“Blong No Westem Wan Samting”
Man blong raetem store long Wekap! long Gana i talem store ya
MI MITIM man ya long smol woksap blong hem long Labadi, wan ples long taon ya Akra, hem i stap yusum so mo wokem wud wetem strong paoa. Nem blong hem Adams Akuetteh. Hem i gat 70 yia blong hem mo hem i stap wok olsem wan kapenta long 50 yia finis.
Taem mi askem long hem wanem impoten taem long laef blong hem olsem wan kapenta, kwiktaem nomo hem i talem se ol fo yia we hem i givhan blong wokem wan nyufala hedkwota blong Watch Tower Sosaeti long Nangua, Gana. Hemia long 1984 kasem 1988.
Mi mi askem long hem se: “?Yu yu mekem wanem wok long taem ya?”
Hem i ansa se: “Mi mi mekemrere ol ples blong oli kafsaedem simen long hem, mo mi givhan long ol man we oli putum ruf long ol haos.”
Mi mi talem se: “Ol man oli savegud yu from yu yu lukaot long ol nil long ples blong wokem haos.”
“A yes, ol nil. Yu save, ol nil oli sas long Gana. Taem we mi stap givhan long hedkwota ya, haf kilo nil hem i tu no tri dola. Taswe mi tingting olsem se: ‘?Ating mifala i save yusum sam nil bakegen? Bambae mi traem.’
“Taswe mi stat blong wokem plan blong mi long fri taem blong mi nomo. Taem brata we i lukaot long ol wok i luk mi, hem i glad tumas. Hem i givim wok ya long mi oltaem. Taswe long ol fo yia we mi stap long ples ya, evri moning mi go lukaot ol nil we oli stap olbaot long graon. Mo tu, mi tekemaot ol nil we mi faenem long ol wud we oli yusum finis.”
Mi askem long hem se: “?Yu yu sakem ol nil we oli rosta smol no oli kruked?”
“No gat. Olgeta we oli rosta lelebet mifala i yusum olgeta bakegen long ol wud we i sofsof, no mifala i mekem hol long ol wud we i strong fastaem nao mifala i yusum ol nil ya long hem. Ol nil we oli kruked, mi mi stretem olgeta wetem hama.”
“?Yu yu kam taed long wok ya mo yu les long hem?”
“Ating wan yangfala i save kam taed long hem, be mi, no gat. Brata we i lukaot long ol wok ya i talem long mi se wok blong mi i stap sevem plante mane blong Sosaeti, mane blong Jeova, taswe mi mi haremgud long wok ya. Mi mi glad tumas taem mi luk ol hif blong ol nil long ol defren saes oli stap kam bigwan. Oltaem mi tingting se: ‘!Aha! !Naoia ol man blong putum ruf oli no wet long mi!’ Be afta ol hif oli godaon. !Naoia ol man blong wokem ruf oli singaot long mi blong mi givim moa nil long olgeta! Ale mi spid bakegen blong faenem sam moa nil.”
“?Naoia we wok ya i finis yu yu stap mekem wanem?”
“Mi mi wok olsem wan fultaem paenia bakegen, mi stap wet blong givhan blong bildim hedkwota blong Gana i kam bigwan moa. Ale bambae mi stap bakegen, blong lukaot ol nil mo sevem moa mane—wetem fasin glad.”
Long ol fo yia ya brata ya i mekem wok we plante man oli ting se i nating nomo. Be Adams Akuetteh, “man blong stretem ol nil long hedkwota long Gana,” neva hem i tingting olsem. !Hem i glad tumas we hem i save faenem ol nil ya mo mekem se oli yusum bakegen blong sevem mane blong Jeova!
Jisas tu i tingting olsemia. Hem i naf blong mekem merikel blong givim bred bitim mak long ol man, be wan taem afta we oli kakae finis, hem i talem se: “Yufala i go tekem ol hafkakae ya we i stap. I nogud oli lus.”—Jon 6:12.
[Tok blong pija long pej 31]
Adams Akuetteh, “man blong stretem ol nil long hedkwota long Gana”