Proveb
18 Man we i stap hem wan oltaem, i stap folem ol samting we hem nomo i wantem.
Hem i sakemaot* olgeta waestok we i wok gud.
2 Man we i stupid, hem i no glad blong lanem samting,
Be hem i wantem nomo blong talemaot tingting blong hem.+
3 Taem wan man nogud i kam, fasin blong no tinghae long narafala, hem tu i kam,
Mo sipos ol man oli stap mekem ol samting blong sem, bambae ol narafala tu oli no respektem olgeta.+
4 Ol toktok we i kamaot long maot blong wan man, i olsem ol dip wota.+
Wel blong waestok, i olsem springwota we i stap boel i kam antap.
5 I no stret we man i mekem i gud long rabis man nomo+
Mo i no stret blong blokem stret man blong i no kasem jastis.+
6 Ol tok blong wan man we i stupid i save pulum ol man blong oli rao,+
Mo maot blong hem i stap pulum ol man blong oli kam wipim hem.+
7 Maot blong wan stupid man i stap spolem hem bakegen,+
Mo lips blong hem i olsem trap blong karemaot laef* blong hem.
8 Ol tok blong man we i stap spolem nem blong narafala, i olsem wan pis kakae we i tesgud,*+
Taem man i solemdaon, hem i go stret insaed long stomak.+
9 Man we i les blong wok
Hem i brata blong man we i stap spolem evri samting.+
10 Nem blong Jehova i wan strong taoa.+
Ol stret man oli resis i go insaed long hem, nao oli kasem proteksen.*+
11 Ol sas samting blong rijman hem i taon blong hem we stonwol i raonem gud.
Long tingting blong hem, ol samting ya oli olsem wan wol we i protektem gud hem.+
12 Man we tingting blong hem i hae tumas, trabol bambae i spolem gud hem,+
Mo tingting we i stap daon i givim glori long man.+
13 Fasin ya we man i givim ansa long wan bisnes, bifo we hem i lesin blong faenem stret save,
Hem i krangke mo i fasin blong sem.+
14 Nating we wan man i sik, be tingting we hem i gat i save sapotem hem gogo sik blong hem i finis,+
Be man we tingting blong hem i foldaon, hem i no moa save mekem wan samting.+
15 Hat blong man we i kasemsave samting i stap tekem moa save,+
Mo man we i waes, sora blong hem i stap lesin blong faenem save.
16 Presen we man i givim, i openem rod long hem long plante samting.+
Hem i mekem se man ya i save go mitim ol haeman.
17 Oltaem man we i talemaot ol poen blong hem fastaem, ol man oli ting se hem i stret,+
Gogo kasem taem we man we i agensem hem i kam, i stap askem ol kwestin long hem.*+
18 Ol man oli stap yusum ol spesel ston blong stretem ol rao+
Mo sipos tu strong man i stap tok agensem tufala, oli yusum spesel ston blong faenemaot hu long tufala i rong.*
19 Sipos yu mekem i no stret long brata blong yu, bambae hem i kam strong we i strong i bitim wan strongfala taon,+
Mo i gat sam raorao we oli olsem get blong wan strongfala haos we oli lokem gud.+
20 Frut we i kamaot from tok we man i talem,* bambae i fulumap stomak blong hem.+
Bambae hem i harem gud long samting we i kamaot from tok blong hem.
21 Ded mo laef i stap long paoa blong tang.+
Olgeta we oli laekem blong yusum, bambae oli kakae frut blong hem.+
22 Man we i faenem wan gudfala waef, hem i faenem wan gudfala samting,+
23 Taem wan puaman i wantem askem wan samting long rijman, hem i toktok gud long hem,
Be rijman i stap tok strong long hem blong ansa long hem.