Fas Samuel

23 Biaen sam man oli talem long Deved se: “Ol man Filistia oli stap faet agensem ol man long Kehila,+ mo oli stap stilim ol kakae long ples blong klinim wit.” 2 Ale Deved i askem long Jehova se:+ “?Bambae mi go kilim ol man Filistia ya oli ded, no nogat?” Nao Jehova i talem long Deved se: “Yu go kilim ol man Filistia oli ded mo yu sevem ol man long Kehila.” 3 Be ol man blong Deved oli talem long Deved se: “!Yu luk! Naoia we yumi stap long Juda,+ yumi fraet finis. !Be sipos yumi go long Kehila blong faet agensem ol man Filistia, bambae i mowas!”+ 4 Ale Deved i askem bakegen long Jehova,+ nao Jehova i ansa long hem se: “Yu girap mo yu godaon long Kehila, from we bambae mi mi putum ol man Filistia long han blong yu.”+ 5 Ale Deved wetem ol man blong hem oli go long Kehila, mo oli faet agensem ol man Filistia. Nao Deved i kilim plante long olgeta oli ded, mo hem i tekem ol animol blong olgeta, mo hem i sevem ol man long Kehila.+

6 Long taem we Abiata,+ boe blong Ahimelek, i ronwe i go folem Deved long Kehila, hem i tekem wan efod wetem hem. 7 Nao Sol i harem nius se Deved i kam long Kehila. Ale hem i talem se: “God i putum* hem long han blong mi,+ from we hem i fas long wan trap, hem i go insaed long wan bigfala taon we oli blokemgud ol get blong hem wetem timba.” 8 Nao Sol i singaot olgeta man blong oli godaon mo hivap raon long Kehila, blong faet wetem Deved mo ol man blong hem. 9 Taem Deved i harem se Sol i stap mekem plan blong kam faet agensem hem, hem i talem long pris ya Abiata se: “Yu tekem efod i kam.”+ 10 Nao Deved i talem se: “O Jehova, God blong ol man Isrel, mi mi man blong wok blong yu mo mi harem se Sol i plan blong kam long Kehila mo spolem bigfala taon ya from mi.+ 11 ?Bambae ol lida* blong Kehila oli putum mi long han blong hem? ?Bambae Sol i kamdaon olsem we man blong wok blong yu i harem? O Jehova, God blong ol man Isrel, plis yu letem mi mi save.” Nao Jehova i talem long hem se: “Bambae hem i kamdaon.” 12 Nao Deved i askem se: “?Bambae ol lida blong Kehila oli putum mi mo ol man blong mi long han blong Sol?” Mo Jehova i talem se: “Bambae oli putum yu long han blong hem.”

13 Wantaem nomo Deved wetem ol man blong hem we oli samwe long 600 man,+ oli girap mo oli aot long Kehila, mo oltaem oli muv i go long ol ples we oli naf blong go long hem. Taem Sol i harem nius se Deved i ronwe long Kehila, hem i no moa go from hem. 14 Deved i stap long rijen blong ol hil long draeples long Sif,+ long ol ples we i had blong man i go long hem. Mo oltaem Sol i stap lukaot hem,+ be Jehova i no letem Deved i go long han blong Sol. 15 Nao taem Deved i stap long draeples long Sif long Hores, hem i harem se* Sol i stap lukaot hem* blong kilim hem i ded.

16 Nao Jonatan we i boe blong Sol, i kam luk Deved long Hores, mo i leftemap tingting blong hem, i mekem hem i save se Jehova i stap wetem hem.+ 17 Hem i talem long Deved se: “Yu no fraet, papa blong mi bambae i no faenem yu. Yu bambae yu king blong Isrel,+ mo mi bambae mi seken long yu, mo papa blong mi i save samting ya.”+ 18 Nao tufala i mekem wan kontrak+ long fes blong Jehova, mo Deved i stap long Hores be Jonatan i gobak long ples blong hem.

19 Biaen ol man Sif oli go antap long Gibea+ blong luk Sol, mo oli talem long hem se: “Deved i stap haed klosap long mifala,+ long ol ples we i had blong man i go long hem. Hem i stap long Hores,+ long hil blong Hakila,+ we i stap long saot blong Jesimon.*+ 20 O king, taem yu* luk se i stret, yu kamdaon, nao bambae mifala i putum hem long han blong yu.”+ 21 Nao Sol i talem se: “Prea blong mi se Jehova bambae i blesem yufala, from we yufala i sore long mi. 22 Plis yufala i go traem faenemaot weples stret hem i stap long hem, mo hu i luk hem long ples ya, from we oli talem se hem i waes blong mekem trik. 23 Yufala i mas faenemaot evri ples we hem i stap haed long hem, mo yufala i mas kambak wetem ol pruf. Biaen bambae mi go wetem yufala. Sipos hem i stap long ples ya, bambae mi go long evri grup* blong ol man Juda blong lukaotem hem.”

24 Ale ol man ya oli aot fastaem long Sol, oli gobak long Sif.+ Long taem ya, Deved wetem ol man blong hem oli stap long draeples long Maon,+ long Araba+ we i stap long saot blong Jesimon. 25 Biaen Sol wetem ol man blong hem oli kam lukaot Deved.+ Taem Deved i harem samting ya, kwiktaem nomo hem i godaon long hil ya we i ston nomo,+ mo hem i stap long draeples long Maon. Taem Sol i harem samting ya, hem i biaenem hem i go long draeples long Maon. 26 Taem Sol i kam narasaed long bigfala hil ya, Deved mo ol man blong hem oli stap long narasaed blong hil ya. Ale Deved i hariap blong ronwe+ long Sol, be Sol mo ol man blong hem oli kam gogo klosap nomo oli holem Deved wetem ol man blong hem.+ 27 Be wan mesenja i kam talem long Sol se: “!Yu kam hariap, from we ol man Filistia oli kam long ples blong yumi, blong faet!” 28 Nao Sol i no moa ronem Deved,+ be i gobak blong faet wetem ol man Filistia. Hemia nao from wanem oli singaot ples ya se Bigfala Ston We i Seraotem Tufala.

29 Nao Deved i aot long ples ya, i go antap long Enkedi, mo i stap long ol ples we i had blong man i go long hem.+