamam Ḇyena sna kina ḇeaski, sna pararei, ma skain pyum kuker naek srar sesi ro supswan ine ḇesiper. (Yesaya 2:4; Farfyar 10:34, 35; 1 Korintus 6:9-11) Ine fyasnai kaku Yahwe karkara Ḇyena nakaki syadi ro dunya ine karkara ḇyena.

11. Mansei ḇefara Moses karkara ḇyena, ma barakas rosai ismai na?

¹¹ Yahwe manfamyan ḇesoasuser Ḇyesya ro fafisu naiwara sifawi Yahwe karkara Ḇyena nama nakaki syadi. Imnis raris, Moses ”ḇyeḇefarkor kuker fawawi ḇeḇor ro kawasa Masir” mboi ifawi fawawinanem ḇekaku ndramuma ro Yahwe I. (Farfyar 7:22; Mazmur 90:12) Inja dor ḇe Yahwe I, ”Wafnoḇek aya fa yafawi nyan Bena.” (Keluaran 33:13) Snar Moses imarisen Yahwe fyara karkara ḇyena, inja Yahwe ḇye i fa duf fararur ḇefandun kaku fa ifrur marisen Ḇyena. Ma isandik Moses i kuker dor i ḇe snon ḇena kakyar ḇeba kaku.​—Ibrani 11:24-27.

12. Rosai ḇeḇe knam ro Paulus snemuk ḇyena?

¹² Manwawan Paulus ima snonkaku ḇefawawi diri, fyarkor pyum, ma ifawi dawos ro wos Ibrani ma Yunani. (Farfyar 5:34; 21:37, 39; 22:2, 3) Mboi pyampum fawawi dunya ma snemuk dun anna neknam ro Wos Refo ya. (Wasya Farfyar 17:2; 1 Korintus 2:6, 7, 13.) Barakas ismai na iso, fararmyan ḇyena nun bon ḇepyum ma iwaf muraḇe barakas ḇekain fyoro ya.​—2 Timotius 4:8.

13. Mansei na ḇekinfir fa ḇefadwer karkara koḇena insama komam roi nakam raris moḇ Yahwe myam na raya?

¹³ Nasnai kaku, Allah karkara Ḇyena nakaki syadi ro karkara dunya ine. Koso Allah farkankin Ḇyena ido, nari kosmai kaku aski ma payamyum. Mboi Yahwe ipok idif ko fa koso karkara Ḇyena ḇa. ”Manfamyan mansei ḇeḇesyowi ma ḇefawi nananem” ma penatua sya kako na sfara karkara koḇena ḇa. (Matius 24:45; 2 Korintus 1:24) Ko oser-oser iso ḇekinfir fa kofadwer karkara mankun koḇena insama komam roi nakam raris moḇ Yahwe myam na raya. Moḇsa kofrur na rai?

KOMEWER DUNYA INE FYARA KARKARA KOḆENA

14, 15. (a) Rosai fandun fa kokarauser na insama kokara raris Yahwe karkara Ḇyena? (b) Rosai ḇefnai fa korir awer karkara dunya ine nsun ro swaruser koḇena? Fasnai fawar oser.

¹⁴ Roma 12:2 doḇe, ”Mkoso awer nyan famfnom ro supswan ine. Naek buk mankundaw fa Allah ifrur fa babo wer, insa beḇesadwer. Rarirya naek wafawi Allah marisen ḇyena isoine rosai ḇeḇye ma ḇefrur sneprei Allah ma ḇemnis.” Mnuk ine ikofenḇair ḇe ko ro fafisu kofarkor kakaku ya ḇaim, roi nabor nfara karkara koḇena. Naiso rari ḇeyado ro sinan koḇansi ma rosai ḇeḇejadi ro kenem koḇena. Mboi bisa kofadwer karkara koḇena fa namnis Allah karkara Ḇyena. Roi ḇeradine neknam ro rosai kokinfir fa kokara na. Kokarauser Yahwe karkara Ḇyena ido, nari kofasnai ḇe mankunko karkara Ḇyena nama nkaku ḇesya kwar. Rarirya, na komarisen komam roi nakam raris moḇ Yahwe myam na raya.

¹⁵ Mboi insama kofadwer karkara koḇena raris Yahwe karkara Ḇyena, fandun fa ’koso awer nyan famfnom supswan ine’. Ine kyurfasnai fandun fa komam, kowasya, ma korower awer rosairirya kam ḇemnis ḇa kuker Allah karkara Ḇyena. Insama kofawi ine fyandun kaku, koḇukikara na rya imnis ra roḇean. Snonkaku oso imarisen iprei syadi ido nari dan roḇean ḇepyum. Mboi, roi ifrur nakam na nefromo rofyor dan ker roḇean ḇepyum ḇa kwar na! Rarirya kako, sasewar koḇena fa kofarkor Yahwe karkara Ḇyena nari nefromo monda rofyor korir karkara dunya ine nsun ro swaruser koḇena.

