Eksodas
15 Long taem ya, Moses wetem ol laen blong Isrel oli singsing long Jehova se:+
“I gud mi singsing long Jehova, from we hem i winim faet mo i leftemap nem blong hem i go antap.+
Hos mo man we i ron long hos, hem i sakem tufala i go long solwota.+
2 Jah* hem i paoa blong mi, from we hem nao i stap sevem mi.+
Hem i God blong mi, mo bambae mi presem hem.+ Hem i God blong papa blong mi,+ mo bambae mi leftemap nem blong hem.+
3 Jehova i wan strong man blong faet.+ Jehova i nem blong hem.+
4 Hem i sakem ol jariot blong Fero wetem ol ami blong hem i go long solwota,+
Mo ol beswan strong man blong faet blong Fero oli draon long Red Si.+
5 Bigfala solwota i kam draonem olgeta, nao oli draon olsem ston.+
6 O Jehova, raethan blong yu i gat bigfala paoa.+
O Jehova, raethan blong yu i save brebrekem wan enemi.
7 Long bigfala paoa blong yu, yu daonem olgeta we oli girap agensem yu.+
Yu sanem kros blong yu we i olsem faea, nao i bonem olgeta olsem gras we i drae.
8 Taem win i kamaot long nus blong yu, solwota i kam wanples.
Solwota ya i stanap stret olsem wan stonwol.
Long medel blong solwota, ol wef oli kam strong.
9 Ol enemi oli talem se: ‘!Bambae mi ronem olgeta! !Bambae mi kasem olgeta!
!Bambae mi seraotem olting blong olgeta we mi tekemaot olsem we mi* wantem!
!Bambae mi yusum naef blong faet blong mi! !Han blong mi bambae i winim olgeta!’+
10 Yu yu blo long win blong yu, nao solwota i kavremap olgeta.+
Oli draon olsem wan led long medel blong ol bigfala wota.
11 O Jehova, i no gat wan narafala god we i olsem yu.+
I no gat wan man i olsem yu. Yu yu tabu we yu tabu.+
Yu stap mekem ol bigbigfala wok, mo ol man oli mas ona mo presem yu long singsing blong olgeta.+
12 Yu stretem raethan blong yu, nao graon i solemdaon olgeta.+
13 Oltaem yu yu lavem ol man ya we yu pemaot olgeta, taswe yu lidim olgeta.+
Long paoa blong yu, bambae yu lidim olgeta i go long holi ples blong yu we yu stap long hem.
14 Ol man oli mas harem,+ mo bambae oli fraet, oli seksek.
Ol man Filistia bambae oli harem nogud tumas.
15 Long taem ya, ol jif* blong Edom bambae oli fraet we oli fraet,
Mo ol strong rula blong Moab, bambae oli fraet mo oli seksek.+
Mo tingting blong ol man Kenan bambae i foldaon.+
16 Bambae oli fraet tumas.+
O Jehova, bigfala paoa blong yu bambae i mekem olgeta oli kam olsem ston, oli no save mekem wan samting
Gogo olgeta man blong yu oli pas long eria blong olgeta,
17 Bambae yu tekem olgeta i kam mo yu planem olgeta long bigfala hil blong yu,+
O Jehova, hemia ples we yu bin rerem blong yu stap long hem,
O Jehova, wan tabu ples we han blong yu i bin stanemap.
18 Jehova bambae i rul olsem king gogo i no save finis.+
19 Taem ol hos blong Fero wetem ol jariot blong hem, mo ol soldia blong hem we oli ron long hos oli go long solwota,+
Jehova i mekem solwota i kambak i kavremap olgeta.+
Be ol man Isrel oli wokbaot long drae graon nomo, oli gokros long medel blong solwota.”+
20 Nao Meriam we i sista blong Eron mo we i wan woman profet, i tekem wan tamborin. Nao evri woman oli tekem ol tamborin blong olgeta, oli folem hem, oli stap plei mo oli danis. 21 Nao Meriam i stap sing afta long ol man, hem i singsing se:
“Yumi singsing long Jehova, from we hem i winim faet mo i leftemap nem blong hem i go antap.+
Hos mo man we i ron long hos, hem i sakem tufala i go long solwota.”+
22 Biaen Moses i lidim ol man Isrel oli aot long Red Si, mo oli go long draeples blong Suru. Oli wokbaot tri dei long draeples, be oli no faenem wota. 23 Nao oli kamtru long Mara,*+ be oli no save dring wota we i stap long Mara from we wota ya i konkon. Taswe Moses i putum nem blong ples ya se Mara. 24 Ale ol man oli stat blong tok smosmol agens long Moses,+ oli talem se: “?Bambae mifala i dring wanem?” 25 Nao Moses i krae i go long Jehova,+ mo Jehova i lidim hem i go long wan smol tri. Ale Moses i tekem tri ya, i sakem i go long wota, nao wota ya i kam swit.
God i mekem samting we i hapen i kam olsem wan eksampol, blong ol man oli save jajmen blong God. Mo God i traem olgeta blong luk sipos oli obei long hem o nogat.+ 26 Hem i talem se: “Mi mi Jehova, mi God blong yufala, sipos yufala i lesin gud mo yufala i obei long voes blong mi, mo yufala i mekem ol samting we i stret long ae blong mi, mo yufala i folem ol komanmen blong mi, mo yufala i holemtaet olgeta rul blong mi,+ bambae mi mi no letem yufala i kasem eni sik we mi bin mekem long ol man Ijip,+ from we mi mi Jehova, mi stap mekem we yufala i no kasem sik.”+
27 Biaen oli kamtru long Elim. Long ples ya, i gat 12 springwota mo 70 pamtri. Nao oli mekem kamp blong olgeta klosap long ol wota ya.