Baebol i Talem Wanem . . .

Prea—?Yusum Sem Toktok Evritaem No Oli Mas Kamaot Long Hat?

WAN plen i stap flae olsem 12,500 mita antap. Daon i gat ol kolkol wora blong Pasifik i stap. Wantaem nomo, wan enjin blong plen ya i ded. Biaen, tri narafala enjin tu oli lusum paoa blong olgeta. !Long tu menet plen ya i foldaon 10 kilomita! Nao i stap 2,700 mita antap long skae, long taem ya hem i kasem paoa bakegen, mekem se i save flae i go kasem San Fransisko. Wan pasenja long plen ya i talem se: “Mi mi prea strong moa i bitim ol narafala taem long laef blong mi.”

Taem ol man oli kasem trabol, oli stap long denja, oli harem nogud tumas, plante man, mo olgeta we oli no gat skul tu, oli askem long Hae God blong givhan long olgeta. Mo tu, ol man we oli gat skul, oltaem oli stap talem bakegen ol prea blong olgeta long skul no long tempel no long haos. Samfala oli yusum ol bidbid blong mekem ol prea we oli kolem ‘Patanosta’ mo ‘Ave Maria.’ Samfala oli yusum ol prea long ol buk. Plante milyan man long Is oli tantanem ol wil we ol prea oli stap insaed long olgeta, hemia blong talem bakegen ol prea kwiktaem nomo.

Maet yu bin askem kwestin ya se: ‘?Olsem wanem blong prea? ?Yumi mas yusum ol sem toktok evritaem no oli mas kamaot stret long hat blong yumi?’

?Prea i Olsem Wanem?

Sipos papa blong yu we yu laekem hem tumas i stap long narafala kantri, nao hem i pulum yu blong telefon long hem oltaem taem we yu nomo yu wantem—yu no pem. ?Yu ting se bambae yu telefon long hem oltaem? ?Bambae yu yu glad blong holem mo mekem i kam strong moa lav ya we yu yu gat long papa blong yu? ?Bambae yu yu talem ol trabol blong yu long hem mo bambae yu talem tangkyu long hem from ol help we hem i bin givim long yu mo from taem we hem i bin spenem blong leftemap tingting blong yu long laef blong yu? ?Bambae yu yu tinghae mo holemtaet fasin fren ya we yu yu gat wetem hem, no?

Taem yu yu toktok wetem hem long telefon, maet yu talem sem samting plante taem bakegen, ?be yu ting se bambae yu ridimaot ol tok blong yu long wan buk no talem ol tok we yu lanem baehat? No gat. Taswe wan Kristin we hem i prea long God i no mas mekem olsem tu. Jisas Kraes i talem se yumi no mas mekem olsem long ol prea blong yumi.

?Jisas Kraes i Talem Wanem?

“Taem yufala i prea, i nogud yufala i stap talem plante tok olsem we ol hiten man oli stap mekem. Ol hiten man ya oli ting se ol god blong olgeta bambae oli harem olgeta from we oli talem plante toktok.”a (Matyu 6:7) Sam narafala Baebol oli talem olsem: “Long ol prea blong yufala, yufala i no mas talem plante toktok tumas olsem ol hiten man.” (The New English Bible) “Taem yufala i prea, yufala i no mas talem ol toktok we i no gat mining olsem ol hiten man oli mekem.”—Revised Standard Version.

Plante man oli ting se sipos oli talem plante toktok bambae oli tabu moa long fes blong God, mo oli ting se sipos ol toktok long prea blong olgeta i rongud, prea i givim moa ona long God, mo tu oli ting se sipos prea i longfala mo i talem sem samting bakegen, bambae God i ansa long hem. Be God i no jajem prea se i gud no i nogud from hem i longfala no i sot. No gat. I klia se Jisas i no wantem we ol man blong hem oli talem ol sem prea evritaem no lanem ol prea baehat. From samting ya, ?olsem wanem ol bidbid, ol buk blong prea, mo ol wil blong prea oli save givhan long ol man?

Taem Jisas i talem tok ya antap finis, hem i givim wan eksampel blong prea long ol disaepol blong hem—ol man oli savegud prea ya se Prea blong Masta. (Matyu 6:9-13) ?Be hem i wantem se oli talem bakegen ol tok ya evritaem? No gat. Taem Jisas i talem bakegen prea ya wan yia biaen, hem tu i no yusum ol sem toktok. (Luk 11:2-4) ?I gat sam vas long Baebol we oli soemaot se ol Kristin bifo oli talem ol sem toktok long prea no lanem olgeta baehat? No gat.