16. Fandun fa komamwarek mankunko ro rosairirya?

¹⁶ Na bisa koḇinkwanbur kaku karkara dunya ine ke? Oroḇa, snar karkara dunya naisya ro ris koḇedi ma kopok kosasyarbur supswan ine ḇa. (1 Korintus 5:9, 10) Fyor koḇaryas kako, na korower snonkaku ḇekofen karkara ḇesasar ma kakyar ḇekaku ḇa sena. Mboi fafisu jadi fa koḇinkwanbur kaku na ḇa, kokarauser ker awer na ḇaido komarisen awer na. Raris Yesus i, fandun fa kopampum ḇeri karkara Setan imarisen fa kona na. Ma komamwarek mankunko kuker korir awer karkara dunya ine nsun ro swaruser koḇena.​—Wasya Amsal 4:23.

17. Rariso kofasnai komewer koser karkara koḇena kuker karkara dunya ine?

¹⁷ Imnis raris, fandun fa kosasor ko rofyor kokinfir bati koḇesya. Refo ḇyuk swarapepen, koḇebati fanam kuker snonkaku ḇesyom Yahwe I ḇa sya ido, nari kokara imnis moḇ skara raya. (Amsal 13:20; 1 Korintus 15:12, 32, 33) Fandun kako fa kosasor ko rofyor kokinfir hiburan na. Kopampum hiburan ḇefasnai farkarkor evolusi, rarmomen, ḇaido kenem ḇeḇyeḇa na. Kofrur na ido, kofasnai komewer koser karkara koḇena kuker roi ”ssḇuki isampum napnapes ro Allah”.​—2 Korintus 10:5.

18, 19. (a) Rosai ḇefnai fandun fa kosasor ko faro karkara dunya ḇesnaibos ḇeri ḇa? (b) Fakfuken risai fandun fa kofuken ro mankunko, ma rosai ḇefnai ya?

¹⁸ Fandun fa komambir ma kopampum karkara dunya ḇesnaibos ḇeri ḇa. Imnis raris, abar ono rya nesonem fararur polotik na. Ma anun ono nfasnaiḇair aw sena ma rosai sifrur kwar fa dunya ine myanen na. Felem ma syap ḇeḇeso sfasnai sfaḇri mankunsi ma kina sesi, ma sifrur na fa rya nasrow, napyum, ma nkaku. Imbape, karkara ḇeradine neknam ro Refo ya ḇa. Refo doḇe fandun fa koswar syadi Yahwe ro mankunko ma kina koḇesya. Kofrur na ido, nari kosmai kaku aski ya. (Matius 22:36-39) Oso wer ido, farfyar faro romawa ro felem karton ma hiburan ḇebor komam na rya napyum, mboi fawawas nafnai fa romawa sya simarisen faro kenem ḇeḇyeḇa na.

¹⁹ Ine kyurfasnai ḇa komam hiburan nama nsasar. Mboi fandun fa kofuken mankunko, ’Sfasnaibos ḇeri ḇa mboi yamambir karkara dunya ḇero roi ine dori ke? Yamamwarek romawa yesi ma mankundaya ro roi ono nkomam ro televisi ma roi nkowasya na ke? Yafnoḇek romawa yesi fa sakna Yahwe karkara Ḇyena insama karkara dunya srower ma smam na nawyae awer si ke?’ Komambir Allah karkara Ḇyena neḇese ro dunya ine ido, na kopok ’koso nyan famfnom ro supswan ine’ ḇa.

MANSEI ḆEFARA KARKARA BENA RO FAFISU INE?

20. Rosai na ḇefasnaiḇair mansei ḇefara karkara koḇena?

²⁰ Fandun fa koswarepen anun kosmai na ndramuma ro knam risuru. Oser ya iso Yahwe I, ma ḇese wer iso Setan ma dunya ḇyedi. Mansei ḇefara karkara Bena? Kankarem Bena ryama ro manseiso wamarisen rwower anun ḇyena. Kosmai karkara dunya ido, nari dunya ine fyara karkara koḇena ma nari kokara ma kofaḇri mankunko monda. Inja, fandun kaku fa kokinfir pyum rosai komam, kowasya, korower, ma kokara na.

21. Rosai nari kawos ro farkarkor ḇerama ya?

²¹ Ro farkarkor ine, kofawi kwar nyan fa kona Yahwe karkara Ḇyena, fandun fa koḇinkwanbur karkara dunya ine. Kokarauser Allah karkara Ḇyena insama kona karkara raris moḇ kyara raya. Ro farkarkor ḇerama ya, nari kofarkor moḇsa kofrur roi ine rai.