Koḇesyowi Yahwe I ḇe Manḇefrur Uren Saprop Koḇedi

1. Rosai ḇefnai fa Yahwe iso Manḇefrur Uren Saprop ḇeba kaku ya?

RO November 2010, rosaser saprop ḇerik Cina ḇekwar oso ḇyeḇeḇoḇ kuker ḇaḇyak ri 900 miliar rupiah ro Inggris. Na komanen kaku snar kofawi manḇefrur uren saprop oso bisa fa pyankayum saprop ḇerik ḇeroyoḇa ḇe rosaser ḇepyum kaku ma ḇaḇyak ya dek kaku. Yahwe, Manḇefrur Uren Saprop koḇedi, Ibasyadi buro manḇefrur uren saprop snonkaku syakam. Refoya ikofen, snar Yahwe ifrur snonkaku ḇemnis kaku ”ro saprop” ya. (Kej. 2:7) Snonkaku ani iso, Adam, sap i ḇe ’romawa ro Allah’ ma syambraḇ fa fyarari Allah rari ḇyena.​—Luk. 3:38.

2, 3. Rariso na kofarari snonkaku Israel ḇembror sya?

² Rofyor Adam ḇyembroḇ faro Manḇedaw ḇyedi, ḇyeromawa Allah werḇa. Ḇape ḇebor ro kpu ḇyesi sisoasuser pdef ma sskinfir Yahwe I ḇe Manḇepoik seja. (Ibr. 12:1) Kuker sneḇerun sisouser ḇe I. Rarirya, spampum Setan i ma simarisen skinfir Yahwe I ḇe Kma ma Manḇefrur Uren Saprop seja. (Yoh. 8:44) Ine nafrur fa kowasen mura ḇe snonkaku Israel ḇembror sya ḇekofen, ”Sye, Yahwe, au kada Kma nkoḇedi. Nkoine iso saprop ḇerik, ma auso Manḇefrur Uren Saprop nkoḇedi; ma nkokame ḇraur ḇramin bena.”​—Yes. 64:8.

³ Ro kirine, Yahwe manfamyan ḇyesi kako sisewar fa sfasna sneḇerun ma sisouser pdef. Sḇaḇir, sap Yahwe I ḇe Kma ima fakamaman ḇeba kaku. Sikako simarisen seḇepankayum ro Manḇefrur Uren Saprop ya. Komarisen ḇe saprop ḇerik ḇesbunek na Allah pyankayum koḇe roi ḇeḇemaeja kaku ke? Na komam naek srar koḇesi ḇe snonkaku Allah pyankayum kaker si ke? Insama kona mamam ḇemnis, nari kowawos nyan rariso Yahwe kyinfir snonkaku nari pyankayum sya, rosai ḇefnai fa ma rariso pyankayum si rai.

YAHWE KYINFIR SNONKAKU PYANKAYUM SYA

4. Rariso Yahwe kyinfir snonkaku iyer ḇe I sya? Buk contoh.

⁴ Nyan Yahwe myam snonkaku sya imnis kuker koḇa. Myamḇir kaku ko. (Wasya 1 Samuel 16:7b.) Yahwe fyasnana rofyor ḇyawes sidang Kristen ya. Iyer snonkaku ḇebor smamkyof sya fa sfanam kuker I ma Yesus i. (Yoh. 6:44) Contoh ya iso Saul, snonkaku Farisi sfawi ḇe ’manḇeanonef ma ḇewayam ma ḇekoryaye’. (1 Tim. 1:13) Yahwe myamkukeḇ sne ḇyedi ma myam iḇe saprop ḇepakrek ḇa. (Ams. 17:3) Kyara ḇo Saul bisa fa pyankayum iḇe ’dera ḇeḇekimfir’ fa nari ḇyeḇaryas ”faro er ḇeso kako ma faro wairek-wairek ma kawasa Israel”. (Kis. 9:15) Yahwe I kako kyinfir snonkaku na pyankayum si ”faro fandun ḇepyum” ya. Siso randak ya ḇemarsarser, snonkaku ḇena kenem ḇeḇyeḇa ma ḇekarawraw. (Rm. 9:21; 1 Kor. 6:9-11) Snar sifarkor pdef Refoya, kakyar sena nasambraḇ syadi ma simarisen Yahwe pyankayum si.

5, 6. Snar kokyar kaku Yahwe iso Manḇefrur Uren Saprop koḇedi, rariso na komam (a) snonkaku ḇero moḇ koḇaryas sya rai? (b) naek srar koḇesi rai?

