Ol Sam
Singsing blong Deved.
35 O Jehova, yu difendem kes blong mi agensem ol man we oli agensem mi,+
Yu faet agensem olgeta we oli stap faet agensem mi.+
3 Yu leftemap spia mo akis blong faet* blong yu, yu go agensem ol man we oli stap ronem mi.+
Yu talem long mi* se: “Mi mi sevia blong yu.”+
4 I gud yu mekem olgeta we oli stap lukaot rod blong tekemaot laef* blong mi oli sem, mo yu daonem olgeta.+
I gud olgeta we oli stap mekem plan blong distroem mi, oli tanraon i gobak we oli sem gud.
5 I gud oli kam olsem skin blong wit we win i blu long hem,
I gud enjel blong Jehova i ronemaot olgeta.+
6 Taem enjel blong Jehova i stap ronem olgeta,
I gud rod blong olgeta i kam tudak mo i glis.
7 From we nating se mi no mekem wan rong, be oli girap oli haedem wan net blong mi fas long hem,
Mo nating se mi no mekem wan rong, be oli girap oli digim wan hol blong mi* foldaon long hem,
8 I gud trabol i kasem hem, we hem i sek nomo long hem,
I gud net we hem i haedem i kasembak hem,
I gud hem i foldaon insaed long hem mo i smas nogud.+
9 Be mi bambae mi* glad long Jehova,
Bambae mi glad from ol samting we hem i mekem blong sevem man.
10 Evri bun blong mi bambae oli talem se:
“O Jehova, ?hu i olsem yu?
Yu yu tekemaot man we i no gat man blong givhan long hem, long olgeta we oli strong moa long hem,+
Yu tekemaot man we i no gat man blong givhan long hem wetem puaman, long olgeta we oli stap stilim olting blong olgeta.”+
11 Ol witnes we tok blong olgeta i spolem man, oli kam,+
Oli stap askem sam samting we mi mi no save nating.
12 Oli mekem i nogud long mi, nating se mi mi mekem i gud long olgeta,+
Oli mekem mi* harem nogud tumas.
13 Be taem oli sik, mi mi werem klos we oli wokem long bag,
Mi* fasting blong mi harem nogud,
Mo taem prea blong mi i kambak we i no gat ansa,*
14 Mi stap wokbaot olbaot mi stap sore from olgeta olsem se oli fren, no oli brata blong mi,
Mi bendaon, mi harem nogud olsem wan man we i stap sore from mama blong hem.
15 Be taem mi stambol, oli glad tumas mo oli kam joen wanples,
Oli joen wanples, oli go haed rere blong kilim mi,
Oli terterem mi long ol smosmol pis, mo oli no stap kwaet nating.
16 Ol man we oli no stap obei long God, oli stap laf nogud long mi,*
Oli stap kakae tut blong olgeta from mi.+
17 O Jehova, ?bambae yu stap lukluk mi olsem gogo kasem wetaem?+
Yu tekemaot mi* long ol samting we oli stap mekem agensem mi,+
18 Nao bambae mi talem tangkiu long yu long bigfala kongregesen,+
Bambae mi presem yu long medel blong bigfala hip blong ol man.
19 Yu no letem olgeta we oli kam enemi blong mi blong nating nomo, oli glad from trabol we i kasem mi,
Yu no letem olgeta we oli no laekem mi blong nating nomo,+ oli mekem saen long ae blong olgeta blong spolem mi.+
20 From oli no talem ol tok we i blong mekem pis,
Be oli stap giaman, oli mekem plan agensem ol man blong pis we oli stap long graon ya.+
21 Oli openem maot blong olgeta bigwan blong tok nogud long mi,
Oli stap talem se: “!I gud ya! !I gud ya! Ae blong mifala i luk samting ya finis.”
22 O Jehova, yu yu luk samting ya finis. Yu no mas stap kwaet.+
O Jehova, yu no mas stap longwe long mi.+
23 God blong mi, Jehova, yu difendem kot kes blong mi,
Yu wekap mo yu stanap blong difendem mi.
24 O Jehova God blong mi, yu jajem mi folem stret fasin blong yu,+
Yu no letem olgeta oli glad from trabol we i kasem mi.
25 I gud oli neva taltalem long olgeta se: “!I gud ya! Yumi kasem finis samting we yumi wantem.”*
I gud oli neva talem se: “Yumi solemdaon hem finis.”+
26 I gud ol man oli mekem olgeta evriwan oli sem mo oli no ona long olgeta,
Hemia olgeta ya we oli glad from we mi kasem trabol.
Olgeta we oli stap leftemap olgeta se oli hae moa long mi, i gud sem mo fasin ya we man i daonem olgeta i kavremap olgeta olsem wan klos.
27 Be i gud olgeta we oli glad long stret fasin blong mi, oli singaot from oli glad,
I gud oli talem oltaem se:
“I gud yumi leftemap Jehova, we i glad tumas taem man blong wok blong hem i gat pis.”+