?Samting ya i min se yumi no save talem sem poen bakegen no askem sem samting long God bakegen? No gat, from we Jisas i talem se: “Taem yufala i wantem samting, yufala i mas stap askem, nao bambae yufala i save kasem, mo yufala i mas stap lukaot, nao bambae yufala i save faenem.” (Matyu 7:7) Samting we yumi wantem, yumi mas askem plante taem bakegen. Olsem nao, Jeova i luk se yumi rili wantem samting ya mo tingting blong yumi i strong long saed ya.

Wan eksampel, bitwin 500 B.K.T. mo 400 B.K.T. i gat wan man i stap kalabus wetem ol man Jyu long Babilon, hemia Nehemaea, wan man we i stap ona long God. Hem i man blong karem ol kap mo dring i kam long king blong Pesia. Taem hem i harem se ol manples blong hem long Judia oli kasem trabol, hem i prea “long dei mo long naet” blong oli save haremgud bakegen. (Nehemaea 1:6) Jeova i harem ol prea blong hem. Jeova i pusum king blong Pesia blong givim raet long Nehemaea blong go long Jerusalem blong stretem bisnes ya. Nehemaea i mekem olsem, ale ol manples blong hem oli haremgud mo from samting ya, oli holem bilif blong olgeta.—Nehemaea 1:3 kasem 2:8.

Olsem Wanem Prea We i Kamaot Long Hat i Givhan

Nating se Jeova i gat olgeta paoa long heven mo wol, be hem i singaot ol “pikinini” blong hem blong prea long hem wetem ful hat blong olgeta. Disaepol blong Jisas, Jemes i talem se: “Yufala i mas kam stap kolosap long God, nao hem bambae i kam stap kolosap long yufala.” (Jemes 4:8) ?Be olsem wanem blong mekem olsem? Yumi mas prea long hem tru long nem blong Jisas. (Jon 14:6, 14) Mo tu Pol i talem se: “Sipos man i no bilif long God, hem i no save mekem God i harem gud. From we sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.”—Hibrus 11:6.

Olgeta we oli gat trabol, mo olgeta we oli mekem sam bigfala sin, oli save askem long God blong hem i halpem mo forgivim olgeta mo bambae hem i save mekem olsem. Jisas i soemaot samting ya long store blong hem long saed blong wan Farisi. Taem hem i prea, hem i talem tangkyu long God from we hem i klin moa long fes blong God i bitim ol narafala. Be wan man blong tekem mane blong takis (we ol man oli no laekem hem mo oli luk hem olsem man blong mekem ol bigfala sin) hem i talem nomo long God se: “Ei God, plis yu sore long mi. Mi mi man nogud.” Tru ya, sot isi prea ya we i kamaot stret long hat blong hem, hem i no ridim long wan buk. Jisas i jajem Farisi ya we i gat tu fes, be hem i talem long saed blong narafala se: “Man we i mekem hem i stap daon, God bambae i leftemap hem.”—Luk 18:10-14.

Ol rabis fasin blong wol ya oli mekem se plante man oli wari mo oli harem nogud long tingting blong olgeta. Plante Kristin man tu maet oli wari se oli no stret long ae blong God. Be sipos yumi prea oltaem long Jeova mo ol prea oli kamaot stret long hat blong yumi, samting ya i save givhan bigwan long yumi. Pol i raetem se: “I nogud yufala i stap tingting tumas from sam samting. Be sipos yufala i sot long wan samting, yufala i mas prea long God from. Yufala i mas askem long hem, mo yufala i mas talem tangkyu tu long hem. Nao pis we God i save putum, hem i bigfala moa, i bitim save blong yumi olgeta. Mo God bambae i putum pis ya long tingting blong yufala, blong lukaotgud long yufala ya we i joen long Jisas Kraes.”—Filipae 4:6, 7.

Kaen prea ya i min se yumi askem strong long God, yumi plis long hem blong givhan long yumi, yumi talemaot olgeta samting we i stap long hat blong yumi olsem wan pikinini we i stap toktok wetem papa no mama blong hem we i laekem hem tumas mo i kasem save long hem. Ol prea olsem oli no kamaot long sam buk, mo oli no prea we man i lanem baehat. Oli kamaot long hat blong man, man we i nidim help mo i rili bilif long Jeova, Man blong “harem prea.”—Ol Sam 65:2, NW.

[Futnot]

[Foto Credit Line blong pija long pej 26]

Drawings of Albrecht Dürer/Dover Publications, Inc.