⁵ Kokyar kaku Yahwe na kyinfir ma iyer snonkaku ḇesrow kaku. Iso ḇefnai fa koḇemankara awer snonkaku ḇero moḇ koḇaryas ya ḇaido ro sidang koḇedi. Imnis raris, komam rosai Michael ifrurya rofyor Saksi Yahwe srama ḇe i. Ikofen, ”Yaken kedwa ya ḇeri ma yaḇaḇir sisyaḇa. Yafrur pyum siḇaḇeri! Ḇarpur ya, yasrow kina oser yamanem si snar kenem ḇepyum sena. Ras oso, yakandor kaku. Siso Saksi Yahwe sirya! Yemir yakara rosai ḇefnai fa yamarisen faro Saksi Yahwe syaḇa. Yaḇaḇir ḇeri snar kaku ya yafawi siḇaḇeri ma yarower monda rosai snonkaku sya sikofenna.” Michael imarisen ifawi naborwer ma fyarkor Refo. Ḇarpur mura, ḇyebaptis ma ḇyemanfamyan ro oras nakam ḇe Yahwe I.

⁶ Kosyowi Yahwe I ḇe Manḇefrur Uren Saprop koḇedi ido, na kona kakara ḇepyum ḇe naek srar sya. Yahwe myam fandun fa pyankayum kaker si. Fandun fa komam si rarirya kako. Allah myam kaku si ma fyawi kirine sḇe snonkaku ḇemnisḇa kaker. I kako ifawi inari sḇe snonkaku ḇerariso. (Mz. 130:3) Na kofarari Yahwe rofyor kona kakara ḇemnis faro naek srar koḇesi. Ibasyadiwer na kofararur kayam kuker Manḇefrur Uren Saprop ya fa kofnoḇek naek srar sya fa sifrur fararwe. (1 Tes. 5:14, 15) Penatua ro sidang sya fandun fa sḇuk farari ḇepyum ro roi nane.​—Ef. 4:8, 11-13.

ROSAI ḆEWAR FA YAHWE PYANKAYUM KO?

7. Rosai ḇefnai fa ḇesyowi disiplin ḇerama ro Yahwe I?

⁷ Ono sisya sikofen, ’Yaḇe syowi kaku disiplin yasmai ro sinan ayesi isof ro yemir yana romawa.’ Rofyor umurna nakaki, na kokako koḇesyowi disipilin snaro komam ine fyasnaḇair saswar ya. (Wasya Ibrani 12:5, 6, 11.) Imbo, Yahwe iswar koḇe romawa ḇyesi. Inja, kuker kaḇaḇaḇ pyankayum ko kuker ḇyuk disiplin ḇeko. Imarisen insama kofawi nanem, koḇeaski, ma koswar I ḇe Kma koḇedi. (Ams. 23:15) Imewer fa kosma kandera ma komar ḇe snonkaku ḇemḇror ḇa.​—Ef. 2:2, 3.

8, 9. (a) Rariso Yahwe fyarkor ko ro fafisu ine rai? (b) Rariso nari Yahwe fyarkor ko ro dunya babo ya?

⁸ Rofyor komambir Yahwe ḇaim, imbude na kona rari ḇeḇyeḇa nabore. Ḇape, Yahwe pyankayum ko ma ifnoḇek ko fa kofrur fararwe. Bon ya, kirine kona rari-rari ḇepyum kaku. (Yes. 11:6-8; Kol. 3:9, 10) Iso ḇefnai fa koro firdaus rurya. Ine iso moḇ Yahwe ifrur ro fafisu koḇedine fa pyankayum ko. Kokenem ro ris snonkaku ḇefrur roi ḇeḇarḇor rariryano, kosma fadadiren ma ḇaḇeaski. Snonkaku sfaduru si kuker saswar yaḇa nari sḇaḇir saswar ḇekaku ya ro naek srar sya ro firdaus rurya. (Yoh. 13:35) Ma, kofarkor kwar fa kofasna saswar ḇe snonkaku ḇese sya. Ḇefandun kaku ya, komambir Yahwe I ma kirine koḇaḇir saswar ḇyeja ḇe Kma koḇedi.​—Yak. 4:8.

⁹ Ro dunya babo, nari kosma fainda nabor syadi wer ro firdaus rurya. Kokako nari kokenem kuker payamyum ro firdaus supswan ro baḇ Karajan Allah. Ro fafisu ani, nari Yahwe pyankayum ma fyarkor ko pdef kuker nyan kokara ḇaimna. (Yes. 11:9) Yahwe I kako nari ifrur swaruser ma baken koḇena fa namnis kaku. Inja, nari napyan syadi ḇeko fa kofawi ma kosouser parenta ḇyena. Rarirya, komarisen insama Yahwe pyankayum ko pdef. Ma, mkorama kofasna faro Yahwe I snar koḇesyowi kaku saswar ḇyeja.​—Ams. 3:11, 12.

