Seken Buk Blong Ol King
22 Josaea+ i gat eit yia taem hem i kam king, mo hem i rul 31 yia long Jerusalem.+ Mama blong hem, nem blong hem Jedida mo hem i gel blong Adaea we i blong Boskat.+ 2 Josaea i mekem samting we i stret long ae blong Jehova mo i wokbaot long ol rod we bubu blong hem Deved i bin folem,+ mo hem i no tanem i go long raet o long lef.
3 Long namba 18 yia blong rul blong King Josaea, king i sanem Safan we i sekretari blong hem mo we i boe blong Ajalia mo i smol bubu blong Mesulam, blong i go long haos blong Jehova,+ mo i talem long hem se: 4 “Yu go luk hae pris ya Hilkia,+ mo bambae hem i hivimap olgeta mane we oli tekem i kam long haos blong Jehova,+ hemia olgeta mane we ol man oli bin givim long ol pris we oli stap gad long doa.+ 5 Mo yu talem long olgeta blong oli givim mane ya, long ol man we oli bin putumap olgeta blong oli lukaot long ol wok we oli stap mekem long haos blong Jehova. Mo olgeta ya bambae oli givim mane ya long ol man we oli stap riperem ol ples we oli nogud* long haos blong Jehova,+ 6 hemia ol man we oli gat gudhan blong wokem ol samting, ol man blong bildim haos, mo olgeta we oli stap wokem haos long ston. Mo tu bambae oli yusum mane ya blong pem ol timba mo ol ston we ol man oli katemrere finis, blong riperem haos ya.+ 7 Mo taem oli givim mane long olgeta, oli no mas jekem se oli yusum mane ya olsem wanem, from we yumi trastem olgeta.”+
8 Biaen, hae pris ya Hilkia i talem long Safan we i sekretari+ se: “Mi mi faenem buk blong Loa+ long haos blong Jehova.” Ale hem i givim buk ya long Safan, mo Safan i stat blong ridim.+ 9 Biaen Safan we i sekretari, i go luk king mo i talem long hem se: “Ol man blong wok blong yu oli tekemaot evri mane we oli faenem long haos, mo oli givim long olgeta we oli bin putumap olgeta blong oli lukaot long ol wok long haos blong Jehova.”+ 10 Mo tu, Safan we i sekretari i talem se: “I gat wan buk+ we pris ya Hilkia i givim long mi.” Ale hem i stat blong ridim buk ya long fored blong king.
11 Nao taem king i harem ol tok we i stap long buk blong Loa, wantaem nomo hem i terem klos blong hem.+ 12 Biaen king i givim oda long pris ya Hilkia, wetem Ahikam+ we i boe blong Safan, Akboro we i boe blong Mikaea, Safan we i sekretari, mo Asaea we i man blong wok blong king, i se: 13 “Yufala i go long bihaf blong mi, long bihaf blong ol man, mo long bihaf blong olgeta man Juda, mo yufala i go faenemaot tingting blong Jehova long saed blong ol tok we oli stap long buk ya we oli faenem. Jehova i kros we i kros long yumi,+ from we ol olfala blong yumi oli no obei long ol tok blong buk ya, oli no folem olgeta samting we oli raetemdaon blong yumi.”
14 Nao pris ya Hilkia, wetem Ahikam, Akboro, Safan, mo Asaea oli go luk woman profet ya Hulda.+ Woman ya i waef blong Salum we i boe blong Tikvaha mo i smol bubu blong Hahas, we i stap lukaot long ples blong putum ol klos. Woman ya i stap long Seken Distrik Blong Jerusalem, mo olgeta oli toktok long hem long ples ya nao.+ 15 Nao woman ya i talem long olgeta se: “Hemia samting we Jehova we i God blong Isrel i talem: ‘Yufala i talem long man ya we i sanem yufala i kam luk mi, se: 16 “Hemia samting we Jehova i talem: ‘Bambae mi mekem bigfala trabol i kasem ples ya wetem ol man we oli stap long ples ya, nao olgeta tok blong buk ya we king blong Juda i bin ridim bambae oli kamtru.+ 17 Hemia from we olgeta oli lego mi mo oli stap mekem sakrefaes we i smok i go long ol narafala god.+ Oli stap wokem ol samting we i blong mekem mi mi kros,+ mo from ol samting ya, kros blong mi bambae i bonem ples ya mo bambae i gohed nomo blong laet.’”+ 18 Be king blong Juda we i sanem yufala i kam blong faenemaot tingting blong Jehova, hemia samting we yufala i mas talem long hem: “Hemia samting we Jehova we i God blong Isrel i talem: ‘Long saed blong toktok ya we yu harem, 19 hat blong yu i harem nogud* mo yu mekem tingting blong yu i godaon+ long fored blong Jehova, taem yu harem ol tok ya we mi bin talemaot agensem ples ya mo ol man blong hem, se bambae trabol i kasem olgeta mo oli kam olsem wan samting we man i fraet long hem. Ale yu terem klos blong yu,+ mo yu krae long fored blong mi, taswe mi tu mi harem yu, hemia nao tok blong Jehova. 20 Taswe bambae yu go spel wetem ol olfala blong yu,* mo bambae yu go long gref blong yu long pis, mo bambae yu no luk eni long ol trabol ya we bambae mi mekem long ples ya.’”’” Ale oli go talemaot ol tok ya long king.