Fas Samuel

27 Be Deved i stap tingting se: “Wan dei bambae Sol i kilim mi mi ded ya. I moa gud mi ronwe+ i go long ples blong ol man Filistia, olsem nao Sol bambae i no moa lukaot mi long olgeta teritori blong Isrel,+ nao bambae mi aot long han blong hem.” 2 Ale Deved wetem ol 600 man+ we oli stap wetem hem, oli girap mo oli go luk king blong Gat we nem blong hem Akis+ mo we i boe blong Maok. 3 Nao Deved wetem ol man blong hem oli stap wetem Akis long Gat. Ol man blong hem oli go wetem ol famle blong olgeta, mo Deved tu i go wetem tufala waef blong hem, Ahinoam+ we i blong Jisrehel, mo Abigel+ we i wido blong Nabal we i blong Kamel. 4 Taem Sol i harem nius se Deved i ronwe i go long Gat, hem i stop blong lukaot hem.+

5 Nao Deved i talem long Akis se: “Sipos yu glad long mi, i gud yu givim wan ples blong mi save stap long hem, long wan smol taon blong yu. Mi mi man blong wok blong yu, i no stret blong mi stap wetem yu long bigfala taon blong king.” 6 Ale long dei ya, Akis i givim taon ya Jiklag+ long Deved blong i go stap long hem. Hemia nao from wanem ol king blong Juda oli holem taon ya kam kasem tede.

7 Deved i stap long smol taon ya blong ol man Filistia gogo kasem wan yia fo manis.+ 8 Nao Deved wetem ol man blong hem oli stap go antap long ples blong ol man Gesuru,+ Girisi, mo Amalek,+ blong faet mo tekem ol samting blong olgeta. Olgeta ya oli stap long graon we i stat long Telam i go kasem Suru+ mo i godaon go kasem Ijip. 9 Taem Deved i go faet long ol ples ya, hem i kilim i ded evri man mo woman,+ be i tekem ol klos blong olgeta, ol sipsip, ol buluk, ol dongki, mo ol kamel, nao biaen hem i gobak long Akis. 10 Nao taem Akis i askem long hem se: “?Tede yufala i go faet wea?” Deved i ansa se: “Mifala i go mekem faet long saot* blong Juda,”+ no “long saot blong ples blong ol laen blong Jeramehel,”+ no “long saot blong ples blong ol man Kenaet.”+ 11 Deved i kilim i ded evri man mo woman, blong i no gat wan long olgeta i kam long Gat, from we hem i talem se: “I nogud oli ripotem yumi long olgeta se: ‘Hemia nao samting we Deved i mekem.’” Mo long olgeta taem we Deved i stap long smol taon ya blong ol man Filistia, hem i mekem samting ya nao. 12 Nao Akis i bilivim ol tok we Deved i talem, mo i stap tingting se: ‘Naoia ol man ples blong hem long Isrel oli luk hem olsem wan samting we i sting, taswe oltaem bambae hem i stap wok blong mi.’