NYAN RARISO YAHWE PYANKAYUMKO RAI

10. Rariso Yesus ḇyekaḇaḇaḇ ma ḇyekir raris Manḇefrur Uren Saprop ya?

¹⁰ Manḇefrur uren saprop ḇekir syadi na ifawi pyum saprop ḇerik ifrur ya. Rarirya kako, Yahwe, Manḇefrur Uren Saprop koḇedi myamḇir kaku ko. Ifawi pyum ḇaḇeraryarḇa, samambraḇ, ma ḇaḇerur koḇena. Ma, pyankayumko oser-oser imnis kuker fafisu koḇena. (Wasya Mazmur 103:10-14.) Na kofawi rariso Yahwe myam ko rai kuker komam epen moḇsa Yesus ifrur pyum manwawan ḇyesi rofyor sifrur sasar. Manwawan sya sfamfabriker kuker manseiso ḇebasyadi rofandu si. Ausya ro dia ido, na rariso mamsi rai? Imbude na ḇaḇir sima simnis raris saprop ḇerik ḇesḇunekḇa. Ḇape faro Yesus i, bisa fa pyankayum si. Inja, ḇyuk ananun kuker mayaryaren ma kaḇaḇaḇ ḇesi. Na seḇefadwer rofyor simnaf Yesus ma sfasna sne ḇerun raris Yesus i. (Mrk. 9:33-37; 10:37, 41-45; Luk. 22:24-27) Rofyor Yesus ḇyeḇeḇawes ramnai, manwawan sya sisma rur ḇesren ma skara werḇa manseiso ḇeba syadi ro fandu si. Smam monda faro fararur Yesus ḇyukna.​—Kis. 5:42.

11. (a) Rariso Daud fyasna ima saprop ḇerik ḇesbunek ya? (b) Rariso na kofarari Daud i?

¹¹ Kirine, Yahwe pyankayumko kuker Refo, rur ḇesren, ma sidang ya. Rariso na Refo pyankayumko rai? Fandun fa kowasyana, kowasen, ma kor farfnoḇek ro Yahwe I insama kosouser rosai kofarkor kwar na. Raja Daud fyas, ”Rofyor yaswarepen au ro moḇ anenef ayedi, ro kawanwan warwaren roḇ ya yawasen au.” (Mz. 63:6) I kako fyas, ”Nari yasandik Yahwe, ḇebuk ananun ḇe aya kwar. Kaku ḇeri, fafisu roḇ ya ginjal ayedi fyarkor aya.” (Mz. 16:7) Daud iwasen ananun ro Yahwe I ma imarisen pyankayum ’ginjal ḇyedi’, isoine swaruser ma sneḇaḇir ḇyedi, rariryano ananun ine syamswen faro i. (2 Sam. 12:1-13) Daud isouser ma nya sne ḇerun inja ḇyuk farari ḇepyum ḇeko. Inja wafuken ro mankundaw, ’Rofyor yawasya Refoya, na yawasen ma yarir ananun Allah ḇyena ro swaruser ma sneḇaḇir ayedi ke? Na yafrurna ker ke?’​—Mz. 1:2, 3.

12, 13. Rariso Yahwe ḇyuk rur ḇesren ma sidang ya fa nafnoḇek ko rai?

¹² Rur ḇesren na pyankayum ko kuker nyan ḇeḇeso. Imnis raris, na ifnoḇek ko fa kofarari rari Yesus ḇyena ma kofasna ḇar-ḇar ro bon rurya. (Gal. 5:22, 23) Oser ya iso saswar. Koswar Allah ma komarisen kosouser I ma komarisen pyankayum ko snaro kofawi parenta ḇyena nefainda. Rur ḇesren ya kako na syambraḇser ko fa kopampum dunya ḇeḇarḇor ine ḇepankayum ko. (Ef. 2:2) Rofyor manwawan Paulus byabo kaker, manfarkin agama Yahudi ḇeararer sya sawyaye i. Ḇape rur ḇesren ifnoḇek i fa fyadwer kenem ḇyedi. Ḇarpurya, fyas, ”Ro roi ḇeḇor nakam yaḇarna snar Kristus ḇeḇuk samambraḇ maḇe aya.” (Flp. 4:13) Kokako fandun fa kor rur ḇesren ro Yahwe I snaro kokyar nari kyarem nadi koḇena kor kuker sne ḇesiper na.​—Mz. 10:17.

