Fas Samuel
24 Taem Sol i finis faet wetem ol man Filistia, hem i kambak, nao ol man oli talem long hem se: “!Yu luk! Deved i stap long draeples long Enkedi.”+
2 Ale Sol i jusumaot 3,000 man long Isrel blong oli folem hem, mo oli go lukaot Deved wetem ol man blong hem long ples blong ol wael nani blong hil, long ol klif we i fulap long ol ston. 3 Nao Sol i kamtru long wan yad blong sipsip* we i stap long saed blong rod. I gat wan hol blong ston long ples ya, nao Sol i go insaed long hem blong gobus, be Deved wetem ol man blong hem oli stap haed long hol ya, insaed olgeta.+ 4 Nao ol man blong Deved oli talem long hem se: “Tede, Jehova i talem long yu se: ‘!Yu luk! Mi mi putum enemi blong yu long han blong yu,+ mo yu save mekem eni samting long hem, olsem we yu wantem.’” Ale Deved i girap, i go sloslo mo i katemaot en blong kot* blong Sol. 5 Be biaen, hat* blong Deved i stap stikim hem+ from we hem i katemaot en blong kot blong Sol. 6 Nao hem i talem long ol man blong hem se: “Long lukluk blong Jehova, i no stret nating blong mi mekem samting ya long masta blong mi, we Jehova i makemaot hem. Mo i no stret nating blong mi tajem hem, from we Jehova i makemaot hem.”+ 7 Ale ol tok ya blong Deved oli blokem ol man blong hem,* mo hem i no letem olgeta oli kilim Sol. Nao Sol i aot long hol blong ston ya mo i folem rod i go.
8 Nao Deved i girap, i kamaot long hol blong ston ya, mo i singaot i go long Sol se: “!Masta mo king blong mi!”+ Taem Sol i lukluk biaen, Deved i bodaon we fes blong hem i go kasem graon blong ona long hem. 9 Ale Deved i talem long Sol se: “?From wanem yu lesin long toktok blong ol man we oli talem se mi stap lukaot yu blong kilim yu?+ 10 Tede yu luk klia se long hol blong ston ya, Jehova i putum yu long han blong mi. Wan man i talem se mi mas kilim yu yu ded,+ be mi sore long yu mo mi talem se: ‘Bambae mi no tajem masta blong mi, from we Jehova i makemaot hem.’+ 11 Papa blong mi, yu luk, mi mi stap holem en blong kot blong yu. Mi katemaot en blong kot ya, be mi no kilim yu yu ded. Naoia yu save luk klia se mi mi no plan blong kilim yu no blong agensem yu, mo mi no mekem wan sin agens long yu,+ be yu yu stap lukaot mi blong tekemaot laef* blong mi.+ 12 I gud Jehova i jajem yumitu+ blong luk se hu i rong, mo i gud Jehova i panisim yu from ol samting we yu mekem long mi.+ Be mi bambae mi no tajem yu.+ 13 Wan olfala proveb i talem se: ‘Man nogud i mekem ol samting we oli nogud,’ be mi bambae mi no tajem yu. 14 ?King blong Isrel i stap lukaot hu? ?Yu yu stap ronem hu? ?Wan dog we i ded finis? ?Wan laos?+ 15 I gud Jehova i jaj blong yumitu, mo hem bambae i jajem yumitu. Bambae hem i lukluk trabol ya, mo i toktok long bihaf blong mi,+ i jajem mi, mo i tekemaot mi long han blong yu.”
16 Taem Deved i talem ol toktok ya finis, Sol i talem se: “?Pikinini blong mi Deved, hemia voes blong yu?”+ Nao Sol i krae bigwan. 17 Biaen hem i talem long Deved se: “Yu yu wan stret man i bitim mi, from we yu mekem i gud long mi, be mi mi mekem i nogud long yu.+ 18 Tede yu talemaot gudfala samting we yu mekem long mi. Taem Jehova i putum mi long han blong yu, be yu yu no kilim mi mi ded.+ 19 ?Hu man we i faenem enemi blong hem, be i letem hem i go we i no kilim hem? Jehova bambae i mekem i gud long yu+ from samting we yu mekem long mi tede. 20 !Yu luk! Mi save se yu bambae yu kam king,+ mo yu nao bambae yu mekem kingdom blong Isrel i stap strong longtaem. 21 Naoia yu mas mekem wan strong promes long mi long nem blong Jehova,+ se bambae yu no waepemaot olgeta we bambae oli kamaot biaen long mi.* Mo yu mas promes se bambae yu no tekemaot nem blong mi long famle blong papa blong mi.”+ 22 Ale Deved i mekem strong promes long Sol, nao biaen Sol i gobak long ples blong hem.+ Be Deved wetem ol man blong hem oli go antap long ples we oli stap haed long hem.+