Taem Yu Satem Ae Blong Smoltaem Blong Yu Nomo
YU MEKEM samting ya bakegen. Yestede yu bin mekem 15,000 taem. Ating yu no save se yu stap mekem, be yu stap gohed blong mekem, mo from samting ya yu yu protektem tufala samting we oli impoten tumas long bodi blong yu. Taem yu mekem samting ya, maet yu stap soemaot long sam fasin olsem wanem bren blong yu i stap wok. ?Wanem samting ya? Yu satem ae blong yu blong smoltaem nomo.
Taem tufala ae blong yu i wokgud, oli nambawan samting long bodi blong givim save mo filing long yu. Plante man oli tokbaot ae olsem wan merikel, oli talem se ae i olsem wan kamera we i otomatik, i save lukluk kolosap no longwe, i mekem pija i klia hem wan, i stap tekem pija oltaem, i save lukluk olkaen kala, mo i save tekem pija we i stap muvmuf tu. Taem man i no stap yusum kamera blong hem, hem i kavremap glas blong kamera wetem wan led. Be ae blong yumi i mekem i moa gud.
Bighaf blong ae i stap insaed long hed we i gat samting blong protektem hem. Be smolhaf blong ae (10%) i stap afsaed, mo ol smok mo ol narafala doti long win i save kilim hem. Blong protektem ae long ol samting ya, bodi i gat wan nambawan “led”—hemia skin blong ae we i mekem se yumi save satem mo openem ae blong yumi. Skin ya i tin bitim ol narafala skin long bodi, i gat ol smosmol string long hem blong mekem hem i strong, mo hem i stap glis nomo i godaon blong kavremap ae blong yumi. Blong satem ae blong smoltaem olsem i tekem 10% long wan seken nomo, mo yumi mekem samting ya 15 taem long wan menet.
Be smosmol wok ya we yu no haremsave se yu stap mekem, hem i rili wan bigfala wok. Taem ae i sat mo i open bakegen, “led” no skin blong hem i pulum wan kaen wora i gokros long ae, olsem we i wasem ae blong klinim hem. Mo tu samting ya i mekem ae i saen. Taswe skin ya i no led blong ae nomo, be hem i klinim ae, mo i waepem ae blong mekem hem i saen tu. ?Yu ting se hem i nambawan samting?
Be longtaem finis ol sayentis oli ting se wan samting i narakaen: I tekem longtaem lelebet blong ae i kam drae, taswe blong wasem mo klinim ae, i naf we man i satem ae blong hem blong smoltaem long wan no tu taem long wan menet nomo. ?From wanem nao yumi mekem olsem plante taem long wan menet? I luk olsem se ansa long kwestin ya hem i long saed blong bren blong man.
Ol man we oli stadi long bisnes ya oli joenem fasin blong satem ae blong smoltaem nomo wetem fasin blong tingting. Eksampel, taem man i wari tumas hem i stap satem ae blong hem moa. Sipos yu stap traehad blong lanem blong kam paelot long plen, no sipos wan loea we i kros i stap askem kwestin long yu long kot, no sipos yu trabol tumas long tingting blong yu, ating yu stap satem ae blong yu plante taem. Sipos yu yu man blong ridim nyus long televisin, ating oli talem long yu blong no satem ae blong yu tumas, sipos no ol man we oli stap lukluk yu long televisin bambae oli ting se yu yu wari long ol nyus we yu stap talemaot.
Be sipos yu yu stap lukluk strong long wan samting nomo, olsem we yu stap droem wan laen long pepa, no yu stap draevem trak long taon, no yu stap ridim wan buk, yu no stap satem ae blong yu tumas. Ol paelot long plen oli mas tingbaot wok blong olgeta moa i bitim namba tu paelot, taswe ol faswan paelot oli no stap satem ae blong olgeta plante olsem namba tu paelot. Taem wan man i fraet, hem i no stap satem ae blong hem tumas, mo tu ae blong hem i mas muf kwiktaem i go i kam.
I gat wan narafala rod tu we bren mo ae tufala i wok tugeta. The Medical Post blong Kanada i talem se oli faenemaot se “maet yumi satem ae blong yumi blong smoltaem nomo taem yumi no moa stap lukluk wan samting be yumi stat blong tingting long wan samting.” Eksampel, wan man we i wantem holem sam save long tingting blong hem, ating bambae hem i satem ae blong hem blong smoltaem stret long taem we hem i ridim finis ol save we hem i wantem rimemba long hem. Mo taem man i stap mekem disisin, oli faenemaot se “bren i talem long ae blong sat blong smoltaem taem hem i gat inaf save blong mekem wan gudfala disisin.” Hemia toktok blong magasin ya Post, mo hem i gohed olsem: “Ol tes long saed ya oli soemaot se fasin blong satem ae blong smoltaem nomo i olsem wan kaen smol spel long tingting.”
Kolosap tri taosen yia finis wan waes man i raetemdaon tok blong God se: “Olgeta samting we yu yu mekem oli narafala mo oli nambawan tu.” (Ol Sam 139:14) Ol save we ol dokta tede oli faenemaot long saed blong bodi blong man oli pruvum poen ya moa. Tingbaot: !Wok blong wasem mo klinim wan nambawan glas, fasin blong soemaot olsem wanem bren i stap wok mo i wari tu, mo fasin blong mekem tingting i spel smol long ol save we hem i stap kasem tru long ae blong hem—ol samting ya nao oli hapen taem yumi satem ae blong yumi blong smoltaem nomo!
[Tok blong pija long pej 28]
Yumi save luk smolhaf (10%) blong ae nomo