¹³ Yahwe I kako ḇyuk sidang ma penatua sya fa spankayum ko oser-oser. Imnis raris, rofyor penatua sya sifawi kona ḇaḇeraryarḇa oso ido, na sḇensewar fa sifnoḇek ko. Pok fa sḇuk ananun ḇeknam ro kakara sena monda ḇa. (Gal. 6:1) Ḇape, kuker sne ḇerun sḇenadi sor fawawi nanem ma fawawi. Ramnai, sḇuk Refo ma publikasi fa sisewar informasi ḇesrow kuker fandandun koḇena. Inja, rofyor penatua srama ḇe au ma kuker mayaryaren ma saswar sḇuk ananun ḇe au, imbude kuker nyan wasansun au rai, waswarepen kaku ananun sena nfasnaḇair snar Allah iswar au. Wasouser ananun nane ido, wamnis saprop ḇerik ḇesḇunek Yahwe pyankayumna.

14. Bisa fa Yahwe pyankayum ko imnis marisen Ḇyedi, ḇape ifrur rariryaḇa. Rosai ḇefnai ya?

¹⁴ Kofawi nyan rariso Yahwe pyankayum ko ido, na kona fesepen ḇepyum kuker naek srar koḇesi. Na kona swaruser ḇepyum faro snonkaku ḇero moḇ koḇaryas na, ma ḇefarkor Refo kuker ko sya kako. Rofyor pyankayum saprop ḇerik ya ḇaim, manḇefrur oso fandun fa ifrur sren saprop ḇerik ya ro karui ma roi ḇesena. Manḇefrur Uren Saprop, Yahwe I, idif snonkaku syaḇa fa sifrur fararwe. Ifnoḇek si kuker ikofenḇadir sasoser Ḇyena ḇesi. Ramnai, fandun fa sun snemuk ro mankunsi snar simarisen sifrur fararwe ro mankunsi ke roḇa.

15, 16. Rariso ḇefarkor Refo sya sifasna snar simarisen Yahwe pyankayum si rai? Buk contoh.

¹⁵ Komam farfyar ro Tessie ro Australia rofyor ḇyesaksi ḇaime. Syamswen ḇe i ḇa fa fyawi rosai Refo fyarkorna. Ḇape, fasawḇa fa isur ro ḇaḇerur ya ma iso fananjur yaḇa. Inḇesrar ḇebuk farkarkor ḇe i ḇyenadi ma dun snemuk fa imnai ḇyuk farkarkor Refo ḇe i. Ḇape kyara ḇaḇeri, ro farkarkor Refo ḇeuser ya, Tessie ikofenḇair rosai ḇefnai fa isur ro ḇaḇerurya ḇa. Ḇyaḇir ifrowes mankundi snar ifnak judi kaker. Ḇape, dun snemuk kwar fa imnai ifnak judi.

¹⁶ Ramnai, skoryaye i, ḇape Tessie iso ro fananjur ya ma fyadwer rari ḇeḇyeḇa ḇyena. Ḇarpurya, Tessie ḇyebaptis. Ma nya romawa ḇebaḇa kaker rariryano, ḇyeperintis. Inja, rofyor ḇefarkor Refo sya sifrur fararwe fa sifrur Allah imarisen, nari Yahwe fyanam ḇesi ma pyankayum si ḇe roi ḇemaeja kaku.

17. (a) Rosai wamarisen ro Manḇefrur Uren Saprop Bedi, Yahwe I? (b) Rosai na kowawos ro artikel ḇeuser ya?

¹⁷ Manḇefrur ḇeḇeso ro babo ine spankayum kaker saprop kuker bramin sena monda fa sifrur roi ḇepyum kaku. Yahwe ḇyekaḇaḇaḇ fa pyankayum ko kuker ananun Ḇyena, ma myampyum kaku rariso kosouserna rai. (Wasya Mazmur 32:8.) Bisa fa ḇaḇir snar Yahwe fyandun kaku Au ke? Na ḇaḇir snar Yahwe kuker kaḇaḇaḇ pyankayum Au ke? Rarirya ido, rari risai wafandunna fa ḇesaprop ḇerik ḇesḇunek insama napyan fa ḇeḇepankayum pdef? Kenem ḇerariso fandun fa wasawen na insama wamnisḇa kuker saprop ḇerik ḇepakrek? Ma, rariso sinan sya sfararur kayam kuker Yahwe I fa spankayum romawa sesya rai? Artikel ḇeuser ya kyarem fakfuken nane.